Pa Januwale 27, 2021, * luŵala lwa magambo lwa Nadezhdinskiy lwaluli mu dela ja Primorskiy chilupeleche chigamulo pa magambo ga M’bale Vladimir Filippov. Jwalakwe chakatame mu ukayidi kwa yaka 6 ni hafu.

Vladimir Filippov

• Chaka chakupangwa: 1943 (Mu msinda wa Oktyabrskiy, Novosibirsk)

• Mbili jakwe: Baba ŵakwe ŵajasiche pa ngondo jaŵili jwalakwe ali asigele panandi kupagwa. Mu 1964 jwamalisisye majiganyo ga sukulu ja usilikali ku Tomsk Artillery. M’chaka cha 1967, jwalakwe jwalombele jwamkongwe lina lyakwe Lyubov. Jwalakwe jwakamwile masengoga kwa yaka yakwana 27

  Ŵamkwakwe ŵatandite kulijiganya Baibulo m’chaka cha 1994. Pali pagambile kupita kandaŵi nombe najo jwatandite kulijiganya. Jemanjaji ŵabatisidwe m’chaka chakuyichisya

Mu Ogasiti 2017, achakulungwakulungwa ŵa boma ŵatandite kwambula mwachinsisi maloŵe soni mafidiyo gakwayana ni M’bale Filippov soni abale ŵane ŵa ku Razdolnoye. Kwa miyesi jejinji, achakulungwakulungwaŵa, ŵaŵele ali mkwambula maloŵe ga m’bale Vladimir ali mkuŵecheta pa misongano ja mpingo soni ali mkwalalichila ŵane.

Pa Julayi 19, 2018, kagulu ka asilikali ŵa FSB, ŵakopochele pa nyumba ja m’bale Filippov. Kaguluka kawete masiki soni kajigele wuti. Jemanjaji ŵamputile Vladimir kungope ni kumkanganichisya kuti agone pasi. Kaneko ŵamtaŵilile makono kunyuma ni kutanda kuwungunya m’nyumba mwakwe. Pandaŵiji, m’bale Vladimir jwaliji ali akwete yaka 75. Nyumba ja m’baleju, jawungunyidwe maulendo gaŵili, mu Ogasiti 2019 soni mu Januwale 2020. Paulendo waŵiliwu, ŵakuwungunyaŵa ŵamsalile m’baleju kuti ali jwakulemwa.

Tukumŵenda Yehofa kuti apitilisye kwapa machili abale ni alongo ŵakusimana ni yakusawusya ni chakulinga chakuti apitilisye kola chikulupi soni kuŵa ŵakusangalala.—Yesaya 40:29, 31.