Luŵala lwine lwa magambo (Furmanovsky City Court) lwaluli mu upande wa lvanovo mpaka lulamule magambo ga M’bale Yevgeniy Spirin mkanipayiche pa Julayi 14, 2020. Ŵakwimila boma pa magamboga aŵendile kuti M’bale Spirin atame mu ukayidi kwa yaka 7.

M’bale Spirin akwete yaka yakwana 34. Jwalakwe akwimbidwa magambo gakuti ni jwakusalongolelaga yakutendekwa ya kagulu kele boma ja Russia jikusati kali ka ŵandu ŵakwimuchila boma. Magambo ga m’baleju gatandite pa Januwale 21, 2019. Ŵawagatandisye magamboga ali jwakuwunguya ya magambo jwa mu bungwe ja Federal Security Service (FSB). Pali pagambile kumala masiku 6 ŵa bungweji ŵapite kukuwungunya kunyumba ja M’bale Spirin. Mbaleju ali jwamlombele soni ŵamkwakwe lina lyawo lili Natalya. Luŵala lwa magambo lwa ku Oktyabrsky lwaluli mu upande wa Ivanovo lwalamwile kuti M’bale Spirin asunjidwe m’ndende kwa miyesi jiŵili ligongo lyakuti jwaliji jwa Mboni sya Yehofa. Kaneko masiku gakutama mu ndendemu wagajonjechesye.

Jwalakwe ŵamkopwesye pa Julayi 5, 2019 ali atemi m’ndende kwa masiku gakwana 160. Nambo ŵamlamwile kuti chaŵe pa ukayidi wangatyoka panyumba. Pa Disembala 8, 2019, luŵala lwa magambo lwa Oktyabrsky lwaluli mu upande wa Ivanovo lwalamwile kuti M’bale Spirin agopoledwe pa ukayidi wangatyoka panyumba. Luŵalalu lwalamwile yeleyi atamose kuti ŵakuwungunya ya magambo ŵala nganakamulana nayo. Luŵalalu nganilujonjechesyasoni yilango yine.

Tukupopela soni tukwete chikulupi chakuti Atati ŵetu ŵachinonyelo Yehofa chapitilisye kwakamuchisya abale ni alongo ŵetu ku Raussia ŵakulagasidwa ligongo lya chikulupi chawo.—1 Petulo 4:14.