Achakulungwakulungwa ŵakusalolela malo gakusatendela ŵandu misongano, ŵayamichile ŵa Mboni ku South Korea ligongo lyakulinganya kuti chatende msongano wawo wa 2020 kupitila pa intaneti, mmalo mwakutendela ku sitediyamu jekulungwa. Jemanjaji atuyamichile ligongo lyakutenda yindu pakusaka kwachenjela ŵandu kuyilwele yampaka apelegane naga ali asongene malo gamo. Soni kuti tukusatenda yeleyi kwineku tuli mkulolechesya kuti ŵandu akupochela majiganyo gausimu. Mbiya syosope syatwalipilile maloga ŵatuwuchisye.

Jwakulolela malo gane ku Seoul jwatite: “Ŵa Mboni sya Yehofa atesile yindu mwalunda. Tukusanonyela mnope jemanjaji. Uneji ngangumanyilila naga pana mpingo wine wawukusatenda yindu mpela ŵa Mboni.” Jwapitilisye kuti: “Ŵa Mboni sya Yehofa akusatenda yindu mwangalinonyela. Tudandawile mnope kuti chaka achino ngatendela msongano wawo pamalo getu. Nambo tukukulupilila kuti chachikamulichisyasoni masengo malo getuga kusogoloku.”

Jwakulolela malo gane ku Suwon jwatite: “Ndaŵi syosope ngusasangalala ni ŵa Mboni sya Yehofa, ŵele kwa yaka 35 aŵele ali mkugachimbichisya maloga soni kugakamulichisya masengo mpela gawo. Nambo apano ngusangalalasoni mnope ligongo jemanjaji akutenda yakomboleka pakukuya matala gakusala ŵa boma gakwamba matala gakuŵambalila kuwanda kwa ulwele wa COVID-19. Sangalele mnope ligongo lyakutenda yindu mwakwaganichisya ŵane. Ngwembecheya mwachidwi kwawonasoni jemanjaji chaka chachikwisachi.”

Jwamkulungwa jwine jwakusakamula masengo paluŵala lwa ndege lwaluŵandikene ni malo gakutendela msongano jwatite: “Mu 2018 soni mu 2019, twayiweni kuti ŵa Mboni sya Yehofa ali ŵadongosolo, soni akusatenda mwachitema yindu yaŵendedwe. Yatesile jemanjaji pakwimika kuti akatenda msongano pamalo ga ŵandu ŵajinji, yikulosya kuti jemanjaji akusiŵaganichisyaga ŵane. Yeleyi yisangalesye mnope.” Jwasasilesoni kuti: “Yindu yikaliji chenene yikaŵe kuti ŵandu wosope ali mpela ŵa Mboni.”

Ŵakutumichila ŵa Yehofawe, tukusaŵa ŵakusangalala ligongo lyakuti tukusalijiganya yampaka tutende kuti tutameje mwakamulana soni mwamtendele ni ŵane mundaŵi jakusawusyaji.—Mateyu 22:39.