Pachangakaŵapa luŵala lwamagambo lwa asilikali lwa ku Tajik chilusale naga M’bale Rustamjon Norov ali jwakulemwa kapena iyayi. Jwalakwe mpaka akatame ku ukayidi kutandila ni yaka yiŵili mpaka msano. M’baleju akumjimba magamboga ligongo lyakukana kwinjila usilikali ligongo lya yikulupi yakwe. Jwalakwe aŵele ali kumsunga mu ukayidimu kwembecheya kuti amjimbe magambo kutandila pa Okotoba 1, 2020.

Rustamjon Norov

• Chaka Chiŵapali: 1998 (Dushanbe)

• Mbili ja Umi Wakwe: Aŵele ali mkukamula masengo ga kulinganya nyumba syejonasiche soni kuswejesya mipando pakusaka kuti apateje yakusosechela ya liŵasa lyakwe. Akusanonyela kuputa mpila

• Ŵabatisidwe mu 2016 ali akwete yaka 17. Pali pamasile yaka yiŵili jwalakwe jwasamile mu mpingo wakumangwakwe wa chiŵecheto cha Chilasha ni kwawula ku dela ja ŵandu ŵakuŵecheta Chitajiki. Jwatesile yeleyi ni chakulinga chakuti ŵakamuchisye ŵandu kulijiganya Baibulo.

M’chaka cha 2016, M’bale Rustamjon Norov ŵapite ku ma ofesi ga asilikali ni chakulinga chakuti akasalile kuti jwalakwe nganaŵa ajinjile usilikali, nambo yili yakomboleka kumpa masengo gane gangakwayana ni usilikali. Mu 2017 jwapitesoni kukwasalila nganiji. Jwamkulungwa jwine jwa maofesiga jwayamichile soni kuchimbichisya yaŵaŵechete M’bale Norov. Ligongo lya yeleyi, kwa yaka yitatu, M’bale Norov nganam’ŵilanga kuti akajinjile usilikali.

Nambo pa Sepetemba 24, 2020, ofesi ja asilikali jam’ŵilasile. Mwamti ŵamwusisye yiwusyo kwa maawala gatatu. Kaneko achakulungwaŵa ŵayiweni kuti yili yangapikanika kuti M’baleju akajinjila usilikali. Chamti myoyo, ŵamkanganichisye kuti ajawule kwa madokotala kuti akampime ni chakulinga chakuti alole naga ali jwakuŵajilwa usilikali. Nambo babagwe M’bale Norov ŵayimanyi yayatendekwagayi, mwamti ŵaŵendile achakulungwakulungwaŵa kuti nganiji ajijawusye kwa ŵandu ŵakumanyilila ya malamusi.

M’bale Norov ni babagwe ŵala ŵapite ku maofesi ga ŵakumanyilila malamusi pa Okotoba 1. Achakulungwakulungwa ŵakumanyilila ya malamusiŵa ŵaŵendile kuti jwapolisi ŵapechesye ŵanduŵa ku maofesi ga asilikali kula. Nambo ali ayiche kumalo kula, babagwe M’bale Norov, nganiŵakunda kuti ajinjile. Mmalomwake, M’bale Norov ŵamkamwile ni mkusunga kwa masiku gaŵili. M’baleju pangali pamjimbile magambo mpela gelega. Kwa masiku gaŵili gaŵamsunjile gala, nganamkunda m’baleju kuti awonegane ni loya jwakwe.

Pa Okotoba 2, M’bale Norov, ŵamsamichisye kudela jine jakusatamaga asilikali ku Khujand. Delaji jili palutando lwa makilomita 300 kutyochela kumangwakwe ku Dushanbe. Kwa masiku gane gaŵili ŵamsamichisye mmalo gane gakusatamaga asilikali mu dela jijiji ja Khujand.

Pa Okotoba 6, M’bale Norov ŵamkundile kuti ŵajimbile foni ŵachibale ŵakwe soni kuti loya jwakwe mpaka ayiche kukumlola. Nambo pa Okotoba 17, luŵala lwa magambo lwa asilikali lwa ku Tajik lwalamwile kuti M’baleju ajawule ku ukayidi pakwembecheya lisiku lyakumjimba magambo. Jwalakwe chatame ku ukayidiku mpaka pandaŵi jele luŵala lwamagambo luchilamula magambo gakwe. Pandaŵijisoni luŵalalu chimlimwungunyeje m’baleju. M’bale Norov akumjimba magambo gakuti ŵachenjile panepakwe mu yikalata yakwe yakuchipatala ni chakulinga chakuti akajinjila usilikali.

Atamose kuti jwalakwe ali mu ukayidi, nambope ngakutenguka soni akwendelechela kumdalila Yehofa. M’baleju akumyamichila Yehofa ligongo lyakuti akumkamuchisya kola chikulupi chakulimba chachikumkamuchisya kuti apilileje yakusawusya yakweyi. Jwalakwe akuyamichilasoni ligongo lya yakusawusya yaŵasimene nayo mu 2013. M’chakachi, achakulungwakulungwa ŵamkanganichisye jwalakwe yalumo ni mpwakwe (Ravshan) paŵaliji kusukulu kuti ajawule ku malo gakusalembela masengo asilikali. Chakulinga chawo chaliji chakuti ŵachipatala akapime jemanjaji naga akuŵajilwa masengogo. Pandaŵiji Rustamjon jwakwete yaka 15. Yakayi yaliji yamnono yakuti mundu ngaŵa mkwinjila usilikali. Konjechesya pelepa Rustamjon ŵaliji jwakulalichila jwangabatisidwa. Yili yitendekwe yeleyi, baba ŵawo anyamataŵa, Che Batyr, ŵalinganyisye yakuti amalileje ndaŵi jejinji pakulambila kwa peŵasa ni chakulinga chakwakamuchisya anyamatawo kuti apakomboleje kulichenjela pangani syakwayana ni kwinjila usilikali. Pakulambila kwa peŵasaku, babaŵa ndaŵi syejinji ŵaliŵanichisyaga mpela msilikali jwakwalemba ŵane masengo ga usilikali. Ni anyamataŵa ŵalosyaga yampaka atende pakulichenjela.

Jumo mwa anyamataŵa (Rustamojon) ŵasasile kuti, “Mkanitutande kutenda yeleyi pakulambila kwetu kwa peŵasa, naganisyaga kuti naliji jwakoseka kuchenjela chikulupi changu. Nambo patwatendega yeleyi pakulambilapa, ni panayimanyi kuti mpaka ndende woga mnope. Yeleyi yangamuchisye kumanyilila kusosekwa kwa kupopela ni chakulinga chakuti namkulupilileje mnope Yehofa soni kulijiganya yejinji yakungamuchisya kola chikulupi chakulimba kuti ngajinjila masengo ga usilikali. Woga ula watandite kumalila panandipanandi.” Chakundanda kwa chaka cha 2016 nalipeleche kwa Yehofa soni nabatisidwe.”

Chine chachimkamuchisye Rustamjon chili kunguluka ni abale ŵachikulile ŵakulimba mwausimu ŵaŵatemi mu ukayidi ligongo lya chikulupi chawo. Jwalakwe jwasasilesoni kuti, “Ngumanyilila kuti naga ngangwinjila masengo ga usilikali, nikuti mpaka simane ni yakusawusya. Naga ngwawula ku ukayidi, nguwuwona kuŵa upile wakuti ngamchimbichisye Yehofa ndili mu dela jine jakulalichilila.”

Babagwe M’bale Rustamjon, ŵatite, Liŵasa lyetu likumyamichila Yehofa pakutuchimbichisya kuti tutendeje yakusaka soni kuti tuŵe yida m’miyala mwakwe. Kwa abale ni alongo ŵetu, tukuti, ‘sikomo kwejinji pakutulosya chinonyelo, kutupopelela soni pakutukamuchisya kuti tukajasa mtima soni kuti tuŵe paunasi wakulimba ni Yehofa.’ Ngatukudandawula. Mwakamulana ni yakusatusimichisya Yehofa m’Maloŵe gakwe, mitima jetu jigumbele ni mtendele.”—Afilipi 4:6, 7.