Pa Ogasiti 6, 2020, luŵala lwa magambo ku Turkmen, lwalamwile kuti M’bale Eldor soni Sanjarbek Saburov, atame mu ukayidi kwa yaka yiŵili ligongo lyakuti ŵakanile kwinjila usilikali. Jemanjaji ŵakanile kwinjila usilikali ligongo lya yindu yakusakulupilila. M’bale Eldor akwete yaka 21, pele m’bale Sanjarbek akwete yaka 25. Luŵala lwa magambolu, lwakanile yakuti abaleŵa akatende apilo nganiji. Keleka kali kaŵili abaleŵa kwimbidwa magambo gakukana kwinjila usilikali.

Mu 2016, M’bale Sanjarbek Saburov mwauchimbichimbi, ŵakanile kwinjila usilikali. Ligongo lya yeleyi, ŵamjimbile magambo soni ŵamlamwile kuti akasakasasoni lilamusili soni kuti chamloleleje kwa yaka yiŵili.

Chaka chakuyichisya, mpwakwe jwa m’baleju lina lyakwe Eldor, nombe najo jwakanile kwinjila usilikali. Ligongo lyakukanaku luŵala lwamagambo lwalamwile kuti boma chijimkateje mbiya syakusapochela pa masengo gakusakamula.

Mwakamulana ni lilamusi lya chilambo cha Turkmen, naga mundu akukana kwinjila usilikali pa ulendo waŵili panyuma pakuti pa ulendo wandanda ŵakanilesoni, ni pakusampa chilango chamachili. Mwesi wa Epulo 2020, abaleŵa ŵapochelesoni utenga wakuti ajinjile usilikali. Nambo abaleŵa ŵakanilesoni. Ligongo lyakukanaku, jemanjaji ŵajimbile magambo mwamti ŵalamwile kuti akatame mu ukayidi.

Achinangolo ŵa abaleŵa ali ŵachanasa soni akulaga nganisyo ligongo lyakuti ŵanache ŵawo ŵaŵisile mu ukayidi. Yeleyi chiyitendekasye kuti achinangoloŵa asoŵeje chikamuchisyo. Baba ŵa abaleŵa akusalaga ni ulwele wa mgongo, yayikusatendekasya kuti yiŵeje yakusawusya kukamula masengo chenene. Ŵanacheŵa ni ŵaŵakamuchisyaga achinangoloŵa. Ŵatendega yeleyi mwakukamula masengo gakulima litonji. Myoyo ligongo lyakuti jemanjaji ataŵidwe, nikuti chiŵeje yakusawusya kwa achinangoloŵa kupochela chikamuchisyo pa yakusosechela yawo. Mmalo mwakwe achinangoloŵa ni ŵachasosekweje kwapatila ŵanacheŵa yakusosechela ya paumi.

Chilambo cha Turkmen changapa ŵandu masengo gane naga akanile kukamula masengo ga usilikali. Myoyo ligongo lya yeleyi abale ŵachinyamata pakanile kwinjila usilikali ligongo lya chikulupi chawo, akusiŵaŵika mu ukayidi kwa chaka chimo kapena yaka mcheche. Kupwatika pa m’bale Saburov, ku ndende ja ku Turkmen kwanasoni ŵa Mboni ŵachinyamata ŵakwana 10 ŵele ŵaŵisile mu ukayidi ligongo lyakana kwinjilila usilikali.

Ngatukukayichila kuti Yehofa chiŵakamuchisye abale ŵetu ŵali mu ukayidi ku Turkmen ligongo lyakulimba mtima kwawo. Tukwaŵenda abaleŵa kuti akaliŵalila yaŵasasile Mlungu kwa Mwenye Asa yakuti, “Jemanja mkwenela kulimba mitima ni kulimbichila, ligongo timchipochela mbote pa masengo gimkutendaga.”—2 Mbili 15:7.