David Petrosov akwete yaka 19. Jwalakwe akusatama m’chilambo cha Turkmenistan. Atamose kuti m’baleju ali jwachinyamata, nambo asimene ni yindu yampaka yilinje kulupichika kwakwe. Jwalakwe atemi mu ukayidi kwa chaka chimo ligongo lyakana kwinjila usilikali. M’baleju ŵamkopwesye mu ukayidi pa Sepetemba 30, 2020.

M’bale Petrosov jwaŵechete kuti, “Panaliji mu ukayidi, naŵaga jwachanasa kwa masiku gane. Nambope Mlungu jwalimbikasyaga kupitila m’Maloŵe gakwe. Kumanyilila kuti Mlungu akumanyilila mwangupikanila soni ali jwakoseka kungamuchisya, yandendekasisye kuti mbopeleje kwa jwalakwe. Pana malemba gejinji gagangamuchisye pandaŵiji. Nambo ndaŵi syejinji ngusakumbuchila lilemba lya Afilipi 4:13.”

M’bale Petrosov jwapagwile mumsinda wekulungwa wa Ashgabat ku Turkmenistan. Pajwakulaga jwalijiganyisye kwimba gitala. Jwalakwe akusanonyela kulemba nyimbo, kwawula ku malo gane kukunguluka, kwawula kwitumbi soni maseŵela ga kung’ambila m’nyasa.

M’baleju jwalijiganyisye Baibulo ni mjakwe juŵaliji jwa Mboni sya Yehofa jwele jwalijiganyaga najo kalasi jimpepe. Panyuma pakulijiganya, jwalakwe jwabatisidwe mu 2019. Atamose kuti mu liŵasa lya David wosope nganaŵa ŵa Mboni sya Yehofa, nambope akusachimbichisyaga yakusakulupilila M’baleju pakwamba Mlungu.

Panyuma pakubatisidwa, David ŵamjigele ni kumjawusya ku koti ligongo lyakuti jwakanile kwinjila usilikali. M’chilambo cha Turkmenistan changapa ŵandu ufulu wakusagula kamula masengo gane naga akanile kwinjila usilikali. Myoyo achakulungwakulungwa ŵalamwile kuti atame mu ukayidi kwa chaka chimo.

Pandaŵi ja ukayidi wakwe, Yehofa ŵamkamuchisyaga M’bale Petrosov. Jwalakwe jwasasile kuti, “Panaliji mu ukayidi, mayi ŵangu ŵambaga moni wakutyochela kwa abale ni alongo ŵanganakombolaga kwika kukundola.” Mayiŵa ŵasalile kuti, “Abale ni alongo ŵampopelelaga mwangalechesya. Yeleyi yandendekasyaga kuti mbeje jwakusangalala.”

Mwakamulana ni lilamusi lyalili ku Turkmenistan, David akumanyilila kuti mpaka amlamulesoni kwinjila usilikali. Naga mundu akukana kupikanila lilamusili, mundujo akusamjimba magambo soni akumsalamula kuti akatame ku ukayidi kwa yaka yejinji.

David jwaŵechete kuti, “Mpela mwayikusaŵela ni jwalijose, ngangusaka kuwujilasoni ku ukayidi. Nambope nganingola woga. Chachikungamuchisya kuti mbeje jwakulimba mtima chili chikulupi changu pa Yehofa, abale ni alongo soni nyimbo sya Uchimwene.”

Tukukulupilila kuti Yehofa chapitilisye kumlimbikasya M’bale David. Tukwapopelelasoni abale ŵetu 10 ŵalipe mu ukayidi ku Turkmenistan ligongo lyakukana kwinjila usilikali. Tukumanyilila kuti Yehofa akusiŵanonyela, kwakumbuchila soni kwakamuchisya.—Salimo 69:33.