M’bale Selim Taganov ali amkopwesye mu ukayidi pa Okotoba 3, 2020, jwaŵechete kuti, “Pambopesile kwa Yehofa, jwalakwe jwangamuchisyaga kuti mbe jwakusimana mtima.” Selim akwete yaka 19. Jwalakwe atemi mu ukayidi kwa chaka chimo ligongo lyakuti yakusakulupilila yangamkunda kuti ajinjile usilikali.

Selim jwapagwile ku Ashgabat mu msinda wa Turkmenistan wawuli likulu lya chilambocho. Paŵaliji jwachinandipile, jwalakwe jwaliji mwanache jwalunda soni jwatandite kunonyela kwimba nyimbo. Jwalakwe akusalembaga nyimbo, kusijimba soni akusajimbaga gitala. Achinangolo ŵakwe, ŵachibale ŵakwe soni achimjakwe ŵasasile kuti Selim ali mundu jwakwaganichisya ŵane, jwakuwusimana mtima soni jwakusangalala. Mwamti loya juŵamjimilaga M’bale Selim pamagamboga ŵasasile kuti, “Ali mnyamata jwambone. Jwalakwe jwangakwembaga kapena kumwa ukana soni agambile kumalisya kwene majiganyo ga ku sekondale. Myoyo kumŵika mu ukayidi chikugambe kumjonanga jwalakwe.”

Umi wa mu ukayidi ŵaliji wakupweteka mnope. Mwamti jwalakwe jwatite, “Unasi wangu ni Yehofa ulimbile mnope ligongo lya ndaŵi jindemi mu ukayidi. Ngusakumbuchila yanalijinganyisye m’Baibulo mkanaŵe kundaŵa, mwamti natandite kuyipikanichisya chenene. Lilemba lingusalikumbuchila lili lya Yesaya 41:10, 11. Lilembali lyangamuchisye mnope.

“Panaliji pa malo gakusunjila ŵandu ŵakwembecheya kwawula ku ukayidi, yaliji yakusawusya kupata mundu jwakuti namsalile yakusawusya yangu. Nambo kaneko napopesile kwa Yehofa kuti angamuchisye. Panyuma pakupopela, achikayidi soni ŵakulolela akayidi ŵaŵalagasyaga, ŵatandite kungamuchisya soni kulimbikasya. Yeleyi yalosisye kuti Yehofa akungamuchisya.”

Abale ni alongo ŵamlimbikasyagasoni M’bale Selim. Jwalakwe jwatite, “Panaliji mu ukayidi, abale ni alongo ŵajinji ŵambaga moni soni mfundo sya m’Baibulo syakulimbikasya. Najinjisyaga pamtima mfundosi kuti nasikumbuchileje. Kutenda yeleyi kwangamuchisyaga mnope.”

Mwakamulana ni malamusi ga ku Turkmen, M’bale Selim mpaka amŵendesoni kuti ajinjile usilikali. Naga yeleyi yili yitendekwe, Selim akumanyilila kuti mpaka atame mu ukayidi kwa ndaŵi jelewu. Atamose yili myoyo jwalakwe jwatite, “Pakuŵa Yehofa angamuchisye kuti mbilile yakusawusya, apano woga umalile, mwamti ngangogopasoni yakusawusya yiliyose yampaka simane nayo kusogoloku. Chikamuchisyo chakusapeleka Yehofa chikusangamuchisya kuti mbeje jwakulimba mtima.”

Wosopewe tukumanyilila kuti chitusimane ni yakusawusya kusogoloku. Nambope M’bale Selim akutulimbikasya kuti, “Ŵachasimane ni yakusawusya mpela yeleyi, akusosekwa kukumbuchila maloŵe gakusimanikwa pa Yesaya 30:15 [NWT] gagakusati, ‘Chimchikolasoni machili naga mkutenda yindu mwakuwusimana mtima.’”