M’bale  Eziz Atabayev ŵamlamwile kuti aŵichidwe mundende ku Turkmenistan kwa yaka yiŵili, ligongo lya kukana kwinjila usilikali. Nambope jwalakwe jwapitilisyepe kuŵa jwakulupichika. Kaneko ŵamkopwesye pa Disemba  19, 2020. M’chilambochi kwa yaka 10 yipiteyo, abale ŵakwana 46 ŵaŵichidwe mundende ligongo lya chikulupi chawo.

Mu 2016, M’bale Atabayev ŵamkanganichisye kuti akakamuleje masengo ga usilikali. Nambo jwalakwe jwakanile masengoga ligongo lya chikulupi chakwe. Kaneko nganiji japite ku ofesi ja ŵakwimila boma pamagambo. Pali papitile yaka chiŵandika yiŵili, ngani ja m’baleju japite ku luŵala lwa magambo. Pa Disemba 19, 2018 ŵamsalile kuti akatame yaka yiŵili kundende.

M’bale Atabayev jwasasile kuti, “Mkaninjawule kundende nakungulukaga ni abale ŵaŵasimene ni yakusawusya ligongo lya kukana usilikali kapena ŵakuti pakwete patemi mundende ligongo lya kukana masengo gelega. Naŵalangaga m’mabuku getu ngani syakusala ya mbili ja ŵandu ŵane. Naŵalangagasoni malemba gakulimbikasya.

“Kundaŵi kwa lisiku lyakwimbidwa magambo, m’bale jwine ŵambalanjile lilemba lya Yesaya 30:15. Lilembali likusati, ‘Chimchikolasoni machili naga mkutenda yindu mwakuwusimana mtima, soni naga mkulosya chikulupi.’ Lilembali lyangamuchisye kuti mbeje jwakuwusimana mtima soni namdalileje Yehofa pa chilichose. Nambosoni kuganichisya lilembali kwangamuchisye kuti mbilileje pandaŵi josope jinaliji mundende.”

Atamose kuti umi waliji wakusawusya mnope, chindu chachaliji chakupweteka mnope kwa M’bale Atabayev chaliji kulekangana ni ŵamwiŵasa mwakwe. Nambope jwalakwe jwatite, “Panaliji mundende nakamulanaga mnope ni achimjangu ŵa Mboni sya Yehofa ŵaŵali mundendemo. Jemanjaji ŵaliji achimjangu ŵasyesyene soni ŵangamuchisyaga kuti malaneje ni lipowo ligongo lyakwasoŵa ŵamwiŵasa mwangu soni achimjangu.”

M’baleju ali mundende jwalalichilagasoni. Jwalakwe jwatite, “Pandanda pene, achikayidi ŵane nganasangalala pangwasalila ŵandu ŵane yangusakulupilila. Mkupita kwandaŵi ŵandu ŵane ŵaŵakanaga kwalalichila ŵatandite kupikanila. Nombe nawo achikayidi ŵaŵagambile kwika kwene nganasangalalaga pangulalichila. Nambope achikayidi ŵaŵayiche kalakala soni ŵakuti pakwete panalalichile, ŵanjenjelaga nambosoni ŵalondechesyaga achikayidi ŵasambanowo yindu yiŵalijiganyisye.”

Pakusaka kukosechela chenene yakulingwa yamsogolo, M’bale Atabayev jwatite, “Ngwalimbikasya achimjangu kuti alijiganyeje pajika soni kupopela kwa Yehofa mwagopoka. Amsalileje yosope yakusimana nayo, atamosesoni yine yayikwatesya woga. Tugambe kuti yosope.

“Yehofa ŵangamuchisye kupilila chakulingwa chelechi. Ngangukayichila ata panandi kuti jwalakwe chachingamuchisyasoni kusogoloku. Apano ngangogopa chakulingwa chilichose champaka simane nacho.”—Salimo 118:6.