Pa Febuluwale 24, 2022, asilikali ŵa chilambo cha Russia ŵajinjile m’chilambo cha Ukraine kukuputa ngondo. M’chilambo cha Ukraine, mwana ŵa Mboni sya Yehofa ŵakupunda 129,000. Ligongo lya ngondoji, ofesi ja nyambi jilinganyisye yakuti paŵe makomiti 27 gakuti gapelecheje chikamuchisyo kwa abale ni alongo ŵetu. Konjechesya pelepa, abale ni alongo ŵa m’chilambochi akutendasoni yiliyose yampaka akombole pakukamusyangana jwine ni mjakwe. Jemanjaji akwakamuchisyasoni ŵandu ŵane ŵanganaŵa ŵa Mboni sya Yehofa.

Atamose kuti abale ni alongo ŵetu ŵajinji akupitilisyape kutama m’chilambochi, nambo ŵane asagwile yakwamba kutilila m’yilambo yine. Abale ni alongo ŵaŵatilagaŵa ŵatemi m’misele ja ŵandu ŵakutila ngondo. Misele jine jaliji jelewu makilomita 30 mwamti ŵasosekwaga kulindilila kwa masiku gatatu kapena mcheche kuti akayiche pa maofesi ga boma gagakusalolelaga yindu yayikukopoka soni kwinjila m’chilambocho. Ligongo lya yeleyi, abale ni alongo ŵane ŵa m’chilambochi ŵatandite kwawungunya abale ni alongo ŵaŵaliji pa misele jakopoka m’chilambocho ni chakulinga chakuti ŵape yakulya soni mesi, kapenasoni kwakamuchisya m’matala gane. Paŵayiche m’yilambo yiŵatililagayo, abale ni alongo wa m’yilamboyo ŵapochele achimjawoŵa ni yikwangwani yelembe kuti jw.org. Abale ŵa m’yilamboyo ŵakosechele kwalimbikasya soni kwakamuchisya achimjawoŵa.

• Yakutesya chanasa yili yakuti pakwikanaga pa Malichi 1, 2022, m’bale jwine mu msinda wa Kharkiv ŵawulajidwe soni ŵamkwakwe ŵawulele mnope ni mabomba gaŵagawulisye asilikali

• Alongo ŵanesoni ŵatatu ŵawulele.

• Abale ni alongo ŵakupunda 5,000 atisile m’nyumba syawo

• Nyumba siŵili syagumulidwe

• Nyumba sitatu syajonasiche mnope

• Nyumba 35 syajonasiche panandi

• Nyumba sya Uchimwene siŵili syajonasiche

• Abale ni alongo ŵajinji akutama ali ŵangali magesi, ma telefoni soni mesi

• Abale atamilikasisye makomiti 27 gakamuchisya pajitendekwe ngosi ku Ukraine

• Makomitiga gakamuchisye abale ni alongo ŵakwana 867 kupata malo gambone gakutama

• Makomitiga gakupelekasoni chikamuchisyo mpela yakulya soni mesi

Yiŵalanjiloyi yili ya lipoti lyandanda.

Tukumŵenda Mlungu kuti apitilisye kwapa lunda soni umanyilisi abale ni alongo ŵetuŵa kuti apilile yakusawusya yangayijembecheyayi soni kuti alosyaneje chinonyelo jwine ni mjakwe.—Misyungu 9:10; 1 Atesalonika 4:9.