Lyamcheche pa Disemba 17, 2020, Luŵala Lwekulugwa Lwakulola ya Ufulu wa Ŵandu ku Europe (ECHR), lwapeleche chigamulo chambone pa magambo ga M’bale Tretiak ni chilambo cha Ukraine. Ŵandu ŵatatu ŵamputile M’bale Tretiak pa Nofemba 26, 2013 paŵatyochelaga kukulalichila kwawula kumangwakwe. Luŵalalu lwalamwile kuti achakulungwakulungwa ŵa boma ja Ukraine, ŵalepele kuwungunya chenene magamboga nambosoni kuti ampe mbiya syakwana madola 9,100 sya ku America.

M’bale Tretiak ŵamputile mnope mwamti jwamasile mwesi wamtundu ali m’chipatala. Kutyochela pa lisiku liŵamputile m’baleju, pamasile miyesi jitatu kuti ŵapolisi atande kuwungunya nganiji. Ŵapolisiŵa, ŵasasile kuti nganamanyililaga yakuti m’baleju jwawulele mnope. Nambosoni ŵakanile kuti m’baleju ŵamputile ligongo lyakuti ali jwa Mboni sya Yehofa. Kaneko ŵapolisiŵa ŵalamwile kuti ŵandu ŵatatu ŵala nganapalamula magambo gekulungwa. Mwamti mwa ŵandu ŵatatuwo, ŵagambile kumjimba magambo mundu jumo. Nambosoni paŵamjimbaga magamboga, jwaliji ali atilile m’chilambo chine. Ŵandu ŵaŵili ŵaŵamputilewo, ni ŵaŵaŵele mboni pa magambo gakwego. Jumo mwa ŵanduŵa jwaliji jwapolisi. Pangali jwalijose juŵapochele chilango. Yindu yeleyi soni yine yangali chilungamo, ni yayamtendekasisye M’bale Tretiak mu 2015, kutenda apilo magambo gakwe ku Luŵala Lwekulungwa lwa Magambo lwa ku Europe.

Luŵala lwekulungwalu, lwapeleche chigamulo chakuti, “achakulungwakulungwa ŵa boma ja Ukraine nganawungunya chenene ya yindu yangasa yaŵamtendele M’bale Tretiak.” Yaŵatesileyi yikutindana ni lilamusi lyaŵakamulene pa Msongano Wakulola ya Ufulu wa Ŵandu ku Europe.

Tukukulupilila kuti chigamulo chelechi, chichakamuchisye abale ni alongo ŵetu ŵa ku Ukraine soni yilambo yine kuti atendeje yindu mwa ufulu. Tumkuyamichila mnope Yehofa ligongo ni jwatendekasisye kuti magamboga gajende mwachilungamo.—Malilo 3:59.