Kutyochela pa Julayi 23 mpaka pa 31, ŵakulalichila ŵa ku Ukraine soni atamose ŵatilile m’yilambo yine, abatisidwe pa msongano wa 2022 wa mtwe wakuti “Tulinjeje Kutama Mwamtendele.” Pakwikanaga pa Ogasiti 2 ŵandu ŵakwana 1,113 abatisidwe ku Ukraine. M’bale jwine jwa ku Ukraine jwasasile kuti, “Atamose ngondo ngaŵa mkulekasya masengo ga kulalichila. Pajatu Yesu jwasasile kuti, ‘Une ndili ni jemanja masiku gosope.’”—Mateyu 28:20.

Tuli ŵakusangalala kwasalila yindu yine yayitendekwe.

Jwamkongwe jwine lina lyakwe Natalia jwa yaka 63, akusatamaga ku Kreminna mu chigawo cha Luhansk. Jwalakwe yalumo ni ŵanache ŵakwe ŵaŵili ŵachisikana ŵatandite kulijiganya Baibulo ni Mboni sya Yehofa cha mma 1990. Mwamti asikana ŵakwewo ŵajawile pasogolo mpaka ŵabatisidwe, nambo jwalakwe nganajawulaga pasogolo. Jili jiwuliche ngondo ku Ukraine, liŵasa line lya Mboni sya Yehofa pakutila ngondojo ŵamjigele Natalia nikutila najo yalumo. Jwalakwe ŵampele malo gakutama pa Nyumba ja Uchimwene ja Ivano-Frankivsk.

Natalia jwasasile kuti, “Mabomba gali gawuliche mwakogoya, nayiweni kuti nganimbasoni mbele jwakusangalala. Abale ni alongo ŵalosisye chinonyelo chisyesyene. Mwamti nganinjembecheyaga kuti mpaka asamalile chamti myoyo. Kutandila pandaŵiji, natanditesoni kumnonyela Yehofa. Ngusaŵalangaga Baibulo, soni mlongo jwine jwambendile kuti tutande kulijiganya Baibulo ni buku ja Asangalaleje Mpaka Kalakala. Yehofa ŵangamuchisye kupitila mwa jwalakwe. Apano ndili jwakusangalala kuti sano ndili jwa Mboni sya Yehofa jwam’batisidwe. Ngusaka kuti nguyeje lilamusi lyekulungwa lyakuti, ‘Mumnonyeleje Yehofa Mlungu jwenu ni mtima wenu wosope, ni umi wenu wosope soni ni nganisyo syenu syosope.’”—Mateyu 22:37.

Nombe najo Olia jwa ku Cherkasy jwaliji jwakulalichila jwangabatisidwa pajatandaga ngondo ku Ukraine. Pa Malichi 6 jwalakwe yalumo ni mwanache jwakwe soni chisukulu chakwe ŵatilile m’chilambo cha Poland. Jwalakwe jwasasile kuti, “Twagambile kutila ni yikwama yapangosi basi, nambo abale ni alongo ŵetu ŵausimu ŵatukamuchisyaga wosopewe. Yeleyi yangamuchisye kuti ngakayichilaga kuti gulu ja Yehofa jili jakamulana soni kuti jikusalongoleledwa ni msimu wakwe. Mwamti yosopeyi yandendekasisye kuti nalipeleche kwa Yehofa. Jwalakwe ŵangamuchisye mundaŵi ja yisawusyo, mwamti apano ngusaka namtumichileje pakulosya kuyamichila kwangu.”

Yulia jwakusatama mu chigawo cha Donetsk akwete yaka 18 mwamti jwalakwe jwapagwile muliŵasa lya Mboni sya Yehofa nambo ŵaliji mkanabatisidwe. Jwalakwe jwasasile yayamtendechele ngondo jili natandape. Jwalakwe jwatite, “Nagambile kugona kwalaa pasi, mwamti nayiwonaga kuti ndaŵi jilijose chimbwe. Kutwatamaga ni achinangolo ŵangu, msewu wosopewo wajonasiche, nambope m’weji twakulupwiche.” Panasimene ni yeleyi nikupopela kwa Yehofa soni kuganichisya ya ndamo syakwe, yangamuchisye kuti mbe najo paunasi. Mwamti nalesile kulikayichila naga mpaka ngombole kulipeleka kwa Yehofa. Jwalakwe ali ajanjile mapopelo gangu, yalosisye kuti akusanonyela. Nagambaga kummanyilila Mlungu, nambo apano ngumnonyela mnope jwalakwe.” Yulia jwabatisidwe pa 23 Julayi chaka achino.

Ngondoji jili jigambile kutanda, David jwa yaka 11 jwatilile ku Germany yalumo ni achinangolo ŵakwe. Jwalakwe jwaŵele jwakulalichila jwangabatisidwa ali akwete yaka 9. Jwalakwe akulingalinga kuti akwanilisye yakulinga yakwe yausimu. Jwalakwe jwatite, “Naganisisye yakubatisidwa ligongo lyakuti ngusamnonyela Yehofa soni kuti ngusaka kuŵa najo paunasi. Paubatiso wangu, nasangalele mnope pakumanyilila kuti sano ndili mu liŵasa lya Yehofa. Ngusasangalaga kwasalila ŵandu yakwamba Yehofa soni chakulinga chakwe, mwamti nguganisya yakuti malileje ndaŵi jangu jejinji pa masengo gakulalichila. Soni ndili jwakusachilila kwatumichila abale ni alongo mumpingo, mwamti nguganisya kuti lisiku line chinjikola udindo wakuŵa mtumiki jwakamuchisya mumpingo. Chakulinga changu chekulungwa chili kuja kutumichila ku ofesi ja Mboni sya Yehofa. Chelechi chiŵele chakulinga changu kutandila panapite kukulola ofesi ja Mboni sya Yehofa ja mumsinda wa Lviv mu 2018.”

Olena jwakusatama mumsinda wa Kyiv jwaŵele jwakulalichila jwangabatisidwa mu 2011. Nambo jwalakwe jwawujile panyuma kwa yaka 10. Mu 2020, achakulungwa ŵa mumpingo ŵamjendele mwamti ŵampele kabuku kakuti Awujile kwa Yehofa. Jwalakwe jwatite, “Natanditesoni kulijiganya Baibulo soni kusimanikwa pamisongano. Nambope mkupita kwandaŵi nalesilesoni. Pandaŵi ja ngondoji Yehofa ajanjile mapopelo gangu, kundeteya, kunonyela soni kumba mtendele wa mumtima. Natilile ku Romania mwamti nawonegene ni ŵa Mboni. Chinonyelo soni chisamalilo chaŵambaga abale chaŵele mpela libulangete lyambunichile Yehofa.” Olena jwabatisidwe pa Julayi 23. Jwalakwe jwasasilesoni kuti, “Ngumyamichila Yehofa ligongo aŵele ali mkundendela yindu mwakuwusimana mtima. Sambano apano ngumanyilila kuti, ‘yindu yosope ngusapata machili kutyochela kwa jwele jwakusambaga machilijo.’”—Afilipi 4:13.

Pakwikanaga pa Ogasiti 2, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale ŵa m’madela gosope ga m’chilambochi.

• Abale ni alongo 43 awile

• Abale ni alongo 97 ŵawulele

• Abale ni alongo 22,568 atilile mmadela gane ga m’chilambochi

• Nyumba syakwana 586 sigumulidwe

• Nyumba syakwana 613 sijonasiche mnope

• Nyumba syakwana 1,632 sijonasiche panandi

• Nyumba sya Uchimwene syakwana 5 sigumulidwe

• Nyumba sya Uchimwene syakwana 10 sijonasiche mnope

• Nyumba sya Uchimwene syakwana 37 sijonasiche panandi

• Makomiti 27 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 53,836 apatile chikamuchisyo kutyochela ku makomitiga, mwamti abaleŵa apatile malo gambone gakutama

• Ŵakulalichila ŵakwana 24,867 atilile m’yilambo yine, mwamti ŵakulupilila achimjawo akwakamuchisya