Nyumba chiŵandika 3,000 sya ŵa Mboni sya Yehofa sijonasiche panandi kapena mnope kutandila pandaŵi jajatandite ngondo ku Ukraine mu Febuluwale 2022. M’mwesi wa Ogasiti, abale ŵa ku Ukraine ŵatandite kulinganyasoni nyumba syejonasiche ku madela kwakwakombolekaga kutenda yeleyi, mwakulongoleledwa ni Dipatimenti Jakamuchisya Pasitendekwe Ngosi (DRD) soni Dipatimenti Jakulola ya Mapulani soni Yakutaŵa. Masengoga gapwatikaga koma malata, kuŵichilila mawindo, soni kulinganya yindu yine yamwanamwana. Mmalo gane, kwele nyumba syajonasiche mnope ŵachengaga galaja kapena shedi ni chakulinga chakuti jiŵe nyumba. Pakwikanaga apano, nyumba syakwana 37 simasile kutaŵidwa, soni sine syakwana 48 sikutaŵidwa.

Atamose kuti yili yakusawusya kulinganya nyumbasi mundaŵi jakusawusyaji, nambope abaleŵa nganawujila munyuma pakamula nawo masengo gakamuchisya pajitendekwe ngosi. Mlongo Svitlana, jwa yaka 70, jwakutyochela ku Velyka Dymerka, jajili Dela ja Kyiv, jwatite: “Nganingola mbiya syakulinganyichisya nyumba jangu. Nambo Yehofa ŵandendele yindu yekulungwa kwabasi. Abale ni alongo ŵayiche ni kulinganya nyumba jangu kwa masiku gatatupe.”

Mlongo Nadiia jwa ku Horenka, jajili Dela ja Kyiv, jwasasile kuti masengo gakamuchisya pajitendekwe ngosi gakamuchisye ŵandu muutumiki kukola chidwi. Jwalakwe jwapitilisye kuti: “Masengo gakulinganyasoni yejonasiche, gatendekasisye kuti paŵe masengo gekulungwa gakwalalichila ŵandu. Atamose ŵandu ŵanganinamanyililaga ŵaŵechetaga kuti ŵa Mboni sya Yehofa akusanonyelana yisyesyene. Jemanjaji nganakulupililaga yakuti abale ni alongoŵa ayiche kukungamuchisya.”

Atamose ŵandu ŵele nyumba syawo syajonasiche mpela Yevhen ni Tetiana ŵakamwile nawo masengoga. Nyumba ja liŵasali jajonasiche pandaŵi jajawuliche bomba. Mmalo mwakuti agambeje ganichisya yaŵasimene nayoyi, jemanjaji ŵakamwile masengo mwakulipeleka pakusaka kwakamuchisya abale ni alongo achimjawo. Yevhen jwatite “Chakulinga chetu chekulungwa ndaŵi syosope chili chakuti twakamuchisyeje ŵane. Kwatumichila ŵane kutukamuchisye kuti tukomboleje kupilila yakusawusya yetu.”

Mwakulandana ni yeleyi, panyuma pakuti abale alinganyisye nyumba ja mlongo Lidiia jwakusatama ku Hostomel, jajili Dela ja Kyiv, yamtendekasisye kuti ajawule kukukamuchisya masengo gakwakamuchisya ŵanega. Jwalakwe jwatite “Abale ni alongo ŵakwana 16 ŵalinganyisye nyumba jangu kwa mawiki gaŵili. Nalipikanaga mpela kuti mbiche kala mchilambo chasambano. Apano ngusachilila kwakamuchisyasoni ŵane.”

M’bale jwa mu komiti ja nyambi ja ku Ukraine, pachangakaŵapa jwajendele madela gele kwakwakamulidwaga masengo gakamuchisya pasitendekwe ngosi pakusaka kwalimbikasya ŵandu ŵele nyumba syawo syajonasiche. Jwalakwe jwatite: “Ndaŵi syosope abale ni alongo ŵa ku Ukraine ali yisyasyo yambone pakulosyana chinonyelo. Mwamti, ngondoji jitendekasisye kuti tuŵe ŵakamulana mnope. Yili yakutamika mtima pasi kuyiwona chikamuchisyo chapochele abale ni alongo ŵetu ŵakunonyelwaŵa kuti chakamuchisye kuti atendeje yindu yejinji mu utumiki soni ‘yatendekasisye ŵandu kuti amyamichileje Mlungu,’ mpela mwalikusaŵechetela lilemba lya 2 Akolinto 9:12.”

Pakwikanaga pa Disemba 20, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilichika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale ŵa m’madela gosope ga m’chilambochi.

• Abale ni alongo 47 awile

• Abale ni alongo 97 ŵawulele

• Abale ni alongo 11,477 atilile mmadela gane ga m’chilambochi

• Nyumba syakwana 590 sigumulidwe

• Nyumba syakwana 645 sijonasiche mnope

• Nyumba syakwana 1,722 sijonasiche panandi

• Nyumba sya Uchimwene syakwana 7 sigumulidwe

• Nyumba sya Uchimwene syakwana 19 sijonasiche mnope

• Nyumba sya Uchimwene syakwana 68 sijonasiche panandi

• Makomiti 26 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 54,212 apatile chikamuchisyochi kutyochela ku makomitiga, mwamti abaleŵa apatile malo gambone gakutama

• Ŵakulalichila ŵakwana 26,892 atilile m’yilambo yine, mwamti ŵakulupilila achimjawo akwakamuchisya