Yili yakutesya chanasa kuti alongo ŵetu ŵaŵili ŵaŵulajidwe ni mabomba mumsinda wa Mariupol. Patukuŵechetapa, abale ni alongo ŵakupunda 2,000 ngakukombola kutila mumsindamo ligongo lyakuti mwana ngondo jakogoya. Nambo kwa masiku gamnono gapitega, ŵa Mboni sya Yehofa ŵakwana 150 akombwele kutila mumsindamo. Abale ŵakukamula masengo m’makomiti gakamuchisya pasitendekwe ngosi, ŵalinganyisye yakuti akapeleche chikamuchisyo mumsinda wa Mariupol. Nambo jemanjaji yalumo ni magulu gane gakamuchisya ŵandu pangosi, nganakombola kupeleka chikamuchisyochi ligongo lyakuti asilikali ŵakamwile. Chine chachitendekwe chili chakuti, bomba jawuliche pa Nyumba ja Uchimwene soni pa malo gakutendela misongano. Pandaŵiji abale ŵetu chiŵandika 200 ŵaliji ali ajuŵile pasi pa chipinda chine mu Nyumba ja Uchimwene. Abaleŵa nganawulala, nambo magalimoto gawo gajonasiche. Yeleyi yitendekasisye kuti yiŵe yakusawusya kutila mumsindamo.

Jwamkulungwa jwine jwa mumpingo (chiwulili chakwe chili mwiŵanda) juŵakombwele kutila mumsinda wa Mariupol yalumo ni liŵasa lyakwe jwasasile kuti: “Twalesile nyumba, masengo soni nganitukola upile wakuwoneganasoni ni achimjetu. Soni ulendo watwasosekwaga kwenda lisiku limo, watujigalile masiku 6. Patwatilaga mumsindamo pagalimoto jetu, mumsewu mosope twaliwonaga lyosi lya mabomba. Nambosoni abale ŵatukamuchisyaga pakutupa malo gagona soni yakulya. Twalipikene kuti Yehofa ali Mtati jwetu . . . Yeleyi yitulimbikasisye kumdalila mnope Yehofa.”

Ŵa Mboni sya Yehofa ŵakutila ngondo ku Ukraine atilile m’yilambo yakulekanganalekangana ya ku Europe. Mwachisyasyo, jwakutumichila jwakamuchisya jwine yalumo ni ŵamkwakwe soni ŵanache ŵakwe ŵayaka 7, 11 soni 16 ŵatilile ku Portugal kwa ŵachibale ŵawo ŵalisoni ŵa Mboni sya Yehofa. Panyuma pakutama m’malile mwa chilambochi kwa maawala 11 pakusaka kuti ŵakunde kwawula chilambo chine, liŵasali lyasosekwagasoni kwenda ulendo wa makilomita 4,000 kwa masiku mcheche kuti akayiche kwa ŵachibale ŵawo. Jemanjaji ŵayiche kwa ŵachibaleŵa misongano jili jisigele panandi kutanda. Atamose kuti liŵasali lyangakombola kuŵecheta Chipwitikisi, nambope lyapitilisye kutenda yindu yakwayana ni kulambila Mlungu soni kutenda misongano ja mpingo. Abale ni alongo mumpingowo ŵasangalele paŵaliweni liŵasali lilimkuwoneka lyakusangalala atamose kuti lyaliji pa yipwetesi.

Mlongo jwine juŵatilile ku Germany yalumo ni liŵasa lyakwe ŵatite: “Kuŵalanga Baibulo, kuganichisya yindu yambone soni chembecheyo chambone chatukwete, ni yayitulimbikasisye soni kutukamuchisya. . . . Tum’weni Yehofa ali mkutukamuchisya kupitila mwa abale ni alongo ŵetu. Jemanjaji ŵatukamuchisye chenene patwaliji ku Ukraine, ku Hungary atamose patuli akuno ku Germany.”

Yeleyitu yikulosya kuti Yehofa akwakamuchisya abale ni alongo ŵetu ku Ukraine.—Salimo 145:14.

Pakwikanaga pa Malichi 16, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale m’madela gosope ga m’chilambochi:

• Ŵakulalichila mcheche ŵawile

• Ŵakulalichila 19 ŵawulele

• Ŵakulalichila 29,789 atilile m’madela gane ga m’chilambocho

• Nyumba syakwana 45 syagumulidwe

• Nyumba 84 syajonasiche mnope

• Nyumba syakwana 366 syajonasiche panandi

• Nyumba sya Uchimwene syakwana 16 syajonasiche

• Makomiti 27 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 20,981 apatile chikamuchisyo kutyochela ku makomitiga mwamti abale apatile malo gambone gakutama

• Ŵakulalichila ŵakwana 11,973 atilile m’yilambo yine mwamti ŵakulupilila achimjawo akwakamuchisya