Tukupitilisya kwapopelela abale ni alongo ŵetu ŵa ku Mariupol, kwele asilikali akupitilisya kumenyana m’misewu soni kuwulisya mabomba. Yakutesya chanasa yili yakuti abale ni alongo ŵetu 6 awile ni mabomba. Pakwikanaga apano abale ni alongo ŵetu ŵakwana 10 awile ku Ukraine. Mwakamulana ni malipoti gane, wiki jipiteji, asilikaliŵa awulisyesoni nyumba jine jakutendela mang’asi, jele pandaŵiji mwaliji ŵandu ŵakupunda 1,000. Pangali m’bale kapena mlongo jwawulajidwe, nambope ŵane ŵamnono awulele panandi.

Abale ŵetu ŵakwana 750 atyosile mu msinda wa Mariupol, nambope abale ŵetu chiŵandika 1,600 akutamape mumsindawu. Ŵajinji mwa abaleŵa atilile chakungopoko lyuŵa kwa msindawu, wele apano uli myala mwa asilikali wa Russia.

Mu lipoti lyetu lipite twasasile kuti abale ni alongo chiŵandika 200 ŵatilile m’chipinda chine pa Nyumba ja Uchimwene soni malo gakutendela misongano. Twakwete upile ŵakuŵecheta ni abaleŵa, jemanjaji ŵaŵechete ayi:

“Pagawulikaga mabombago, abale ni alongo ŵamnono ni ŵaŵatesile woga mnope mwamti ŵane ŵatandite kulila. Tuli tupikene kuwulika kwa mabomba kusa kwa maloga, twaganisyaga kuti chituwe ni kuwulikako kapena moto. Nambo jwamkulungwa jwine jwa mumpingo jwaganisisye yakuti tutande kwimba nyimbo sya Uchimwene. Ni twajimbile nyimbo nambala 10 mpaka 15. Kuwulika kwa mabomba kula pakwapikanikaga mnope, nombe najo nyumbajo jatandite kutenganyika. M’weji ni patwajimbagasoni mwakwesya maloŵe. Kaneko twaŵalasile nikambilanasoni Salimo 27. Tuli tumasile kambilana lilembali, twatanditesoni kambilana malemba gatukusaganonyela soni mwagatite kutulimbikasya.  . . Twayiweni nditu kuti Yehofa ali ‘Atati ŵachanasa ni Mlungu ŵakusatulimbisya mitima mnope,’ ŵampaka atukamuchisye atamose mundaŵi jakusawusya mnope.”—2 Akolinto 1:3, 4.

Achakulungwa ŵa mumpingo soni abale ŵa mu makomiti gakamuchisya pasitendekwe ngosi, akukamula masengo mwakulipeleka pakuwungunya kwali abale ni alongo ŵawo soni kwapa yakulya ni mtela. Jemanjaji akutenda yeleyi atamose kuti umi wawo mpaka uŵe pangosi. Mwamti ndaŵi sine abaleŵa akusasosekwa kwawungunya achimjawoŵa ali mkwaŵa. Jemanjaji akutendaga yeleyi pakusaka kuliteteya ku yipolopolo. Tukwayamichila mnope abale ŵetuŵa pakuŵika umi wawo pangosi ligongo lya ŵakulupilila achimjawo.—Aloma 16:4.

Pakuŵa kuti mumsindamo mwangali magesi, alongo ŵakulimba mtima akutelekaga yakulya pasa pa nyumba syawo. Kaneko akuyitumisyaga yakulya yila kwa ŵakulalichila ŵachikulile soni ŵalemale. Mwamti ligongo lya ngondoji, ŵajinjiŵa mwa achalongo achimjetuŵa, nganakola nyumba, magalimoto, soni katundu jwawo jwine. Nambope akuyamichila chinonyelo soni chikamuchisyo chakupochela kutyochela kwa achalongo achimjawo.

Abale ni alongo ŵetu ŵali kumalo gakutilila ngondo akupitilisya kutenda yindu yakwayana nikulambila Mlungu. Yindu yakwe yili kulijiganya Baibulo yimpepe soni kwasalila ŵane utenga wa m’Baibulo.

Pakwikanaga pa Malichi 22, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale m’madela gosope ga m’chilambochi.

• Ŵakulalichila ŵakwana 10 awile

• Ŵakulalichila 27 awulele

• Ŵakulalichila 33, 180 atilile m’madela gane ga m’chilambocho

• Nyumba syakwana 78 sigumulidwe

• Nyumba syakwana 102 sijonasiche mnope

• Nyumba syakwana 484 sijonasiche panandi

• Nyumba ja Uchimwene jimo jigumulidwe

• Nyumba sya Uchimwene syakwana 4 sijonasiche mnope

• Nyumba sya Uchimwene syakwana 18 sijonasiche panandi

• Makomiti 27 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 25,069 apatile chikamuchisyo kutyochela ku makomitiga mwamti abaleŵa apatile malo gambone gakutama

• Ŵakulalichila ŵakwana 14,308 atilile m’yilambo yine mwamti ŵakulupilila achimjawo akwakamuchisya