Tuli ŵakusangalala kwamanyisya kuti Yehofa ŵakamuchisye abale ni alongo ŵetu ŵamchilambo cha Ukraine kuti atende nawo Mwambo wa Chikumbuchilo cha chiwa cha Yesu. Abale ni alongoŵa ŵakamulichisye masengo Nyumba sya Uchimwene sine sya kungopoko lyuŵa kwa Ukraine pakutenda Chikumbuchilochi. Nambosoni ŵanganakombola kutyoka mmajumba mwawo, ŵatesile Mwambowu mtumagulu kupitila pa fidiyo kofelesi.

Palisiku lya Chikumbuchilochi, mbali sine sya mchilambochi kwalilaga chimanyilo chakuti mabomba chigawuliche. Nambo pakwaswele kulila kula kwalesile. Sherhiy jwa kudela ja Druzhkivka, Donetsk jwatite, “Twaŵele tuli mkupopela kuti Mwambowu ukasokonechela ni masegwe ga ngondo. Mwambowu uli usigele panandi kuti utande, masegwe gagatendekwaga ligongo lya ngondo galesile.”

Abale ni alongo ŵaŵaliji ŵachikulile soni ŵaŵalwalaga ŵa ku Nemishaeve, chiŵandika ku Kyiv, nganakombola kutenda misongano kwa kandaŵi. Jemanjaji ŵaliji mkupopela kuti atende nawo Chikumbuchilo. M’bale Vitaliy, jwali jwamkulungwa jwa mumpingo, ŵakamuchisye jemanjaji kuti atende nawo chikumbuchilo. Jwalakwe jwatite, “Twakamulichisye masengo matochi patwatendaga Mwambowu ligongo lyakuti kwaliji kuli kwangali magesi. Kwaliji kwangali yakutukamuchisya kupikana chitukuta. Ligongo lyakuti nganitukola wayilesi, mwanache jwangu jwakamulichisye masengo violin kuti tujimbe nyimbo.”

Oleksandr, jwali jwamkulungwa jwa mumpingo jwatite, “Pandaŵi jakwaŵilanjila ŵandu ku Mwambowu, nganitukombola kwaŵilanjila ŵandu ŵamudela ja mpingo ŵetu ligongo majumba galiji gali gagwile soni ŵandu ŵaliji ali atisile. Nambope twakombwele kwaŵilanjila ŵachinasi ŵetu soni ŵandu ŵatwatisile nawo yalumo ngondo. Ŵandu ŵajinji ŵatwasimanaga nawo mu yipinda yapasi ŵaliji mkanapikanepo ya Ŵamboni. Ŵajinji mwa jemanjaji twatesile nawo Chikumbuchilo.”

Atamose kuti nganitupochele chiŵalanjilo cha mipingo josope cha ŵandu ŵaŵasimanikwe pa Chikumbuchilo, pakwikanaga apano ŵandu ŵakupunda 210,000 ni ŵaŵatesile nawo Mwambowu.

Pakusala mwakupikanila pakwamba ya Chikumbuchilo, m’bale jwine jwa ku Ukraine jwatite, “Ŵandu ŵali mu sitima ja pa mesi akusamanyilila kuti aŵandichile kumkuli pajiweni nyumba jili mkuŵala. Mwakulandana ni yeleyi, panatesile Chikumbuchilo nayiŵeni kuti lisiku lya Yehofa liŵandichile. Chikumbuchilo cha chaka achino chilimbikasisye mnope.”

Pakwikanaga pa Epulo 21, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale ŵa m’madela gosope ga m’chilambochi.

• Abale ni alongo ŵakwana 35 awile

• Abale ni alongo ŵetu ŵakwana 60 ŵawulele

• Abale ni alongo ŵakwana 43,792 atilile mmadela gane ga m’chilambochi

• Nyumba syakwana 374 sigumulidwe

• Nyumba syakwana 347 sijonasiche mnope

• Nyumba syakwana 874 sijonasiche panandi

• Nyumba jimo ja Uchimwene jigumulidwe

• Nyumba sya Uchimwene syakwana 10 sijonasiche mnope

• Nyumba sya Uchimwene syakwana 27 sijonasiche panandi

• Makomiti 27 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 44,971 apatile chikamuchisyo kutyochela ku makomitiga, mwamti abaleŵa apatile malo gambone gakutama

• Ŵakulalichila ŵakwana 19,961 atilile m’yilambo yine, mwamti ŵakulupilila achimjawo akwakamuchisya