Pakamulichisya masengo Makomiti Gakamuchisya Pajitendekwe Ngosi gakwana 27, ofesi ja nyambi ja Ukraine jikupitilisya kwakamuchisya abale ni alongo ŵatilile m’madela gakulekanganalekangana. Kutyochela pandaŵi jijatandite ngondoji, chilambo cha Poland chiŵele chili mkutumisya katundu jwakupunda matani 250. Katundu jwakwe juli yakulya, yakuwala soni mtela. Konjechesya pelepa, abale ni alongo ŵane ŵa m’chilambo cha Ukraine, ŵapeleche yakulya yakupunda matani 80.

Mlongo jwine lina lyakwe Valentyna jwakutyochela ku Kyiv pajwapochele chikamuchisyo kutyochela kwa abale ŵa m’Komiti Jakamuchisya Pajitendekwe Ngosi jwatite, “Ngondo pajagambile kutanda yaliji yakogoya kupitilisya kutama mumsinda wa Kyiv. Myoyo natilile ku ka tawuni kanekakwe kamwana kakaliji m’chigawo cha Cherkasy. Mwamti ndemi akuno kwa miyesi jakupunda jiŵili. Abale ni alongo wa mumpingo wakuno aŵele ali mkutenda yindu mwakunganichisya mnope. Jemanjaji ŵayikaga nago makatoni ga yakulya yambone soni mtela. Panguganichisya mwaŵele ali mkungamuchisya, yikusangwaya mnope mumtimamu. M’katoni jine ndili najiwugwile, mwaliji mwana kadi soni chiwulili chele mwanache jwine jwa yaka mcheche lina lyakwe Blanca ŵajambwile . . . Chisunjejepe yindu yeleyi kuti nayikumbuchileje. Ngwayamichila mnope abale ni alongo wosope soni ngumyamichilasoni mnope Yehofa.”

Panasoni mlongo jwamlemale jwa yaka 83 jwa ku Sieverodonetsk. Mlongoju lina lyakwe ali Valentyna. Jwalakwe jwaŵechete kuti, “Pajatandaga ngondo naliji jika. Mwanache jwangu jwamlume jwawile ngondo mkanijitande. Mabomba gawulikaga lisiku lyosope mwamti yaliji yakogoya mnope kupitilisyape kutama mumsindamo. Kwaliji kwangali mesi, magesi, gasi soni netiweki jasawusyaga kwejinji. Ngusinayamichila mnope abale ŵiŵaŵisile umi wawo pangosi kuti angamuchisye.”

Mlongoju jwapitilisye kuŵecheta kuti, “Kaneko abale ŵasalile une yalumo ni alongo ŵaŵili ŵalemale kuti tusamile ku msinda wa Dnipro kukwaliji kwakuteteyeka. Ku Dnipro abale ŵambele malo gakutama. Sambano, ngutama ni liŵasa line lya Chiklistu lyalikusamalila. Tukusagamba kuŵa mpela ŵandu ŵa m’liŵasa limpepe. Jemanjajitu ŵayikene pakumba foni jangusakamulichisya masengo pamisongano. Ngasiliŵalila chinonyelo chiŵalosisye abaleŵa.”

Tuli ŵakusangala soni tukumyamichila mnope Yehofa ŵali Atati ŵetu ŵachinonyelo, pakupitilisyape kwasamalila abale ni alongo ŵetu ŵa ku Ukraine kuti ‘chikasoŵaga chilichose chambone.’—Salimo 34:10.

Pakwikanaga pa Juni 7, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale ŵa m’madela gosope ga m’chilambochi.

• Abale ni alongo ŵakwana 42 awile

• Abale ni alongo ŵetu ŵakwana 82 ŵawulele

• Abale ni alongo ŵakwana 46,145 atilile m’madela gane ga m’chilambochi

• Nyumba syakwana 469 sigumulidwe

• Nyumba syakwana 540 sijonasiche mnope

• Nyumba syakwana 1,405 sijonasiche panandi

• Nyumba sya Uchimwene syakwana 5 sigumulidwe

• Nyumba sya Uchimwene syakwana 8 sijonasiche mnope

• Nyumba sya Uchimwene syakwana 33 sijonasiche panandi

• Makomiti 27 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 50,663 apatile chikamuchisyo kutyochela ku makomitiga, mwamti abaleŵa apatile malo gambone gakutama

• Ŵakulalichila ŵakwana 22,995 atilile m’yilambo yine, mwamti ŵakulupilila achimjawo akwakamuchisya