Ndaŵi sine, ŵakutumichila ŵa Mlungu ŵane mpaka aganisyeje kuti kukamulichisya masengo mfundo sya m’Baibulo paumi wawo kukusasaka ndaŵi jejinji soni kulipeleka mnope. (Salimo 73:2, 3) Jemanjaji mpaka ayikane pakutenda yindu yakutindana ni malamusi ga Yehofa soni kwalambusyaga ŵakulupilila achimjawo alimkutenda ndamo jakusakala mwakusisa.

 Ngani ajino jilembedwe pakusaka kwakamuchisya ŵandu ŵakwete umi wapaŵili soni ŵakusaka kuleka umi welewu.

Papeji ajino

•  Ana umi wapaŵili uli chichi?

•  Ana kuŵa jwa umi wapaŵili kukundendekasya kuŵa mundu jwakusakala?

•  Ana mpaka ndeche chamtuli umi wapaŵili?

•  Yakusaŵecheta ŵachinyamata achimjawo

 Umi wapaŵili ukusagopolela kuti pali ni achimjawo ŵangamtumichila Yehofa, akusatenda yindu yakuyimanyilila kuti yili yakulemwa, nambo pali ku mpingo ni abale ni alongo ŵakulupichika akusatendaga yindu mpela akusaka kumtumichila Yehofa. Yayikulosya kuti akusaŵa mundu jwa paŵili kapena kuti akusawala chinyago.

 Erin jwatite, “Mundu jwakwete umi wapaŵili, akusiŵasisa ŵandu wosope kuti akamanyilila chine chakwe chakutenda jwalakwe, mwamti pangali jwampaka ammanyilile mwaŵelele mundujo. Gamba kuti akusaŵa jwangakulupichika kwa jwalijose.”

 Ana akumanyilila? Kuŵa mundu jwa umi wapaŵili kukusapwatikapo kutenda yindu kwajika yawukuyimanyilila kuti Yehofa nganaŵa asangalele nayo.

 Nolan jwatite, “Natandite kulolela yiwulili yangaŵajilwa pa intaneti pandaŵi janakwete yaka 14. Natendaga yindu mpela ngusaŵengana ni kulolela yakuŵagula pandili ni ŵandu ŵane, nambo mumtima ndili mkumanyilila kuti ngusayinonyela.”

 Mfundo ja m’Baibulo: “Kapolo ngaŵa mkutumichila achambuje ŵaŵili, pakuŵa tachiŵengana ni jumo ni kumnonyela jwine, kapena tachilipeleka kwa jumo ni kumnyosya jwinejo.”—Mateyu 6:24.

 Ngaŵa mnopemnope. Kusala yisyene, ŵandu ŵane akusasagula kuti akakuyaga mfundo sya m’Baibulo. Nambo, ana wawojo asagwile myoyo? Kapena pana ligongo line lyalikwatendekasya kuŵa mundu jwa umi wapaŵili, mpela:

•   Kogopa kuti achimjawo mpaka aleche kunguluka ni wawojo.

•   Kuyiwona kuti pana yindu yakulandana yakusatendaga mwakamulana mnope ni achimjawo ŵa kusukulu kulekangana ni achimjawo ŵa kumpingo.

•   Ganisya kuti nganaŵa akwete machili soni lunda kuti akombole kuya malamusi gosope ga Mlungu.

 David jwatite, “Nguganisya kuti ŵachinyamata ŵane ŵa umi wapaŵili akusasangalala mnope pali ni ŵandu ŵanganaŵa Aklistu ligongo lyakuti akusayiwona kuti pangali chakusawusya kutenda chilichose chakusaka.”

 Kusala yisyene, pangali ligongo lililyose lyambone lyakumtendekasya mundu kuŵa jwa umi wapaŵili. Nambope, magongoga gatukamuchisye kumanyilila kuti atamose ŵandu ŵambone mpaka yikomboleche kuŵa ŵa umi wapaŵili. Naga akusatenda yeleyi, ana akusosekwa kutenda chichi?

1.  1. Aliwungunye apanopano mwakutendela yindu ni umi wawo. Aliwusye kuti: ‘Ana yili yisyene kuti ngusosekwa kuŵa mundu jwa umi wapaŵili? Naga ngupitilisya kuŵa myoyo, ana yakuyichisya yakwe yichiŵa yamtuli?’

    Mfundo ja m’Baibulo: ‘Mundu jwakalamuka akusachiwona chindu chakogoya. . . , nambo jwakuloŵela akasagamba kupelekanganya ni akusasimana ni yipwetesi ni kuligamba.’—Misyungu 27:12.

2.  2. Aŵeje ŵakuwona mtima. Akambilane yakwamba ndamo jawoji ni achinangolo ŵawo kapena mjawo jwali jwakulimba mwausimu jwakusakuya malamusi ga Yehofa. Yili yangakayikasya kuti jemanjaji mpaka asangalale kwakamuchisya. Mwamti jemanjaji chachiŵa ŵakusangalala kumanyilila kuti wawojo akusaka kuti atendeje yindu yambone.

    Nolan jwatite, “Kwasalila ŵane yakulemwa yangu jaliji ngani jakusawusya mnope kujisala, nambo panagambile kwasalila ŵane, napikene chenene mumtima.”

    Mfundo ja m’Baibulo: “Mundu jwakusasisa ulemwa wakwe ngasapata upile, nambo mundu jwakusapesya kapena kuti jwakusawujitichisya ulemwa ni kuwuleka, tachitendeledwa chanasa.”—Misyungu 28:13.

3.  3. Ajitichisyeje yakuyichisya yakwe. Akumbuchileje kuti naga aŵele ali mkusisa yineyakwe kwa achinangolo ŵawo soni kwa abale ni alongo, yikusaŵa yakusawusya kuti jemanjaji ŵakulupililejesoni. Yakuyichisya yakwe, achinangolo ŵawo kapena achakulungwa ŵa mumpingo mpaka ŵalekasye kuti akatendaga nawo yindu yine kwakandaŵi. Ajitichisye yeleyi soni alinganye ndamo jawo ‘mwakutenda yindu yosope mwakuwona mtima’ kutandila pepano.—Ahebeli 13:18.

    Mfundo ja m’Baibulo: “Mpikanileje msyungu wakusampa ŵandu, kuti timŵe ŵalunda pasogolo pakwe.”—Misyungu 19:20.

4.  4. Akulupilileje mnope kuti Mlungu akusiŵanonyela. Ligongo lyakuti Yehofa akusatunonyela, jwalakwe akusamanyilila mnope yiliyose yatukusatendaga. Myoyo, naga ali mundu jwa umi wapaŵili, jwalakwe akusiŵamanyilila soni ngakusasangalala ni ŵawojo. Yili myoyo, “ligongo jwalakwe akusasamala mnope ya jemanja,” mwamti ali jwakusachilila kwakamuchisya kuti aleche ndamoji.—1 Petulo 5:7.

    Mfundo ja m’Baibulo: “Pakuŵa Yehofa, meso gakwe gakusalola aku nakuku pachilambo chapasi chosope kuti alosye machili gakwe kwa ŵandu ŵali ni mtima wakulungama kwa jwalakwejo.”—2 Mbili 16:9, NWT.