Iyayi. Baibulo jikusasala kuti tukusosekwa kupopelaga kwa Mlungupe kupitila mu lina lya Yesu. Yesu ŵasalile ŵakulijiganya ŵakwe kuti, “Pandaŵi jimkupopela mjileje myi: Atati ŵetu ŵakwinani. Lina lyawo lichimbichikwe.” (Mateyu 6:9) Pangali patukusaŵalanga kuti jwalakwe ŵasalile ŵakulijiganya ŵakwe kuti apopeleje kwa ŵandu ŵaswela mtima, malayika kapena kwa jwine jwalijose nambo kwa Mlungupe basi.

 Yesu ŵasalilesoni ŵakulijiganya ŵakwe kuti, “Une ndili litala, usyesyene, ni umi, pangali mundu jwakwawula kwa Atati akaŵe kupitila mwa une basi.” (Yohane 14:6) Mlungu ampele Yesu udindo wakutuŵechetela kwa Mlungu.—Ahebeli 7:25.

Ana pana chakusawusya chilichose naga ngupopela kwa Mlungu soni kwa ŵandu ŵaswela mtima?

 Pa Malamusi Likumi ga Mlungu, jwalakwe jwatite, “Pakuŵa une AMBUJE Mlungu jwenu, ndili Mlungu jwa jelasi.” (Ekisodo 20:5, NAB) Ana Mlungu ali jwa “jelasi” chamtuli? M’maloŵe ga mwiŵanda, Baibulo jine (New American Bible) jikusati jwalakwe “akusasaka ŵandu apopeleje kwa jwalakwe jika basi.” Mlungu akusasaka ŵandu apopeleje kwa jwalakwejo basi.—Yesaya 48:11.

 Patukupopela kwa jwalijose chinga ŵandu ŵaswela mtima kapena kwa malayika tukusaŵa tuli kumlemwechesya Mlungu. Ndumetume Yohane paŵasakaga kulilumba lilayika, lilayikalyo lyamsalile jwalakwe kuti, “Mkatenda myoyo! Une ndili jwakutumichila wamba mpela mumŵelele m’mwejo ni ŵakulupilila ŵane. Jemanjajo ni ŵele ŵakusakuya yakuwona yisyesyene yiŵajuwile Yesu.”—Chiwunukuko 19:10.