Ana Mlungu Ŵachenjile Yaumi Yine Pakupanganya Yaumi Yine?
Kwanga kwakutyochela m’Baibulo
Iyayi. Baibulo jikusasala mwakupikanika chenene kuti Mlungu ŵapanganyisye ŵandu soni “mitundu” jakulekanganalekangana ja yinyama soni yakumela. a (Genesesi 1:12, 21, 25, 27; Chiwunukuko 4:11) Jikusasalasoni kuti ŵandu wosopewe tuli ŵanache ŵa Adamu soni Hawa ŵali achinangolo ŵetu ŵandanda. (Genesesi 3:20; 4:1) Baibulo jangajitichisyaga kuti Mlungu ŵakamulichisye masengo yaumi yine pakupanganya mitundu jine ja yindu ya umi. Nambosoni jangasisyaga yakusasala ŵasayansi yakuti mitundu ja yindu yaumi jikusaŵeleka ŵanache ŵakulandana ni mtunduwo.
Ana Mlungu ŵapanganyisye yaumi kutyochela ku yaumi yine?
Ŵandu ŵakusakulupilila kuti Mlungu ŵapanganyisye yaumi kutyochela ku yaumi yine, akwete nganisyo syakulekanganalekangana pa ngani jeleji. Ŵandu ŵane akusakulupilila kuti Mlungu ni “jwakusalongolela yaumi yosope kuti yichenjeje pakujigalila malo gayikusimanikwa yinduyo.
Konjechesya pelepa nganisyo syakwetesoni ŵandu mpaka sipwatichepo:
Yaumi yosope yatyochele ku yaumi yine yayapali kalakala.
Mtundu wa cha umi chimo mpaka chichenje nikuŵa mtundu wa cha umi chine.
Mlungu ni jwakutendekasya kuti yeleyi yitendekwe.
Ana nganisyo syakuti yaumi yatesile kuchenga kutyochela ku yindu yine sili syakamulana ni yajikusasala Baibulo?
Nganisyo syakuti yaumi yatesile kuchenga kutyochela ku yindu yine sili syangakamulana ni yajikusasala buku ja Genesesi. Myoyo Yesu ŵakamulichisye masengo yayili m’buku ja Genesesi kuti yili yisyesyene (Genesesi 1:26, 27; 2:18-24; Mateyu 19:4-6) Baibulo jikusasala kuti Yesu mkanayiche pachilambo chapasi, jwalakwe jwatamaga kwinani ni Mlungu soni jwakamuchisyaga nawo pakupanganya “yindu yosope” yatukuyiwonayi. (Yohane 1:3) Myoyo nganisyo syakuti Mlungu ŵachenjile yaumi yine kutyochela ku yindu yine sili syangakamulana ni yajikusajiganya Baibulo.
Wuli yakumela soni yinyama yikusachenga payitemi pamalo gasambano?
Baibulo jangasalaga winji wa yindu yine yaumi yampaka yipagwe kutyochela pa mtundu umo wa chindu. Nambosoni jangasisyaga mfundo jakuti mitundu jakulekanganalekangana ja yinyama soni yakumela yayapanganyidwe ni Mlungu, mpaka yichenje kawoneche kakwe payikuŵelekana kapena naga yili yitemi pa malo gasambano. Atamose kuti ŵandu ŵane akusaganisya kuti chindu chaumi pachichenjile ligongo lyakuti chili pamalo gasambano, nikuti mtundu wasambano wa chaumi upanganyidwe nambo yeleyi nganiŵa yakuwona.
a Baibulo jikusakamulichisya masengo maloŵe gakuti “mtundu” ligongo lyakuti Maloŵega gakwete ngopolelo jambone kulekangana ni maloŵe gakuti, “gulu ja yindu” mwakamulana ni mwakusakamulichisya masengo ŵasayansi. Ndaŵi sine ŵasayansi akusasala kuti yaumi yasambano yikusachenga kutyochela ku ya umi yine. Nambo kusala yisyene yeleyi nganiŵa myoyo mwakamulana ni maloŵe gaŵagakamulichisye masengo m’buku ja Genesesi.
You May Also Like
YIJIGANYO YAKUSOSEKWA MNOPE YA M’BAIBULO
Ana Yindu Yakwinani Soni Yapachilambo Chapasi Yatesile Kupanganyidwa?
Yajikusasala Baibulo pangani jakupanganyidwa kwa yindu, ŵandu ŵajinji ŵangapikanichisya chenene mwamti akusagamba kujiwona kuti jili adisi. Ana yajikusasala Baibulo pa nganiji, mpaka tuyikulupilile?
MABUKU NI TUMABUKU
Ana Yaumi Yatesile Kupanganyidwa?
Ana yakusakulupilila pakwamba ya muwatandile umi yana masengo.
