Ulemwa kuli kutenda kapena kuganisya yindu yakusaŵengana nayo Mlungu. Yikusapwatikapo, kutenda yangalumbana kapena kasa malamusi ga Mlungu mwakutenda yindu yakusayiwona Mlungu kuti yili yakusakala. (1 Yohane 3:4; 5:​17) Baibulo jikusasalasoni kuti ulemwa uli kulepela kutenda yindu yakuŵajilwa.​—Yakobo 4:​17.

 M’yiŵecheto yandanda yaŵayikamulichisye masengo pakulemba Baibulo, maloŵe gakuti ulemwa gakusagopolela “kukulusya.” Mwachisyayo, kalakala asilikali ku Isalaeli ŵakombolaga kusoma yindu ni legeni mwamti ‘nganakulusyaga.’ Maloŵega gali gagopoleledwe mpela mugaŵelele m’chiŵecheto chandanda, mpaka galembedwe kuti” nganalemwaga.” (Ŵakulamula 20:16) Myoyo, kulemwa kuli kukulusya pa malamusi ga Mlungu.

 Mlungu ni juŵatupanganyisye. Myoyo jwalakwe ni jwali jwakuŵajilwa kutupa malamusi gatukusosekwa kukuya. (Chiwunukuko 4:​11) Jwalakwe chachitujimba magambo ligongo lya yitendo yetu.​—Aloma 14:12.

Ana yili yakomboleka ngalemwa amta panandi?

 Iyayi. Baibulo jikusasala kuti “wosope ŵalemwisye, ni ŵalepele kwika mu lumbili luŵalinganyisye Mlungu.” (Aloma 3:​23; 1 Ayimwene 8:​46; Jwakulalichila 7:​20; 1 Yohane 1:8) Ligongo chichi yili myoyo?

 Adamu ni Hawa, pandanda ŵaliji ŵamlama. Yaliji myoyo ligongo lyakuti, Mlungu ŵapanganyisye mchiwanichisyo chakwe. (Genesesi 1:​27) Nambope jemanjaji nganampikanila Mlungu yayatendekasisye kuti aŵe ŵangali umlama. (Genesesi 3:​5, 6, 17-​19) Kaneko paŵatandite kola ŵanache, ŵajambuchisye ŵanachewo ungali umlamawo. (Aloma 5:​12) Yeleyi yikulandana ni yajwaŵechete Mwenye Daudi jwa Isalaeli kuti ‘Napagwile mu ulemwa.’​—Salimo 51:5.

Ana pana ulemwa wekulungwa mnope kupunda ujakwe?

 Elo. Mwachisyasyo, Baibulo jikusasala kuti achalume ŵa mu Sodomu jwakala “ŵaliji ŵandu ŵakusakala mnope” mwamti ulemwa wawo waliji “wejinji.” (Genesesi 13:13; 18:20) Kwende tulole yindu yitatu yampaka yitukamuchisye kumanyilila kuti ulemwa awu uli wekulungwa kapena wamwana.

1.   Ukulu wakwe. Baibulo jikusatukalamusya kuti tukusosekwa kuŵambala ulemwa wekulungwa mpela chikululu, kutumichila milungu jakupanganyidwa, wiyi, kukolelwa, kuwulaga soni yamisimu. (1 Akolinto 6:​9-​ 11; Chiwunukuko 21:8) Baibulo jikusalekanganya maulemwa gelega ni ulemwa wampaka mundu atende ligongo lyangaganisya chenene, mpela kutenda kapena kuŵecheta maloŵe gakwapweteka ŵane. (Misyungu 12:18; Aefeso 4:​31, 32) Nambope, Baibulo jikusatulimbikasya kuti tukawuwonaga ulemwa wine kuŵa wamwana. Yili myoyo ligongo lyakuti ulemwa wamwana mpaka umtendekasye mundu kasa malamusi ga Mlungu.​—Mateyu 5:​27, 28.

2.   Chakulinga chakwe. Ŵane akusatenda ulemwa ligongo lyangamanyilila yakusasaka Mlungu. (Masengo 17:30; 1 Timoteo 1:​13) Baibulo ngajikusanandiya ulemwa welewu, nambo jikusagamba kulekanganya ni ulemwa wakusatenda mundu ligongo lyakasa malamusi ga Mlungu mwamelepe. (Numeli 15:30, 31) Mundu akusatenda ulemwa mwamele ligongo lyakuti akwete mtima wakusakala.​—Yelemiya 16:12.

3.   Kutenda ulemwa mwakuwilisyawilisya. Baibulo jikusalekanganyasoni mundu jwatesile ulemwa kamo, ni jwakusatenda mwakuwilisyawilisya. (1 Yohane 3:​4-8) Mundu jwakusatenda ‘ulemwa mwamelepe,’ panyuma pakuti akumanyilila chachili chambone, akusapochela chamuko kutyochela kwa Mlungu.​—Ahebeli 10:26, 27.

 Mundu juŵatesile ulemwa wekulungwa mpaka alajeje mumtima ligongo lya yakulemwa yaŵatesileyo. Mwachisyasyo, Mwenye Daudi jwalembile kuti, “Ulemwa wangu undiŵisye msingu wangu, ukusitopa mpela msigo wakupunda machili gangu.” (Salimo 38:4) Nambope Baibulo jikusatulimbikasya kuti,“Ŵakulemwa aleche ndamo syawo syakusakala, nipo jwangalungama aleche nganisyo syakwe syakusakala. Awujile kwa Ambuje kuti ŵatendele chanasa, awujilile kwa Mlungu jwetu, pakuti tachakululuchila mnope.”​—Yesaya 55:7.