Iyayi, chilambo chapasi ngasichijonasika, kupya ni moto kapena kuchenga. Baibulo jikusatujiganya kuti Mlungu ŵachipanganyisye chilambochi kuti atameje ŵandu mpaka kalakala.

•   “Ŵandu ŵambone tachipochela chilambo, ni tachitama mwelemo kwa yaka yosope.”​—Salimo 37:29.

•   “[Mlungu] ŵachitamiche chilambo chapasi pa yilimbilimbi yakwe, kuti chikasichitenganyika.”​—Salimo 104:5.

•   “Chilambo chapasi changachenga mpaka kalakala.”​—Jwakulalichila 1:4.

•   “Ŵalakwewo ni ŵali Mlungu juŵagumbile ni kupanganya chilambo chapasi, nipo ŵachitamilichisye mwamachili. Nganachipanganya kuti chiŵe changali kandu, nambo kuti chiŵe malo gakutama ŵandu.”​—Yesaya 45:18.

 Mlungu ngasakunda kuti ŵandu amalisye konanga chilambo chapasi chinga pakamulichisya masengo ngondo kapena matala gane. Mmalo mwakwe, jwalakwe ‘chachajonanga ŵandu ŵele ŵajonasile chilambo chapasi.’ (Chiwunukuko 11:18) Ana chachitenda chamtuli yeleyi?

 Mauchimwene ga ŵandu galepele kuchisamalila chilambo. Myoyo Mlungu chachiŵika Uchimwene wamlama wa kwinani wawuchijinjila mmalo mwa mauchimwene gelega. (Daniele 2:​44; Mateyu 6:​9, 10) Mwenye jwa Uchimwene welewu chachiŵa Yesu Klistu, Mwanache jwa Mlungu. (Yesaya 9:​6, 7) Yesu pajwaliji pa chilambo chapasi, jwalosisye kuti akwete machili gakulamulila yachilengedwe. (Maliko 4:​35-​41) Mpela Mwenye jwa Uchimwene Wa Mlungu, Yesu chachikamulichisya masengo machili gakwe pakulamulila chilambo chapasi ni yosope yayili mwelemo. Jwalakwe chachipanganyasoni kapena kulinganyasoni yindu pachilambo chapasi. Chachichitendekasya kuti chiŵe mpela muchaŵelele pandanda mumgunda wa Edeni.​—Mateyu 19:28; Luka 23:43.

 Iyayi. Ŵandu ŵane akusaganisya myoyo ligongo lyangapikanichisya chenene lilemba lya 2  Petulo 3:7. Lilembali likusati, “Kwinani ni chilambo chapasi cha masiku agano . . . yisunjidwe kuti tayijoche ni moto.” Kwende tulole mfundo siŵili syakusosekwa mnope syampaka situkamuchisye kupikanichisya maloŵe gelega.

1.   M’Baibulo maloŵe gakuti “kwinani,” “chilambo chapasi,” soni “moto” gakusagopolelasoni yindu yine. Mwachisyasyo, pa Salimo 33:8 pakusati “Chilambo chosope chapasi chimjogope Ambuje.” Pa lilembali maloŵe gakuti “chilambo chosope chapasi,” gakugopolela ŵandu.

2.   Maloŵe ga pa 2 Petulo 3:7 gakutukamuchisya kumanyilila ngopolelo ja kwinani, chilambo chapasi soni moto. Ndime 5 ni 6 jikusala kulandana kwakupali pasikati pa yachiyitendekwe kusogoloku ni Chigumula cha mundaŵi ja Nowa. Pandaŵi jelejo, Chigumulacho chajonasile ŵandu ŵakusakala ngaŵaga chilambo chapasi chisyesyenechi. (Genesesi 6:​11) Chajonasilesoni “kwinani,” kugopolela ŵaŵalamulilaga ŵandu pachilambo jele ndaŵijo. Myoyo ŵandu ŵakusakala ni ŵaŵajonasiche ngaŵaga chilambo chisyesyenechi. Nowa ni liŵasa lyakwe ŵakulupwiche pandaŵi jele Mlungu ŵajonangaga ŵandu ŵakusala .Chigumulachi chili chitendekwe, Nowa ni liŵasa lyakwe ŵapitilisye kutama pachilambo chapasi.​—Genesesi 8:1​5-​18.

 Mwakulandana ni mesi ga Chigumula, konasika kapena kuti “moto” wakuwusala pa 2 Petulo 3:7 uchijonanga ŵandu ŵakusakala ngaŵaga chilambo chisyesyenechi. Mlungu jwasalile kuti chachilinganya “kwinani kwa sambano ni chilambo chapasi chasambano mwele timuchiŵa m’mangwakwe mwa chilungamo.” (2 Petulo 3:​13) “Kwinani kwa sambano” kapena kuti ulamusi wa sambano wawuli Uchimwene wa Mlungu uchilamulila “chilambo chapasi chasambano,” kapena kuti ŵandu ŵachachitama pachilambo chapasi. Mu Ulamusi welewu, chilambo chapasi chichiŵa paladaiso jwa mtendele.​—Chiwunukuko 21:​1-4.