Yakusawusya yekulungwa jili ndaŵi ja yakusawusya yakogoya yanganiyitendekweje pa umi wa ŵandu. Mwakamulana ni yajikusasala Baibulo, yeleyi yichitendekwa mu “masiku gakumalisya” kapena kuti “ndaŵi jakumalisya.” (2 Timoteyo 3:1; Daniele 12:4) Yichiŵa “yakusawusya yekulungwa yanganiyitendekweje kutyochela pandaŵi jele Mlungu ŵapanganyisye yindu mpaka apano, soni ngasiyitendekwasoni.”—Maliko 13:19; Daniele 12:1; Mateyu 24:21, 22.

Yakutendekwa mu ndaŵi ja yakusawusya yekulungwa

•   Konanjidwa kwa dini jaunami. Mu kandaŵi kamnomno, dini jaunami jichijonanjidwa. (Chiwunukuko 17:1, 5; 18:9, 10, 21) Maboma mwakulongoleledwa ni bungwe ja United Nations gachikwanilisya chakulinga cha Mlunguchi pakujijonanga dini jaunami.—Chiwunukuko 17:3, 15-18. a

•   Kwimuchilidwa kwa dini jakuwona. Mkamulano wa maboma wakuwulondesya mmesomkulola ga Esekiyele kuŵa “Gogi jwa chilambo cha Magogi,” chachilinga kuti ŵajonanje ŵandu ŵali mu dini jakuwona. Nambo Mlungu chachachenjela ŵakutumichila ŵakweŵa kuti akajonanjidwa.—Esekiele 38:1, 2, 9-12, 18-23.

•   Kulamulidwa kwa ŵandu. Yesu chachalamula ŵandu wosope soni “chachilekanganya ŵandu, mpela mwakusatendela m’busa pakulekanganya ngondolo ni mbusi.” (Mateyu 25:31-33) Chachalamula ŵanduŵa pakujigalila yaŵatendega pakutukamuchisya kapena kulepela kwawo kutukamuchisya “tuŵanache” ŵali achalongo achimjakwe ŵa Yesu ŵachachilamulila nawo yalumo kwinani.—Mateyu 25:34-46.

•   Kwasonganganya ŵakulamulila mu Uchimwene wa Mlungu. Ŵandu ŵakulupichika ŵasagulidwe kuti chalamulile ni Klistu chachimalisya umi wawo wapachilambo chapasi ni kwajimusya kuti akatame ni umi kwinani.—Mateyu 24:31; 1 Akolinto 15:50-53; 1 Atesalonika 4:15-17.

•   Alamagedo. “Ngondo ja lisiku lyekulungwa lya Mlungu jwamachiligosope” jikusamanyikasoni kuti “lisiku lya Yehofa.” (Chiwunukuko 16:14, 16; Yesaya 13:9; 2 Petulo 3:12) Ŵachachilamulidwa ni Yesu kuti ali ŵakusakala chachijonanjidwa. (Sefaniya 1:18; 2 Atesalonika 1:6-10) Yeleyi yikupwatika konanjidwa kwa dongosolo ja ndale pachilambo chosope jajikwimilidwa m’Baibulo ni chilombo cha mitwe 7.—Chiwunukuko 19:19-21.

Yakutendekwa panyuma pa yakusawusya yekulungwa

•   Kutaŵidwa kwa Satana soni yiŵanda. Lilayika lyekulungwa lichimponya Satana ni yiŵanda “mwisimbo,” kuti yikakombola kujisokonasya mitundu ja ŵandu. (Chiwunukuko 20:1-3) Satana chachiŵa mpela ali mundende, ngasakombola kutenda chilichose.—Chiwunukuko 20:7.

•   Kutanda kwa ulamusi wa yaka 1,000. Uchimwene wa Mlungu uchitanda ulamusi wakwe wa yaka 1,000, wawuchiyikasya yindu yambone yejinji ku mtundu wa ŵandu. (Chiwunukuko 5:9, 10; 20:4, 6) “Gulu jekulungwa” ja ŵandu ŵangaŵalanjika jichikopoka “mu yakusawusya yekulungwa.” Jemanjaji chachikulupuka ni kukuwona kutanda kwa ulamusi wa yaka 1,000 pachilambopa.—Chiwunukuko 7:9, 14; Salimo 37:9-11.