Kab kakrom i yib ni immoy yu ngiyal’ ni ma pi’ e am e ayuw ko girdi’ rok Jehovah. (Ezr 6:1-12; Es 8:10-13) Mus ko ngiyal’ ney ma gad ma guy boch e girdi’ ko re fayleng ney nib puluw boch rogon ni yad ma maruwel nga mat’awrad ni yad ma ayuweg e girdi’ rok Jehovah ko togopuluw ni ma k’aring “fare dragon” ni aram Satan ni Moonyan’ ngorad. Re n’ey e kan yiiynag ni aram fare but’ ni ke ful’ fapi “ran”. (Re 12:16) Yu ngiyal’ e ma k’aring Jehovah ni ir fare “Got ni ma thapegey” e pi tayugang’ ko am ni ngar rin’ed boch ban’en ni ngar ayuweged e girdi’ rok.​—Ps 68:20, BT; Pr 21:1.

Machane, uw rogon ni faanra kan kalbusnagem ni bochan e michan’ rom? Dariy ba ngiyal’ ni nge maruwaran’um nder guyem Jehovah. (Ge 39:21-23; Ps 105:17-20) Ngari pagan’um nra tow’athnag Jehovah e yul’yul’ rom. Ma bochan ni ga be par ni gab yul’yul’, ma rayog ni ngam pi’ e athamgil nga laniyan’ e pi walag u ga’ngin yang e fayleng.​—Fil 1:12-14; Re 2:10.

NGAN YALIY FARE VIDEO NI KENGGIN E KOREAN BROTHERS RELEASED FROM PRISON, NGEMU’ MIN PI’ E FULWEG KO PI DEER NI BAARAY:

• Mang fan ni kan kalbusnag bokum biyu’ e walag u South Korea u lan e pi duw ni ke yan?

• Mang boch ban’en ni kan dugliy u boch e tafen e puf oloboch ni aram e n’en ni ayuweg boch e pi walagdad ya nge yag ni ngan pagrad nib papey?

• Uw rogon nrayog ni ngad ayuweged e pi walag u ga’ngin yang e fayleng ni kan kalbusnagrad ni bochan e michan’ rorad?

• Susun ni uw rogon ni ngad maruwelgad ko puf rogon ni bay rodad e ngiyal’ ney?

• Mini’ e en ni ir e be ayuwegdad ni ngad gelgad u boch e oloboch ni kan togopuluwnag ngodad u tafen e puf oloboch?