Bay e duw rom u thilin e 23 nge 65 ma ga ma pigpig ngak Jehovah u polo’ e tayim rom, fa? Gur be’ nib fel’ fithik’ i dowam ma rayog ni ngan piem nga bang nib t’uf e ayuw ko machib riy, fa? Faanra fulweg rom ko gal deer ney e arrogon, ma kam lemnag ko rayog ni ngam fal’eg e babyor rom ni ngam un ko fare skul ni ka nog e School for Kingdom Evangelizers ngay, fa? Ka nap’an e bin som’on e class nni tay ko re skul ney, mab pag bokum biyu’ e piin mabgol, nge boch e walag ni yad ba muchugbil ni kar fal’eged e babyor rorad ni ngar uned ngay. Machane kab t’uf boch e walag ni pumoon ni yad ba muchugbil ni ngar fal’eged e babyor rorad ni ngar uned ko re skul ney. Ere mu ning e ayuw ngak Jehovah u daken e meybil ni nge ayuwegem ni ngam adag ni ngam rin’ e tin nib m’agan’ ngay mag folwok rok Fak. (Ps 40:8; Mt 20:28; Heb 10:7) Ngemu’ mag lemnag rogon ni ngam lichnag e tayim ni ga be maruwel riy ni nge yag e salpiy ngom, ara urngin e tayim ni ga be rin’ boch ban’en riy nib milfan ngom, ya nge bung rogom ni ngam un ko re skul ney.

Mang boch e kanawo’ ni ke yag rok e piin kar mu’naged e re skul ney ni ngar pigpiggad riy ngak Jehovah? Bay boch e piin kar mu’naged e re skul ney ni kan pi’rad nga boch e binaw nib thil e thin ko girdi’ riy, ara ke yag ni ngar pied e ayuw ko machib ko yungi n’en ni ma muulung e girdi’ ni yoor ngay. Ma boch e yima pi’rad nga ranod ra lekaged boch e ulung ko ngiyal’ ndabiyog ni nge yan e re walag ni ma lekag e pi ulung nem, ara yad boch e piin ma lekag e ulung, ara missionary. Ere nap’an ni ga be lemnag e n’en nrayog ni ngam rin’ ni fan ko pigpig rom ngak Jehovah, ma manga yugum sul u daken fapi thin ni yog Isaiah ni profet ni faani gaar: “Bay gu wan! Mu l’ugeg!”​—Isa 6:8.

NGAN YALIY FARE VIDEO NI KENGGIN E FIELD MISSIONARIES​—WORKERS IN THE HARVEST, NGEMU’ MIN PI’ E FULWEG KO PI DEER NI BAARAY:

• Uw rogon ni yima mel’eg e piin ngar manged missionary?

• Mang reb e maruwel nib manigil ni be rin’ e pi missionary?

• Mang boch e tow’ath ni ke yag ngak e piin yad be pigpig ni yad e missionary?