PI N’EN NI MA RIN’ E PIIN KRISTIANO
Ngad Mon’oggad ko Machib—Rogon Ndab Kun Fil e Bible Ngak e Piin Ndarur Mon’oggad ko Fol Bible
FAN NIB GA’ FAN: Thingari pining e girdi’ fithingan Jehovah ya nge yag ni ngan ayuwegrad. (Ro 10:13, 14) Machane gathi gubin e girdi’ nib m’agan’rad ngay ni ngar filed e Bible e yad ra adag ni ngar rin’ed e tin nib m’agan’ Jehovah ngay. Gadad ma fanay e tayim rodad nib fel’ rogon u nap’an ni gad be yan ko machib ni ngad ayuweged e piin nriyul’ ni yad baadag ni ngar thilyeged rogon e yafos rorad ni ngar rin’ed e tin nib m’agan’ Jehovah ngay. Faanra ba n’uw nap’an ma der yag rok faen ni be fil e Bible ni nge thilyeg boch ban’en ko yafos rok, ma sana ba fel’ ni ngad taleged fare study, ma gad gay e piin ni be pow’iyrad Jehovah ngak nge ulung rok. (Joh 6:44) Machane faanra boch nga m’on me thil boch ban’en u rarogon facha’ ni kan fil e Bible ngak ma aram e be m’ug riy ni ir be’ ni ke ‘mel’eg Got ni nge yog e yafos ndariy n’umngin nap’an ngak’, ma aram e gadad ba felfelan’ ni ngkud ululgad i fil e Bible ngak bayay.—Ac 13:48.
ROGON NI NGAN RIN’:
-
Mu pining e magar ngak ni bochan e baadag ni nge nang e tin riyul’.—1Ti 2:4
-
Mu tamilangnag ngak feni rib ga’ fan ni nge fol ko n’en ni ke fil.—Lu 6:46-49
-
Mu non ngak u fithik’ e sumunguy, mi gimew weliy fare fanathin ni murung’agen faen ni ma wereg awochngin e woldug, mag fith ngak ko mang fan nder yag ni nge mon’og.—Mt 13:18-23
-
Mu fal’eg i lemnag rogon ni ngam tamilangnag ngak fan ni ngam tal’egew e fol Bible ni gimew be tay
-
Mog ngak ni bay mu callnag ara mman ni ngam guy, ya nge yag nim pi’ e athamgil nga laniyan’, ma gog ngak nrayog ni ngkum ululgow ko fol Bible ni faanra gay rogon ni nge thilyeg boch ban’en u rarogon
NGAN YALIY FARE VIDEO, NGEMU’ MIN PI’ E FULWEG KO PI DEER NI BAARAY:
-
Mang e kam fil ko tin be yog fa gali cha’ ko fare video ni be tamilangnag ni facha’ ni yibe fil e Bible ngak e der yag ni nge mon’og ko tirok Got ban’en?
-
Uw rogon ni ke ayuweg fare walag ni pumoon facha’ ni be fil e Bible ngak ni nge tamilang u wan’ nib t’uf ni nge thilyeg boch ban’en u rarogon?
-
Mang e ke rin’ fare walag ya nge yag ni nge nang facha’ ni yibe fil e Bible ngak ni ku rayog ni ngar ululgow ko fol Bible boch nga m’on?