Nap’an ni ga ra yaliy reb e floras ara ga ra sap nga lan e lang ara ga ra yaliy e ran ni be map’ u taban bangi ban’en nga but’, gur rayog ni ngam guy feni rib manigil e tin ke ngongliy e En Tasunmiy? Tin ke sunmiy u toobdad e be tamilangnag pi fel’ngin Jehovah ndabiyog ni ngan guy. (Ro 1:20) Nap’an ni gad ra tal ngad fal’eged i yaliy boch ban’en ma rayog ni ngad nanged gelngin Got, nge rogon ni ma t’ufegey, nge gonop rok, nge rogon feni mat’aw nib muun ngay feni rib gol.​—Ps 104:24.

Mang boch ban’en ni ke sunmiy Jehovah nib ga’ ni ga ma guy ni gubin e ran? Yugu aram rogon ni ga ma par u lan reb e mach ma dabisiy ni ga ma guy e arche’ nge gek’iy. Ere, nap’an ni gad ra fal’eg i yaliy e tin ke sunmiy Jehovah ma aram e rayog ni nge achig a magafan’ rodad ma gad lemnag e tin nib ga’ fan ban’en. Re n’ey e ku rayog ni nge gelnag e michan’ rodad nra ayuwegdad Jehovah e chiney i yan nga m’on. (Mt 6:25-32) Faanra bay e bitir rom mag ayuwegrad ni ngar nanged pi fel’ngin Jehovah ndariy ban’en nrayog ni ngan taarebnag ngay. Nap’an ni gad ra felfelan’ ko tin bay u toobdad ni ke sunmiy Jehovah, ma aram e rayog ni ngad chugurgad ngak e En Tasunmiy.​—Ps 8:3, 4.

NGAN YALIY FARE VIDEO NI KENGGIN E THE WONDERS OF CREATION REVEAL GOD’S GLORY​—LIGHT AND COLOR, NGEMU’ MIN PI’ E FULWEG KO PI DEER NI BAARAY:

• Uw rogon ni pigments e ra ayuwegdad ni ngad guyed raen ban’en?

• Uw rogon ni ma thilthil ramaen ban’en ni faanra ngam thilthilyeg e gin ni ngam par riy ngam sap ngay?

• Mang fan ni faan gad ra sap nga lan e lang mab thilthil ramaen?

• Mang boch e raen nrib manigil ni kam guy ko tin ni ke sunmiy Jehovah?

• Mang fan nthingar da ted ba ngiyal’ ni ngad fal’eged i yaliy e tin ke sunmiy Jehovah?