Ba ga’ fan u wan’ Jehovah e n’en ni ke micheg e piin mabgol ngorad. Ke yog nthingar ra pared u taabang ndab ra dargad. (Mt 19:5, 6) Boor e girdi’ rok Got nib fel’ e mabgol rorad. Machane dariy reb e mabgol nib flont, ya ra munmun me sum boch e magawon riy. Thingar dab da lemgad ni bod yooren e girdi’ ni ma lemnag nnap’an nra sum e magawon u thilin ba wu’ e mabgol, ma aram e ba fel’ ni nge bagayow me par rok ara ngar dargow. Ere uw rogon ni nge ayuweg e piin Kristiano e mabgol rorad?

Am lemnag lal e kanawo’ nib ga’ fan nrayog ni ngan rin’ e re n’ey riy.

1. Mu siyeg boch ban’en nra magawonnag lanin’um ni bod ni ngaum ngongol ara ngaum thin i gosgos ngak be’ ni be m’ug riy ni ga baadag facha’, ara um beeg ara um yaliy boch ban’en ni bay yaan e ngongol ndarngal riy. Pi n’ey e ra warnag e tha’ u thilin e mabgol.​—Mt 5:28; 2Pe 2:14.

2. Mu gelnag e tha’ u thilmew Got, mag guy rogon ni nge ga’ fan u wan’um e n’en nib m’agan’ ngay ni ngam rin’ u lan e mabgol rom.​—Ps 97:10.

3. Mon’ e bin nib beech i pangiy nga dakenam mu um rin’ nochi ban’en nib achig ni fan ko en mabgol rom nra felfelan’ ngay.​—Kol 3:8-10, 12-14.

4. Gubin ngiyal’ ni nge fel’ rogon e numon u thilmew e en mabgol rom ma ngaum nonow ngomew u fithik’ e tayfan.​—Kol 4:6.

5. Ra bigimew ma nge rin’ e n’en nib milfan ngak ni bay rogon ko par u thilin e mabgol u fithik’ e t’ufeg.​—1Ko 7:3, 4; 10:24.

Nap’an nra tayfan e piin Kristiano e mabgol rorad, ma aram e yad be tayfan Jehovah ni Ir e Ke Sunmiy e mabgol.

NGAN YALIY FARE VIDEO NI WE MUST “RUN WITH ENDURANCE”​—OBEY THE RULES OF THE CONTEST, NGEMU’ MIN PI’ E FULWEG KO PI DEER NEY:

• Yugu aram rogon nra mabgol l’agruw ni’ ko som’on mab fel’ e mabgol rorow, machane mang boch e magawon nrayog ni nge sum?

• Uw rogon nrayog ni nge ayuweg e pi kenggin e motochiyel u Bible ba wu’ e mabgol ni faanra yow be lemnag ndakuriy e t’ufeg u thilrow?

• Mang boch e motochiyel ni ke ngongliy Jehovah ni fan ko piin mabgol?

• Faanra nge par e mabgol rok l’agruw ni’ nib fel’, ma mang e ba t’uf ni ngar rin’ew?