I par Samuel nib yul’yul’ ngak Jehovah u n’umngin nap’an e yafos rok. Nap’an ni kab bitir, me siyeg ndabi ngongol ni bod rogon fa gal pagel ni fak Eli ni ka nog Hofni nge Finehas ngorow. (1Sa 2:22-26) Ere nap’an ni be ilal Samuel i yan ma bay Jehovah rok. (1Sa 3:19) Nap’an ni pilibthir ma ka be ulul ni nge pigpig ngak Jehovah u fithik’ e yul’yul’ ni yugu aram rogon ni fa gal pagel ni fak e dar yul’yul’gow.​—1Sa 8:1-5.

Mang e rayog ni ngad filed ko n’en ni rin’ Samuel? Faanra kab fel’ yangarem, ma nge pagan’um ngay ni manang Jehovah e magawon ni ga be mada’nag nge rogon lanin’um. Rayog ni nge ayuwegem ni ngam par ndab mu rus. (Isa 41:10, 13) Faanra gur reb e gallabthir ni ke tal fakam ko pigpig ngak Jehovah, ma dabi mulan’um ya mus ngak Samuel ma de yag ni nge towasariy fa gal pagel ni fak ni ngar folgow ko pi motochiyel rok Jehovah. I pag fan e magawon rok ngak Jehovah, me par nib yul’yul’ me rin’ e n’en nib m’agan’ Jehovah ngay ni Chitamangin ni bay u tharmiy. Sana ngongol rom nib fel’ e ra k’aring fakam ni nge sul ngak Jehovah.

NGAN YALIY FARE VIDEO NI LEARN FROM THEM​—SAMUEL, NGEMU’ MIN PI’ E FULWEG KO PI DEER NEY:

• Uw rogon ni dag Samuel nder rus u nap’an ni kab bitir?

• Uw rogon ni dag Danny nder rus?

• Uw rogon ni dag Samuel e kanawo’ nrayog ni ngan folwok riy u nap’an ni ke pilibthir?

• Uw rogon ni dag e gallabthir rok Danny e kanawo’ nib fel’ nrayog ni ngan folwok riy?