FAN NIB GA’ FAN: Boor e girdi’ ni yad ba malmit e dubrad ni ngar nonad ngak be’ ndar nanged. Aram fan nib t’uf ni ngad nanged rogon ni ngad machibnaged e girdi’ ni aray rogon. Piin nib malmit e ri yad ba t’uf rok Jehovah ma ma lemnagrad. (Le 19:14) Ku arrogodad nrayog ni ngad athamgilgad ngad ayuweged e pi girdi’ ney ni ngar filed murung’agen Jehovah.

ROGON NI NGAN RIN’:

• Ngan ‘gay’ e piin nib malmit. (Mt 10:11) Ga manang be’ ni bay reb i girdien e tabinaw rok nib malmit, fa? Bay reb e skul, ara bang ni ma par e piin pilibthir riy ni bay boch i yad nib malmit, ara yu yang ni yima ayuweg e piin nib malmit riy ni yad baadag boch e babyor rodad ni kan ngongliy ni fan ko piin nib malmit, fa?

• Mu dag ni ga be lemnagrad. Ga ra gol ngak be’ nib malmit, mu kum dag nri ga be lemnag ma ra ayuweg ni nge pagan’ ngom. Mu guy rogon ni ngam weliyew murung’agen ban’en ni baadag e girdi’ ko gin ga be machib riy ni ngan weliy murung’agen

• Ngan pi’ boch e babyor ngorad nra ayuwegrad ko tirok Got ban’en. Ra nge yag ni ngan ayuweg e piin nib mo’maw’ ni ngar guyed ban’en ara piin nib malmit, ma bay e babyor nib thilthil e format riy ni ke fal’eg e ulung ni fan ko pi girdi’ ney. Ere mu fith ngak ko uw rogon ni baadag ni nge fil boch ban’en. Faen ni ir e service overseer e susun e nge micheg nre format ko babyor ni ke yoloy fare walag ni ma yarmiy e babyor nga but’ ni ngan pi’ e aram e bin ni baadag facha’ nib malmit