Ra ngan yal’uwegem ma be yip’ fan ni ngan fil ban’en ngom ma yibe fonownagem, machane kub muun ngay ni ngan llowan’nagem nge ngan gechignagem. Ma yal’uwegdad Jehovah ya nge yag nda liyorgad ngak u rogon nib m’agan’ ngay. (Ro 12:1; Heb 12:10, 11) Yu ngiyal’ e rayog nib mo’maw’ ni nge m’agan’dad nga rogon ni yibe yal’uwegdad, machane re n’ey e rayog ni nge mat’awnagdad miki yib angin ngodad. (Pr 10:7) Mang e susun ndabi pagtalin e piin yad be yal’uweg be’, nge piin yibe yal’uwegrad?

En be yal’uweg be’. Piin piilal, nge piin gallabthir, nge yugu boch e girdi’ e ri yad ma guy rogon ni ngar yal’uweged be’ u fithik’ e sumunguy nge t’ufeg ni bod rogon ni ma rin’ Jehovah. (Jer 46:28) Mus ni faanra ba gel e fonow ni ngan pi’ ngak be’, ma susun e ngan rin’ u reb e kanawo’ nib puluw ko denen ni ke rin’, ma ngkun rin’ ni bochan e yibe t’ufeg facha’ ni yibe fonownag.​—Tit 1:13.

En yibe yal’uweg. Demtrug rogon ni kan yal’uwegdad ma susun e dab da siyeged, ya ngad guyed rogon ni ngad folgad riy ni ka chingiyal’ nem. (Pr 3:11, 12) Bochan ndawor da flontgad, ma aram fan ni gad gubin nib t’uf ni ngan yal’uwegdad u boch e kanawo’ nib thilthil. Rayog ni ngan yal’uwegdad u daken e pi n’en gad ma beeg u Bible, ara pi n’en gad ma rung’ag u nap’an e muulung. Yu ngiyal’ e ku rayog nib t’uf ni nge yib dalip e piilal nga taabang ni ngar yal’uweged gadad. Faanra m’agan’um nga rogon ni kan yal’uwegem mag fol riy, ma aram e rayog ni nge fel’ e par rom miki yag e yafos ni manemus ngom.​—Pr 10:17.

NGAN YALIY FARE VIDEO NI “THOSE WHOM JEHOVAH LOVES HE DISCIPLINES,” NGEMU’ MIN PI’ E FULWEG KO PI DEER NEY:

• Uw rogon e par rok Canon u nap’an ni kab bitir, ma uw rogon ni thil e par rok?

• Uw rogon ni yal’uweg Jehovah Canon u fithik’ e t’ufeg?

• Mang e gad be fil ko n’en ni buch rok Canon?