Nap’an ni i machib Jesus, ma i fanay e pi n’en i buch e ngiyal’ nem ni nge fil ban’en riy ko girdi’. (Lu 13:1-5) Ku rayog ni ngam weliy e n’en be buch e ngiyal’ ney ya ngam k’aring e girdi’ ni ngar adaged ni ngar motoyilgad ko fare thin nib fel’ ni murung’agen Gil’ilungun Got. Tomuren ni kam weliy murung’agen e magawon ko salpiy, ara ban’en ni ke buch ni ke gafgow e girdi’ riy, ara wagey ni yibe tay u bang, ara boch e falay ni kireb ni kan mecham ngay, ara ban’en ni bod e pi n’ey, mag fith reb e deer nra pug e tafinay rok facha’. Rayog ni ngam fith ni nge lungum: “Ga be lemnag ni bay ba ngiyal’ nra m’ay e . . . ?” ara “Mang e ga be lemnag nra chuweg e . . . ?” Ngemu’ mag beeg reb e thin nu Bible ni bay rogon ko re n’ey. Faanra baadag facha’ e n’en gimew be weliy, mag dag reb e video ngak ara ba ken e babyor ni bay ko fare Tafen Talin e Maruwel ni Yima Fil Ban’en Riy ko Girdi’. Manga yugu da rin’ed urngin ban’en ni fan ko fare “Thin Nib Fel’” u nap’an ni gad be guy rogon ni ngad k’aringed e girdi’ ko gin gad be machib riy ni ngar adaged ni ngar motoyilgad.​—1Ko 9:22, 23.

Mang boch ban’en nsana ra adag e girdi’ ko gin ga ma machib riy ni ngar motoyilgad ngay?