FAN NIB GA’ FAN: Machib u telefon e aram reb e kanawo’ nib ga’ fan nrayog ni ngan weliy riy ngan nang fare “Thin Nib Fel’ ni yib rok Got.” (Ac 20:24) * Ireray reb e kanawo’ nrayog ni ngad machibnaged riy e piin dabiyog ni nga darod nga taferad.

ROGON NI NGAN RIN’:

• Mu fal’eg rogom. Mmel’eg ban’en ni ngam weliy nra adag e girdi’ ni ngar nanged. Ngemu’ mag yoloy nga but’ e n’en ni ga baadag ni ngam weliy. Ku rayog ni ngam yoloy ban’en nga but’ ni nga mog ni faanra kam call ma masin e ke non ngom. Ba fel’ ni ngam par nga reb e tebel ma bay fare gi babyor ni kam yoloy e n’en ni nga mog ngay u charem nge ku boch ban’en nib t’uf rom, ni bod e phone ara tablet rom ni ngaum guy fare JW Library^® ara jw.org^® riy

• Dab mu tinna’. Mu non ni bod rogon ni ga ma non. Mu siminmin ma ga non ni be un paam ngay ni gowa bod nrayog ni nge guyem facha’ ni ga be non ngak. Dab mu tal ko numon nib n’uw nap’an. Ba manigil ni faanra ngam rin’ed boch e girdi’ e re n’ey u taabang. Ma faanra ke fith be’ reb e deer ngom, ma rayog ni ngam sul u daken nib ga’ lamam ya nge yag ni rung’ag e en bay u toobem me ayuwegem ni ngam pirieg e fulweg riy

• Mu fith reb e deer ngak facha’ nrayog ni ngam weliyew e fulweg riy ko yay ni migid ni ga ra callnag. Faanra baadag facha’ e n’en kam weliyew, ma rayog ni ngam fith reb e deer ngak ni ngam weliyew e fulweg riy ko yay ni migid ni ga ra callnag. Ku rayog ni ngam fith ngak ko rayog ni ngam e-mailnag, ara mman mu pi’ ba ken e babyor ngak nga tafen, ara mu mailnag ngak. Fa reb e rayog ni ngam fith ngak ko rayog ni ngam textnag ara mu e-mailnag reb e video rodad ara reb e article ngak. Ma faanra ba puluw ni ngam rin’, mag weliy ban’en ni bay ko website rodad