Dabki n’uw nap’an ma dabki gum’an’ Jehovah u puluwon e re fayleng ney. Yira thang e pi yurba’ i teliw ni googsur, me chel ba ulung i nam ngar chamgad ko girdi’ rok Got, me thang Jehovah e piin nib kireb u nap’an e Armageddon. Piin Kristiano e yad be sonnag e ngiyal’ nra buch e pi n’ey nib ga’ fan.

Riyul’ ndad nanged urngin ban’en nra buch ni bay rogon ko fare gafgow nib ga’. Bod ndad nanged e ngiyal’ nra tabab. Ku dad nanged fan nra yog e pi am ni ngar thanged e pi yurba’ i teliw. Ku dad nanged n’umngin nap’an nra cham e pi nam ko girdi’ rok Got ara n’en nib muun ko re n’ey. Ku dad nanged e n’en nra fanay Jehovah ni nge thang e piin nib kireb u nap’an e Armageddon.

Machane ba gaman e n’en be yog e Bible ngodad nra ayuwegdad ni ngad pared nib pagan’dad, ma dab da rusgad ko pi n’en nra buch boch nga m’on. Bod ni gad manang ni gad be par u tungun e “tin tomren e rran.” (2Ti 3:1) Ku gad manang ni yira “lichnag” e rran ni yira cham ko pi yurba’ i teliw ya nge dabi un e baan riyul’ e teliw ko mogothgoth. (Mt 24:22) Ku gad manang nra ayuweg Jehovah e girdi’ rok. (2Pe 2:9) Ku gad manang ni En ke mel’eg Jehovah ni nge thang e piin nib kireb me ayuweg e yafos rok girdien fare ulung nib ga’ u nap’an e Armageddon e ir be’ nib mat’aw mab gel gelngin.​—Re 19:11, 15, 16.

Ba mudugil ni pi n’en nra buch boch nga m’on e ra k’aring e girdi’ ni ngar ‘awgad nga but’ ko marus.’ Machane faan gad ra beeg murung’agen rogon ni i ayuweg Jehovah e girdi’ rok kakrom nge n’en ke yog nra buch boch nga m’on ma gad fal’eg i lemnag, ma aram e rayog ni ngad ‘sak’iygad ngad changargad nga lang,’ ya ba pagan’dad ni ke chugur ni ngan chuwegdad u fithik’ e gafgow.​—Lu 21:26, 28.