Ra nap’an e pul ni November, ma gad ra athamgil ni ngad machibnaged ko girdi’ ni ke chugur reb e fayleng ni kab fel’ boch. (Ps 37:10, 11; Re 21:3-5) Ere mu fal’eg e schedule rom ya nge yag nim un ko re campaign ney ni yira tay. Faanra kam fal’eg e babyor rom ni ngam un ko pioneer ni ayuw ko re pul nem, ma aram e rayog ni ngam mel’eg ni ngam machib u lan 30 ara 50 e awa.

Mmel’eg reb e thin nu Bible ni be weliy murung’agen e bin nib beech e fayleng ni ngam beeg ngak urngin e girdi’ nrayog rom. Nap’an ni ga be mel’eg e thin nu Bible ni ngam beeg, mag lemnag e n’en nra adag e girdi’ ko gin ga be machib riy ni ngar motoyilgad ngay. Faanra baadag facha’ ni kam mada’gow ko yay nsom’on e n’en kam weliyew murung’agen, mag pi’ ba ken Fare Wulyang ko Damit No. 2 2021 ngak ni fan ko girdi’ ni yoor. Mu sul ngam guy nib papey mag guy rogon ni ngam tababgow i fil e Bible ni gimew be fanay fare brochure ni Mu Par Ndariy N’umngin Nap’an ni Gab Felfelan’! Ri gad ba felfelan’ ni ngad uned i machibnag fare “thin nib fel’ ni murung’agen ban’en ni kab pag feni fel’”!​—Isa 52:7, NW.

NGAN YALIY FARE ORIGINAL SONG VIDEO NI THE NEW WORLD TO COME, NGEMU’ MIN PI’ E FULWEG KO PI DEER NEY:

• Mang boch ban’en nib manigil ni ka bay nga m’on ni be lemnag fachi buliyel?

• Mang boch ban’en u rarogon e bin nib beech e fayleng ni ga be athapeg?

• Faanra um fal’eg i lemnag e athap rom, ma uw rogon nra ayuwegem ni ngam fal’eg rogom ni ngam un ko fare campaign ni yira tay ko November?​—Lu 6:45