Gad Ra Fel’ u Wan’ Got ni Faan Gad Ra Par ni Gad Ba Yul’yul’
“Ngam pired ni gimed bod e piin nib mich Kristus u wun’rad ma ba gum’an’rad, ma aram fan ni ke yog ngorad e tin ni yog Got nra pi’.”—HEB. 6:12.
TANG: 3, 54
1, 2. Mang ban’en nib mo’maw’ ni mada’nag Jefthah nge fare rugod ni fak?
BAY reb e rugod ni ke mil i yan ni nge mada’nag e chitamangin. Kari felfelan’ ni ke guy e chitamangin ni ke sul ko mahl. I mil i yan ko chitamangin ni be tang ma be churu’ ni kari felfelan’ ni bochan e ke gel e chitamangin ko mahl. Machane, miri gin ko n’en ni yog e chitamangin nge n’en ni rin’, ya guchthuy e mad rok ni kari kireban’ me tolul ni gaar: “Ah, fakag! Ka rim kirebnag lanin’ug!” Ma aram me yog ngak ni bay ban’en ni ke micheg ngak Jehovah nra thilyeg e yafos rok fare rugod ni fak. Bochan e n’en ni ke micheg ma aram e dabkiyog ni nge mabgol fare rugod ni fak ara fakay e bitir. Machane, ka chingiyal’ nem me yog fare rugod ban’en nri pi’ e athamgil nga laniyan’ e chitamangin. I yog ngak ndabi thilyeg e n’en ni ke micheg ngak Jehovah. Thin ni yog e be m’ug riy ni be pagan’ ngak Jehovah ndemtrug e n’en nra yog ngak ni nge rin’, ma ra yib angin ngak. (Judg. 11:34-37, BT) Nap’an ni guy e chitamangin gelngin e michan’ rok fare rugod ni fak, miri felfelan’ ngak ni bochan e manang nrib felfelan’ Jehovah ko n’en ni ke m’agan’ ngay ni nge rin’.
2 I pagan’ Jefthah nge fare rugod ngak Jehovah nge rogon ni ma rin’ boch ban’en. Kar parew ni yow ba yul’yul’ ngak ngki mada’ ko ngiyal’ nib mo’maw’ ngorow ni ngar parew ni yow ba yul’yul’. Yow baadag ni ngar fel’gow u wan’ Jehovah, ma kab ga’ fan e re n’em u wan’row ko pi n’en ni yow ra pag fan.
3. Mang fan nrayog ni nge ayuwegdad e n’en ni buch rok Jefthah nge fare rugod ni fak e ngiyal’ ney?
3 De mom ni ngad pared ni gad ba yul’yul’ ngak Jehovah. Ya ba t’uf ni ngad ‘athamgilgad nguud pired ko fare mich ni ke pi’ Got.’ (Jude 3) Ere, n’en nrayog ni nge ayuwegdad e aram e ngad filed rogon ni yag rok Jefthah nge fare rugod ni fak ni ngar athamgilgow u fithik’ boch ban’en nib mo’maw’ nranow u fithik’. Uw rogon nra parew ni yow ba yul’yul’ ngak Jehovah?
NGAN PAR NI YIB YUL’YUL’ U FITHIK’ BOCH BAN’EN KO RE FAYLENG NEY NRAYOG NI NGE MAGAWONNAGEY
4, 5. (a) Mang e yog Jehovah ngak piyu Israel u nap’an ni ka ranod nga lan fare Nam ni Kan Micheg? (b) Mang wenegan ni ke yib ko fare nam nu Israel ni bochan e dar folgad rok Jehovah nrogon ni be weliy e Psalm 106?
4 Gubin e rran ni i par Jefthah nge fare rugod ni fak ni yow be lemnag wenegan ni ke yib ni bochan e de par piyu Israel ni yad ba yul’yul’ ngak Jehovah. Ba chugur ko 300 e duw u m’on riy, me yog Jehovah ngak piyu Israel ni ngar thanged owchen e piin ni yad ma liyor nga boch e got ni googsur u lan fare Nam ni Kan Micheg, machane dar rin’ed e n’en ni yog ngorad. (Deut. 7:1-4) Boor e girdi’ nu Israel e ra uned ko liyor nga boch e got ni googsur, ma kur uned i rin’ boch e ngongol nib kireb ni bod rogon e girdi’ nu Kanaan.—Mu beeg e Psalm 106:34-39.
5 Ere, bochan nde fol piyu Israel rok Jehovah ma aram fan nde ayuwegrad u pa’ e pi toogor rorad. (Judg. 2:1-3, 11-15; Ps. 106:40-43) Ba mudugil nib mo’maw’ ko pi tabinaw nib t’uf Jehovah rorad ni ngar pared ni yad ba yul’yul’ ngak u nap’an e pi duw nem. Machane, be weliy e Bible murung’agen boch e girdi’ ni ur pared ni yad ba yul’yul’ ni bod rogon Jefthah, nge fare rugod ni fak, nge Elkanah, nge Hannah, nge Samuel. Kar dugliyed u wan’rad ni ngar rin’ed e tin nib m’agan’ Got ngay.—1 Sam. 1:20-28; 2:26.
6. Mang boch ban’en ko re fayleng ney nrayog ni nge magawonnagdad e ngiyal’ ney, ma mang e susun ni ngad rin’ed?
6 Girdi’ e ngiyal’ ney e yad ma lem maku yad ma ngongol ni bod rogon e girdi’ nu Kanaan. Kar pared nib ga’ ni ngongol ndarngal, nge cham, nge salpiy e ir e ba m’on u wan’rad. Machane, ba tamilang e ginang ni be pi’ Jehovah ngodad. Ya baadag ni nge ayuwegdad ni bod rogon ni ayuweg piyu Israel ndab ra uned ko pi ngongol ney ni un rin’ kakrom. Ere gur, rayog ni ngad filed ban’en ko oloboch rorad? (1 Kor. 10:6-11) Thingar da athamgilgad u rogon nrayog rodad ni ngad siyeged e pi lem ko re fayleng ney. (Rom. 12:2) Ere gad ra athamgil ni ngad rin’ed e re n’ey u rogon nrayog rodad, fa?
NGAD PARED NI GAD BA YUL’YUL’ U NAP’AN NI KAN RIN’ BOCH BAN’EN NI DUBDAD
7. (a) Mang boch ban’en ni rin’ e girdi’ rok Jefthah ngak nde mat’aw? (b) Mang e rin’ Jefthah?
7 Nap’an Jefthah ma i gafgownag piyu Filistia nge piyu Ammon e girdi’ nu Israel ni bochan e dar folgad rok Jehovah. (Judg. 10:7, 8) Machane, gathi kemus e magawon ni i mada’nag Jefthah, ya mus ko pi pumoon ni walagen nge pi tayugang’ nu Israel ni ur rin’ed boch ban’en ngak nde mat’aw. Ere, bochan e awan’ nge fanenikan rorad ngak, ma aram mar tulufed nge chuw ko re binaw ni baaram ni kan pi’ ni gayog rok. (Judg. 11:4-11) De pag Jefthah e ngongol rorad nib kireb ni nge magawonag laniyan’. Uw rogon ni kad nanged e re n’em? Ya nap’an ni wenig e pi tayugang’ ko re nam nem ni nge ayuwegrad, me rin’ ni ka chingiyal’ nem. (Judg. 11:4-8) Ere, mang e n’en nrayog ni ir e k’aring Jefthah ni nge ngongol ni aram rogon?
8, 9. (a) Mang e pi kenggin e motochiyel nib l’ag rogon ko fare Motochiyel rok Moses ni ayuweg Jefthah? (b) Mang e n’en th’abi ga’ fan u wan’ Jefthah?
8 Jefthah e ir reb e salthaw nib falu’. Ri manang e pi n’en ni i buch rok piyu Israel nge fare Motochiyel rok Moses. Rogon ni i ngongol Jehovah ko girdi’ Rok e ayuweg ni nge nang rogon ni ma lemnag Got e tin nib mat’aw nge tin nde mat’aw ban’en. (Judg. 11:12-27) Aram e pi n’en ni ayuweg Jefthah u rogon ni nge dugliy boch ban’en u lan e yafos rok. Manang rogon ni ma lemnag Jehovah e damumuw nge ngan fulweg taban e kireb, nge rogon ni baadag ni nge dag e girdi’ Rok e t’ufeg ngorad. Ki fil u lan fare Motochiyel rogon ni nga i ngongol ko girdi’ nib muun ngay e piin ni ur fanenikayed.—Mu beeg e Exodus 23:5; Levitikus 19:17, 18.
9 Dabisiy ni fil Jefthah ban’en ko n’en ni buch rok Josef. Ba mudugil ni manang rogon ni runguy Josef pi walagen ni yugu aram rogon ni ur ‘fanenikayed.’ (Gen. 37:4; 45:4, 5) Pi n’ey ni i lemnag Jefthah e ayuweg ni nge ngongol u rogon nib m’agan’ Jehovah ngay. Ya dariy e maruwar riy ni kari kireban’ ko n’en ni ke rin’ fapi pumoon ni walagen ngak. Machane, de tal ndaki pigpig ngak Jehovah, maku de tal ndaki ayuweg e girdi’ Rok. (Judg. 11:9) Kab ga’ fan u wan’ ni nge cham ni fan nga fithingan Jehovah ko bin ni nga i par nga i lemnag e pi magawon ni be mada’nag. Ke dugliy u wan’ ni nge par nib yul’yul’ ngak Jehovah. Ma n’en ni rin’ e yib angin ngorad piyu Israel.—Heb. 11:32, 33.
10. Uw rogon ni ngad paged e pi kenggin e motochiyel rok Got ni nge ayuwegdad ni ngad ngongolgad ni bod e piin Kristiano e ngiyal’ ney?
10 Ere gur, gad ra fil ban’en ko n’en ni buch rok Jefthah? Mang e gad ra rin’ ni faanra ke rin’ boch e walag u lan e ulung ban’en ngodad ni ke kirebnag lanin’dad? Susun e dab da paged e pi n’en ni ke kirebnag lanin’dad ni nge talegdad ko pigpig ni gad be tay ngak Jehovah. Dab mu tal ko muulung ni bochan e re n’ey, ara mu tal ndab kum chag ko girdi’ u lan e ulung. Ngad folgad rok Jehovah ni bod e n’en ni rin’ Jefthah. Ya re n’ey e ra ayuwegdad ni ngad pithiged boch e magawon ni gad ma mada’nag nib mo’maw’, ma gad dag e kanawo’ nib manigil ni nge folwok boch e girdi’ riy, ni bod e n’en ni rin’ Jefthah.—Rom. 12:20, 21; Kol. 3:13.
RA PAG BE’ FAN BOCH BAN’EN MA BE DAG FENI GEL E MICHAN ROK
11, 12. Mang e micheg Jefthah ngak Jehovah, ma mang e be yip’ fan e re n’ey?
11 Manang Jefthah ni faanra nge chuweg piyu Israel u tan pa’ piyu Ammon mab t’uf e ayuw rok Jehovah. Ere, micheg ngak Jehovah ni faanra ayuweg nge gel ngak piyu Ammon, ma cha’ nra yib ni ngar mada’gow nsom’on u nap’an nra sul nga tafen e aram e cha’ nra pi’ ngak Jehovah ni nge mang “maligach” ni mooruf. (Judg. 11:30, 31, BT) Mang e be yip’ fan e re n’ey?
12 Rogon ni bay ko motochiyel rok Jehovah e ba fanenikan ni ngan pi’ be’ ni maligach. Ere, ba tamilang ni gathi be lemnag Jefthah ni nge ognag be’ ni maligach. (Deut. 18:9, 10) Ya rogon ni bay ko Motochiyel rok Moses e maligach ni yima urfiy e ba tow’ath ni ma pi’ be’ nib polo’ ngak Jehovah. Ere, be yip’ Jefthah fan ni en nra pi’ ngak Jehovah e ra pigpig ngak u tabernacle u n’umngin nap’an e yafos rok. I m’agan’ Jehovah ko n’en ni yog Jefthah ma aram me ayuweg ni nge gel ko mahl. (Judg. 11:32, 33) Machane, mini’ e ra pi’ Jefthah ngak Jehovah ni nge mang “maligach” ni mooruf?
13, 14. Mang e be dag fapi thin ni yog Jefthah ko Judges 11:35 u rogon feni gel e michan’ rok?
13 Am lemnag e n’en ni kan weliy u tabolngin e re article ney. Nap’an ni sul Jefthah ko mahl, ma fare rugod ni fak nrib t’uf rok e ir e som’on ni yib ni nge mada’nag. Ma gad manang ni kari mus fak aram! Ere gur, ka ra par Jefthah nib yul’yul’ ko n’en ni ke micheg? Ma ka ra pi’ fare rugod ni fak ni nge pigpig ngak Jehovah u tabernacle u n’umngin nap’an e yafos rok, fa?
14 Ba mudugil ni fapi kenggin e motochiyel rok Got e ir e ayuweg Jefthah ni nge dugliy e n’en nib fel’ ni nge rin’. Sana ke yib ngan’ fapi thin ni yog Jehovah ko girdi’ rok u Exodus 23:19 ni aram e susun ni nge m’agan’rad ngay ni ngar pied e tin th’abi fel’ rorad ngak. Ku be yog e Motochiyel nnap’an nra micheg be’ ban’en ma dabkiyog ni nge thilyeg. Be gaar: “Nap’an nra mow be’ . . . ngak Somol . . . , ma thingari dabi pag e n’en ni ke micheg, ma thingari rin’ urngin e tin ni yog ni nge rin’.” (Num. 30:2, BT) Yugu aram rogon ni manang Jefthah e n’en nra buch rorow fare rugod ni fak, machane thingari tay u gil’ e n’en ni ke micheg, ni bod rogon e n’en ni rin’ Hannah ni be’ nib yul’yul’ ni sana ku immoy u nap’an Jefthah. Bochan ni nge pigpig fare rugod ni fak u tabernacle, ma aram e dabiyog ni nge fakay e bitir. Ere, dariy be’ nra fek ngachalen Jefthah me lekag tafen. (Judg. 11:34) Machane, ki yog Jefthah u Judges 11:35 (BT) ni gaar: “Kug ngongliy ba m’ag ni kug micheg ngak Somol, ni dabkiyog ni nggu sulweg!” Ere, ke m’agan’ Jehovah ko fare maligach ni pi’ Jefthah ngak, ma ke tow’athnag ni bochan. Faan gomanga gur Jefthah, ma ga ra par ni gab yul’yul’, fa?
15. Mang e ke micheg boor i gadad ngak Got, ma uw rogon ni ngad ted u gil’ e n’en ni kad micheged?
15 Nap’an nda ognaged e yafos rodad ngak Jehovah, ma gad micheg ngak ni gad ra rin’ e tin nib m’agan’ ngay ni yugu demtrug rogon. Gad manang nde mom ni ngad ted u gil’ e n’en ni kad micheged ngak Got. Rayog ni ngari mo’maw’ e re n’ey ngodad ni faanra ka nog ban’en ngodad ni ngad rin’ed ndubdad. Machane faan gad ra athamgil ndab da rusgad me m’agan’dad ngay ni ngad folgad rok Got, ma aram e gad be tay u gil’ e n’en ni kad micheged. Sana de mom ni ngad paged fadad u boch ban’en, machane pi tow’ath ni ma pi’ Jehovah e kab fel’ ko pi n’en ni kad paged fan. (Mal. 3:10) Machane, uw rogon fare rugod ni fak Jefthah?
Uw rogon nrayog ni ngad folwokgad rok Jefthah nge fare rugod ni fak u rogon feni gel e michan’ rorow? (Mu guy e paragraph 16 nge 17)
16. Mang e rin’ fare rugod ni fak Jefthah u nap’an ni yog e chitamangin ngak ni nge rin’ ban’en nder lemnag ni nge rin’? (Mu guy e sasing ni bay u tabolngin e re article ney.)
16 N’en ni ke micheg Jefthah e ba thil ko n’en ni ke micheg Hannah. Hannah e micheg ni nge pi’ Samuel ni fak ni nge pigpig u tabernacle ni ir reb e Nazirite. (1 Samuel 1:11) Pi Nazirite e rayog ni ngar mabgolgad me yag e tabinaw ngorad. Machane, fare rugod ni fak Jefthah e nge par ni bod ba “maligach ni mooruf.” Ere dabiyog ni nge un ko mabgol me fakay e bitir. (Judges 11:37-40, BT) Susun nrayog ni nge leay reb e pumoon nib fel’ u Israel ni bochan e chitamangin e ir be’ nib ga’ lungun ko re nam nem. Machane, thingari mang reb e tapigpig u tabernacle. Ere, mang e rin’ e re rugod ney? I dag nib m’on e tirok Got ban’en u wan’ u nap’an ni yog ngak e chitamangin ni gaar: “[Mu] rin’ e tin ka mog ni ngam rin’ ngog.” (Judges 11:36, BT) I pag laniyan’ ndabi un ko mabgol maku dabi fakay e bitir ni bochan e nge pigpig ngak Jehovah. Ere, uw rogon nrayog ni ngad folwokgad rok u rogon ni pag fan ir u boch ban’en?
17. (a) Uw rogon nrayog ni ngad folwokgad rok Jefthah nge fare rugod ni fak u rogon feni gel e michan’ rorow? (b) Uw rogon ni be pi’ fapi thin ni bay ko Hebrews 6:10-12 e athamgil nga lanin’um ni ngam pag fam u boch ban’en?
17 Bokum biyu’ e walag ni pumoon nge ppin ni Kristiano ni kab fel’ yangarrad ni ke m’agan’rad ngay ni ngar paged lanin’rad ndab ra uned ko mabgol, maku dab ra fakayed e bitir e chiney. Mang fan? Bochan e yad baadag ni ngar yoornaged e tayim rorad ko pigpig ni yad be tay ngak Jehovah. Ku boor e walag ni kar piilalgad boch ni yad be fanay e tayim nrayog ni nguur rin’ed pi fakrad nge pi tungirad boch ban’en riy u taabang ni fan e ngar rin’ed boch ban’en ni fan ngak Jehovah. Boch i yad e ma un ko dimow Kingdom Hall nge ku boch e naun ni yima fanay ni fan ko liyor ngak Jehovah, ara ngar uned ko fare skul ni ka nog e School for Kingdom Evangelizers ngay mi yad yan nga boch e ulung nib t’uf e ayuw riy. Boch i yad e kar paged fan e tirorad ban’en ni fan e ngar yoornaged e tayim rorad ni fan ko machib u m’on ngu tomuren e Puguran. Dabi pag Jehovah talin e maruwel ni be rin’ e pi walag ney nge rogon ni yad be dag nib t’uf rorad. (Mu beeg e Hebrews 6:10-12.) Me gur, rayog rom ni ngam pag fam u boch ban’en ya nge yag nim yoornag e tayim rom ni fan ko pigpig ngak Jehovah, fa?
PI N’EN NI KAD FILED RIY
18, 19. Mang e kad filed rok Jefthah nge fare rugod ni fak, ma uw rogon nrayog ni ngad folwokgad rorow?
18 Mang e ayuweg Jefthah ni nge gel nga boch ban’en ni mada’nag nib mo’maw’? I pag Jehovah ni nge pow’iy u rogon ni nge dugliy boch ban’en u lan e yafos rok. I dugliy ndabi pag e girdi’ u tooben ni nge magawonnag e michan’ rok. I par Jefthah nib yul’yul’ ngak Jehovah ni yugu aram rogon ni immoy boch e girdi’ ni ur rin’ed boch ban’en ngak ndabun. I tow’athnag Jehovah Jefthah nge fare rugod ni fak ni bochan e pi n’en ni m’agan’row ngay ni ngar pagew fan, me fanayrow ni ngar rin’ew boch ban’en ni fan ko bin riyul’ e liyor. Yugu aram rogon ni immoy boch e girdi’ e ngiyal’ nem ndakur folgad ko pi motochiyel rok Got, machane Jefthah nge fare rugod ni fak e ra parew ni yow ba yul’yul’ ngak Jehovah.
19 Be yog e Bible ni ngad ‘pired ni gad bod e piin nib mich Kristus u wun’rad ma ba gum’an’rad, ma aram fan ni ke yog ngorad e tin ni yog Got nra pi’.’ (Heb. 6:12) Ere, ngad folwokgad rok Jefthah nge fare rugod ni fak ni bochan e gad manang ni faan gad ra par ni gad ba yul’yul’ ngak Jehovah, ma ra tow’athnagdad.