BA GA’ fan e machib ni gad ma tay ma kub ga’ angin. Machane, gathi gubin e girdi’ ni gad ma machibnagrad ni yad manang feni ga’ fan e machib ni gad ma tay. Mus ni faanra kar motoyilgad ngodad, machane gathi yad gubin ni yad ma lemnag nib t’uf ni ngad filed e Bible ngorad.

Ireray e n’en ni buch rok be’ ni ka nog Gavin ngak. I tabab ni nga i un ko pi muulung ni yima tay; machane dabun ni nge un ko fol Bible. I yog ni gaar: “Dabug ni nge nang e girdi’ nde yoor ban’en ni gu manang u murung’agen e Bible. Maku reb e, dabug ni ngan bannageg maku dabug ni nggu un nga barba’ e teliw.” Uw rogon u wan’um? Ga be lemnag ndariy e n’en nra rin’ me thil Gavin? Ba mudugil ni danga’. Am lemnag rogon nrayog ni nge yib angin e thin nu Bible ngak be’. I yog Jehovah ko girdi’ rok kakrom ni gaar: “Machib rog e bayi . . . ngal’ ni waangachal u but’ ni kadbul. Thin rog e bayi aw ni bod e n’uw ni aw . . . nga ran’ e pan.” (Deut. 31:19, 30; 32:2) Re n’ey e be tamilangnag rogon nrayog ni ngad ayuweged urngin mit e girdi’ u nap’an e machib.​—1 Tim. 2:3, 4. 

Waangchal e ma sum ni buchuuw ma buchuuw. Waangchal e ma sum ko garbeb ni bay u fithik’ e nifeng. Ere, rayog ni ngan taarebrogonnag e thin rok Jehovah ko “waangachal u but’” ni bochan e ma non ko girdi’ rok u fithik’ e gol nge sumunguy. Ere, faanra ud daged ko girdi’ ni gad be tayfan e pi n’en ni ke michan’rad ngay ma aram e gad be folwok rok Got. Kub ga’ fan ni ngad pied e athamgil nga lanin’rad ni ngar fal’eged i lemnag mar dugliyed boch ban’en u wan’rad ni yad rorad. Faan gad ra rin’ ni aray rogon, ma aram e rayog ni ngar adaged ni ngar motoyilgad ko pi n’en ni gad be machibnag ngorad, ma aram e ra yib angin e machib ni gad be tay.

Waangchal e ma garbebnag ran’ e woldug. Faanra ud lemnaged rogon nrayog ni ngad ayuweged e girdi’ ni ngar nanged e tin riyul’, ma aram e rayog ni nge yib angin e machib ni gad be tay ngorad ni bod rogon e waangchal ni ma garbebnag ran’ e woldug. Gavin ni faan kad weliyed murung’agen e dan towasariy ni nge un ko fol Bible. Ya n’en ni rin’ e re walag ni baaram ni ognag e fol Bible ngak ko som’on ni ka nog Chris ngak e gay boch e kanawo’ nrayog ni nge ayuweg Gavin riy ni nge adag ni ngan weliy boch ban’en u murung’agen e Bible ngak. Som’on e yog Chris ngak Gavin ni taab n’en e be weliy e Bible murung’agen, ma faanra guy rogon ni nge nang ko mang e re n’em, ma ra ayuweg ni nge nang fan e pi n’en ni yima weliy ko pi muulung ni ma un ngay. Bin migid me yog Chris ngak ni pi yiiy u lan e Bible e aram e n’en ni ke ayuweg ni nge mich u wan’ nriyul’ e thin ni bay u lan e Bible. Tomuren e re n’ey, ma aram me yag ni ngar weliyew boch ban’en u murung’agen rogon ni be lebug e pi yiiy u lan e Bible. I felfelan’ Gavin ko pi n’en nra weliyew Chris me tomur riy ma aram me m’agan’ ngay ni ngan fil e Bible ngak.

Waangchal e ma ayuweg e woldug ndabi yim’. Fare nam nu Israel e bay yu ngiyal’ ni ma par ndabi aw e n’uw riy u lan in e pul, ma bayi n’en mab gel e gowel ma ke melik’ ran’ e woldug. Ere, faanra dariy e waangchal u ran’ e woldug, ma ra mororoy nge yim’. Ngiyal’ ney e gad bay u ba ngiyal’ ni taareb rogon ko fa ngiyal’ nem ni ma par nder ma aw e n’uw riy u Israel kakrom. Ma re n’ey e bod rogon e n’en ni ke yiiynag Jehovah nra buch u m’on riy. (Amos 8:11) Ke micheg ni pi tamachib ni yad bang ko fare ulung ni kan dugliyrad e yad ra bod e “waangachal ni . . . Somol e ke pi’ ke yib” ni yad be machibnag fare thin nib fel’ ni murung’agen Gil’ilungun Got, ma be ayuwegrad “yugu boch e saf.” (Mik. 5:7; John 10:16) Fare thin ni gad ma machibnag e aram boch ko pi n’en ni ma pi’ Jehovah nra ayuweg e piin ni yad baadag ni ngar nanged e tin riyul’ ni nge yag e yafos ngorad. Ere, ba ga’ fan u wan’dad e re thin nem ni gad ma machibnag, fa?

Waangchal e aram reb e tow’ath ni ke yib rok Jehovah. (Deut. 33:13) Machib ni gad ma tay e rayog ni nge mang ba tow’ath ngak e piin ni gad ma machibnagrad. Ireray reb e tow’ath ni yag ngak Gavin. Nap’an ni un ko fol Bible, ma aram me yag ni nge pirieg e fulweg ko pi deer rok. De n’uw nap’an nga tomuren ma aram me yag ni nge un ko taufe, ma chiney e yow ba felfelan’ Joyce ni ppin rok ni yow ma un i machibnag fare thin nib fel’ ni murung’agen Gil’ilungun Got.

Faan gad ra taarebrogonnag e machib ni gad ma tay ko waangchal u ran’ e woldug maku rayog ni nge pi’ e athamgil nga lanin’dad ni nge ga’ fan u wan’dad urngin e tayim ni gad ma fanay ni fan ko machib. Ni uw rogon? Ra map’ in e waangchal e ran nga daken e but’, ma dabi yib angin, machane faanra map’ bokum milyon e waangchal nga daken e but’ ma ra munurnag e but’. Ere, ku arrogon ni pi n’en ni gad ma rin’ u nap’an e machib ni yigoo gadad e sana rayog nder ma m’ug angin ni ka ngiyal’ nem. Machane, faanra maruwel urngin e pi tapigpig rok Jehovah u taabang ma aram e rayog ni ngar machibnaged “urngin e girdi’” u fayleng. (Matt. 24:14) Ere gur, ra par e machib ni gad be tay nib tow’ath ni ke pi’ Jehovah ko girdi’? Rayog ni nge par ni aram rogon ni faan gad ra guy rogon ni nge par e thin ni gad be machibnag ni bod rogon e waangchal u ran’ e woldug ni ma sum ni buchuuw ma buchuuw, ma ma garbebnag ran’ e woldug, maku ma ayuweg e woldug ndabi yim’!