1, 2. (a) Mang reb e ban’en nri ma felfelan’ e pi tapigpig rok Got ngay e ngiyal’ ney? (b) Uw rogon nrayog ni nge ayuweg e pi gallabthir ni Kristiano nge piin piilal u lan e ulung e piin fel’ yangaren ni ngari tamilang u wan’rad fan e taufe ni ngar uned ngay?

 “KA NAP’AN nni gargelegem ma gu manangem, ma kug felfelan’ ni kug nang ni ga baadag ni ngam un ko taufe. Machane, bay ban’en ni gu baadag ni nggu fith ngom, ‘Mang fan ni ga baadag ni ngam un ko taufe?’” Ireray e n’en ni yog reb e piilal ngak reb e pagel ni 12 e duw rok ni ka nog Christopher ngak. Ba puluw e re deer ney ni fith e re piilal nem ko re pagel ney. Ya riyul’ nib gel e felfelan’ ni gad ma tay ni gad ma guy bokum  biyu’ e fel’ yangaren u ga’ngin yang e fayleng ni yad ma un ko taufe u gubin e duw. (Ekl. 12:1) Machane, ba milfan ngak e pi gallabthir ni Kristiano nge piin piilal u lan e ulung ni ngar guyed rogon ni faanra ke dugliy reb e fel’ yangaren ni nge un ko taufe, ma aram e nge rin’ ni bochan e ban’en ni ke sum u gum’irchaen ma kki tamilang u wan’ fan e taufe ni nge un ngay.

² Be tamilangnag e Thin rok Got nnap’an nra ognag be’ ir ngak Got nge un ko taufe ma aram tabolngin e pigpig ni nge tay ngak ni ir reb e Kristiano. Ma boor e tow’ath nra yag ngak ni bochan e pigpig nra tay ngak Got, machane ku boor e togopuluw nra fek Satan i yib ngak. (Prov. 10:22; 1 Pet. 5:8) Ere, aram fan nri ma tiyan’ e pi gallabthir ni Kristiano ni ngar ayuweged pi fakrad ni ngari tamilang u wan’rad e n’en ni be yip’ fan ni nge mang be’ reb i gachalpen Kristus. Machane, faanra der ma pigpig e gallabthir rok reb e fel’ yangaren ngak Got, ma aram e ba milfan ko piin piilal u lan e ulung ni ngar ayuweged fare fel’ yangaren ni nge tamilang e re n’ey u wan’. (Mu beeg e Luke 14:27-30.) Ya bod rogon reb e naun ni faanra ngan toy nib fel’ rogon nge yan i m’ay, ma thingar ni fal’eg kunuy gubin i mam’en nga taabang u m’on ni ngan tabab i toy. Ere, ku arrogon ni faanra nge pigpig be’ ngak Jehovah u fithik’ e yul’yul’ “nge mada’ ko tomur” ma bay boch ban’en nthingari rin’ ko som’on. (Matt. 24:13) Machane, mang e rayog ni nge rin’ e piin fel’ yangaren me yag ni ngar dugliyed rorad ni ngar pigpiggad ngak Jehovah u n’umngin nap’an e yafos rorad? Ngad weliyed boch ban’en.

3. (a) Mang e be fil e n’en ni yog Jesus nge Peter ngodad u murung’agen feni ga’ fan e taufe ni ngan un ngay? (Matt. 28:19, 20; 1 Pet. 3:21) (b) Mang boch e deer ni gad ra weliy e fulweg riy, ma mang fan?

³ Gur reb e fel’ yangaren ni ga be lemnag ni ngam un ko taufe, fa? Faanra gur reb, ma rib manigil e n’en ni ga be lemnag ni ngam rin’! Ra un be’ ko taufe nge mang reb e Pi Mich Rok Jehovah, ma aram reb e tow’ath nrib manigil ni ke yag ngak. Maku reb e, piin Kristiano e thingar ra uned ko taufe. Maku taufe nra un be’ ngay e aram reb e ban’en nra ayuweg ni nge yag e yafos ngak. (Matt. 28:19, 20; 1 Pet. 3:21) Machane, gad gubin ni gad baadag ni ngad ted u gil’ e n’en ni kad micheged ngak Jehovah, ere aram fan ni gad baadag ni ngad fal’eged rogodad u m’on ni ngad uned ko taufe. Ere, ba fel’ ni ngam fal’eg i lemnag e re dalip i deer ni baaray ya nge yag nim nang ko ke bung rogom nrayog ni ngam un ko taufe fa dawor. Baaray e re dalip i deer nem: (1) Kug ilal ko tirok Got ban’en ma kki ilal e lem rog nrayog ni nggu rin’ e re n’ey, fa? (2) Riyul’ ni gu baadag ni nggu rin’ e re n’ey, fa? (3) Kug nang e n’en ni be yip’ fan ni nge ognag be’ ir ngak Jehovah, fa? Chiney e ngad weliyed e pi deer ney.

4, 5. (a) Mang fan ni gathi yigoo piin ni kar piilalgad e rayog ni ngar uned ko taufe? (b) Ra uw rogon reb e Kristiano ma aram e rayog ni nga nog ni ke ilal ko tirok Got ban’en ma kki ilal e lem rok?

⁴ Der yog e Bible ni yigoo piin ni kar ilalgad ara kar tawgad nga reb e yangar nrayog ni ngan pag fan boch ban’en ngorad e aram e piin nrayog ni ngar uned ko taufe. Ya be gaar e Proverbs 20:11 (BT): “Mus ko bitir ni ma m’ug ko ngongol rok ko ba miti mang girdi’; rayog ni nga mog ko ba yul’yul’ ma ba manigil fa.” Mus ngak be’ ni kab bitir ma rayog ni nge nang e n’en ni be yip’ fan ni nge rin’ be’ e tin nib mat’aw ban’en me ognag e yafos rok ngak e En ni Ke Sunmiydad. Ere, rayog ni nge un be’ ni kab bitir ko taufe ni faanra ke ilal ko tirok Got ban’en ma kki ilal e lem rok, ma ke ognag ir ngak Jehovah.​—Prov. 20:7.

⁵ Machane, ra uw rogon be’ ma aram e rayog ni nga nog ni ke ilal e lem rok? Re n’ey e gathi ri be yip’ fan rogon ni be ilal facha’ i yan. Ya be yog e Bible ni be’ ni aray rogon e ‘ke fil rogon ni nge nang e tin nib fel’ ko tin nib kireb.’ (Heb. 5:14) Ere, be’ ni ke ilal ko tirok Got ban’en ma kki ilal e lem rok e manang e n’en nib m’agan’ Jehovah ngay ma aram e n’en ni ke dugliy u wan’ ni nge rin’.  Faanra aray rogon e lem rok be’ mab mo’maw’ ni ngan waliy ni nge rin’ ban’en nib kireb; maku gathi ir be’ ni yugu ra un par ma yibe yog ngak e n’en nib fel’ ni nge rin’. Reb e fel’ yangaren ni ke un ko taufe e gad manang ni gubin ngiyal’ nra i fol ko pi motochiyel rok Got ni ki mada’ ko ngiyal’ nde moy e gallabthir rok ara be’ nib piilal u tooben.​—Mu taarebrogonnag ko Filippi 2:12.

6, 7. (a) Mu weliy boch ban’en ni mada’nag Daniel u nap’an ni immoy u Babylon. (b) Uw rogon ni m’ug ni Daniel e ir be’ ni ke ilal ko tirok Got ban’en ma kki ilal e lem rok?

⁶ Gur, rayog ni nge m’ug u rarogon reb e fel’ yangaren nriyul’ ni ke ilal ko tirok Got ban’en ma kki ilal e lem rok? Am lemnag e n’en ni buch ku Daniel ni kan weliy murung’agen u Bible. Rayog ni kab fel’ yangaren u nap’an nni chuweg ko gallabthir rok min fek nga Babylon. Ni fek Daniel nga fithik’ boch e girdi’ nib thil rogon ni yad ma lemnag e tin nib mat’aw nge tin nib kireb ban’en. Ku bay reb e magawon ni ki mada’nag Daniel: Nap’an ni immoy u Babylon, ma un tayfan u rom. Bin riyul’ riy e ir bagayad fapi pagel nni mel’egrad ni ngar pigpiggad ngak e en pilung! (Dan. 1:3-5, 13) Ere, bod ni bay boch ban’en nrayog ni nge rin’ Daniel u Babylon nra fel’ ngak ndabiyog ni nge rin’ u nap’an ni immoy u Israel.

⁷ Machane, mang e rin’ Daniel? Gur, i pag e fel’ rogon u Babylon nge boch ban’en nra guy e girdi’ ma yad baadag ni nge bannag? Gur, i pag e pi n’en ni immoy u tooben ni nge thilyeg rarogon me warnag e michan’ rok? Danga’! Ya be yog e Bible nnap’an ni immoy Daniel u Babylon me dugliy u wan’ ndabi un i rin’ boch ban’en ni bay rogon ko liyor ni googsur nra k’aring ni nge “par ndaki machalbog.” (Dan. 1:8) Riyul’ ni Daniel e ir be’ ni ke ilal ko tirok Got ban’en ma kki ilal e lem rok!

8. Mang e rayog ni ngam fil rok Daniel?

⁸ Ere, mang e rayog ni ngam fil rok Daniel? Reb e fel’ yangaren ni ke ilal ko tirok Got ban’en ma kki ilal e lem rok e ra par nib mudugil ni fan ko michan’ rok ni ki mada’ ko ngiyal’ ni ke mada’nag boch ban’en nib mo’maw’. De bod rogon e k’ay u maday ni ma thilyeg ramaen ni nge m’ag ko pi n’en ni bay u tooben. Ere, reb e fel’ yangaren ni ke ilal ko tirok Got ban’en e der ma dake ir reb e fager rok Got u nap’an nra yib ko muulung, ma nap’an nra yan nga skul me ngongol ni bod rogon e girdi’ nu fayleng. Ya ma par nib mudugil ni ki mada’ nga nap’an ni ki mada’nag boch e skeng nib mo’maw’.​—Mu beeg e Efesus 4:14, 15.

9, 10. (a) Mang angin nra yib ngak reb e fel’ yangaren ni faanra lemnag ko mang e ke rin’ u nap’an ni ke mada’nag boch e skeng ndawori n’uw nap’an? (b) Mang fan e taufe ni yima un ngay?

 ⁹ Riyul’ ndariy bagadad nib flont; ya gad gubin ni gad ma oloboch yu ngiyal’. (Ekl. 7:20) Yugu aram rogon ma faanra ga be lemnag ni ngam un ko taufe, mab fel’ ni ngam fal’eg i lemnag ko karim dugliy u wan’um ni ga ra fol ko pi motochiyel rok Jehovah ndemtrug rogon fa danga’. Ere, uw rogon ni ngam nang ko kari dugil e lem rom fa dawor? Ngam fithem ni nge lungum, ‘Ke n’uw nap’an ni gu be fol ko pi motochiyel rok Got, fa?’ Mu lemnag e n’en ni kam rin’ u nap’an ni kam mada’nag boch e skeng ndawori n’uw nap’an. Nap’an ni kam mada’nag e pi skeng nem ma kam dag ni ke ilal e lem rom nrayog ni ngam nang e n’en nib thil u thilin e tin nib fel’ nge tin nib kireb, fa? Ma uw rogon ni faanra kan tabab ni ngaun tayfam ko re fayleng rok Satan ney ni bod rogon e n’en ni buch rok Daniel? Rayog rom ni ngam ‘nang e n’en nib m’agan’’ Jehovah ngay ni ngam rin’ ni mus ni faanra de puluw e n’en ni yibe waliyem ngay ko n’en nib m’agan’ Jehovah ngay, fa?​—Efe. 5:17.

¹⁰ Mang fan ni yibe fith e pi deer ney ngom? Yibe fith ni fan e nge ayuwegem ni ngam nang feni ga’ fan e taufe. Ya kad weliyed faram nnap’an nra un be’ ko taufe ma aram e be dag ni bay ban’en ni ke micheg ngak Jehovah. Ke micheg ngak ni nge t’ufeg u polo’ i gum’irchaen me pigpig ngak ndariy n’umngin nap’an. (Mark 12:30) Gubin e piin ni kar dugliyed ni ngar uned ko taufe e thingar rin’ed e n’en ni kar micheged.​—Mu beeg e Eklesiastes 5:4, 5. 

11, 12. (a) Mang e thingari fal’eg i lemnag be’ ni be lemnag ni nge un ko taufe? (b) Mang e ra ayuwegem ni ngaum lemnag e taufe nrogon ni ma lemnag Jehovah?

¹¹ Be yog e Bible ni urngin e girdi’ rok Jehovah ni kub muun e piin fel’ yangaren ngay e ra “bagayad me ir e ra ognag ir” ni nge pigpig ngak. (Ps. 110:3) Ere, faanra ga be lemnag ni ngam un ko taufe ma ba t’uf ni ngam dugliy u wan’um ko rriyul’ ni ireray e n’en ni ga baadag ni ngam rin’ fa danga’. Ba t’uf ni ngam fal’eg i lemnag e re n’ey nib fel’ rogon nib ga’ ni faanra gur be’ ni kan chuguliyem ko tin riyul’.

¹² Nap’an ni ga be ilal i yan ma sana kam guy boor e girdi’ ni kar uned ko taufe, nib muun e pi taab yangar rom ngay ara boch e pi walagem. Machane, ba t’uf ni ngam kol ayuw ni bochan e rim lemnag ni ngam un ko taufe ni bochan e kam taw nga reb e yangar ara ga be guy ni yooren e girdi’ e yad be un ko taufe. Ere uw rogon mag nang ni ga be lemnag e taufe ni bod rogon ni ma lemnag Jehovah? Ba t’uf ni ngaum tay e tayim ni ngam fal’eg i lemnag fan nib ga’ fan e taufe. Yira weliy boch i fan ko re article ney nge bin migid.

13. Uw rogon nrayog ni ngam nang ko taufe ni ga be lemnag ni ngam un ngay e ban’en ni ke yib u gum’irchaem fa danga’?

¹³ Bay boch e kanawo’ nrayog ni ngam nang riy ko taufe ni ga be lemnag ni ngam un ngay e ban’en ni ke yib u gum’irchaem fa danga’. Bod ni, rogon e meybil ni ga ma tay e ra m’ug riy ko riyul’ ni ga baadag ni ngam pigpig ku Jehovah fa danga’. Ga ma meybil ku Jehovah ni gubin ngiyal’, fa? Ma nap’an ni ga ra meybil, ma ga ma weliy gubin ban’en ni bay u lanin’um ngak, fa? Fulweg rom ko gal deer ney e ra dag ko uw feni chugur e tha’ u thilmew Jehovah. (Ps. 25:4) Boor yay ni ma fulweg Jehovah taban e meybil rodad u daken e Bible. Ere, reb e kanawo’ nrayog ni ngam nang riy ko riyul’ ni ga baadag ni ngam chugur ngak Jehovah mag pigpig ngak u polo’ i gum’irchaem e aram e ngam fal’eg i yaliy rogon e fol Bible ni ga ma tay ni goo gur. (Josh. 1:8) Ere, ngam fithem ni nge lungum: ‘Gu ma weliy gubin ban’en ni bay u lanin’ug ngak Jehovah, fa? Uw rogon e fol Bible ni gu ma tay ni goo gag, gu ma rin’ ni gubin ngiyal’ fa fin munmun mug rin’?’ Ma faanra ma tay chon e tabinaw rom e Fol Bible ni Tabinaw, ma ngam fithem ni nge lungum: ‘Gu baadag ni gu ma un ngak chon e tabinaw rog ko fol Bible, fa?’ Fulweg rom ko pi deer ney e rayog ni nge ayuwegem ngam nang ko taufe ni kam lemnag ni ngam un ngay e ban’en ni rriyul’ ni ga baadag ni ngam rin’ fa danga’.

14. Mu weliy e n’en nib thil u thilin e ngan ognagey ngak Got nge ngan un ko taufe.

¹⁴ Sana bay boch e fel’ yangaren ndawor ra nanged e n’en nib thil u thilin e ngan ognagey ngak Got nge ngan un ko taufe. Bod ni, bay boch e fel’ yangaren ni ka rogned ni kar ognaged yad ngak Jehovah machane yad be lemnag ndawori bung rogorad ni ngar uned ko taufe. Ere, ba puluw e re n’ey, fa? Ra ognag be’ ir ngak Jehovah ma aram e be yip’ fan ni ke yog ngak Jehovah u daken e meybil ni nge pigpig ngak ndariy n’umngin nap’an. Ma nap’an nra un ko taufe, ma aram e be dag ko girdi’ ni yoor ni aram e ke ognag ir ngak Jehovah. Ere u m’on ni ngam un ko taufe, mab t’uf ni ngam nang e n’en ni be yip’ fan ni nge ognag be’ ir ngak Got.

15. Mang e be yip’ fan ni ngan ognagey ngak Got?

¹⁵ Ere, nap’an ni ga ra ognagem ngak Jehovah, ma aram e kam piem ngak ni ir e nge gagiyegnigem. Kam micheg ngak ni ngam m’oneg e n’en nib m’agan’ ngay u lan e yafos rom. (Mu beeg e Matthew 16:24.) Ga manang ni faanra kam micheg ban’en ngak be’ ma susun ndab mu thilyeg. Ere, faanra kam micheg ban’en ngak Jehovah Got ma thingar mu tay u gil’ ndab mu thilyeg! (Matt. 5:33) Ere uw rogon ni ngam dag nriyul’ ni kam pag fam ma kam piem ngak Jehovah ni ir e nge gagiyegnigem?​—Rom. 14:8.

16, 17. (a) Mu susunnag e n’en ni be yip’ fan ni ngam pag fam. (b) Ra ognag be’ ir ngak Got ma aram e mang e be yog ngak?

¹⁶ Rayog ni ngan susunnag e re n’ey ngak reb e fager rom ni ke pi reb e karrow ngom ni ngam fanay nib tow’ath. Nap’an ni pi’ babyoren fare karrow ngom me gaar: “Re karrow ney e fanam.” Machane, uw rogon ni faanra gaar: “Gathi gur e ngam man ko re karrow ney. Bay gu chaariy e kiy riy mu ug wan riy.” Ere, ra uw rogon e re “tow’ath” nem u wan’um nge facha’ ni ke pi’ ngom?

¹⁷ Ere, am lemnag e n’en ni baadag Jehovah ni nge rin’ be’ ni ke ognag ir ngak ni ke gaar: “Aram e kug pi’ e yafos rog ngom, ma ke milfag ngom.” Uw rogon ni faanra dabi fol facha’ rok Jehovah me mith nga i un ngak be’ nder ma pigpig ku Got? Ma uw rogon ni faanra un nga reb e maruwel nrayog ni nge lichnag e tayim rok ni fan ko machib ara dabkiyog ni nge un ko muulung ni gubin ngiyal’? Faanra rin’ ni aray rogon ma gathi bod ni ke mang ir e ke par fare kiy ko fare karrow rok? Nap’an nra ognag be’ e yafos rok ngak Jehovah ma bod ni be gaar: “Aram e ke milfan e yafos rog ngom. Ere, gubin ngiyal’ ni gu ra rin’ e n’en ni ga baadag ni mus ni faanra gathi aram e n’en ni gu baadag ni nggu rin’.” Aram e n’en ni rin’ Jesus. I yog ni gaar: “Ku gub u tharmiy nga but’ ni nggu rin’ e tin ni be finey e en ni ke l’ugeg ku gub, machane gathi nggu rin’ e tin ni gu be finey.”​—John 6:38.

18, 19. (a) Uw rogon ni n’en ni ke yog Rose nge Christopher e be dag ni faanra un be’ ko taufe ma aram e boor e tow’ath nrayog ni nge yag ngak? (b) Uw rogon e taufe u wan’um?

¹⁸ Ere, ba tamilang ndabiyog ni ngam un ko taufe ndawor mu fal’eg rogom, ya taufe e ban’en nrib ga’ fan. Machane, ra ognag be’ ir ngak Got nge un ko taufe ma aram reb e tow’ath nrib manigil. Piin fel’ yangaren nib t’uf Jehovah rorad ma kar nanged e n’en ni be yip’ fan ni nge ognag be’ ir ngak Jehovah e darur teled yad ndab ra uned ko taufe; ara ra kalgadngan’rad ko n’en ni kar dugliyed. Reb e fel’ yangaren ni ka nog Rose ngak e yog ni gaar: “Rib t’uf Jehovah rog ma dariy ban’en ni kab gel e felfelan’ rog ngay ko bin ni nggu pigpig ngak. Dariy ban’en ni kug rin’ nrib mudugil lanin’ug ngay ni bod rogon e taufe ni kug dugliy ni nggu un ngay.”

¹⁹ Ma uw rogon Christopher ni faan kan weliy murung’agen u tabolngin e re article ney? Uw rogon u wan’ e taufe ni un ngay u nap’an ni ke gaman 12 e duw rok? I yog nrib felfelan’ ko n’en ni ke rin’. Nap’an ni gaman 17 e duw rok me un ko pioneer, ma nap’an ni gaman 18 e duw rok min mel’eg ni nge mang reb e ministerial servant, ma chiney e ma maruwel u Bethel. I yog ni gaar: “Taufe e aram ban’en ni kug dugliy nrib manigil. Boor e maruwel ni gu ma rin’ ni fan ngak Jehovah nge ulung rok ni ma yibnag e felfelan’ ngog.” Ere, faanra ga be lemnag ni ngam un ko taufe, ma mang boch ban’en nib t’uf ni ngam rin’? Bin migid e article e ra pi’ e fulweg ko re deer ney.