1. Mang boch e motochiyel rok Got ni bay u lan e Bible? Mang angin nra yib ngodad ni faanra ud folgad riy?

 BOOR e motochiyel ni ke pi’ Jehovah ngodad u lan e Thin rok ni be tamilangnag ngodad e n’en nib m’agan’ ngay ni ngad rin’ed. Bod ni, ke tamilangnag nthingar dab da uned ko ngongol ndarngal, nge meybil ko liyos, nge moro’ro’, nge chingaw. (1 Kor. 6:9, 10) Maku reb e, ki tay Jesus ni Fak Got chilen ngak pi gachalpen ni gaar: “Mmarod, ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup [“gelngin Got nib thothup,” NW], mi gimed fil ngorad rogon ni nguur folgad u gubin e tin ni ku gog ngomed ni nguum rin’ed. Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.” (Matt. 28:19, 20) Rib ga’ angin e pi motochiyel ni ke pi’ Got ngodad! Bochan ni gad ma fol riy, ma aram fan ni ke yag ni ngad ayuweged gadad u boch ban’en, ma gad be par nib fel’ fithik’ i dowdad, ma bay e felfelan’ u lan e tabinaw rodad. Ma bin th’abi ga’ fan riy e bochan ni gad ma fol ko pi n’en ni ke motochiyelnag Jehovah ni ngad rin’ed nib muun ngay fare maruwel ni machib, ma aram fan ni gad ma par ni gad ba fel’ u wan’ ma ma tow’athnagdad.

2, 3. (a) Mang fan ni gathi gubin ban’en ni ma buch rodad ni bay e motochiyel riy u lan e Bible? (b) Mang boch e deer ni gad ra weliy e fulweg riy ko re article ney? (Mu guy e sasing ni bay u tabolngin e re article ney.)

 ² Machane, boor ban’en ni ma buch rodad ndariy e motochiyel riy u lan e Bible. Bod ni, dariy ba motochiyel u lan e Bible ni be yog rogon e re miti mad nsusun e nga i chuw e piin Kristiano ngay. Re n’ey e be dag nib gonop Jehovah. Mang fan? Ya ra reb e nam u roy u fayleng ma rogon e re miti mad ni yad ma chuw ngay nge rogon yalen e munmad rorad. Maku reb e, gubin ngiyal’ ni be thilthil rogon yaan e mad ni yibe ngongliy ni ngaun chuw ngay. Ere, faan gomanga ni yoloy nga lan e Bible rogon e re miti mad ni ngad chuwgad ngay, ma dabi m’ag nga rogon e mad ni yima chuw ngay e ngiyal’ ney. Ku aram fan ndariy e motochiyel u lan e Bible ni be tamilangnag rogon e re miti maruwel nge tafalay nrayog ni nge un e piin Kristiano ngay, nge rogon e miti n’en nrayog ni ngaur chuweged e chalban rorad ngay. Ra be’ ara reb i lolugen e tabinaw ma ir rok e thingari dugliy rogon ni nge rin’ e pi n’ey.

³ Ere gur, re n’ey e be yip’ fan ndariy rogon u wan’ Jehovah e pi n’en ni gad ma dugliy ni ngad rin’ed ni kub muun ngay boch ban’en ni bay rogon ko yafos rodad? Gur, gubin ban’en ni gad ra dugliy nde togopuluw ko motochiyel rok ma ra m’agan’ ngay, fa? Uw rogon ni ngad dugliyed e n’en nib m’agan’ Jehovah ngay ni ngad rin’ed ni faanra dariy ba motochiyel ni ke pi’ riy nrib tamilang?

4, 5. Uw rogon nrayog ni nge ayuwegdad ara magawonnagdad e pi n’en ni gad ma dugliy? Uw rogon nrayog ni nge ayuweg ara magawonnag yugu boch e girdi’?

⁴ Boch e girdi’ e sana yad ma lemnag ndariy rogon e pi n’en ni gad ma dugliy ni ngad rin’ed. Machane, faanra ngad dugliyed boch ban’en nib m’agan’ Jehovah ngay, ma som’on e thingar da lemnaged e pi motochiyel nge pi kenggin e motochiyel rok u lan e Bible ma gad fol riy. Bod ni, faanra ngad fel’gad u wan’ Got ma thingar da folgad ko motochiyel rok u murung’agen e racha’. (Gen. 9:4; Acts 15:28, 29) Meybil e ra ayuwegdad ni ngad dugliyed boch ban’en nib puluw ko pi motochiyel nge pi kenggin e motochiyel u Bible.

⁵ Pi n’en nib ga’ fan ni gad ma dugliy e bay rogon ngodad nge rarogodad ko tirok Got ban’en. Gubin ban’en ni gad ma dugliy e bay rogon ko tha’ u thildad Jehovah ndemtrug ko ba fel’ fa ba kireb. Faanra ba fel’ e n’en ni kad dugliyed ma ra gelnag e chugur ko tha’ u thildad Got, ma faanra ba kireb e n’en ni kad dugliyed ma rayog ni nge kireb e tha’ u thildad. Maku reb e, faanra ba kireb e n’en ni kad dugliyed ma rayog ni nge magawonnag e michan’ ara laniyan’ yugu boch e girdi’, ara magawonnag e taareban’ u lan e ulung. Ere riyul’ ni bay rogon e pi n’en ni gad ma dugliy.​—Mu beeg e Roma 14:19; Galatia 6:7.

6. Mang e susun ni nge pow’iy rogon e pi n’en ni gad ma dugliy ni ngad rin’ed?

⁶ Mang e susun ni ngad rin’ed ni faanra ba t’uf ni ngad dugliyed ban’en ndariy e motochiyel riy u lan e Bible? Nap’an ni gad ra mada’nag boch ban’en ni aray rogon mab milfan ngodad ni ngad fal’eged i yaliy rarogon fare n’em ma gad dugliy e n’en ni ngad rin’ed ngay nrogon nib m’agan’ Jehovah ngay, ma gathi rogon ni gad baadag. Faan gad ra rin’ ni aray rogon ma ra felfelan’ Jehovah ngodad me tow’athnagdad.​—Mu beeg e Psalm 37:5.

7. Uw rogon ni ngad nanged e n’en nib m’agan’ Jehovah ngay ni faanra dariy ba motochiyel u lan e Bible ni bay rogon ko n’en nib t’uf ni ngad dugliyed?

⁷ Sana rayog ni nge lungum u wan’um, ‘Uw rogon ni ngad nanged e n’en nib m’agan’ Jehovah ngay ni faanra dariy ba motochiyel u lan e Bible ni bay rogon ko n’en nib t’uf ni ngad dugliyed?’ Be gaar e Efesus 5:17: “Ngam guyed rogon ngam nanged e n’en nib m’agan’ Somol ngay.” Ere, uw rogon ni ngad nanged e n’en nib m’agan’ Got ngay ni faanra dariy ba motochiyel u lan e Bible ni bay rogon ko n’en ni ngad dugliyed? Thingar da meybilgad ngak ma gad pag gelngin nib thothup ni nge pow’iydad.

8. Uw rogon ni nang Jesus e n’en nib m’agan’ Jehovah ngay ni nge rin’? Mu weliy ban’en ni buch rok.

⁸ Am lemnag rogon ni i lemnag Jesus e n’en nib  m’agan’ e Chitamangin ngay ni nge rin’. L’agruw yay ni be yog e Bible ni meybil ngemu’ me ngongliy e maang’ang nge duruw’iy bogi girdi’ ni kar muulunggad nga taabang. (Matt. 14:17-20; 15:34-37) Machane, nap’an ni immoy u daken e ted ni ke yib e bilig ngak me guy Moonyan’ rogon ni nge waliy ni nge pilyeg e malang nge ngal’ ni flowa, me siyeg ni nge rin’ e re n’em. (Mu beeg e Matthew 4:2-4.) Bochan ni taareb rogon e lem rorow e Chitamangin, ma aram fan ni manang nde m’agan’ e Chitamangin ngay ni nge pilyeg e pi malang nem nge ngal’ ni flowa. Arrogon, manang Jesus nde m’agan’ Got ngay ni nge fanay gelngin ni nge rin’ ban’en ni ir e nge fel’ ngak. N’en ni rin’ Jesus e be dag riy nib pagan’ ngak Jehovah nra pow’iy me pi’ e tin nib t’uf rok.

9, 10. Mang e ra ayuwegdad ni ngad dugliyed boch ban’en u fithik’ e gonop? Mu susunnag.

⁹ Faanra ngad dugliyed boch ban’en nib fel’ rogon ni bod rogon Jesus, ma thingar da taga’gad ngak Jehovah ni nge pow’iydad. Ba t’uf ni nge puluw e ngongol rodad ko fapi thin ni be gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’. Dab mu lemnag ni gur e gab gonop; ya nguum par ni bay madgun Somol u wun’um, ma ga pi’ keruum ko kireb.” (Prov. 3:5-7) Faan gad ra nang rogon ni ma lem Jehovah u daken e fol Bible ni ga ma tay, ma aram e rayog ni ngad nanged e n’en ni baadag ni ngad rin’ed u nap’an ni kad mada’naged boch ban’en. Faanra rib tamilangan’dad u rogon ni ma lem Jehovah, ma aram e ra mom ngodad ni ngaud paged ni nge pow’iydad.​—Ezek. 11:19.

¹⁰ Baaray rogon nrayog ni ngan susunnag: Am lemnag reb e ppin nib mabgol ni ke yan ni nge chuway’. Ma nap’an ni bay u kantin me guy reb e sus ni baadag ni nge fanay, machane rib tolang puluwon. Ere, fith ir ni gaar, ‘Ra uw rogon u wan’ e pumoon rog ni faan gu ra n’ag boor e salpiy ko re sus ney?’ Dariy e maruwar riy ni manang e fulweg ko re deer ney ni yugu aram rogon nde moy e pumoon rok u tooben. Mang e ke rin’ ma ke nang e fulweg ko re deer ney? Ya ke n’uw nap’an ni kar parew e pumoon rok u taabang, maku manang rogon laniyan’ u rogon ni ngar maruwelgow ko salpiy rorow. Ere, aram fan ni manang e n’en nra lemnag e pumoon rok ni faanra chuw’iy reb e chugum ni aram feni tolang puluwon. Ku arrogodad ni faanra gad manang rogon ni ma lem Jehovah nge rogon ni ma rin’ boch ban’en, ma aram e rayog ni ngad nanged e n’en ni baadag ni ngad rin’ed u nap’an ni kad mada’naged boch ban’en.

11. Mang boch e deer nrayog ni ngad fithed gadad riy u nap’an ni gad be beeg ara gad be fil e Bible rodad ni yigoo gadad? (Mu guy fare kahol ni kenggin e “ Nap’an ni Ga Be Fil e Thin rok Got, Mag Fithem ni Nge Lungum.”)

¹¹ Faanra gad baadag ni ngad nanged rogon ni ma lem Jehovah, mab t’uf ni ngaud tedan’dad ko fol Bible ni gad ma tay ni yigoo gadad. Nap’an ni gad be beeg ara gad be fil e Thin rok Got, ma rayog ni ngad fithed gadad ni nge lungudad, ‘Mang e be fil e re n’ey ngog u murung’agen Jehovah, nge rogon feni mat’aw e pi n’en ni ma rin’, nge rogon ni ma lem?’ Ba t’uf ni ngad lemgad ni bod David ni faani tang ni gaar: “Got, mfil ngog e tirom e kanawo’; mu dag ngog nggu nang. Mfil ngog rogon ni nguug lem ma gu be ngongol nib mat’aw ko thin rom nib riyul’; yi gur e Taayuw rog. Kakadbul nge mada’ ko nep’ ni gu be par ni gur e ba pagan’ug ngom.” (Ps. 25:4, 5) Nap’an ni ga be fal’eg i lemnag reb e thin nu Bible, ma rayog ni ngam lemnag e pi deer ni baaray ni be gaar: ‘Uw rogon nrayog ni nggu fol ko re thin ney u lan e tabinaw rog? Uw e rayog ni nggu fanay e re thin ney riy? Gur, rayog ni nggu fanay u tabinaw rog? Ara u tabon e maruwel? Ara u skul? Ara u nap’an e machib?’ Tomuren ni kad nanged e gin nrayog ni ngad fanayed e re thin ney riy, ma aram e ra mom ngodad ni ngad nanged rogon ni ngad maruwelgad ngay.

12. Uw rogon nrayog ni nge ayuwegdad e pi babyor rodad nge pi muulung ni gad ma un ngay ni ngad nanged rogon ni ma lemnag Jehovah boch ban’en?

¹² Reb e kanawo’ nrayog ni ngkud nanged rogon  laniyan’ Jehovah riy e aram e ngaud tedan’dad nga rogon ni be pow’iydad e ulung rok. Bod ni, fare Watch Tower Publications Index nge fare Research Guide for Jehovah’s Witnesses ni thin ni Meriken e kan ngongliy rogon ni nge ayuwegdad ni ngad nanged rogon laniyan’ Jehovah u boch ban’en ni gad ma dugliy. Maku reb e, rayog ni nge yib angin ngodad ni faanra ud fal’eged e motoyil u nap’an e muulung ma gad be un ko pi n’en ni yibe rin’ riy. Gad ra fal’eg i lemnag e pi n’en ni yibe fil ngodad u nap’an e muulung ma ra ayuwegdad ni ngad nanged rogon ni ma lem Jehovah mu ud lemgad ni bod ir. Faanra ud maruwelgad ko pi n’en ni be pi’ Jehovah ngodad ni nge ayuwegdad ko tirok ban’en, ma aram e rayog ni ngad nanged rogon ni ma rin’ boch ban’en. Ma angin nra yib ngodad e gad ra dugliy boch ban’en nib m’agan’ ngay me tow’athnagdad.

13. Mu weliy reb e ban’en ni be dag ni faanra gad manang rogon laniyan’ Jehovah ma rayog ni nge ayuwegdad ni ngad dugliyed ban’en u fithik’ e gonop.

¹³ Mu lemnag reb e ban’en ni be dag ni faanra gad manang rogon laniyan’ Jehovah u ban’en ma rayog ni nge ayuwegdad ni ngad dugliyed boch ban’en u fithik’ e gonop. Bochan ni gad boch e tamachib, ma sana gad baadag ni ngad uned ko pioneer ni ngaud machibgad u polo’ e tayim rodad. Ere, kad lichnaged pa’ nga puluwdad ni bochan e nge yag nda rin’ed e re n’ey. Machane, sana be magafan’dad ni bochan e dad nanged ko ka rayog ni ngad pared ni gad ba felfelan’ ndaki yoor e salpiy nge chugum rodad fa danga’. Gad manang ndariy reb e motochiyel u Bible ni be tay chilen ngodad ni ngad uned ko pioneer; ya ku rayog ni ngad ululgad ko pigpig ngak Jehovah ni gad boch e publisher. Machane, ke micheg Jesus ngodad ni piin ni yad ra pag fan boch ban’en ni fan nga Gil’ilungun Got e ra yag boor e tow’ath ngorad. (Mu beeg e Luke 18:29, 30.) Maku reb e, be tamilangnag e Bible nib felfelan’ Jehovah ko maligach ni gad ma pi’ ngak ni aram e ngad ‘pininged’ e sorok ngak, ma gad rin’ e tin nrayog rodad ni ngad mon’ognaged e bin riyul’ e liyor. (Ps. 119:108; 2 Kor. 9:7) Ere, faan gad ra fal’eg i lemnag e pi thin nu Bible ney ma gad meybil ngak Jehovah ni nge pow’iydad, ma aram e gad ra nang rogon laniyan’ u boch ban’en. Ma re n’ey e rayog ni nge ayuwegdad ni ngad dugliyed ban’en nra yib angin ngodad ma ra tow’athnagdad Jehovah riy.

14. Uw rogon ni ngam nang ko ba m’agan’ Jehovah nga rogon ba mit e mad ni ga baadag ni ngam chuw ngay fa danga’?

¹⁴ Kum lemnag reb e ban’en: Susun e bay ba mit e mad ni ga baadag ni ngam chuw ngay machane rayog ni nge magawonnag laniyan’ boch e walag u lan e ulung. Ma ga manang ndariy reb e motochiyel u Bible ni be yog ndab ni chuw ko re miti mad nem. Machane, uw rogon laniyan’ Jehovah ko re n’ey? I pi’ apostal Paul e re fonow ni baaray ni gaar: “Er rogon e piin ni ppin ni gub adag ni ngar gonopiyed rogon e mad rorad nge yan i par nib fel’ rogon, mi yad yin’ e mad nrogon yalen e munmad ko ppin; ma gathi ngar  ngongliyed piyan lolugrad ni nge thum’ nga wuru’, ara ra tiyed e nunuw ni gol ara nunuw nni ngongliy ko churuwo’ nu l’ugun e yar ara mad nib tolang puluwon, machane ngar ngongliyed e ngongol nib fel’ nib m’ag ngak e ppin ni yad be dag ni yad girdien Got.” (1 Tim. 2:9, 10) Re fonow ney e ku bay rogon ngak e pi pumoon ni Kristiano. Bochan ni gad boch e tapigpig rok Jehovah, ma aram fan ni gad ma lemnag rogon laniyan’ yugu boch e girdi’ u rogon e re miti mad ni gad ma chuw ngay, ma gathi kemus ni ngad lemnaged e n’en ni gad baadag. Bochan nib t’uf pi walagdad rodad ma aram fan ni gad ma guy rogon ndab da rin’ed ban’en nra kirebnag ara magawonnag lanin’rad. (1 Kor. 10:23, 24; Fil. 3:17) Maku reb e, faan gad ra lemnag e n’en ni be yog e Bible ma rayog ni nge ayuwegdad ni ngad nanged rogon laniyan’ Jehovah ko re n’ey me yag ni ngad dugliyed boch ban’en nib m’agan’ ngay.

15, 16. (a) Uw rogon u wan’ Jehovah ni faanra ud lemnaged murung’agen e ngongol ndarngal? (b) Uw rogon ni ngad nanged e n’en nib m’agan’ Jehovah ngay u nap’an ni gad be mel’eg e pi n’en ni ngad chuweged e chalban rodad ngay? (c) Uw rogon ni ngad dugliyed boch ban’en nrib ga’ fan?

¹⁵ Be yog e Bible nnap’an nra rin’ e girdi’ boch ban’en nib kireb ara ra pared nib “sug lanin’rad ko tin nib kireb,” ma ri ma kireban’ Jehovah. (Mu beeg e Genesis 6:5, 6.) Ere, be tamilangnag e re n’ey nib kireb ni ngaud lemnaged murung’agen e ngongol ndarngal ya rayog ni nge k’aringdad ni ngad rin’ed reb e denen nib ubchiya’ nib togopuluw ko Bible nge rogon ni ma lem Jehovah. I yoloy James nreb i gachalpen Jesus ni gaar: “Bin som’on e fare gonop ni yib u tharmiy e mmachalbog; ma ku er rogon ni ma fal’eg thiliy nge aw e gapas riy, ma ma sumunguynigey, ma ma fal’eg owchey nge thin ngak e girdi’, ma ba sug ko runguy ma ma k’uf ni ngongol nib fel’; ma ma taareb rogonnag e girdi’ u wun’uy ma der ma dake modingnigey.” (Jas. 3:17) Ere, thingar da siyeged boch ban’en ni yima chuweg e chalban ngay nrayog ni nge k’aringdad ni ngad lemnaged ara da ar’arnaged e ngongol nib puwlag ara ngongol nib kireb. Ma faanra gad manang e n’en ni baadag Jehovah nge n’en ni ma fanenikay, ma ra mom ngodad ni ngad nanged e re miti babyor, nge kachido, ara video games ni ngad mel’eged ni ngaud chuweged e chalban rodad ngay. Maku reb e, be tamilangnag e Bible rogon laniyan’ ko pi n’ey.

¹⁶ Bay yu ngiyal’ nnap’an ni gad ra mada’nag ban’en nib t’uf ni ngad dugliyed e n’en ni ngad rin’ed ngay, ma boor e kanawo’ nrayog ni ngad rin’ed fare n’em riy nib m’agan’ Jehovah ngay. Machane, bay boch ban’en nrib ga’ fan nib fel’ ni ngad ninged e ayuw riy ko piin ni kar ilalgad ko tirok Got ban’en ara piin piilal. (Titus 2:3-5; Jas. 5:13-15) Riyul’ nde fel’ ni nga dogned ngak yugu boch e girdi’ ni ngar dugliyed e n’en ni ngad rin’ed. Ya ra reb e Kristiano ma susun ni nge fil rogon ni nge maruwel ko tamilangan’ nge gonop rok ya nge yag ni nang e n’en nib fel’ ni nge rin’ nge n’en nib kireb ndabi rin’. (Heb. 5:14) Gad gubin nthingari puluw e ngongol rodad ko fapi thin ni yog Paul ni faani gaar: “Ra be’ ma ba’ gilban ni be fek.”​—Gal. 6:5.

17. Mang angin nra yib ngodad ni faan gad ra dugliy boch ban’en u rogon nib m’agan’ Jehovah ngay?

¹⁷ Faan gad ra dugliy boch ban’en nrogon nib m’agan’ Jehovah ngay, ma ra gel e chugur ko tha’ u thildad. (Jas. 4:8) Ku rayog ni ngad pared ni gad ba fel’ u wan’ ma ra tow’athnagdad. Ma re n’ey e ra gelnag e michan’ rodad ngak. Ere, ngad paged e pi motochiyel nge pi kenggin e motochiyel u Bible ni nge pow’iydad, ya aram e pi n’en ni ma ayuwegdad ni ngad nanged rogon laniyan’ Got u boch ban’en. Riyul’ ni gubin ngiyal’ ni bay ban’en nib beech ni ngad filed u murung’agen Jehovah. (Job 26:14) Machane, faan gad ra athamgil u rogon nrayog rodad ma rayog ni nge yag e gonop nge tamilangan’ ngodad ya nge yag nda dugliyed boch ban’en u fithik’ e gonop. (Prov. 2:1-5) Girdi’ e gubin ngiyal’ ni ma thilthil lanin’rad u boch ban’en, machane ke puguran faen ni yoloy e Psalm ngodad ni gaar: “Tin ni ke lemnag ke ta’ e bayi par ndariy n’umngin nap’an, ma tin ni ke finey e bayi par ndariy n’umngin nap’an.” (Ps. 33:11) Ere, ba tamilang ni faanra ba puluw e lem nge ngongol rodad ko lem rok Jehovah ni ir fare Got nth’abi gonop, ma aram e rayog ni ngad dugliyed boch ban’en nib fel’ rogon.