1-3. Mang e n’en nsana ir e k’aring e magawon nga thilin Euodia nge Sintike? Uw rogon nrayog ni ngan siyeg boch e magawon ni aray rogon? (Mu guy e sasing ni bay u tabolngin e re article ney.)

 RIB ga’ fan e babyor rok Got ni aram e Bible u wan’ e pi tapigpig rok. Bochan ndawor da flontgad, ma aram fan ni gad gubin ni bay yu ngiyal’ ni yima fonownagdad ko thin rok Got u Bible. Ere, mang e ga ra rin’ u nap’an ni yira fonownigem? Am lemnag e n’en ni buch rok Euodia nge Sintike ni l’agruw e Kristiano ni ur moyew u nap’an e bin som’on e chibog. I sum e magawon u thilin e gal ppin ney ni yow bagayad e piin ni kan dugliy. Mang e magawon ni sum u thilrow? Der yog e Bible. Machane, rayog ni ngad susunnaged e n’en ni gomanga buch u thilrow.

² Rayog ni ke pining Euodia boch e walag nga tabinaw rok ni ngar abichgad u taabang, ma de pining Sintike. Ma faani boch nga tomuren me rung’ag Sintike murung’agen e n’en ni ke rin’ Euodia. Ere, dabisiy ni gaar Sintike: ‘Dagnang fan nde piningeg Euodia ko abich! Wan’ug e gamow ba fager.’ Bochan e re n’ey, ma aram me lemnag Sintike nde adag Euodia daken ma be guy rogon ni nge dabi non ngak. Ere, n’en ni rin’ Sintike e ki yarmiy rogon reb e abich u tafen miki pining fapi walag ni  pining Euodia nga tafen, machane de pining Euodia! Re magawon ney ni sum u thilin Euodia nge Sintike e rayog ni ke magawonnag e gapas u lan e ulung. Der yog e Bible e n’en ni buch, machane dabisiy nra motoyilgow ko fonow ni pi’ apostal Paul ngorow u fithik’ e t’ufeg.​—Fil. 4:2, 3. 

³ Bay boch ban’en ni aray rogon ni ma buch u lan e ulung rok Jehovah e ngiyal’ ney ni ku rayog ni nge k’aring e magawon nga thilin boch e walag. Machane, faan gad ra fol ko fonow ni bay ko Thin rok Got, ma rayog ni ngad pithiged ara da siyeged boch e magawon ni aray rogon. Ma faan gad ra fol ko n’en ni be yog e Bible, ma aram e gad be dag nib ga’ fan e Babyor rok Jehovah u wan’dad.​—Ps. 27:11.

4, 5. Mang e fonow ni bay ko Thin rok Got ni murung’agen rogon ni ngaud gagiyegnaged e damumuw rodad?

⁴ Faanra yog ara rin’ be’ ban’en ni ke kirebnag lanin’dad ara gad be lemnag nde mat’aw e n’en ni ke rin’ be’ ngodad, ma ra mo’maw’ ni ngad gagiyegnaged rogon e lem ni gad ma tay. Rayog ni nge kireban’dad ni faanra yibe darifannagdad ni bochan e gin ni kad bad riy, ara ramaen dowdad, ara boch ban’en u rarogodad. Ri kub gel e kireban’ ni gad ra tay ni faanra reb e walag u lan e ulung e ir e ke rin’ e re n’ey ngodad! Ere gur, bay e fonow u lan e Thin rok Got nra ayuwegdad u nap’an ni kad mada’naged boch e magawon ni aray rogon?

⁵ Ka nap’an ni sunmiy Jehovah e girdi’ ni ma fal’eg i yaliy rarogorad nge pi n’en ni yad ma rin’. Ma fal’eg i yaliy rarogon e lem nge ngongol rodad. Nap’an ni gad ra dabuy ban’en ara da damumuwgad, ma rayog ni nga dogned ara da rin’ed ban’en me tomur riy mad kalgadngan’dad. Ri gad ba gonop ni faanra da folgad ko fonow u lan e Bible ni be yog ni ngad gagiyegnaged rogon e damumuw rodad! (Mu beeg e Proverbs 16:32; Eklesiastes 7:9.) Dariy e maruwar riy ni gad gubin nib t’uf ni ngad guyed rogon ni ngad gagiyegnaged rogon e damumuw rodad mu ud n’aged fan e kireb rok boch e girdi’ u wan’dad. Bin riyul’ riy e, yog Jesus ni faanra dab ud n’aged fan e kireb rok boch e girdi’ u wan’dad, ma aram e dabi n’ag Jehovah fan e kireb rodad u wan’. (Matt. 6:14, 15) Ere gur, ba t’uf ni ngaum guy rogon ni ngaum n’ag fan e kireb ni ke rin’ boch e girdi’ ngom ara ngam gagiyegnag e damumuw rom?

6. Mang fan nsusun e ngaud gagiyegnaged rogon e damumuw rodad?

⁶ Girdi’ ndabiyog ni ngar gagiyegnaged rogon e lem ni yad ma tay e ba ga’ nib papey e damumuw ngorad. Bochan e re n’ey, ma rayog ni nge dabuy yugu boch e girdi’ ni ngar bad ko gin ni yad bay riy. Be’ nib papey e damumuw ngak e rayog ni nge af e ngongol rok ngak yugu boch e girdi’ u lan e ulung. Sana rayog ni nge guy rogon ni nge mithag e damumuw ara fanenikan ni bay rok, machane “gubin e girdi’” u lan e ulung nrayog ni ngar guyed e re n’ey. (Prov. 26:24-26, BT) Rayog ni nge ayuweg e piin piilal be’ ni aray rogon ni nge guy ni damumuw, nge fanenikan, nge ngaun tay e kireb ni ke rin’ be’ u lanin’uy e aram boch e lem ndabiyog ni nge par u lan e ulung rok Got. Kub tamilang e n’en ni be yog e Babyor rok Jehovah u murung’agen e re n’ey. (Lev. 19:17, 18; Rom. 3:11-18) Ere, ba puluw e re n’ey u wan’um, fa?

7, 8. (a) Uw rogon ni ma pow’iy Jehovah e ulung rok u fayleng? (b) Mang boch e fonow ni bay ko Thin rok Got, ma mang fan nsusun e ngad folgad riy?

⁷ Ma pow’iy Jehovah e ulung rok u fayleng ma ma pi’ e tin nib t’uf rodad u daken “fare tapigpig nib yul’yul’ ma ba gonop” u tan pa’ Kristus ni ir e “be gagiyegnag” e ulung. (Matt. 24:45-47; Efe. 5:23) Rib ga’ fan e Bible u wan’ e re tapigpig ney ni bochan e aram e Thin rok Got ni bod rogon fare ulung ni ma pow’iyey u nap’an e bin som’on e chibog. (Mu beeg e 1 Thessalonika 2:13.) Mang boch e fonow u lan e Bible nra yib angin ngodad?

⁸ Be yog e Bible ngodad ndab da paged e muulung. (Heb. 10:24, 25) Ku be pi’ e athamgil nga lanin’dad ni nge mich taareb e machib u wan’dad. (1 Kor. 1:10) Ku be yog e Thin rok Got ngodad ni  ngad m’oneged Gil’ilungun Got u wan’dad. (Matt. 6:33) Ku be yog e Bible nib milfan ngodad maku gad ba tow’ath ni gad ma un ko machib u mit e tabinaw i yan, nge yungi n’en ni ma muulung e girdi’ ni yoor ngay, ngu fithik’ e sabethin. (Matt. 28:19, 20; Acts 5:42; 17:17; 20:20) Be yog e Babyor rok Got ngak e piin piilal ni Kristiano nthingar ra guyed rogon ni nge par e ulung rok nib beech. (1 Kor. 5:1-5, 13; 1 Tim. 5:19-21) Ku be yog Jehovah ni gubin e girdi’ u lan e ulung rok nthingar ra pared nib beech e dowef rorad nge rarogorad ko tirok ban’en.​—2 Kor. 7:1.

9. Mang e n’en ni be fanay Jesus e ngiyal’ ney ni nge ayuwegdad ni ngad nanged fan e pi n’en ni bay ko Thin rok Got?

⁹ Sana bay boch e girdi’ ni yad ma lemnag nrayog ni ngar nanged fan e thin nu Bible ni yad rorad. Machane, ke tay Jesus fare “tapigpig nib yul’yul’” ni ngaur pied e tin nib t’uf rodad ni fan ko tirok Got ban’en. Ka nap’an e duw ni 1919 ni be fanay Jesus Kristus e re tapigpig nem ni nge ayuweg pi gachalpen ni ngar nanged fan e thin ni bay u lan e Babyor rok Got, mar folgad riy. Faanra ud folgad ko pi fonow ni bay u lan e Bible, ma aram e gad be tay e ulung rodad nib beech, mab gapas, ma bay e taareban’ riy. Ere, ba fel’ ni nge bagadad me fith ir ni nge gaar, ‘Gu ma fol ko pi fonow ni ma pi’ Jesus u daken fare tapigpig nib yul’yul’ e ngiyal’ ney, fa?’

10. Uw rogon ni ke weliy fare babyor rok Ezekiel murung’agen e ulung rok Jehovah u tharmiy?

¹⁰ Be weliy e Thin rok Jehovah murung’agen e ulung rok u tharmiy. Bod nni pilyeg e changar rok Ezekiel nge guy ba karrow ni ma girngiy e os ni bay u tharmiy ni aram e be yip’ fan e ulung rok Got u tharmiy. (Ezek. 1:4-28) Jehovah e ir e bay u daken e re karrow nem, ma be yan ko gin ni be pow’iy gelngin nib thothup ni nge yan ngay. Ere, pi n’en ni ma rin’ e ulung rok Got u tharmiy e bay rogon ko pi n’en ni be rin’ e ulung rok u fayleng. Ma dariy e maruwar riy ni kab kafram i yib ni be mithmith fare karrow ni ma girngiy e os ni bay u tharmiy! Am lemnag urngin ban’en ni kan thilyeg u lan e ulung rok Got u lan fa ragag i duw ni ke yan. Maku reb e, dab mu pagtalin ni Jehovah e ir e be thilyeg e pi n’ey. Chiney ni be n’en ni nge thang Kristus nge pi engel rok Got e re fayleng nib kireb ney e bay e re karrow rok Jehovah nem u tharmiy ni be yan nib papey ni fan e nge gagiyelnag mat’awun Jehovah ni nge gagiyeg me tayfan fithingan nib thothup!

11, 12. Mang boch ban’en ni be rin’ e ulung rok Jehovah?

¹¹ Am lemnag boch ban’en ni ke yag ni nge rin’ e ulung rok Got e ngiyal’ ney ko tin tomuren e rran. Dimow naun. Bokum miriay e walag ni ka ur maruwelgad u Warwick nreb e binaw ni bay u New York u Meriken ni yad be toy e bin nib beech e tochuch ko Pi Mich Rok Jehovah. Bokum biyu’ e walag ni kar ognaged yad ni ngar maruwelgad u tan pa’ fare Worldwide Design/Construction Department ni ngar toyed boch e Tagil’ e Liyor nib beech mar ga’naged boch e branch ofis. Ri gad be pining e magar ko pi walag ney ni yad be maruwel nib gel ni fan e ngar toyed e pi naun ney! Dab mu pagtalin ni Jehovah e ir e be tow’athnag e pi tamachib rok u ga’ngin yang e fayleng ni yad ba yul’yul’ nga rogon e salpiy ni ayuw ni yad ma pi’ ni fan nga boch e naun rodad ni yima toy.​—Luke 21:1-4.

¹² Skul. Am lemnag urngin e skul ni yibe tay ni  yibe fil e thin rok Got riy. (Isa. 2:2, 3) Bay fare skul ni ka nog e Skul ni Fan ko Piin Pioneer ngay, nge fare skul ni ka nog e School for Kingdom Evangelizers ngay, nge Skul u Gilead, nge fare skul ni ka nog e Bethel Entrants’ School ngay, nge Skul ni Fan ko Piin ni Yad Ma Lekag e Ulung nge Ppin Rorad, nge Skul ni Fan ko Piin Piilal, nge fare Kingdom Ministry Skul, nge Skul ni Fan ko Branch Committee nge Ppin Rorad. Riyul’ ni baadag Jehovah ni ma skulnag e girdi’ rok! Ku boor ban’en u Bible nrayog ni ngad filed ko fare website rodad ni jw.org. Boor e babyor ko re website ney ni kan pilyeg nga bokum miriay mit e thin. Ku bay bang riy ni fan ko piin bitir, nge chon e tabinaw, nge bang ni be weliy murung’agen boch ban’en ni be buch rok e pi walag nge ulung rok Got u ga’ngin yang e fayleng. Ere, ga be fanay fare jw.org u nap’an e machib ngu nap’an e fol Bible ni tabinaw, fa?

13. Mang e ba milfan ngodad ni gadad boch e tapigpig rok Jehovah ni gad ba yul’yul’ ngak?

¹³ Ri gad ba tow’ath ni gad bang ko ulung rok Jehovah! Maku reb e, bochan ni kad nanged e pi motochiyel rok nge n’en nib m’agan’ ngay, ma aram e ba milfan ngodad ni ngad rin’ed e tin nib mat’aw ma gad tayfan mat’awun e gagiyeg rok. Chiney nri be gel e kireb ko re fayleng ney e thingar da ‘fanenikayed e kireb’ ni bod rogon Jehovah. (Ps. 97:10) Gad ma siyeg ni ngad uned ko pi n’en ni ma rin’ e piin ni yad ma yog e ‘kireb ko manigil ma yad ma yog e manigil ko kireb.’ (Isa. 5:20) Thingar da athamgilgad ni ngad pared nib beech e dowef rodad, nge ngongol rodad, mab machalbog e liyor rodad ni bochan e gad baadag ni ngad pared ni gad ba fel’ u wan’ Got. (1 Kor. 6:9-11) Ba t’uf Jehovah rodad ma be pagan’dad ngak; ma kad dugliyed ni ngad pared ni gad ba yul’yul’ ngak ni aram e gad ma fol ko pi motochiyel rok ni bay u lan e Babyor rok. Maku reb e, gad ma athamgil u rogon nrayog rodad ni ngad folgad ko pi motochiyel ney ndemtrug ko gad bay u tabinaw, ara u lan e ulung, ara tabon e maruwel, ara skul. (Prov. 15:3) Kum lemnag boch e kanawo’ nrayog ni ngad daged riy ni gad ba yul’yul’ ngak Got.

14. Uw rogon nrayog ni nge dag e pi gallabthir ni Kristiano ni yad ba yul’yul’ ngak Got?

¹⁴ Chugol bitir. Faanra skulnag e pi gallabthir ni Kristiano pi fakrad nrogon nib puluw ko Thin rok Jehovah, ma aram e be m’ug riy ni yad ba yul’yul’ ngak. Ba t’uf ni nge kol ayuw e piin Kristiano ndab ra paged e yalen ni nge gagiyegnag rogon ni yad ma chuguliy pi fakrad. Susun e dabi fek e piin Kristiano e lem nu fayleng nga lan e tabinaw rorad. (1 Kor. 2:12) Reb e matam ni Kristiano nib taufe e susun e dabi gaar u wan’, ‘Rogon e yalen ko nam rog e piin ni ppin e aram e piin nsusun e ngar llowan’naged e bitir.’ Ya ba tamilang e n’en ni be yog e Bible ni be gaar: “Gimed e pi matam e . . . ngam chuguliyed [pi fakmed] mi gimed llowan’nagrad nrogon, mi gimed [fonownagrad; mi gimed pow’iyrad] nrogon nib m’agan’ Jehovah ngay.” (Efe. 6:4, NW; ftn.) Pi matam nge matin ni bay madgun Got u wan’rad e yad baadag pi fakrad ni nge bod Samuel ni immoy Jehovah rok u nap’an ni be ilal i yan.​—1 Sam. 3:19.

15. Uw rogon ni ngad daged ngak Jehovah ni gad ba yul’yul’ u nap’an ni ngad dugliyed boch ban’en nrib ga’ fan?

¹⁵ Rogon ni gad ma dugliy ban’en. Nap’an nra t’uf ni ngad dugliyed boch ban’en nib ga’ fan u lan e yafos rodad, ma reb e kanawo’ nrayog ni ngad daged riy nriyul’ ni gad ba yul’yul’ ngak Got e aram e ngad gayed e ayuw u lan e Thin rok nge ulung rok. Am lemnag reb e magawon ni ma mada’nag boor e gallabthir ni be tamilangnag feni ga’ fan ni ngad rin’ed e re n’ey. Boor e girdi’ ni yad ma par u reb e nam ni gathi nam rorad e nap’an ni yad ra fakay e bitir mab ga’ ni yad ma pi’ pi fakrad nge sul ko gallabthir rorad ni ngar chuguliyed ya nge yag ni ngkur ululgad ko maruwel ni yad be un ngay. Riyul’ nra be’ ma ir rok e nge dugliy e n’en ni nge rin’, machane susun e dab da paged talin nra tomur ma ra bagadad ma nge weliy ngak Got rogon e pi n’en ni i rin’. (Mu beeg e Roma 14:12.) Ere gur, gad ba gonop ni faan gad ra dugliy boch ban’en ni bay rogon ko tabinaw rodad nge rogon e par rodad ndab  da yaliyed e n’en ni be yog e Bible? Danga’! Ba t’uf ni nge ayuwegdad e Chitamangidad u tharmiy ni bochan e dabiyog ni ngad pow’iyed gadad ko gin ni ngad sorgad ngay.​—Jer. 10:23.

16. Mang e ba t’uf ni nge dugliy reb e matin u nap’an ni gargeleg bochi pagel ni fak? Mang e n’en ni ayuweg ni nge dugliy e n’en nib fel’ ni nge rin’?

¹⁶ Reb e ppin ni ma par u reb e nam ni gathi nam rok e nap’an ni fakay bochi tir nib pagel ma aram me lemnag ni nge pi’ e re tir rok nem nge sul ko nam rok ni nge chuguliy e gallabthir ko pumoon rok. Bang ko re ngiyal’ i n’em ni ka fini gargel, ma aram me tabab reb e Pi Mich Rok Jehovah ni nga i fil e Bible ko re ppin ney. I mon’og ko tirok Got ban’en miki fil ni maruwel rok ni ke pi’ Got e aram e nge chuguliy fak ni nge mang reb e tapigpig rok Jehovah. (Ps. 127:3; Prov. 22:6) Ere, meybil ngak Jehovah me weliy laniyan’ ngak ni bod rogon ni be yog e Bible ni ngad rin’ed. (Ps. 62:7, 8) Ngemu’ miki weliy laniyan’ ko en ni yow ma fil e Bible nge ku boch e walag u lan e ulung. Yugu aram rogon ni bay boch e girdi’ u lan e tabinaw rok nge fager rok ni ur towasariyed ni nge pi’ e re tir nem ko gallabthir ko pumoon rok ni ngar chuguliyew, machane me dugliy ndabi rin’ e re n’em ya manang nde fel’. Ri ngat e pumoon rok nga rogon ni ayuweg e pi walag u lan e ulung e re ppin ney nge chi tir ni fak nem ma aram me m’agan’ ngay ni nge un ko fol Bible, miki tabab ni nga i un ko muulung ni yow e ppin rok nge chi tir ni fakrow nem. Ere gur, ga be lemnag ma ke lemnag e re ppin nem ni ke fulweg Jehovah taban e meybil rok? Dariy e maruwar riy ni aram e n’en ni ke lemnag.

17. Mang boch e fonow ni kan pi’ ngodad ni bay rogon ko piin ni gad ma fil e Bible ngorad?

¹⁷ Ngan fol ko fonow. Reb e kanawo’ nib fel’ nrayog ni ngad daged riy ni gad ba yul’yul’ ngak Got e aram e ngaud folgad ko pi fonow ni ma pi’ e ulung rok ngodad. Am lemnag boch e fonow ni kan pi’ ngodad ni bay rogon ko piin ni gad ma fil e Bible ngorad. Ka nog ngodad nnap’an ni gad ra tabab be’ i fil e Bible ni gad be fanay fare ke babyor ni Mang e Ri Be Fil e Bible? ma ngad ted in e minit u tomuren gubin yay e fol Bible ni gad ma tay ni ngad ayuweged e en ni gad be fil e Bible ngak ni nge nang boch ban’en u rarogon e ulung rodad. Rayog ni ngad rin’ed e re n’ey ni aram e ngad fanayed fare video ni kenggin e Mang e Yima Rin’ ko Pi Tagil’ e Liyor Romad? nge fare brochure ni kenggin e Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney? Maku reb e, ka nog ngodad ni faanra kad mu’gad be’ i fil fare ke babyor ni Be Fil e Bible ma gad be guy ni be mon’og, ma susun e ngad ululgad i fil fare ke babyor ngak ni kenggin e “Um Pired ni Gimed Ba T’uf rok Got” ni mus ni faanra ke un facha’ ko taufe. Ke pi’ e ulung rok Got e re fonow ney ngodad ni ngad folgad riy ni bochan e nge yag nda ayuweged e tin nib beech i gachalpen Jesus ni nge ‘gel i yan e michan’ rorad.’ (Kol. 2:7) Ere, ga be fol ko pi fonow ney ni be pi’ e ulung rok Jehovah, fa?

18, 19. Mang boch i fan nsusun e ngaud pininged e magar ngak Jehovah?

¹⁸ Boor fan nsusun e ngaud pininged e magar ngak Jehovah! Gad manang nib milfan e yafos rodad ngak, ya faan gomanga de moy maku dad moyed. (Acts 17:27, 28) Ke pi’ ba ken e babyor ngodad nrib manigil ni aram e Bible. Rib ga’ fan e re ke babyor ney u wan’dad ni bochan e gad manang ni thin rok e ir e bay riy ni bod rogon ni i lemnag e pi Kristiano nu Thessalonika kakrom.​—1 Thess. 2:13.

¹⁹ Bochan ni bay e Thin rok Got rodad, ma aram fan ni kad chugurgad ngak ma ke chugur ngodad. (Jas. 4:8) Ke pi’ e Chitamangidad ni bay u tharmiy reb e tow’ath ngodad nrib manigil ni aram e ngad manged bang ko ulung rok. Ma rib ga’ fan e pi tow’ath ney u wan’dad! Rib manigil rogon ni weliy fare psalmist murung’agen e re n’ey ni gaar: “Ngan pining e magar ngak Somol, ni bochan e ba manigil; t’ufeg rok e ba manemus.” (Ps. 136:1, BT) Reliw’ nge nel’ yay ni ka nog fare thin ni “t’ufeg rok e ba manemus” ko Psalm 136. Ere, faan gad ra par ni gad ba yul’yul’ ngak Jehovah nge ulung rok, ma aram e rayog ni ngad guyed ni ke riyul’ e re thin ney ni bochan e ra yag e yafos ndariy n’umngin nap’an ngodad!