1, 2. Mang fan nthingar da ayuweged yugu boch e girdi’ u rogon ni ngar rin’ed boch e maruwel u lan e ulung?

 FARE maruwel ni ngan machibnag fare thin nib fel’ ni murung’agen Gil’ilungun Got e aram e re maruwel nrib ga’ fan ni i rin’ Jesus. Machane, ku ma tay e tayim ni nge skulnag pi gachalpen u rogon ni ngar ayuweged e girdi’ rok Got nge rogon ni ngar filed ban’en ngak yugu boch e girdi’. (Matt. 10:5-7) Ku arrogon Filip ni yugu aram rogon ni i fanay e tayim rok ni fan ko machib, machane ku i tay e tayim ni nge ayuweg fa aningeg i rugod ni fak ni ngar salapgad u rogon ni ngar weliyed e tin riyul’ ngak yugu boch e girdi’. (Acts 21:8, 9) Uw feni ga’ fan ni ngad rin’ed e re maruwel ney e ngiyal’ ney?

² Ngiyal’ ney e be yoor i yan e piin ni yad be motoyil ko fare thin nib fel’ u fayleng i yan. Ere, piin ni ka fin nra tababgad i fil e tin riyul’ ndawor ni taufenagrad e ba t’uf ni ngar nanged feni ga’ fan ni ngaur ted e fol Bible ni yigoo yad. Kub ga’ fan ni ngan fil ngorad rogon ni ngar machibnaged fare thin nib fel’ ngak yugu boch e girdi’ nge rogon ni ngar filed e tin riyul’ ngorad. Ba t’uf ni ngad pied e athamgil nga laniyan’ e pi walag ni pumoon u lan e ulung ni ngar maruwelgad nib gel ya nge yag nra manged boch e ministerial servant nge piilal. Faanra “machibnag” e pi Kristiano ni kar ilalgad ko tirok Got ban’en e piin ni ka yad bbeech nib fel’ rogon, ma rayog ni ngar ayuweged  yad ni ngar mon’oggad ko tirok Got ban’en.​—Prov. 4:2, BT.

3, 4. (a) Uw rogon ni tamilangnag Paul ni faanra ud filed e Bible nib fel’ rogon ma rayog ni nge yib angin ko machib ni gad ma tay? (b) U m’on ni ngad pied e athamgil nga laniyan’ e piin ni gad ma fil e Bible ngorad ni ngaur filed e Bible rorad ni yigoo yad, ma mang e thingar da rin’ed?

³ Uw feni ga’ fan ni nge bagadad mi i fil e Bible rok ni yigoo ir? Gad ra pirieg e fulweg ko re deer ney ko n’en ni yog apostal Paul ngak e pi Kristiano u Kolose ni gaar: “Gubin ngiyal’ ma gamow be pi’ e meybil ni fanmed, ni fa ngiyal’ ni baaram ni gu rung’agew murung’agmed riy ke mada’ ko chiney. Gamow ma wenignag ngak Got ni nge tamilangnag lanin’med ngam nanged e tin nib m’agan’ ngay ni ir e ngam rin’ed, nib chag urngin e gonop nge tamilangan’ ngay ni ma pi’ e Kan ni Thothup [“gelngin Got nib thothup,” NW] . . . . Ma aram me yog ni um ngongolgad nrogon ni ba adag Somol, mu um rin’ed e tin nib m’agan’ ngay ni gubin ngiyal’. Me yib wom’engin i pangimed u fithik’ urngin mit e maruwel nib fel’, ma gimed be nang rogon Got i yan nge tin ni ba adag.” (Kol. 1:9, 10) Ireray e n’en nra ayuweg e pi Kristiano u Kolose ni ngaur ‘rin’ed e tin nib m’agan’ Jehovah ngay ni gubin ngiyal’.’ Ku ra ayuwegrad u rogon ni nge ‘yib wom’engin i pangirad u fithik’ urngin mit e maruwel nib fel’,’ nib ga’ ni fare maruwel ni ngan machibnag fare thin nib fel’. Machane, faanra nge fel’ rogon e pigpig ni nge tay reb e tapigpig rok Jehovah, ma thingar i fil e Bible ni gubin ngiyal’. Ku aram e n’en nib t’uf ni ngad guyed rogon ni nge tamilang u wan’ e piin ni gad be fil e Bible ngorad.

⁴ Machane, u m’on ni ngad ayuweged yugu boch e girdi’ ni nge yib angin ngorad e fol Bible ni yad ma tay ni yigoo yad, ma gadad e som’on nthingar da nanged feni ga’ fan e re n’ey. Bin riyul’ riy e, thingar ud ted e fol Bible ni yigoo gadad ni gubin ngiyal’. Ere, ba fel’ ni nge bagadad me fith ir ni nge gaar: ‘Nap’an ni gu ra mada’nag be’ u nap’an e machib ni ke yog ban’en nde puluw ko Bible ara ke fith reb e deer ngog nib mo’maw’ e fulweg riy, ma gur, rayog ni nggu pi’ e fulweg ko deer rok nrogon nib puluw ko Bible? Nap’an ni gu ra beeg murung’agen Jesus, nge Paul, nge ku boch e tapigpig rok Got nge rogon ni ur athamgilgad u nap’an e machib, ma gu ma fal’eg i lemnag rogon nrayog ni nge ayuwegeg e re n’ey ko pigpig ni gu be tay ngak Jehovah, fa?’ Gad gubin nib t’uf ni nge yag e tamilangan’ nge fonow ko Thin rok Got ngodad. Ma faan gad ra weliy ngak yugu boch e girdi’ rogon ni ke yib angin ngodad e fol Bible ni gad ma tay ni yigoo gadad, ma aram e rayog ni ngkud pied e athamgil nga lanin’rad ni ngar mon’ognaged rogon e fol Bible ni yad be tay ya nge yag ni ngki yib angin ngorad.

5. Mog reb e ban’en nrayog ni nge ayuweg be’ ni yima fil e Bible ngak ya nge yag ni nga i fil e Bible rok ni yigoo ir.

⁵ Machane, sana ga ra fith ni nge lungum, ‘Uw rogon ni nggu fil ngak e en ni gu be fil e Bible ngak rogon ni nga i fil e Bible rok ni gubin ngiyal’?’ Rayog ni ngam dag ngak rogon ni nga i fal’eg rogon ni fan ko fol Bible ni gimew ma tay. Rayog ni nga mog ngak ni nge beeg e thin ni bay u tan fare thin ni kenggin e yugu boch e thin ni bay ko fare ke babyor ni Mang e Ri Be Fil e Bible?, me yaliy e pi thin nu Bible riy. Mu ayuweg u rogon ni nge fal’eg rogon ni fan ko pi muulung ni gad  ma tay, ya nge yag ni nge pi’ e fulweg u nap’an e muulung. Mu pi’ e athamgil nga laniyan’ ni nga i beeg urngin ken Fare Wulyang ko Damit nge Awake! Ma faanra bay fare Watchtower Library ara Watchtower ONLINE LIBRARY ko thin rok, maku rayog ni ngam dag ngak rogon ni nge fanay e gali n’ey ni nge gay e fulweg u boch e deer ni ma sum ni bay rogon ko Bible. Faan ga ra rin’ e pi n’ey, ma dariy e maruwar riy nra munmun ma ra adag e en ni ga be fil e Bible ngak ni nga i fil e Bible rok ni yigoo ir.

6. (a) Uw rogon nrayog ni ngam ayuweg e en ni ga ma fil e Bible ngak ni ngari ga’ fan e Bible u wan’? (b) Faanra ga’ fan e Bible u wan’ e en ni ga ma fil e Bible ngak, ma mang angin nra yib riy ngak?

⁶ Susun e dab da towasariyed be’ ni nga i beeg e Bible rok ma be tay e fol Bible ni yigoo ir. Ya ngad fanayed e pi n’en ni ma ngongliy e ulung rok Jehovah ni ngad ayuweged e piin ni gad ma fil e Bible ngorad ni ngari ga’ fan e Bible u wan’rad. Faan yad ra rin’ ni aray rogon, ma ra munmun ma rayog ni ngar lemgad ni bod faen ni yoloy e psalm ni gaar: “Kari felan’ug, ya gu be par u tooben Got! U charen Somol nib Th’abi Tolang e kug par riy ndabi buch ban’en rog.” (Ps. 73:28, BT) Dariy e maruwar riy nra fanay Jehovah gelngin nib thothup ni nge ayuweg be’ ni baadag ni nge chugur ngak.

7. Uw rogon ni i skulnag Jesus e piin ni ur machibnaged fare thin nib fel’ kakrom? (Mu guy e sasing ni bay u tabolngin e re article ney.)

⁷ Bay boch e fonow ni pi’ Jesus ngak fa 12 i apostal rok ko Matthew ko guruy ni 10. Ki pi’ boch e fonow nib tamilang ngorad u murung’agen rogon ni ngar machibgad. ^[1] Ma motoyil e pi apostal rok Jesus ngak u nap’an ni be weliy ngorad rogon ni ngar rin’ed e re n’ey. Ku yad ma un ngak ni nga ranod ko machib. Ere, bochan ni ur guyed rogon ni i machib Jesus, ma aram fan ni munmun me yag ni ngar filed e tin riyul’ ko girdi’ nib fel’ rogon. (Matt. 11:1) Ku arrogodad nrayog ni ngad filed ngak e piin ni gad ma fil e Bible ngorad rogon ni ngar manged boch e tamachib ko fare thin nib fel’ ni yad ba salap ko machib. Ere, chiney e ngad weliyed l’agruw e kanawo’ nrayog ni ngad ayuweged yad riy.

8, 9. (a) Uw rogon ni i non Jesus ko girdi’ u nap’an e machib? (b) Uw rogon nrayog ni ngad ayuweged e piin ni ka fin ra uned ko machib ni ngar nonad ko girdi’ ni bod rogon Jesus?

⁸ Rogon ni ngan non ko girdi’. Ba ga’ ni i weliy Jesus murung’agen Gil’ilungun Got ko girdi’. Bod ni, immoy bayay ni yag ni ngar nonow be’ nib pin u tooben e luwed rok Jakob ni bay u tooben fare mach nu Sykar. (John 4:5-30) Ku immoy bayay ni non ngak Matthew Levi ni ir reb e tamukun tax. Gathi ri boor ban’en ni be weliy e pi Gospel u murung’agen e re n’ey, machane i m’agan’ Matthew ngay ni nge mang reb i gachalpen Jesus. Ku immoy bayay u nap’an ni ke yan Jesus nge pi gachalpen ko abich nga tafen Matthew, miki machibnag boor e girdi’ u rom.​—Matt. 9:9; Luke 5:27-39.

⁹ Ku immoy bayay ni non Jesus ngak Nathanael u fithik’ e sumunguy ni yugu aram rogon ni yog Nathanael boch ban’en nde puluw u murung’agen e girdi’ nu Nazareth. Ma pi n’en ni yog Jesus ngak e ayuweg ni nge thilyeg rogon e lem rok. Ma aram me dugliy ni ngki fil boch ban’en u murung’agen e pi n’en ni be machibnag Jesus ni ir be’ nu Nazareth. (John 1:46-51) Ere, ba tamilang ko re n’ey nrib ga’ fan ni ngad filed ko piin ni ka fin ra bad ko tin riyul’ rogon ni ngaur nonad ko girdi’ u fithik’ e sumunguy nge gol. ^[2] Piin ni gad ra ayuweged yad ni ngar rin’ed e re n’ey e dariy e maruwar riy ni yad ra felfelan’ ni ngar guyed e piin ni yad baadag e tin riyul’ ni kar motoyilgad ngorad ni bochan rogon e numon ni kar ted u fithik’ e sumunguy.

10-12. (a) Uw rogon ni i ayuweg Jesus e piin ni i mada’nagrad u nap’an e machib ni ur motoyilgad ko fare thin nib fel’? (b) Uw rogon nrayog ni ngad ayuweged e piin ni ka fin ra uned ko machib ya nge yag nra salapgad i fil e tin riyul’ ko girdi’?

¹⁰ Rogon ni ngan fil ban’en ko piin ni yad baadag e tin riyul’. De n’uw nap’an ni machib Jesus. Machane i tay e tayim ni nge ayuweg e piin ni yad baadag ni ngar motoyilgad ko fare thin nib fel’. Bod ni, immoy bayay ni sak’iy u lan ba bowoch nga i machibnag bogi girdi’ ni kar muulunggad. Tomuren e re n’ey ma aram me ngongliy e maang’ang ni aram e n’igin ni nge kol Peter bogi nig ni boor me gaar ngak: “Chiney i yan ngaram e bay um yognag e girdi’.” Mang angin e n’en ni yog Jesus nge n’en ni rin’? I girngiy Peter nge fapi cha’ ni yad “fa gali bowoch nga lang mi yad pag urngin ban’en ngar uned ngak Jesus.”​—Luke 5:1-11.

 ¹¹ Ku arrogon Nikodemus ni ir reb i girdien e Sanhedrin ni ki adag ni nge motoyil ko pi n’en ni i machibnag Jesus. Baadag ni ngki fil boch ban’en machane be magar nri yog e girdi’ ban’en ngak ni bochan e ke non ngak Jesus u fithik’ e girdi’. Yugu aram rogon me pithig Jesus u puluwon ni ngar mada’gow Nikodemus nnep’. (John 3:1, 2) Ere, mang e gad be fil ko pi n’ey? Gad be fil riy ni Jesus e i tay e tayim ni fan e nge gelnag e michan’ rok boch e girdi’. Ere, ku arrogodad ni susun e ngad pasiggad ni ngad sulod ngak e piin ni kad mada’naged yad u nap’an e machib ma gad fil e Bible ngak e piin ni yad baadag e tin riyul’.

¹² Faanra ud machibgad e piin ni ka fin ra uned ko machib u taabang, ma rayog ni ngar mon’oggad u rogon ni ngar filed e tin riyul’ ko girdi’. Rayog ni ngad ayuweged yad u rogon ni ngar sulod ngak e piin ni kar mada’naged u nap’an e machib ni ka yugu ra motoyilgad buchuuw. Ku rayog ni ngad pininged yad ni ngar uned ngodad u nap’an ni ngad sulod ni ngad guyed be’ ngu nap’an ni nga darod da guyed be’ ni ngad filed e Bible ngak. Faan gad ra rin’ e pi n’ey, ma rayog ni nge ayuwegrad ni ngar nanged rogon ni ngar filed ban’en ngak be’ nge rogon ni ngar filed e Bible ngak be’ ni yad rorad. Ku yad ra nang rogon ni nge dabi mulan’rad, nge rogon ni ngar gum’an’niged yad mar athamgilgad ko machib ni yad be tay.​—Gal. 5:22; mu guy fare thin ni kenggin e “ Ba Ga’ Fan Ndabi Mulan’uy.”

13, 14. (a) Uw rogon u wan’um boch e girdi’ ni bay murung’agrad u Bible ni ur paged farad ni ngar ayuweged yugu boch e girdi’? (b) Mang boch e kanawo’ nrayog ni ngam fil riy ngak e piin ni ka fin ra uned ko machib nge piin fel’ yangaren rogon ni ngaur t’ufeged e pi walag?

¹³ Be tamilangnag e Bible nib milfan ngodad ni nge ‘bagadad mi ri t’uf rok bagadad,’ ma ngaud ayuweged gadad. (Mu beeg e 1 Peter 1:22; Luke 22:24-27.) Jesus ni Fak Got e pag fan urngin ban’en nib muun e yafos rok ngay ni fan e nge ayuweg e girdi’. (Matt. 20:28) Dorkas e i “par ni tin nib fel’ e be rin’ ma be ayuweg e piin ni gafgow.” (Acts 9:36, 39) Me Maria nreb e walag ni i par u Roma e ba ‘gel e maruwel ni i tay’ ni fan ko girdi’ u lan e ulung. (Rom. 16:6) Ere, uw rogon nrayog ni ngad ayuweged e piin ni ka fin ra uned ko machib ni ngar nanged feni ga’ fan ni ngar ayuweged e pi walag u lan e ulung?

¹⁴ Rayog ni nge pining e pi walag ni ke n’uw nap’rad ko tin riyul’ e piin ni ka fin ra uned ko machib ni ngar uned ngorad u nap’an ni nga ranod ra guyed e piin ni kar m’argad nge piin ni kar pilibthirgad. Faanra rayog, mab fel’ ni nge fek e piin gallabthir pi fakrad u nap’an ni nga ranod ra guyed e pi walag ney. Ku rayog ni nge yog e piin piilal ngak yugu boch e walag ni ngar uned ngorad u nap’an ni nga ranod ra pied e ggan ngak e pi walag ni kar pilibthirgad ara ngar ngongliyed e yungi n’en ni ke kireb ko naun rorad. Faan yira rin’ e pi n’ey ma aram e rayog ni nge nang e piin fel’ yangaren nge piin ni ka fin ra uned ko machib rogon ni ngaur rin’ed boch ban’en ni fan ngak yugu boch e girdi’. Immoy reb e piilal nnap’an nra yan ko machib u boch e binaw nib palog mab ga’ ni ma yan i guy e pi walag ni yad ma par ko pi binaw nem ni nge nang salaprad. Re n’ey ni ma rin’ e ayuweg reb e walag ni kab pagel ni nge nang ni gubin e girdi’ u lan e ulung nib t’uf ni ngaun t’ufegrad.​—Rom. 12:10.

15. Mang nib ga’ fan ni nga i tiyan’ e piin piilal nga rogon e mon’og ni be tay e pi walag ni pumoon u lan e ulung?

¹⁵ Bochan ni ma fanay Jehovah e piin pumoon ni ngar filed ban’en ko girdi’ u lan e ulung, ma aram fan nib t’uf ni nge nang e pi walag ni pumoon rogon ni ngaur welthingad u fithik’ e yoor. Ere faanra gur reb e piilal, ma gur, rayog ni ngam motoyil ngak reb e walag nib ministerial servant u nap’an ni be yan u daken e welthin rok? Faan ga ra ayuweg ma rayog ni nge mon’og u rogon ni nga i fil e Thin rok Got ko girdi’.​—Neh. 8:8. ^[3]

16, 17. (a) Uw rogon ni ayuweg Paul Timothy ni nge mon’og? (b) Uw rogon ni nge skulnag e piin piilal boch e walag ni pumoon u rogon ni ngar ayuweged e ulung boch nga m’on?

¹⁶ Rib t’uf boch e walag ni pumoon ni ngar ayuweged e ulung, ma kub t’uf ni ngan skulnag e piin ni yad ra rin’ e pi maruwel ney boch nga m’on. I weliy Paul rogon nrayog ni ngan rin’ e re n’ey u nap’an ni yog ngak Timothy ni gaar: “Me gur, fakag, e ngam fek gelngim ko ayuw ni be pi’ Got ngodad u daken e taab girdi’ ni kad tiyed Kristus. Mfek fapi thin ni mu rung’ag ni gu machibnag u p’eowchen e girdi’ ni yoor ni yad e mich riy, ngam pi’ ngak e piin ni pumoon ni ke pagan’um ngorad, ni piin ni pumoon ni ku rayog ni ngar  machibniged boch e girdi’.” (2 Tim. 2:1, 2) Boor ban’en ni i fil Timothy ko maruwel ni ur tew apostal Paul ni ir reb e piilal u lan e ulung. Miki fol ko pi n’en ni i fil ngak u nap’an e machib nge ku boch ban’en ni i rin’ ni fan ko pigpig ngak Jehovah.​—2 Tim. 3:10-12.

¹⁷ Gathi kemus ni yog Paul ngak Timothy e n’en ni nge rin’ me digey ni nge mang ir e rin’ rok. Ya n’en ni rin’ e fek Timothy nge un ngak ko machib nge milekag ni i tay. (Acts 16:1-5) Ere, ku rayog ni nge folwok e piin piilal rok Paul ni aram e ngar feked boch e walag ni kar manged ministerial servant ni ngar uned ngorad u nap’an ni nga ranod ra guyed boch e walag ni ngar pied e athamgil nga lanin’rad. Faanra rin’ e piin piilal e re n’ey ma rayog ni ngar ayuweged e pi walag ney ni ngar guyed rogon ni yad ma skulnag yugu boch e girdi’, nge rogon feni michan’rad, nge rogon ni yad ma gum’an’ ma yad be t’ufeg e girdi’, nge rogon ni yad ma taga’ ngak Jehovah u nap’an ni yad be ayuweg e pi “saf” rok.​—1 Pet. 5:2.

18. Mang fan ni nge ga’ fan u wan’dad rogon ni gad ma skulnag boch e girdi’ u rogon ni ngar rin’ed boch ban’en ni fan ngak Jehovah?

¹⁸ Rib ga’ fan ni ngan skulnag yugu boch e girdi’ ni bochan e boor e maruwel nib t’uf ni ngan rin’ maku boor e kanawo’ ni bay e ngiyal’ ney nrayog ni ngan pigpig riy ngak Jehovah. Ere, rayog ni nge yib angin ngodad rogon e skul ni i tay Jesus nge Paul ngak boch e girdi’ kakrom. Baadag Jehovah ni ngan skulnag e pi tapigpig rok e ngiyal’ ney ni fan ko pi maruwel ni yad be rin’ ni fan ngak. Ma ke pi’ e biney e tow’ath ngodad ni ngad ayuweged e piin ndawor ra salapgad ni ngar mon’oggad u rogon ni yad be rin’ boch e maruwel nib t’uf ni ngan rin’ u lan e ulung. Ere, chiney nri be gel e kireb ko re fayleng ney i yan ma ka boor e maruwel nib t’uf ni ngan rin’ e rib ga’ fan ni ngad skulnaged urngin e girdi’ nrayog rodad.

19. Mang fan nthingari pagan’um nra yib angin e athamgil ni ga be tay ni ngam skulnag boch e girdi’ u rogon ni ngar rin’ed boch ban’en ni fan ngak Jehovah?

¹⁹ Riyul’ nib t’uf ni ngad ted ba ngiyal’ ni ngad skulnaged e pi girdi’ ney ma gad athamgil u rogon ni ngad rin’ed e re n’ey. Machane, ra ayuwegdad Jehovah nge Fak, maku yow ra pi’ e gonop ngodad u rogon ni ngad rin’ed e re n’ey. Mab gel e felfelan’ ni gad ra tay u nap’an ni gad ra guy e piin ni kad ayuweged ni yad ‘be athamgil ma ba gel e maruwel ni yad be tay.’ (1 Tim. 4:10) Ku arrogodad nib t’uf ni ngad athamgilgad ni ngkud mon’oggad u rogon e pigpig ni gad be tay ngak Jehovah.