1, 2. (a) Uw rogon ni tabab e mabgol? (b) Mang reb e ban’en nsana tamilang u wan’ e bin som’on e pumoon nge ppin u murung’agen e mabgol? (Mu guy e sasing ni bay u tabolngin e re article ney.)

 MABGOL ni yima tay e ka aram bang ko yafos rodad. Machane, faan gad ra fil murung’agen rogon ni sum e mabgol nge fan nni m’agpa’ e gal nsom’on e girdi’ ma rayog ni nge ayuwegdad ni ngad nanged fan nni ngongliy e biney e yaram nge rogon nra yib angin ngodad. Tomuren ni sunmiy Got e bin som’on e girdi’ ni aram Adam, me yog ngak ni nge tunguy fithingan e pi gamanman ni bay. Machane, “dariy be’ ni ke chag ngak be ayuweg.” Ere, gagiyegnag Got Adam ngari mol, ma aram me fek reb e yumiyaw rok nge ngongliy be’ nib pin riy, me fek i yan ngak. (Mu beeg e Genesis 2:20-24.) Ere, Got e ir e sunmiy e mabgol.

² I micheg Jesus e thin ni yog Jehovah ni gaar: “Ereray fan nra digey e pumoon e chitamangin nge chitiningin ngar pirew leengin, mi yow par ni kar taab girdi’gow.” (Matt. 19:4, 5) Re n’em ni fanay Got reb e yumiyaw rok Adam ni nge sunmiy e bin som’on e ppin riy e dabisiy ni ayuweg e gal nsom’on e mabgol ni ngar nangew feni chugur e tha’ u thilrow. De sunmiy Got e mabgol ni nge taw nga ba ngiyal’ me dar, maku de yog  nrayog ni nge yoor e ppin ara pumoon ni nge leay be’ taab yay.

3. Mang reb i fan nni sunmiy e mabgol?

³ Rib gel e felfelan’ ni tay Adam ni bochan fare pin nni pi’ ngak, ma boch nga tomuren me tunguy Efa ngak. Bochan ni sunmiy Got e re ppin nem ni nge “chag” ngak Adam, ma aram fan ni mang ‘taayuw’ rok, mar parew ni yow ba mabgol ni yow be felfelan’ u taabang ni gubin e rran. (Gen. 2:18) Reb i fan nni sunmiy e mabgol e bochan e nge yag ni suguy e girdi’ e fayleng. (Gen. 1:28) Ere, yugu aram rogon nib t’uf e gallabthir ko bitir, machane i tay Got nnap’an ni yad ra un ko mabgol ma ngar chuwgad u tabinaw nga ranod ra ngongliyed reb e tabinaw ngorad. Kub m’agan’ ngay ni nge suguy e girdi’ e fayleng mar ga’naged taferad ya nge yag ni paradis e fayleng ni ga’ngin.

4. Mang e buch ko bin som’on e mabgol?

⁴ I kireb e bin som’on e mabgol ni bochan e mel’eg Adam nge Efa ni ngar fanayew e puf rogon ni ke pi’ Jehovah ngorow ni ngar togopuluwgow ngak. “Fare porchoyog ni ke kakrom” ni aram Satan ni Moonyan’ e bannag Efa ni nge lemnag ni faanra kay wom’engin “fare ke gek’iy ni ma tamilangnag an’uy ko tin nib fel’ nge tin nib kireb,” ma aram e rayog ni nge tamilangan’ me dugliy ko mang e ba fel’ ma mang e ba kireb. De tayfan mat’awun figirngin ni ir lolugen ni aram e nge fith laniyan’ ko re n’em. Maku reb e, i m’agan’ Adam ngay ni nge fek wom’engin fare gek’iy ni pi’ Efa ngak ko bin ni nge fol rok Got.​—Rev. 12:9; Gen. 2:9, 16, 17; 3:1-6.

5. Mang e rayog ni ngad filed u rogon e thin ni yog Adam nge Efa ngak Jehovah?

⁵ Nap’an ni fith Got ngak Adam ko mang fan ni ke rin’ e re n’em, ma aram me yon’ e kireb riy nga daken leengin. I yog ni gaar: “Fare pin ni mu sunumeg ni fan ngog e pi’ wom’engin ngog ni nggu way, ma aram mu gu way.” Me Efa e yon’ e kireb nga daken fare porchoyog ni bannag. (Gen. 3:12, 13) Ere, rin’ Adam nge Efa e kireb mar gayew e tawey rorow nga boch ban’en nde puluw! Bochan ndar folgow rok Jehovah ma aram fan ni yan i aw ni kar togopuluwgow ngak. Re n’ey e be puguran ban’en ngodad! Faanra nge fel’ e mabgol rok l’agruw ni’, ma nap’an nra sum e magawon u lan e mabgol rorow ma dab ra taweygow nga boch ban’en, ya n’en ni ngar rin’ew e nge bagayow me yog e kireb rok mar folgow rok Jehovah.

6. Uw rogon ni ga ra weliy fare thin ni bay ko Genesis 3:15?

⁶ Yugu aram rogon e n’en ni rin’ Satan u Eden, machane ke pi’ Jehovah e athap ko girdi’ u daken e bin som’on e yiiy u lan e Bible. (Mu beeg e Genesis 3:15, BT.) I yog Jehovah ni “fak fare pin” e ra bilbilig lolugen fare engel ni togopuluw ngak. Re n’ey ni ke yog e be dag rarogon e tha’ u thilrad e pi engel ni yad be pigpig ngak u tharmiy. Boch nga tomuren miki yog e Bible nra pi’ Got be’ ko ulung rok ni nge “bilbilig” lolugen Moonyan’ me bing e kanawo’ ko piin ni yad ra fol ni nge yag ngorad bayay e n’en ni mul u pa’ e gal nsom’on e girdi’, ni aram e yafos ni manemus u fayleng ni bod rogon nib m’agan’ Jehovah ngay aram ko som’on.​—John 3:16.

7. (a) Mang e ke buch ko mabgol ni be tay e girdi’ ni ka nap’an e togopuluw ni tay Adam nge Efa? (b) Mang e be yog e Bible nthingari rin’ e piin figirngiy nge piin leengiy?

⁷ Togopuluw ni tay Adam nge Efa e magawonnag e mabgol rorow nge urngin e mabgol ni yib nga tomuren. Bochan e re togopuluw nem ma aram e Efa nge tin ni ka bay e ppin nra bad nga tomuren e yad gubin nib gel e amith ni yad ra tay u nap’an ni yad ba diyen ngu nap’an ni yad ra gargel. Ma piin nib pin e ra ur pared ni yad be yim’ ni bochan e pumoon rorad, machane piin pumoon e yad ra suwey e piin leengirad, maku bay boch i yad nra i gafgownag e ppin rok ni bod rogon ni gad be guy ni be buch e ngiyal’ ney. (Gen. 3:16) Machane, be yog e Bible nthingari maruwel e piin figirngiy nga mat’awrad ni yad lolugen e tabinaw u fithik’ e t’ufeg. Ma piin leengiy e thingar ra folgad ko piin figirngirad ni yad lolugrad. (Efe. 5:33) Faanra i rin’ e piin mabgol ni bay madgun Got u wan’rad e n’en nib milfan ngorad ni ngar rin’ed, ma aram e rayog ni nge lich fa reb e dabki sum boch e magawon u thilrad nrayog ni nge kirebnag e mabgol rorad.

8. Uw rogon e mabgol ni i tay e girdi’ u nap’an Adam nge yan i mada’ nga nap’an ni Tharey e Ran e Fayleng?

⁸ U m’on ni yim’ Adam nge Efa ni bochan e denen ni kar tew, ma aram mar fakayew boch e bitir ni pumoon nge ppin. (Gen. 5:4) Bin som’on e pagel ni fakrow ni ka nog Kain ngak e leay reb e ppin ni girdien. Ma Lamek nreb i owchen Kain e aram e bin som’on e pumoon ni be yog e Bible ni immoy l’agruw e ppin rok. (Gen. 4:17, 19) Pi mfen ni immoy u nap’an Adam nge mada’ ko ngiyal’ ni yib fare Ran nge Tharey e fayleng u nap’an Noah, e kemus nri in e girdi’ riy e ur pigpiggad ngak Jehovah. Boch ko pi girdi’ nem e aram Abel, nge Enok, nge Noah, nge chon e tabinaw rok. Be yog e Bible nnap’an Noah ma aram ‘me guy boch e kan ni ur moyed ba ngiyal’ u tan pa’ Got e pi ppin ni yad ba pidorang, ma aram mi yad leay e pi arorad ni yad ba adag.’ Ere, bochan ni leay e pi engel nem e pi ppin nem, ni ban’en nsusun e dab rrin’ed, ma aram fan nra fakayed boch e bitir ni yu gub pag farad n’un’uw ma yad ba tagiyet ni ka nog e Nephilim ngorad. Maku reb e, ‘ri gel e kireb rok e girdi’ u gubin yang’ ma “gubin ngiyal’ ma ba sug lanin’rad ko tin nib kireb.”​—Gen. 6:1-5.

9. Mang e rin’ Jehovah ngak e piin ni yad ba kireb ni ur moyed u nap’an Noah? Mang e susun ni ngad filed ko n’en ni buch e ngiyal’ nem?

⁹ I pag Jehovah e Ran nge Tharey e Fayleng u nap’an Noah ni bochan e nge thang e piin nib kireb. Ngiyal’ nem e ke mit e girdi’ ko pi n’en ni yima rin’ u reb e rran ngu reb nib muun ngay e mabgol ni be tay e girdi’. Ere, aram fan nda ur motoyilgad ngak “Noah, ni i machibnag e tin nib mat’aw” u nap’an ni be weliy murung’agen e mogothgoth ni bayi yib ngorad. (2 Pet. 2:5) I taarebrogonnag Jesus e pi n’en ni i buch e ngiyal’ nem ko pi n’en ni gad be guy ni be buch e ngiyal’ ney. (Mu beeg e Matthew 24:37-39.) Ngiyal’ ney e yooren e girdi’ e dubrad ni ngar motoyilgad ko fare thin nib fel’ ni murung’agen Gil’ilungun Got ni yibe machibnag u fayleng i yan ni nge rung’ag urngin e girdi’ ko pi nam u m’on ni ngan thang e re m’ag nib kireb ney. Ere, gad be fil ko re n’ey nsusun e dab da paged boch ban’en ni bod rogon e mabgol ni yima un ngay nge chugol bitir ni nge k’aringdad ni nge dab kud lemnaged ni gad be chugur i yan ko fare rran rok Jehovah.

10. (a) Mang boch e ngongol ni golong ni un rin’ u boch e nam kakrom? (b) Uw rogon ni dag Abraham nge Sarah e kanawo’ nib fel’ ni ngan folwok riy u rogon ni ur ayuwegew e mabgol rorow?

¹⁰ Yugu aram rogon ni Noah nge fa dalip i pagel ni fak e ra bagayad ma kemus ni taareb e ppin rok, machane immoy boch e girdi’ nga tomurrad ni ur leayed boor e ppin. Ngiyal’ nem e boor e nam ni ngongol ndarngal e ke mang bang ko par ko girdi’ riy, maku un uneg nga boch e madnom ni un tay ni bay rogon ko liyor rorad. Nap’an ni fol Abram (Abraham) nge Sarai (Sarah) ni leengin ko n’en ni yog Got ma ranow ra parew nga Kanaan, ma re nam nem e rib sug ko ngongol nib kireb ni ma darifannag e mabgol. I yog Jehovah ni bayi thang yu Sodom nge Gomorrah ni bochan e ngongol ni golong ni be rin’ e girdi’ riy. Ere, rin’ Abraham e n’en nib milfan ngak ni ir lolugen e tabinaw rok, me dag Sarah e kanawo’ nib fel’ ni ngan folwok riy ni aram e i par ni be fol rok figirngin ni ir lolugen. (Mu beeg e 1 Peter 3:3-6.) Ki guy Abraham rogon ni nge leay Isak ni fak reb e ppin ni ma pigpig ngak Jehovah. Maku ireray e re lem ni i pow’iy Jakob ni fak Isak ni faan immoy boch e pumoon ni fak ni yad e yib fare 12 i ganong nu Israel rorad.

11. Uw rogon ni i ayuweg fare Motochiyel rok Moses piyu Israel?

¹¹ Boch nga tomuren, me ngongliy Jehovah ba m’ag u thilrad pi fak Jakob (ni ku yima yog Israel ngak). I pi’ fare Motochiyel rok Moses ngorad ni ir e i ayuweg e piin mabgol e ngiyal’ nem nge rogon e liyor ni ur ted ngak Jehovah. Bod ni, pi’ Got e motochiyel u murung’agen rogon e mabgol ni ngaun tay, nib muun ngay murung’agen e mabgol ni i tay boch e girdi’ ni boor e ppin ni ur leayed taab yay. Miki pi’ e motochiyel ni be yog ndabiyog ni nge leay piyu Israel e piin ni yad ma meybil nga yugu boch e got. (Mu beeg e Deuteronomy 7:3, 4.) Nap’an nra  sum e magawon u lan e mabgol rok l’agruw ni’ e ngiyal’ nem mab ga’ ni ma pi’ e piin piilal e ayuw. Ku bay rogon ni yad ma pithig e pi magawon ni ma sum u lan e mabgol ni bochan e de yul’yul’ bagayow fa wu’ i mabgol ngak bagayow, ara be taliyeg bagayow, ara bay bagayow ni be sananag ni bay ban’en nib kireb ni ke rin’ bagayow. Ku rayog ni nge dar e mabgol, machane bay rogon e motochiyel riy ni kan ngongliy. Bod ni faanra ke “dabuy” reb e pumoon leengin, ma rayog ni nge chuweg. (Deut. 24:1) Yugu aram rogon nder yog e Bible tapgin nrayog ni nge “dabuy” be’ e en mabgol rok, machane gad manang ndabiyog ni nga yigi chuweg facha’ leengin ni bochan bochi magawon nde ga’ ni ke sum u lan e mabgol rorow.​—Lev. 19:18.

12, 13. (a) Mang e i rin’ boch e pumoon ko ppin rorad u nap’an Malaki? (b) Ngiyal’ ney e faanra chel be’ nib taufe nge un ko en mabgol rok be’, ma mang wenegan nra yib riy?

¹² Nap’an Malaki ni profet, ma boor e pumoon ni Jew ni yad ba mabgol nda ur yul’yul’gad ko ppin rorad, ma aram mu ur taweygad nga boch ban’en nde ga’ fan ni bochan e nge yag nra n’aged pi leengirad. Pi pumoon nem e ra n’aged pi leengirad nra mabgolgad u nap’an ni kab fel’ yangarrad ni bochan e ngar leayed boch e ppin ni ka yad ba rugod nge boch e ppin ni yad ma meybil nga yugu boch e got ni googsur. Nap’an ni yib Jesus nga fayleng, ma ka be chuweg e pi pumoon ni Jew pi leengirad ni yugu “demturug e n’en ni ke bucheg” fapi ppin. (Matt. 19:3) Rib fanenikan Jehovah Got e mabgol ni ma wer ni aray tapgin.​—Mu beeg e Malaki 2:13-16.

¹³ Ngiyal’ ney e ku de m’agan’ Jehovah ngay ni nge chuw e pi tapigpig rok ko piin mabgol rorad ndariy tapgin. Machane, uw rogon ni faanra bay reb e pumoon ara reb e ppin nib taufe ni ke mabgol ma aram me chel nge un ngak figirngin ara leengin be’ me ngongliy e babyor ni ngar dargow e en mabgol rok ni bochan e nge yag ni nge leay facha’? Faanra dabi kalngan’, ma aram e yira tharbog ko ulung ni bochan e nge par e ulung nib beech. (1 Kor. 5:11-13) Ma u m’on ni nge yag ni ngki sul facha’ bayay ko ulung, ma thingari ‘rin’ boch e ngongol ni nge dag ni ke pi’ keru’ ko denen ni be rin’.’ (Luke 3:8; 2 Kor. 2:5-10) Yugu aram rogon ndawor ni dugliy n’umngin nap’an mfin rayog ni nge sul facha’ ko ulung, machane dabiyog ni nga yugu ni fek owchey ko mit ney e ngongol. Ya gathi ri ma buch e re n’ey ko pi tapigpig rok Got. Ere, faanra buch ban’en ni aray rogon mar ra fek reb e duw ara ba pag reb e duw ni ngari m’ug e mich riy nriyul’ ni ke kal facha’ ngan’, ma aram e fin rayog ni nge sul ko ulung. Ma mus ni faanra kan sulweg facha’ ko ulung, maku thingari ‘sak’iy u p’eowchen Got ngan pufthinnag.’​—Rom. 14:10-12; mu guy Fare Wulyang ko Damit, ko November 15, 1979, ko pp. 31-32 ni thin ni Meriken.

14. Mang fan fare Motochiyel rok Moses?

¹⁴ Fare Motochiyel rok Moses e aram e n’en ni i gagiyegnag e pi n’en ni i rin’ piyu Israel nib pag 1,500 e duw. I ayuwegrad ni ngaur lemnaged e pi kenggin e motochiyel nib mat’aw u nap’an ni yad be rin’ boch ban’en ni bay rogon ko tabinaw rorad nge ku boch ban’en, maku ir e mang sensey ngorad nge yan i mada’ ko ngiyal’ ni yib fare Messiah riy. (Gal. 3:23, 24) Nap’an ni mus e re Motochiyel nem u nap’an ni yim’ Jesus, ma aram me tababnag Got reb e yaram nib beech. (Heb. 8:6) Nap’an ni sum e re yaram nem nib beech, ma aram e ngiyal’ nda kun pag ni ngan rin’ boch ban’en ni un rin’ u tan fare Motochiyel rok Moses.

15. (a) Mang e motochiyel ko ulung ni Kristiano u murung’agen e mabgol? (b) Mang boch ban’en nib t’uf ni nge fal’eg i lemnag reb e Kristiano u m’on ni nge dugliy ni ngar dargow e en mabgol rok?

¹⁵ Nap’an ni pi’ Jesus e fulweg u reb e deer ni fith e pi Farise ngak, ma aram me yog ni bin baaram e yaram ni ngongliy Moses ni aram e rayog ni nge dar be’ nge en mabgol rok e “gathi ereray yalen ko ngiyal’ ni baaram ni sunumiy Got urngin ban’en riy.” (Matt. 19:6-8) Ma aram me yog ni motochiyel ni pi’ Got u Eden ni fan ko piin mabgol e ku aram e re motochiyel nthingari fol e ulung ni Kristiano riy. (1 Tim. 3:2, 12) Bochan nnap’an nra mabgol l’agruw ni’ ma aram e “kar taab girdi’gow,” ma aram fan nthingar ra parew u taabang, mar pagew e t’ufeg rorow ngak Got nge t’ufeg rorow ngorow ni nge gelnag e tha’ ko  mabgol rorow. Faanra dar ba wu’ e mabgol nrogon nib puluw ko motochiyel ko nam machane gathi bochan e ke par bagayow fa gal mabgol nge be’ ni gathi mabgol rok, ma aram e fagali cha’ e dabiyog ni ngkur unew nga yugu reb e mabgol. (Matt. 19:9) Faanra ke un e en mabgol rok be’ ngak be’ ni gathi mabgol rok, ma faen nde kireb e rok e rayog ni nge dugliy ni nge n’ag fan e kireb rok e en mabgol rok u wan’, ni bod rogon Hosea ni profet ni n’ag fan e kireb ni rin’ Gomer ni leengin ngak. Re n’ey e kan taarebrogonnag nga rogon ni i n’ag Jehovah fan e kireb rok piyu Israel u tomuren nra kalgadngan’rad ko kireb ni ur rin’ed. (Hos. 3:1-5) Re n’ey e kub muun ngay ni faanra ke nang be’ ni ke un e en mabgol rok ngak be’ nga wuru’ e mabgol rorow, machane me dugliy ni ngar sulow e en mabgol rok ngaur parew nrogon ni ma rin’ e piin mabgol, ma aram e be m’ug riy ni ke n’ag fan e kireb ko en mabgol rok u wan’, ma aram e dabkiyog ni ngar dargow nrogon nib puluw ko Bible.

16. Mang e yog Jesus u murung’agen e piin ndawor ra uned ko mabgol?

¹⁶ Nap’an ni yog Jesus ni kemus ni yigoo ngongol ndarngal e rayog ni nge dar e mabgol riy nrogon nib puluw ko thin rok Got, ma aram me weliy murung’agen e piin ni “be yog rorad” ni ngar pared ndab ra uned ko mabgol. Ki yog ni gaar: “En nrayog rok e nge fol ko pi thin ney ni kug machibnag.” (Matt. 19:10-12) Boor e walag ni kar dugliyed ni ngar pared ndab ra uned ko mabgol ni bochan e nge yag nra pigpiggad ngak Jehovah ndariy ban’en ni be magawonnag lanin’rad. Ma rib manigil e n’en ni kar dugliyed ni ngar rin’ed.

17. Mang e rayog ni nge ayuweg reb e Kristiano ni nge dugliy ko nge un ko mabgol fa danga’?

¹⁷ U m’on ni nge dugliy be’ ko nge un ko mabgol fa danga’, ma thingari fal’eg i lemnag ko rayog rok ni nge par ndabi un ko mabgol fa dabiyog. Ya yugu aram rogon ni yog apostal Paul nib fel’ e piin ndar uned ko mabgol, machane ki yog ni gaar: “Bochan e boor e girdi’ ni be ngongliy e ngongol ko darngal, ma aram e gubin e pumoon nra be’ ma nge par ni ba’ leengin, ma gubin e ppin nra be’ ma nge par ni ba’ figirngin.” Ki ulul ngay ni gaar: “Faanra dabkiyog ni ngam k’adedan’med, me ere mu uned ko mabgol​—ya kab fel’ ni nga ni mabgol ko bin ni nguu nim’ ni bochan e ngan par.” Faanra un be’ ko mabgol ma rayog ni nge ayuweg e re n’ey ndabi pag e ar’ar rok ni nge k’aring ni nge rin’ boch e ngongol nib kireb ni bod ni nga i rin’ boch ban’en nib kireb ngak ara un ko ngongol ndarngal. Maku reb e, kub t’uf ni nge lemnag be’ yangaren, ya ki yog apostal Paul ni gaar: “Faanra be lemnag be’ ni bay boch ban’en nde fel’ ni be rin’ ni bochan e ke par nder un ko mabgol, ma ke pag e bin baaram e yangar ni immoy riy nib gel e ar’ar u fithik’ i dow ni ma tay e piin fel’ yangaren, ma aram e baaray rogon: Nge rin’ e n’en ni baadag ni nge rin’, ya dariy ban’en nib denen riy. Ngan pagrow ngar mabgolgow.” (1 Kor. 7:2, 9, 36, NW; 1 Tim. 4:1-3) Machane, susun ndabi un be’ ko mabgol ni bochan e nge li’ e ar’ar u fithik’ i dow ni ma yib ngak e piin ni kab fel’ yangarrad. Ya dawori ilal nrayog rok ni nge rin’ e n’en nib milfan ngak e piin mabgol.

18, 19. (a) Uw rogon e mabgol ni susun e nge tay e piin Kristiano? (b) Mang e yira weliy ko bin migid e article?

¹⁸ Rogon e mabgol ni ma tay e piin Kristiano e aram e thingari mabgol l’agruw ni’ ni kar ognagew e yafos rorow ngak Jehovah mab t’uf rorow u polo’ i gum’ircha’row. Maku reb e, susun ni fa gali cha’ e l’agruw ni’ nri yow baadagew yow ma yow baadag ni ngar mabgolgow. Ma riyul’ ni boor e tow’ath nra yag ngorow ni faan yow ra fol ko fare fonow ni faan be yog ni ngan mabgol “nrogon e mabgol ni ma tay e piin ni girdien Kristus.” (1 Kor. 7:39) Nap’an ni yow ra mabgol ma dariy e maruwar riy nra m’agan’row ngay ni Bible e aram e gin ni bay e tin th’abi fel’ e fonow riy nra ayuweg e mabgol rorow ni nge par nib manigil.

¹⁹ Bin migid e article e ra weliy boch e thin nu Bible nrayog ni nge ayuweg e pi Kristiano ni kar mabgolgad u rogon ni ngar athamgilgad u fithik’ e pi magawon ni yima mada’nag e ngiyal’ ney ko “tin tomren e rran,” ya ngiyal’ ney e boor e pumoon nge ppin ni bay boch ban’en u rarogorad ni ma kirebnag e mabgol. (2 Tim. 3:1-5) Gad ra guy e Thin rok Jehovah ma bay boch ban’en riy nib t’uf rodad ya nge yag ni par e mabgol rodad nib fel’ u nap’an ni gad be yan e girdi’ rok u daken fare pa’ i kanawo’ ni be sor i yan ko yafos ndariy n’umngin nap’an.​—Matt. 7:13, 14.