1, 2. (a) Uw rogon ni ke lebug fare thin ni bay ko Isaiah 60:22 e ngiyal’ ney ko tin tomuren e rran? (b) Mang boch ban’en nib t’uf ko ulung rok Jehovah u fayleng e ngiyal’ ney?

 “MUS ko re tabinaw nib th’abi lich e girdi’ riy ma ba sobut’ ni bay ra pired ni bod ba nam ni ba ga’ ma ba gel.” (Isa. 60:22) Be lebug e re yiiy ney e ngiyal’ ney ko tin tomuren e rran, ya nap’an e September ko duw ni 2014 nge mada’ ko August ko duw ni 2015, ma ke taw urngin e piin ni yad be machibnag fare thin nib fel’ u fayleng i yan ko 8,220,105! Fapi thin nnog u tungun e re yiiy ney e ra rin’ ban’en ngak e piin Kristiano ni yad gubin ni bochan e ke yog Jehovah ni gaar: “Bayi taw nga nap’an mu gu gagiyegnag ni nge doro’ nib gur. Yi gag e Somol!” Rriyul’ ni gad be guy rogon feni papey ni be mon’og fare maruwel ni ngan ayuweg boch e girdi’ ni ngar manged boch i gachalpen Jesus. Rogon payngin ni be yan e re maruwel ney e rayog ni ngan taarebrogonnag nga ba karrow nib sug e girdi’ u langgin ni be yan nib papey maku be gel e papey riy i yan. Ere, uw rogon ni gad be pi’ e ayuw ko re maruwel ney? Gad be rin’ e tin nrayog rodad ni ngad machibnaged fare thin nib fel’ u fithik’ e pasig, fa? Boor e walag ni yad be un ko pioneer ni ayuw nge regular pioneer. Kub gel e felfelan’ ni gad be tay ni gad be guy boor e walag ni yad be yan nga boch e binaw nib t’uf boch e tamachib riy ni ngar pied e ayuw ara ngar rin’ed boch e maruwel u lan e ulung.

² Maku reb e, ku gad be guy nib t’uf boch e girdi’ ni ngar rin’ed e re maruwel  ney. Ya ra reb e duw ma sogonap’an 2,000 e ulung ni ke sum. Ere, faanra ra reb e pi ulung ney ma nge pigpig 5 e piilal riy, me ere ra reb e duw mab t’uf 10,000 e ministerial servant ni ngar pigpiggad ko pi ulung ney. Re n’ey e be dag nib t’uf bokum biyu’ e walag ni pumoon ni ngar manged boch e ministerial servant. Machane, demtrug ko gadad e walag ni pumoon ara ppin, ma boor e maruwel nib t’uf ni ngad rin’ed ‘ni fan ngak Somol.’​—1 Kor. 15:58.

3, 4. Ga be lemnag ma mang e ba t’uf ni nge rin’ be’ me yag ni nge mon’og ko tirok Got ban’en?

³ Mu beeg e 1 Timothy 3:1. Fare bugithin ni Greek ni kan pilyeg ni “nameg” e be yip’ fan be’ ni be guy rogon ni nge ded pa’ nga ban’en nib palog rok. Nap’an ni yog apostal Paul e re bugithin ney, ma be tamilangnag ni faanra nge mon’og be’ ko tirok Got ban’en, mab t’uf ni nge athamgil nib gel. Am susunnag reb e walag ni pumoon ni baadag ni nge yag boch e maruwel ngak u lan e ulung. Sana dawori mang reb e ministerial servant, machane manang nib t’uf ni nge gay rogon ni nge yag boch i fel’ngin e piin Kristiano ngak. Ere, som’on e ke guy rogon ni nge mang reb e ministerial servant. Munmun, ma aram mi i athapeg ni nge mang reb e piilal. Demtrug rogon, ma thingari athamgil ya nge yag ni rin’ e pi n’en nib t’uf ni nge rin’ ya nge yag ni lebguy e maruwel ni yira pi’ ngak u lan e ulung.

⁴ Ku arrogon e pi walag ni pumoon nge ppin ni yad baadag ni ngar uned ko pioneer, ara ngar pigpiggad u Bethel, ara ngar uned i toy boch e Tagil’ e Liyor rodad ni kub t’uf ni ngar athamgilgad ya nge yag nrin’ed e pi n’em ni yad be nameg. Chiney e ngad weliyed rogon ni be pi’ e Thin rok Got e athamgil nga lanin’dad ni ngad mon’oggad ko tirok ban’en.

5. Uw rogon nrayog ni nge fanay e piin fel’ yangaren gelngirad ni fan ko pigpig ni yad be tay ngak Got?

⁵ Piin fel’ yangaren e ka yad ba gel. Ere, boor ban’en nrayog ni ngar rin’ed ni fan ko pigpig ni yad ma tay ngak Jehovah. (Mu beeg e Proverbs 20:29. *) Bay boch e walag ni ka yad ba pagel ni yad ma maruwel u Bethel ni yad ma un i ngongliy yu ken e babyor nge Bible. Ku boor e walag ni pumoon nge ppin ni kab fel’ yangarrad ni yad ma un i toy ma yad be ayuweg e pi Tagil’ e Liyor rodad. Ma nap’an nra aw e durru’, ara yoko’, ara boch ban’en ni yima gafgow riy, maku boor e walag ni kab fel’ yangarrad ni yad ma un ngak boch e walag ni kar piilalgad ni nga ranod ra pied e ayuw ko pi walag ni yad ma par ko pi binaw ney. Ku boor e walag ni kab fel’ yangarrad ni yad ma machib u polo’ e tayim rorad ni yad be machibnag fare thin nib fel’ ko girdi’ ni yad ma par ko pi binaw nib palog ara ba thil e thin rorad.

6-8. (a) Uw rogon ni thilyeg reb e pagel rogon laniyan’ ko pigpig ni be tay ngak Got, ma mang angin ni yib riy ngak? (b) Uw rogon nrayog ni ngad ‘pirieged feni manigil’ Jehovah?

⁶ Dariy e maruwar riy ni ga manang feni ga’ fan ni ngad pigpiggad ngak Got u polo’ i gum’ircha’dad. Machane, uw rogon ni faanra ga be lem ni bod rogon reb e walag ni ka nog Aaron ngak? Yugu aram rogon nni chuguliy Aaron u reb e tabinaw ni yad boch e Kristiano, machane i yog ni gaar, “Gu ma chalban ni gu ma un ko muulung nge machib.” Bayi n’en ma ma lemnag ko mang fan nder yag ni nge pirieg e felfelan’ ni yugu aram rogon ni baadag ni nge pigpig ngak Got u fithik’ e felfelan’. Ere, mang e rin’?

⁷ I athamgil ni nga i beeg e Bible rok ni gubin ngiyal’, ma be fal’eg rogon ko pi muulung ni yima tay, maku ma athamgil ni nga i pi’ e fulweg u nap’an e muulung. Maku reb e, ki tabab ni nga i meybil ni gubin ngiyal’. Nap’an ni tabab ni nge gel e t’ufeg rok ngak Jehovah, ma aram e ngiyal’ ni tabab ni nge mon’og ko tirok ban’en. Tomuren e re n’ey ma aram me yag ni nge un ko pioneer, ma kki yag ni nge un i pi’ e ayuw ngak yugu boch e walag ni kar gafgowgad ni bochan e yoko’, ara durru’, ara boch ban’en ni ma yib ni yima gafgow riy, ma kki yag rok ni nge yan nga yugu reb e nam ni nge pi’ e ayuw ko machib. Chiney e ma pigpig Aaron u Bethel, ma ir reb e piilal u lan e ulung. Uw rogon u wan’ e n’en ni ke dugliy ni nge rin’ ko yafos rok? I yog ni gaar: “Kug ‘pirieg feni manigil’ Jehovah. Bochan e pi tow’ath ni ke pi’ ngog, ma aram fan ni gu manang ni bay ban’en nib milfan ngog ni nggu rin’ ni fan ngak, maku be k’aringeg e re n’ey ni nggu rin’ boor ban’en ni fan ko pigpig ni gu be tay ngak, ma angin ni be yib riy e ku be tow’athnageg i yan.”

⁸ I tang fare psalmist ni gaar: “Piin ni yad be fol rok Somol e dariy ban’en nib fel’ ni go manga dariy rorad.”  (Mu beeg e Psalm 34:8-10.) Arrogon, ba felfelan’ Jehovah ngak e piin ni yad ma pigpig ngak u fithik’ e pasig. Faan gad ra rin’ e tin nrayog rodad ni fan ko pigpig ni gad be tay ngak, ma rayog ni ngar da ‘pirieged feni manigil.’ Ma faan gad ra pigpig ngak u polo’ i gelngidad, ma felfelan’ nra yib riy ngodad e dariy ban’en nrayog i taarebrogonnag ngay.

9, 10. Mang fan nib t’uf ni ngam gum’an’nagem ngam ‘son’?

⁹ Nap’an ni ga be athamgiliy ni ngam taw ko n’en ni ga be nameg, mab t’uf ni ngam gum’an’nagem ngam ‘son.’ (Mik. 7:7) Gubin ngiyal’ ni ma ayuweg Jehovah e pi tapigpig rok ni yad ba yul’yul’ ngak ni yugu aram rogon ni bay yu ngiyal’ nthingar ra songad ni nge yag boch e tow’ath ngorad u lan e ulung ara nge thil boch ban’en u rarogon e par rorad. I micheg Got ngak Abraham nra fakay reb e pagel, machane thingari dag Abraham nib mich u wan’ e n’en ni ke yog ngak ma ngki gum’an’nag ir nge sonnag e ngiyal’ nra buch e re n’em riy. (Heb. 6:12-15) Yugu aram rogon ni boor e duw ni son ni nge fakay Isak, machane de mulan’ maku de war e michan’ rok ngak Jehovah.​—Gen. 15:3, 4; 21:5.

¹⁰ Riyul’ nde mom ni ngan sonnag ban’en. (Prov. 13:12) Machane, faanra ngaud pared ma gad be lemnag boch ban’en ni gad baadag machane der yag ni nge buch, ma aram e rayog ni nge mulan’dad. Ere, kab fel’ ni ngad gayed rogon ni ngad mon’oggad u boch ban’en nib t’uf ni ngad mon’oggad riy ya nge yag nni pi’ boch e maruwel ngodad u lan e ulung. Baaray dalip e kanawo’ nrayog ni ngad rin’ed e re n’ey riy.

11. Mang boch e fel’ngin nrayog ni ngad guyed rogon ni nge yag ngodad, ma mang nib ga’ fan e pi fel’ngin ney?

¹¹ Mu guy rogon ni nge yag boch i fel’ngin Got ngom.  Faanra ud beeged e Thin rok Got ma gad be fal’eg i lemnag fan, ma aram e rayog ni nge yag ngodad e gonop, nge tamilangan’, ma gad nang rogon ni ngad dugliyed boch ban’en nib fel’ rogon. Rib ga’ fan ni nge yag e pi fel’ngin ney ngak e piin ni yad ma yog e thin u lan e ulung. (Prov. 1:1-4; Titus 1:7-9) Ma nap’an ni gad ra beeg e pi babyor rodad nib puluw e thin riy ko Bible, ma rayog ni ngad nanged rogon laniyan’ Got u boch ban’en. Gad manang ni gubin e rran nthingar da dugliyed e re miti n’en ni ngad chuweged e chalban rodad ngay, nge rogon e munmad ni ngad ted, nge rogon ni ngad fal’eged yaadad, nge rogon ni ngad maruwelgad ko salpiy rodad, nge rogon ni ngaud ngongolgad ngak yugu boch e girdi’. Ere, faanra ud folgad ko pi n’en ni gad ma fil u Bible, ma aram e rayog ni ngad dugliyed boch ban’en nib m’agan’ Jehovah ngay.

12. Uw rogon nrayog ni nge dag e pi walag u lan e ulung nrayog ni ngan pagan’uy ngorad?

¹² Mu dag nrayog ni ngan pagan’uy ngom. Demtrug ko gad boch e walag ni pumoon ara ppin ma thingar da athamgilgad u rogon nrayog rodad ni ngad rin’ed e maruwel ni kan pi’ ngodad nib fel’ rogon. Bochan ni Nehemiah e ir e governor, ma aram fan nthingari dugliy boch e girdi’ ni nga u rogned e thin ko girdi’ rok Got kakrom. Ere, mini’ e mel’egrad ni ngar rin’ed e re n’ey? I mel’eg e piin ni bay madgun Got u wan’rad, ma rayog ni ngan pagan’uy ngorad. (Neh. 7:2; 13:12, 13) Ere, ku arrogon e ngiyal’ ney ni piin ni kan pag fan boch e maruwel ngorad e thingar ra ‘pared ni yad ba yul’yul’ ngak e masta rorad.’ (1 Kor. 4:2) Ma gad manang nrayog ni ngan guy e pi n’en nib fel’ ni gad ma rin’.​—Mu beeg e 1 Timothy 5:25.

13. Uw rogon nrayog ni ngam folwok rok Josef u nap’an ni ke rin’ boch e girdi’ ban’en ngom nde mat’aw?

¹³ Mu pag Jehovah ni nge yal’uwegem. Mang e rayog ni ngam rin’ ni faanra bay boch ban’en nde mat’aw ni ke rin’ boch e girdi’ ngom? Sana rayog ni ngam pithig fare magawon ni ka chingiyal’ nem. Machane, bay yu ngiyal’ ni faanra mu guy rogon ni ngam micheg ni gathi gur e ba kireb e rom, ma rayog ni ngam ga’nag e magawon ni ke sum. Am lemnag e n’en ni buch rok Josef. I rin’ fapi pumoon ni walagen boch ban’en nib kireb ngak, machane de tay e pi n’em u laniyan’. Ma boch nga tomuren mu kun t’ar e thin nga daken mi non’ nga kalbus. Yugu aram rogon, ma i pag Jehovah ni nge pow’iy u fithik’ e pi magawon ni i mada’nag. Ere, mang angin ni yib riy? “Thin rok Jehovah e aram e n’en ni i yal’uweg.” (Ps. 105:19, NW) Ere, nap’an ni m’ay fapi skeng ni i yan u fithik’ ma ke yag boch e fel’ngin ngak nra ayuweg u rogon ni nge rin’ e maruwel ni kan pi’ ngak ni nge rin’. (Gen. 41:37-44; 45:4-8) Faanra ga be mada’nag boch e magawon nib mo’maw’, mag meybil ngak Jehovah ni nge pi’ e gonop ngom, mu um non ma ga be rin’ boch ban’en u fithik’ e sumunguy, mag pag ni nge pi’ gelngim, ya ra ayuwegem.​—Mu beeg e 1 Peter 5:10.

14, 15. (a) Mang fan nthingar da ‘ayuweged rogon ni gad be’ machibnag e girdi’? (b) Uw rogon nrayog ni ngam thilyeg kanawoen e machib ni ga ma tay? (Mu guy e sasing ni bay u tabolngin e re article ney nge fare thin ni kenggin e “ Ba M’agan’um Ngay ni Ngam Machib u Yugu Boch e Kanawo’, Fa?”)

¹⁴ I pi’ Paul e athamgil nga laniyan’ Timothy ni gaar: “Mu tiyan’um nguum beeg e thin u lan e babyor nib thothup ngak e girdi’ ko muulung, ma ga be machib ngorad ma ga be weliy fan e thin rok Got ngorad. . . . Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’.” (1 Tim. 4:13, 16) Ngiyal’ nem e ke yoor e duw ni ke machib Timothy riy. Ere, mang fan nib t’uf ni nge mon’og? Rayog ni nge yib angin e machib ni be tay ni faanra ‘ayuweg rogon ni be weliy’ e thin rok Got ko girdi’. Dabiyog ni nge lemnag nrogon kanawoen e machib ni be tay e gubin ngiyal’ nra yib angin. Ya faanra nge yag ni nge motoyil e girdi’ ngak, ma thingari puluw e n’en ni be weliy ko pi n’en nib t’uf ko girdi’ ni be mada’nagrad u nap’an e machib. Ere, ku arrogodad e ngiyal’ ney.

¹⁵ Bay yu ngiyal’ ni gad ra yan ko machib ma der yag ni ngad pirieged e girdi’ u taferad. Ku bay yu yang ni yima machib riy ni ma par e girdi’ riy u boch e naun nib liyeg e yoror ndabiyog ni ngan yan ngay. Ere, faanra aray rogon e gin ni ga ma machib riy, ma mang ndab mu gay boch e kanawo’ nrayog ni ngkum machibnag fare thin nib fel’ riy?

16. Uw rogon nrayog ni nge yib angin e machib ni yima tay ko yungi n’en ni ma muulung e girdi’ ni yoor ngay?

¹⁶ Machib ko yungi n’en ni ma muulung e girdi’ ni yoor ngay e aram reb e kanawo’ nib fel’ nrayog ni ngad wereged fare thin nib fel’ riy. Boor e Pi Mich Rok  Jehovah ni ke yag ni nge yib angin e mit ney i kanawoen e machib ngorad. Yad ma guy rogon ni ngar nonad ko girdi’ ko gin ni yima sonnag e train nge bus riy, nge yungi n’en ni yima pi’ boch ban’en riy nni chuway’, ngu park, nge ku yu yang ni ma muulung e girdi’ ni yoor ngay. Ba ga’ ni yad ma weliy ko girdi’ murung’agen ban’en ni kar guyed ara kar rung’aged ko news, ara rogned ngak be’ ban’en nib manigil u murung’agen e bitir rok, ara ra fithed reb e deer ngak be’ u murung’agen e maruwel rok. Ma faanra yad be guy ni baadag facha’ ni yad be non, ma aram ma rogned reb e thin nu Bible ngak mar fithed laniyan’ riy. Ba ga’ ni boor e girdi’ ni yima mada’nag ni yad baadag ni ngar nanged boch ban’en u murung’agen e Bible.

17, 18. (a) Uw rogon ni ngam adag ni ngam machib ko yungi n’en ni ma muulung e girdi’ ni yoor ngay? (b) Mang fan ni ga be lemnag nra ayuwegem fapi thin ni yog David ni be pining e sorok ngak Jehovah u nap’an ni ga be machib?

¹⁷ Faanra kam un ko machib ko yungi n’en ni ma muulung e girdi’ ni yoor ngay ma kam guy nib mo’maw’ ngom ni ngam non ko girdi’, ma dabi mulan’um. Eddie nreb e pioneer ni ma par u New York City e ba mo’maw’ ngak ni nge non ko piin ni ke mada’nagrad ko yungi n’en ni ma muulung e girdi’ ni yoor ngay. Machane, munmun ma aram me yag rok ni nge rin’ e re n’ey. Ere, mang e ayuweg? I yog ni gaar: “Nap’an ni gamow ra tay e ppin rog e fol Bible ni tabinaw, ma gamow ma fal’eg i gay murung’agen rogon ni ngan fulweg lungun be’ ni kan mada’nag ndabun e machib nge murung’agen boch ban’en nib ga’ ni ma weliy e girdi’ ni kan mada’nag. Ku gamow ma yog ngak boch e walag ni nga rogned boch ban’en nrayog ni nge ayuwegmow.” Chiney e ri baadag Eddie ni ma un ko machib ko yungi n’en ni ma muulung e girdi’ ni yoor ngay.

¹⁸ Ga ra mon’og u rogon ni ga be machibnag fare thin nib fel’ mu kum adag ni ngam rin’, ma aram e rayog ni nge guy e girdi’ rogon e mon’og ni ga be tay. (Mu beeg e 1 Timothy 4:15.) Maku reb e, dariy e maruwar riy ni ga ra pining e sorok ngak e Chitamangidad ni bay u tharmiy ni bod rogon e n’en ni rin’ David ni faani gaar: “Gubin ngiyal’ ni bay ug pining e magar ngak Somol; ma bay ug pining e sorok ngak ndab gu tal. Bay ug pining e sorok ngak ko tin ni ke rin’; urngin e piin ni yibe gafgownagrad e ngar motoyilgad mi yad felan’!” (Ps. 34:1, 2) Faan ga ra rin’ ni aray rogon ma dabisiy nrayog ni ngam ayuweg be’ ni nge un ko bin riyul’ e liyor.

19. Mang fan nsusun e nga i par reb e tapigpig rok Jehovah nib felfelan’ ni yugu aram ni be mada’nag boch e magawon nib mo’maw’?

¹⁹ Ki tang David ni gaar: “Somol, urngin e tin ni kam sunumeg e bay ur pininged e sorok ngom, ma tirom e girdi’ e bay ur pininged e magar ngom! Bay ur weliyed murung’agen e flaab ko gagiyeg rom, mi yad weliy murung’agen gelngim ni ba’ nib gel, ya nge nang urngin e girdi’ feni sorom ko tin ni kam rin’, nge gagiyeg ni ga be tay.” (Ps. 145:10-12) Ireray e n’en ni baadag urngin e pi tapigpig rok Jehovah ni yad ba yul’yul’ ni ngar rin’ed. Machane, uw rogon ni faanra dabkiyog ni nge yoor e tayim ni ngam fanay ni fan ko machib ni bochan e kam m’ar ara kam pilibthir? Dab mu pagtalin ni faan ga ra machibnag e pi togta rom ara piin ni yad ma ayuwegem u nap’an ni kam m’ar, ma aram e ka ga be pining e sorok ngak Got. Faanra ka non’em nga kalbus ni bochan e michan’ rom, ma bay yu ngiyal’ nsana rayog ni ngam weliy murung’agen e tin riyul’ ngak yugu boch e girdi’. Ma re n’ey e ku ra felfelan’nag Jehovah. (Prov. 27:11) Ku ra felfelan’ Jehovah ni ga be ulul ni ngam pigpig ngak ni yugu aram rogon ni bay boch e girdi’ u lan e tabinaw rom nde taareb e michan’ romed. (1 Pet. 3:1-4) Faanra ga be mada’nag boch e magawon ni aray rogon, maku rayog ni ngam pining e sorok ngak Jehovah mag mon’og ko tirok ban’en.

20, 21. Faanra yoor e maruwel nni pag fan ngom u lan e ulung rok Jehovah, ma uw rogon nrayog ni ngam ayuweg yugu boch e girdi’?

²⁰ Faan ga ra athamgil ni ngaum mon’og i yan ko tirok Jehovah ban’en ma ra tow’athnagem. Sana rayog ni ngam thilyeg boch ban’en u rarogom ara rarogon e par rom ya nge yag ni yoor boch e tayim ni ngam fanay ni ngam weliy e tin riyul’ riy ko girdi’. Maku reb e, faan ga ra athamgil ni ngam mon’og ko tirok Got ban’en mu um pag fam u boch ban’en, ma rayog ni ngkum ayuweg e piin taareb e michan’ romed. Ma faanra i guyem yugu boch e walag nib t’uf Jehovah rorad ni ga be athamgil ni ngam maruwel nib gel, ma yad ra t’ufegem, me ga’ fam u wan’rad, mar ayuweged gur.

²¹ Demtrug ko ke yoor e duw ni kad pigpiggad ngak Jehovah ara ka fin nda tababgad ndawori n’uw nap’an, ma gad gubin ni bay boch ban’en nib t’uf ni ngad mon’oggad riy. Machane, uw rogon nrayog ni nge ayuweg boch e walag ni kar ilalgad ko tirok Got ban’en e pi walag ni ka yad beech ni ngar mon’oggad? Ireray e n’en ni gad ra weliy ko bin migid e article.