NAP’AN ni gaman 12 e duw rog, ma aram mug nang ni bay ban’en nrib manigil nrayog ni nggu pi’ ko girdi’. Nap’an reb e assembly, me fith reb e walag ni pumoon ngog ko gu baadag ni nggu un ko machib fa danga’. Ma aram mu gog ngak ni gu baadag ni yugu aram rogon ndawor gu un ko machib bayay. Ere, nap’an ni gu warow ko gin ni ngan machib riy, ma aram me pi’ nochi ke babyor ngog ni be weliy murung’agen Gil’ilungun Got ni nggu wereg ko girdi’. Me gaar ngog: “Bay mman mu machibnag e girdi’ u ba’ nem e kanawo’ mug wan u ba’ ney.” Ere, gu wan ko pi tabinaw nem i yan ni kar gu rus. Machane, kug gin ya de n’uw nap’an nga tomuren mug wereg gubin fa nochi ke babyor nge m’ay. Ere, ba tamilang ni boor e girdi’ ni yad baadag e n’en ni kug pi’ ngorad.

Ni gargelnageg ko duw ni 1923 u reb e binaw u Kent u England ni ka nog yu Chatham ngay. Pi duw nem u tomuren ni ka fini m’ay e Bin Som’on e Mahl ko Fayleng e ri boor e girdi’ ni yad be athapeg ni nge fel’ boch e par u fayleng. Machane, de buch e re n’em. Ere, ri boor e girdi’ ni kireban’rad ni kub muun e gallabthir rog ngay. Ki damumuw e gallabthir rog ni bochan e pi tayugang’ ko teliw ni Baptist e kemus ni yad be guy rogon ni nge yag boch e liw nib tolang ngorad u galesiya. Sogonap’an mereb e duw rog, ma aram me tabab e nina’ rog ni nga i yan ko gin ni ma muulung e Pi Mich Rok Jehovah riy. Immoy reb e walag nib pin u rom ni ma fil boch ban’en nu Bible ngomad e piin bitir nge fare ke babyor ni kenggin e The Harp of God. Gu baadag e pi n’en ni ug fil u rom.

Nap’an ni kab fel’ yangareg, ma gu baadag ni gu ma weliy ko girdi’ murung’agen e athap rodad ni bay ko Thin rok Got. Yugu aram rogon nib ga’ ni yigoo gag ni gu ma yan ko machib u mit e tabinaw i yan, machane nap’an ni gu ra un ngak yugu boch e walag ko machib ma boor ban’en ni gu ma fil rorad. Immoy reb e rran u nap’an ni gamow be yan reb e walag ni pumoon nib ilal i yan ko gin ni nggu machibgow riy, ma aram mug thilgad reb e tayugang’ ko teliw u kanawo’. Ma aram me lungug, “Beer reb fapi kaming.” Ma aram me taleg fare walag e rat rok nge og nga but’, me yog ngog ni nggu warow gu parew nga daken baley i gek’iy, ma aram me gaar ngog: “Mini’ e ke pi’ mat’awum ni ngam dugliy e piin ni ngar manged kaming? Kemus ni ngad felfelan’gow ni gadow be weliy fare thin nib fel’ ko girdi’, ma gadow pag Jehovah ni nge mang ir e pufthinnag e girdi’.” Ngiyal’ nem ni kab fel’ yangareg e boor ban’en nug fil u murung’agen e felfelan’ ni gad ma tay u nap’an ni gad ra pi’ ban’en ku be’.​—Matt. 25:31-33; Acts 20:35.

Ku bay reb e walag nib ilal ngog ni ki fil ngog ni faanra ngad felfelan’gad ni ngad pied ban’en ku be’, ma bay yu ngiyal’ nthingar da k’adedan’dad u fithik’ e gafgow ni gad be mada’nag. Ppin ko re walag nem e dabun daken e Pi Mich Rok Jehovah. Immoy bayay ni piningeg e re walag nem nga taferow e ppin rok ni nggu unumew boch e ran ma gamow kay ban’en. Nap’an ni gu warow e ngaram ma kari damumuw e re ppin nem ni bochan e ke yan fare walag ko machib. Ere, i fek nochi  birif i tea ni yima tay ko ran ni gowel nga i pag ngomow. Yugu aram rogon, ma de damumuw fare walag, ya kunuy fapi tea nge sulweg nga tagil’. Rib ga’ angin e gum’an’ ni i tay e re walag nem, ya boch e duw nga tomuren ma aram me un e ppin rok ko taufe ni ke mang bagayad e Pi Mich Rok Jehovah.

Nap’an e March ko duw ni 1940 ma aram min taufenagmow e nina’ rog u Dover. U m’on riy ko September ko duw ni 1939 u nap’an ni ke gaman 16 e duw rog, ma aram me mahl yu Britain ngak yu Chiyamen. Nap’an e June ko duw ni 1940, ma ug guy e salthaw ni ur bad nga u ranod u tooben e naun rog u lan boch e karrow nib gagang’. Pi salthaw nem e aram boch e salthaw nra mageygad ndar m’ad u nap’an fare cham nni tay u Dunkirk. Gu ra yaliy e pi salthaw nem ma dakuriy ban’en ni be l’agan’rad ngay. Ere, rug baadag ni nggu weliy murung’agen Gil’ilungun Got ngorad. Ku aram e re duw ni tabab yu Chiyamen ni ngaur donmachnaged yu Britain. Gubin e nep’ ni gu ma par ngaug yaliy e pi sikoki rok yu Chiyamen ni bay e donmach riy ni be yib i changeg u daken e binaw ni gu ma par riy. Rib gel e marus ni gamad ma tay u nap’an ni gamad ra rung’ag lingan e pi donmach nem ni be mul u lang be yib i aw nga daken e binaw. Nap’an nra kakadbul ni gu warod nga wen, ma gamad be guy yu yang nib sug e naun riy ni ke aw e donmach ngay ke kirebnag. Pi n’ey e ayuwegeg ni nggu nang ni kemus ni yigoo Gil’ilungun Got e aram e n’en nrayog ni nge pi’ e athap ngog ni fan ko gabul nge langlath.

Nap’an e duw ni 1941 ma aram e ngiyal’ ni gu tabab i rin’ ban’en nrib gel e felfelan’ ni kug tay riy. U m’on ko ngiyal’ nem ma ug maruwel u bangi ban’en ni bay u Chatham ni yima ngongliy e barkow riy, mu ug fil rogon ni ngan ngongliy boch e barkow. Boor e girdi’ ni baadag e re maruwel nem, ya rib fel’ puluwon. Machane, ngiyal’ nem e ke tamilang u wan’ e pi tapigpig rok Jehovah nsusun e dabi un e piin Kristiano ko mahl. Ma nap’an e duw ni 1941, ma ke tamilang u wan’mad nthingar dab gu uned ko maruwel u bang ni yima ngongliy boch e talin e cham riy. (John 18:36) Ma gin’em ni ug maruwel riy e un ngongliy e submarine riy ara barkow ni ma yan u ar. Ere, gu dugliy ni nggu tal ko binem e maruwel nggu un ko machib u polo’ e tayim rog. Bin th’abi som’on e binaw ni gu wan ngay ko machib e ka nog yu Cirencester ngay nreb e binaw nrib fel’ yaan ni bay u Cotswolds.

Nap’an ni gaman 18 e duw rog, ma aram mi non’eg nga kalbus ni bochan e kug siyeg ndab gu un ko salthaw, ma aram mug par u rom ni mereb e pul. Rib gel e kireban’ ni gu tay u nap’an non’eg nga kalbus nggu par u rom ni yigoo gag. Machane, de n’uw nap’an nga tomuren, ma aram me tabab e pi matanagen e kalbus nge yugu boch e kalbus ni ngar fithed gag ko mang fan ni ka non’eg e ngaram, ma aram mu ug weliy ngorad e pi n’en ni ke michan’ug ngay.

Tomuren nni pageg u kalbus, ma aram mi nog ngog ni nggu un ngak be’ ni ka nog Leonard Smith * ngak ni nggu warow ko machib nga boch e binaw ni bay ko binaw romow u Kent. Nap’an e duw ni 1944, mab pag bbiyu’ e sikoki ko salthaw ndariy be’ ni be kol e yap’ riy ni un tay e donmach ngay ngaun pag nge yib i aw nga daken yu Kent. Ma gin ug moyed riy e bay u thilin yu London nge pi binaw u Europe ni ke suwey  e Nazi. Ma aram e gin ni ma yib i yan e pi sikoki nem riy. Rib gel e marus ni i tay e girdi’, ya nap’an ni yira rung’ag lingan reb e pi sikoki nem ni ke tal, ma aram e kan nang ndabi n’uw nap’an me mul u lang nge yib i aw nga daken e binaw nge chub. Ere, bay ba wu’ e mabgol ni ug filew e Bible ngorow ni bay dalip e bitir rorow. Bay yu ngiyal’ ni gamad ma fil e Bible u tan reb e tebel ni kan ngongliy ko wasey ya nge dabi puth u nap’an nra aw e donmach ko naun. Munmun ma aram me un gubin i girdien fare tabinaw ko taufe.

Tomuren e mahl, ma l’agruw e duw nug pioneer u yimuch u Ireland. Ba ga’ ni gamad ma yan u mit e tabinaw i yan ni gamad be yog ni gamad boch e missionary, ma gamad be ning bang ni nggu pared riy, maku gamad be pi’ boch e magazine ko girdi’ ni kug mada’naged u kanawo’. Machane, rib thil yu Ireland nga England. Ya yooren e girdi’ u rom e yad ba Katolik. Ere, boor e girdi’ ni ur lemnaged ni gamad bbalyang ni gamad be lemnag nra adag e girdi’ ni nge motoyil ngomad. Immoy bayay ni yog reb e pumoon ni nge li’mad, ma aram mug wan gog ko polis, me gaar fare polis ngog, “Dam nanged ni ireyer e n’en nra buch romed?” Dag nanged nrib gel lungun e pi padrey ko Katolik u rom. Ya ranod u thaan ni ngan taleg e piin ni ur feked e pi babyor romad ko maruwel min tulufmad ko gin ni ug pared riy.

De n’uw nap’an mug nanged ni faan gamad ra taw nga reb e binaw, mab fel’ ni nggu warod gu machibgad u bang nde nangmad e padrey riy. Ere, ba ga’ ni gamad ma yan ko pi binaw nib palog ko gin ni gamad be par riy ni nggu machibnaged e girdi’ mfin gu sulod nggu machibgad ko gin nib chugur ko gin ni gamad be par riy. Nap’an ni gu warod nga Kilkenny, ma aram mug filed e Bible ngak reb e pagel. Re pagel nem e gamad ma fil e Bible ngak ni dalip yay u reb e wik ni yugu aram rogon ni gamad manang nrayog ni nge yib i li’mad e girdi’. Rug baadag ni gu ma fil e tin riyul’ u Bible ko girdi’, ere gu dugliy ni nggu fal’eg e babyor rog ni nggu un ko fare skul ni ka nog e Watchtower Bible School of Gilead ngay, ya nge yag ni nggu mang reb e missionary.

Tomuren nug un ko re skul nem nni tay u New York u lan lal e pul, ma aram min pi’mad dalip e walag ni nggu warod gu machibgad nga boch e donguch ni bay u lan fagi day ni ka nog yu Caribbean ngay. Nap’an e November ko duw ni 1948, ma aram mug afgad nga reb e barkow ni lay u New York City nggu warod. Kar gu felfelan’ ya dawor gu un bayay ko milekag u maday. Immoy bagayad e pi walag nem ni gu milekaggad u taabang ni ka nog Gust Maki ngak. Cha’nem e ir reb e gabitey ko barkow. Ere, boor ban’en ni i fil ngomad u murung’agen e milekag u maday. Bod ni, i fil ngomad rogon ni ngan girngiy e lay nga lang nge rogon ni ngan pilig nga but’, nge rogon ni ngan milekag ni yibe fanay e compass, nge rogon ni ngan pilo’ ko nifeng u nap’an ni yibe milekag u maday. Gust e ir e i yog e gin ni nggu warod riy, ma aram mug milekaggad nggu tawgad nga Bahamas u lan 30 e rran ni yugu aram rogon ni ug mada’naged yungi lang u maday.

Tomuren ni gu machibgad ko pi donguch u lan yu Bahamas, ma aram ma gamad milekag u maday nggu warod nga nochi donguch ni bay u lan yu Leeward nge Windward. Nochi donguch ney e tabab u tooben fa nochi donguch ni ka nog e Virgin Islands ngay ni bay u tooben yu Puerto Rico nge yan i mada’ nga tooben yu Trinidad, ma gin ni tabab e pi donguch nem riy nge yan i mada’ ko gin ni mus riy e sogonap’an 500 e mayel (800 km) pal’ofngin. Lal e duw ni ug machibgad u boch e donguch ndariy e Pi Mich Rok Jehovah riy. Bay yu ngiyal’ ni ma yan boor e wik nder yag ni nggu pied ara nggu feked e mail romad. Machane, ri gamad ba felfelan’ ni gamad be weliy e thin rok Jehovah ko pi donguch i yan!​—Jer. 31:10.

Nap’an ni gamad ra yan gu gatatgad nga reb e pi donguch nem, ma ri ma felfelan’ e girdi’ ni ma guymad, ma aram mar bad i yib ko gampek ni ngar nanged ko gamad chon mini’. Bay boch i yad ndawori guy e barkow ni lay ara girdi’ ni wechwech biid. Pi girdi’ nem e yad ba gol ma ri yad manang e thin nu Bible nib fel’ rogon. Ba ga’ ni yad ma pi’ e nig ngomad, nge avocado, nge kel. Yugu aram rogon nib achig e chi barkow nem, machane rayog ni nggu lumgad, ma gamad mol, ma gamad maluknag e mad romad u langgin.

Nap’an ni gamad ra taw nga reb e donguch, ma gamad yan nga arow nggu machibnaged e girdi’ nib polo’ reb e rran. Ba ga’ ni gamad ma yog ngorad ni yira pi’ reb e welthin nib  puluw ko Bible. Ma nap’an nra yan ni nge aw e lumor ma gamad chubeg e bell ko fare barkow romad. Ma aram mug guyed e girdi’ ni kar bad i yib nga l’ay. Ramaen e magal rorad e bod e t’uf ni be galgal ramaen ni be yib u daken e burey i yib nga dap’el’ay. Bay yu ngiyal’ ni ma yib raay e girdi’, mar pared romad nge n’uw e nep’ ni yad be fith boch e deer ngomad. Yad baadag e tang. Ere, bayi n’en ma gamad typenag boch e tang ko muulung nggu pied ngorad. Gamad e gamad ma tabab ko tang nsom’on, ma aram miki un fapi girdi’ ngomad nggu tanggad u taabang, ma rib fel’ lamrad. Rib gel e felfelan’ ni ug ted!

Bay boch e girdi’ nu tomuren ni gamad ra mu’ i fil e Bible ngorad, ma aram mar uned ngomad ko bin migid e tabinaw ya ngkur uned ko fol Bible ni gamad ra tay u rom. Ra gaman in e wik ni kug pired u reb e pi donguch nem, ma aram mug chuwgad ngkug warod nga yugu reb e donguch. Machane, ba ga’ ni gamad ma yog ngak e piin nri yad baadag e machib ni ngar ululgad e tin baaram e girdi’ ni ku yad baadag e machib ko fol Bible u taabang nge mada’ ko ngiyal’ ni kug sulod bayay. Ri gamad ma felfelan’ ni gamad ma guy boch i yad nri yad ma tedan’rad ni ngar rin’ed e maruwel ni kan pi’ ngorad.

Ngiyal’ nem e pi donguch nem e kemus nnochi donguch nib liyeg e day, nge yan’, nge niw, machane chiney e boor riy e ke sugnag e tourist. Ba ga’ ni gamad ma milekag u reb e binaw nga reb nnep’. Ra gamad be yan u maday, ma gamad ma guy e guchig ni ma yib nga tooben e barkow romad, ma kemus ni yigoo lingan e day ni be aw ko barkow romad e ir e gamad be rung’ag lingan. Ma gamad ma guy ramaen e pul ni be aw nga daken e day nga i galgal ramaen.

Tomuren lal e duw nug machibgad ko pi donguch nem, ma aram mug warod nga Puerto Rico ni nggu thilyeged e re barkow ni lay nem nga reb e barkow ni bay e masin riy. Nap’an nug tawgad ngaram ma aram mug mada’nag reb e walag nib pin nrib pidorang ni ir reb e missionary. Re walag nem e ka nog Maxine Boyd ngak, ma ri gu baadag e re walag nem. Ka nap’an ni kab bitir ni i machibnag fare thin nib fel’ u fithik’ e pasig. Ma boch nga tomuren, ma aram me mang reb e missionary u Dominican Republic, me par u rom nge mada’ ko ngiyal’ ni yog e am ngak ni nge chuw ko duw ni 1950. Bochan ni gag girdien reb e barkow, ma aram fan ni kemus nreb e pul nrayog ni nggu par u Puerto Rico. Ma dabki n’uw nap’an ma thingar gu chuw nggu milekag ko pi donguch i yan u lan in e duw. Ere, lungug u wan’ug, ‘Ronald, faanra ga baadag e chi pin ney, ma ka chiney e ngam rin’ ban’en.’ Tomuren dalip e wik, ma aram mu gog ngak ni gu baadag ni nggu mabgolgow, ma tomuren nel’ e wik ma aram min m’agpa’mow. Tomuren nug mabgolgow Maxine ma aram min dugliy ni nggu mangew missionary u Puerto Rico. Ere, dag wan ko fare milekag ni susun e nggu wan ngay.

Nap’an e duw ni 1956 ma aram mug tababgow ni ngaug lekagew boch e ulung. Boor e walag ko pi ulung nem ni yad ba gafgow, machane ri gamow baadag ni gamow ma yan ni ngguyew yad. Bay reb e binaw ni ka nog yu Potala Pastillo ngay ni immoy l’agruw e tabinaw riy ni yad boch e Pi Mich Rok Jehovah. Ma gal tabinaw nem e ri boor e bitir riy, ere ba ga’ ni gu ma thoy ba mit e talin e musik ni ka nog e ngal ngay ni ngaur rung’aged lingan. Ere, immoy bayay nug fith ngak Hilda nreb e buliyel ni ma par u reb e gal tabinaw nem ko baadag ni nge un ngomow ko machib fa danga’. Ma aram me gaar: “Gu baadag ni nggu un, machane dabiyog, ya dariy e sus rog.” Ere, gu warow gu chuw’iyew e sus nggu piew ngak, ma aram me un ngomow ko machib. Boch e duw nga tomuren u nap’an nug warow Maxine nga Bethel u Brooklyn ko duw ni 1972, ma aram me yib reb e walag nib pin i non ngomow. Re walag nem e ka fini mu’ ko fare skul ni ka nog e Gilead School ngay. Ma ngiyal’ nem e be n’en ni nge yan nga Ecuador ni aram e gin ni kan dugliy ni nge yan ngay ko machib. Ma aram me gaar ngomow: “Sana dakumur poyew gag, fa? Gag fachi buliyel u Pastillo ndariy e sus rok.” Fare pin e Hilda! Ma aram mug yorgow ni kar gu felfelan’gow!

Nap’an e duw ni 1960 ma aram mi nog ngomow ni nggu warow gu pigpiggow ko branch u Puerto Rico. Immoy e branch ofis u ba naun ni l’agruw thal u Santurce u San Juan. Som’on nug warow e ngaram mab ga’ ni gamow reb e walag ni ka nog Lennart Johnson ngak e gamow ma rin’ yooren e maruwel. Re walag nem nge ppin rok e yow e gal nth’abi som’on e girdi’ nra mangew l’agruw e Pi Mich Rok Jehovah u Dominican Republic, mar bow nga Puerto Rico ko duw ni 1957. Boch nga tomuren, ma aram mi i maruwel Maxine ni ir e en ni ma pi’ yu ken e magazine nge yan ngak e piin ni ka rogned ni ngaun pi’ e tin nib beech e magazine ngorad. Baadag Maxine ni ma rin’ e re maruwel nem ni bochan e ma lemnag urngin e piin ni yad be fil murung’agen Jehovah ko pi babyor nem.

Gu baadag e maruwel u Bethel ni bochan e aram bang nrayog ni nggu fanay gelngig riy ni fan ko pigpig ngak Jehovah. Machane, gathi gubin ngiyal’ nib mom e re maruwel ney. Immoy bayay u nap’an nni tay e bin th’abi som’on e international assembly u Puerto Rico ko duw ni 1967, mi ri aw parawog nga urngin e maruwel nni pi’ ngog ni nggu rin’. Ku aram e ngiyal’ ni yib Nathan Knorr nga Puerto Rico ni ir e en ni i yarmiy e ulung ko Pi Mich Rok Jehovah e ngiyal’ nem. I oloboch me lemnag ndawor gu yarmiy rogon e karrow ni nge yan i fek e pi missionary ni kar bad ni ngar uned ko re muulung nem, machane bin riyul’ riy e kug yarmiy. Ere, boch nga tomuren ma aram me fonownigeg u murung’agen feni ga’ fan ni ngaun yarmiy ban’en, machane rib gel e thin ni yog ngog, miki yog ngog ndabun e n’en ni kug rin’. Dabug ni nggu fulweg lungun ni bochan e dabug ni nggu luagew e thin, machane de  puluw u wan’ug e n’en ni rin’ ngog. Ere, gu par ba ngiyal’ nib kireban’ug ni bochan e n’en ni ke buch. Machane, faani yay ni migid nug mada’nagew Maxine Brother Knorr, ma aram me piningmow ko singgil rok me fal’eg boch e ggan ni nggu wed.

Nap’an ni ug mew u Puerto Rico, ma bay in yay nug warow nga England ni ngguyew chon e tabinaw rog. Nap’an ni ka fin gu unew e nina’ rog ko tin riyul’, ma papa’ rog e dabun e machib. Machane, nap’an nra yan boch e walag ni pumoon u Bethel ko binaw ni yow ma par riy, mab ga’ ni yad ma par ko tabinaw romad. Ere, guy e papa’ rog ni pi walag ni pumoon nem e rib sobut’an’rad, ma ri yad ba thil ko pi tayugang’ ko teliw ndabun dakenrad ya rib tolangan’rad. Ere, nap’an e duw ni 1962, ma aram me un ko taufe ni ke mang bagayad e Pi Mich Rok Jehovah.

Nap’an e duw ni 2011, ma aram me yim’ Maxine ni ppin rog. Gu be sonnag e ngiyal’ ni ka gamow ra mada’ bayay u nap’an ni yira faseg e piin ni kar m’ad. Rug ma felfelan’ u nap’an ni gu ra lemnag e re n’ey! U lan e re 58 i duw ni baaram nug mabgolgow riy e ke yag ni ngguyew e ulung rok Jehovah u Puerto Rico ni ke ga’ i yan, ya som’on e immoy ni sogonap’an 650 e Pi Mich Rok Jehovah u rom, ma chiney e ke gaman 26,000! Nap’an e duw ni 2013, ma aram me peth e branch nu Puerto Rico ko bin nu Meriken e branch. Ere, nog ngog ni nggu wan nga Wallkill u New York ni nggu pigpig u rom. Bochan ni ke gaman 60 e duw ni kug par u Puerto Rico, ma gowa kug mang be’ u rom. Machane, ke taw nga nap’an ni ngkug wan nga bang nib t’uf e ayuw riy.

Ku gub felfelan’ ko pigpig ni gu be tay ngak Got u Bethel. Chiney e ke pag 90 e duw rog, ma maruwel rog u Bethel e gu ma pi’ e athamgil nga laniyan’ e pi walag ni yad ma maruwel u rom. Ka nog ngog ni ka nap’an e ngiyal’ ni gub nga Wallkill ke mada’ ko chiney, ma ke pag 600 e walag ni kug ayuwegrad. Bay boch e pi walag ney ni yad ma yib ra guyed gag ni ngar weliyed murung’agen boch e magawon ni yad be mada’nag ara boch e magawon u lan e tabinaw rorad. Ku bay boch i yad ni yad baadag ni ngar nanged rogon nrayog ni nge fel’ rogon e pigpig ni yad be tay u Bethel. Ku bay boch i yad ni ka fini un ko mabgol ni yad baadag ni nggu pi’ boch e fonow ngorad u murung’agen e mabgol. Maku bay boch i yad ni kar sulod bayay kar manged boch e pioneer. Gu ma motoyil ko n’en ni ma yog e pi walag ney ngog, ma faanra kug guy nib puluw ni nggu rin’, ma ma lungug ngorad: “‘Got e ba t’uf rok e en ni ma pi’ ban’en u fithik’ e felfelan’.’ Ere, mu felfelan’ ko maruwel ni ga be rin’, ya fan ngak Jehovah.”​—2 Kor. 9:7.

Demtrug ko ga be pigpig u Bethel ara yugu bang ma: Thingar dab mu pagtalin fan nrib ga’ fan e maruwel ni ga be rin’. Gubin e maruwel ni yima rin’ u Bethel e fan ngak Got. Pi maruwel ney e ma ayuweg “fare tapigpig nib yul’yul’ ma ba gonop” ni nge pi’ e tin nib t’uf ko pi walag u fayleng i yan. (Matt. 24:45) Demtrug e gin ni gad bay riy ni gad be pigpig ngak Jehovah, ma rayog ni ngad pininged e sorok ngak. Ere, ngad rin’ed urngin ban’en ni ke yog ngodad u fithik’ e felfelan’, ya “Got e ba t’uf rok e en ni ma pi’ ban’en u fithik’ e felfelan’.”