PIIN ni yad ma fil e Bible ni yad ba yul’yul’ e yad bod e girdi’ ni ma gay e gol. Pi girdi’ ney e ba t’uf ni ngar maruwelgad nib gel ni ngar gayed e gonop ko thin nu Bible ma dab ra talgad i gay. Dalip kanawoen e magow gol ni yima tay. Ere, mang e rayog ni ngad filed ko re dalip i n’ey?

Mu susunnag ni ga be yan u marichlen e lul’ ma gguy ba malang nib achichig ni be mat e yal’ ngay be gal ramaen. Ka rim felfelan’ ni kam pirieg boch yang i gol ma aram mag lumel nga but’ ni ngam fal’eg i yaliy. Chi malang nem e ba achig ngab p’elolugen e masis ma ri tamthath ni bod e diamond nib tolang puluwon. Rib mudugil ni ga ra sapsap u toobem ni ga be yaliy ko ka bay boch ni ga ra pirieg fa danga’.

Sana boch kafram ma bay reb e tapigpig rok Jehovah ni ke yib nga tabinaw rom ni ngam weliyew murung’agen e tin riyul’ u Bible nra yibnag e athap ko girdi’. Sana ra yib ngan’um e ngiyal’ ni baaram nth’abi som’on nim rung’ag e tin riyul’. Ma rayog ni buch e re n’em ko yay nth’abi som’on nim guy fithingan Got u lan e Bible ni aram Jehovah. (Ps. 83:18) Ara sana kum fil nrayog ni ngam mang fager rok Jehovah. (Jas. 2:23) Ka chingiyal’ nem mag nang ni kam pirieg ban’en ni kab fel’ ko gol, ma kag baadag ni ngkum gay boch!

Bay yu ngiyal’ ni ma mokun noch yang i gol nga lan e lul’ ni buchuuw ma buchuuw. Ere, piin ni yad ma gay e gol e rayog ni ngar pirieged in e pawn e gol ko yungi n’em u lan taab ngiyal’ ni bokum biyu’ e dolla tolngin puluwon.

Nap’an nim tababgow reb e Pi Mich Rok Jehovah i fil e Bible, ma sana rayog ni kam lem ni bod rogon be’ ni ma gay e gol ni be fanay barba’ i ban’en ni nge af e gol ngay me rurug ni nge chuw e but’ nge boch ban’en u fithik’. Nap’an ni kam fal’eg i lemnag boch e thin nu Bible ni kam beeg ma dabisiy ni ke ga’ e tamilangan’ rom, ma aram reb e ban’en ni ke ayuwegem ni ngam mon’og ko tirok Got ban’en. Nap’an ni kam fil e tin riyul’ u lan e Bible, ma ke yag ni ngam nang rogon nrayog ni ngam chugur ngak Jehovah mag par ni gab t’uf rok ma ga be sonnag e yafos ndariy n’umngin nap’an.​—Jas. 4:8; Jude 20, 21.

Ere, rayog ni sana kam maruwel nib gel ni ngam gay boch ban’en nib ga’ fan ko thin rok Got u Bible ni bod rogon facha’ ni be gay e gol ni ke mokun nga taabang. Tomuren ni kam fil e pi kenggin e machib u lan e Bible  ma sana ke k’aringem ni ngam rin’ e pi n’en nib t’uf ni ngam rin’ ya nge yag nim ognagem ngak Got mag un ko taufe.​—Matt. 28:19, 20.

Girdi’ ni yad ma gay e gol e rayog ni ngar pirieged noch yang i gol nrib achig u fithik’ e malang nib gowel. Bay yu yang e pi malang ney nib sug e gol u fithik’, machane faanra ngan fek e pi gol nem ma thingar ni bilbilig e pi malang nem. Som’on ni yira sap ko pi malang nem, ma dab ni guy e gol u fithik’. Mang fan? Bochan nra bang e pi malang nem ma kemus ni sogonap’an 10 e gram e gol ni yira pirieg riy. Machane, facha’ ni be gay e gol e rib ga’ fan e re n’ey u wan’, ere ra athamgil u rogon nrayog rok ni nge gay e pi gol nem.

Nap’an nra yoor ban’en ni nang be’ u “murung’agen Kristus,” mab t’uf ni nge athamgil ni ngki fil boch ban’en. (Heb. 6:1, 2) Ba t’uf ni ngam maruwel nib gel ya nge yag nim fil boch ban’en nib beech nge boch ban’en nra yib angin ngom u nap’an ni ga be fil e Bible ni goo gur. Ere, mang e rayog ni ngam rin’ ya nge yag nim fil e Bible rom u reb e kanawo’ nrayog ni ngam fil boor ban’en riy ni yugu aram rogon ni ke yoor e duw ni kam fil e Bible?

Mu guy rogon ni ngam adag ni ngaum fil boch ban’en nib beech, mag fal’eg i fil murung’agen nib fel’ rogon. Mu athamgil ni ngam pirieg boch ban’en u lan e Bible nrayog ni nge ayuwegem ni nge yag e gonop nge llowan’ ngom. (Rom. 11:33) Rogon nrayog ni nge ga’ e tamilangan’ rom ko thin nu Bible e aram e ngaum fanay boch e babyor ara boch ban’en ni kan ngongliy ko thin rom ni ngam fal’eg i gay murung’agen boch ban’en u Bible. Mu gum’an’nagem ngam gay boch e fonow nge fulweg ko deer rom u lan e Bible. Rayog ni ngam fith boch e girdi’ u lan e ulung ko mang boch e thin nu Bible nge article ni kar pirieged nib ga’ angin ngorad ma ke yag ni nge pi’ e athamgil nga lanin’rad. Ku rayog ni nga mog ngak boch e girdi’ boch ban’en ni kam pirieg nib manigil u nap’an ni ga be fil e Thin rok Got.

Riyul’ ni gathi kemus ni ga be nameg ni nge yoor ban’en ni ngam nang. Ya yog apostal Paul ni ‘tamilangan’ e ma gelnag e ufanthin ko girdi’.’ (1 Kor. 8:1) Ere, mu athamgil ni ngam par ni gab sobut’an’ ma kub gel e michan’ rom. Faanra um ted chon e tabinaw rom e fol Bible ni tabinaw ni gubin ngiyal’ ma ga be fil e Bible ni goo gur, ma rayog ni nge ayuwegem ni nge puluw e ngongol rom ko pi motochiyel rok Jehovah ma ra k’aringem ni ngkum ayuweg boch e girdi’. Machane, bin th’abi ga’ fan riy e ga ra felfelan’ ni bochan e kam pirieg ban’en ni kab fel’ ko gol.​—Prov. 3:13, 14.