Kam fal’eg i beeg fa yu ken nem e Wulyang ko Damit ni kan ngongliy ndawori n’uw nap’an, fa? Am guy ko rayog ni ngam pi’ e fulweg ko pi deer ni baaray fa dabiyog:

Ba miti mang denen e be weliy Jesus murung’agen u nap’an ni pi’ fare fonow ni bay ko Matthew 18:15-17?

Be weliy murung’agen boch e magawon nrayog ni nge pithig l’agruw ni’ ni yigoo yow rorow. Machane, mit ney e magawon e faanra dab ni pithig ma rayog ni ngan tharbog be’ riy. Mit ney e denen e rayog ni nge un ngay e sasalap ni ke tay be’, ara be’ ni ke t’ar e thin nga daken be’.​—w16.05, p. 12.

Mang boch ban’en nrayog ni ngam rin’ nra yibnag angin e beeg Bible ni ga ma tay?

Baaray boch ban’en nrayog ni ngam rin’: Mu beeg ni ga be guy rogon ni ngam nang fan, mag gay boch ban’en riy nrayog ni ngam fol riy; mu fithem ni nge lungum, ‘Uw rogon nrayog ni nggu fanay e re n’ey ni nggu ayuweg boch e girdi’ ngay?’; mag fanay e pi babyor nge boch ban’en ni yima pi’ ngodad ni ngam gay murung’agen e pi n’en ni kam beeg.​—w16.05, pp. 29-31.

Yugu aram rogon nib mich e fos ko yam’ u wan’ e piin Kristiano, ma gur, ba kireb ni nge kireban’rad u nap’an ni ke yim’ be’ nib t’uf rorad?

Yugu aram rogon nib mich e fos ko yam’ u wan’ e piin Kristiano, machane ka ma kireban’rad u nap’an nra yim’ be’ nib t’uf rorad. I kireban’ Abraham u nap’an ni yim’ Sarah. (Gen. 23:2) Yugu aram rogon nra kireban’ be’, machane ra munmun ma ra war e kireban’ rok.​—w16.05, p. 4.

Mini’ e be yip’ fan fare pumoon ni be fek ban’en ni nge yol ngay ni kan weliy murung’agen ko Ezekiel ko guruy ni 9, nge fa nel’ i pumoon nra bagayad ma ke fek reb e talin e cham?

Ke tamilang u wan’dad ni pi pumoon ney e be yip’ fan e pi engel nra uned i gothey fare mach nu Jerusalem kakrom, maku yad ra un ko cham u nap’an fare mahl ni Armageddon. Ngiyal’ ney e fare pumoon ni be fek ban’en ni nge yol ngay e be yip’ fan Jesus Kristus ya ir e en ni be tay e pow ngak e piin ni yira ayuweg e yafos rorad.​—w16.06, pp. 16-17.

Mang boch ban’en ni buch nde yag ni nge kirebnag e Bible?

I yag ni nge par e Bible ni ka rogon ni yugu aram rogon ni (1) un yoloy nga daken yungi babyor ni kan ngongliy ko gek’iy ni papyrus nge yu yang ni kan ngongliy ko keru’ e gamanman; (2) i guy e pi tayugang’ ko am nge teliw rogon ni ngar kirebnaged; (3) ke guy boch e girdi’ rogon ni ngar thilyeged e thin riy.​—w16.07, pp. 4-7.

Mang boch e kanawo’ nrayog ni nge momnag reb e Kristiano rogon e par rok riy?

Mu yoloy nga but’ e pi n’en nib t’uf rom, mag tal i chuw’iy boch ban’en nde ga’ fan. Mu dugliy e pi n’en nib t’uf ni ngam chuw’iy nge urngin e salpiy ni bay rom nrayog ni ngam chuway’ ngay. Mu chuweg e tin baaray e chugum rom ndariy ban’en ni ga be fanay ngay, mag thang e malfith rom. Mu lichnag e tayim rom ni fan ko maruwel ni nge yag e salpiy riy, mag lemnag rogon nrayog ni ngam yoornag e tayim rom ni fan ko machib.​—w16.07, p. 12.

Mang e be yog e Bible ni kab ga’ fan ko gol nge silber?

Be tamilangnag e Job 28:12, 15 ni kab fel’ e gonop ni ke yib rok Got ko gol ara silber. Mu guy rogon ni ngam par ni gab sobut’an’ ma kub gel e michan’ rom u nap’an ni ga be gay rogon ni nge yag e re gonop ney ngom.​—w16.08, pp. 18-19.

Ba puluw ni nge digey reb e walag ni pumoon sorben ndabi puy nge m’ay e ngiyal’ ney, fa?

Bay boch e nam nde kireb ko yalen riy ni nge puy reb e walag ni pumoon sorben nge ngoch, machane dabi m’ay, maku dabi magawonnag laniyan’ e girdi’ u nap’an e machib. Yugu aram rogon, ma bay boch e walag ni pumoon ni kar dugliyed ni ngar puyed sorobrad nge m’ay. (1 Kor. 8:9) Machane, bay boch e nam nde puluw ko yalen riy maku de fel’ ni nge digey e pi tamachib ni Kristiano sorobrad ndab ra puyed nge m’ay.​—w16.09, p. 21.

Mang boch ban’en u rarogodad nrayog ni nge mo’maw’nag ngodad ni ngad folgad ko pi fonow rok Jehovah?

Thingar da siyeged boch ban’en u rarogodad ni ma k’aringdad ni nge gelan’dad. Pi n’ey e ba muun ngay e tolangan’, nge denen ni yima rin’, nge michan’ ni be war. Pi n’ey e rayog ni nge k’aringdad ni nge dab kud folgad mu ud togopuluwgad.​—w16.06, p. 12.

Mang e ba thil u thilin e tamilangan’, nge nang fan, nge gonop?

Be’ ni bay e tamilangan’ rok e kemus ni be suguy laniyan’ ko llowan’ ara boch ban’en ni ke fil nib riyul’. Be’ ni ke nang fan ban’en e ke nang rogon nib peth reb e ban’en nga reb. Machane, be’ nib gonop e manang rogon ni nge maruwel ko tamilangan’ rok nge rogon ni ke nang fan ban’en u reb e kanawo’ nra yib angin ngak.​—w16.10, p. 18.