1, 2. (a) Uw rogon nib peth e t’ufeg ko michan’? (b) Mang boch e deer ni gad ra weliy e fulweg riy?

 BA T’UF Jehovah rodad ni bochan e ir e “som’on ni at’ufegdad.” (1 John 4:19) Ma rin’ Jehovah boch ban’en ni nge tow’athnag e pi tapigpig rok ni yad ba yul’yul’ ni bochan e aram reb e kanawo’ ni ma dag e t’ufeg rok riy ngorad. Ra gel feni t’uf Got rodad, ma aram e ra gel e michan’ rodad. Gathi kemus nra mich u wan’dad nriyul’ ni bay, machane ku ra pagan’dad ngak ni ir e en ni ma tow’athnag e piin ni yad ba t’uf rok.​—Mu beeg e Hebrews 11:6.

² Jehovah e ir reb e Got ni ma tow’athnagey ni bochan e aram bang u rarogon. Dabiyog ni nge yan i aw nib polo’ e michan’ rodad ni faanra gathi rib mich u wan’dad ni ma tow’athnag Got e piin ni yad ma gay. Mang fan? Ya bochan ni faanra “nge michan’dad ma aram e ke pagan’dad ko pi n’en ni ir e ke l’agan’dad ngay.” (Heb. 11:1) Arrogon, ra nge yag e michan’ ngodad mab muun ngay ni ngad athapeged e pi tow’ath ni ke micheg Got. Uw rogon nra yib angin ngodad ni faanra ud pared ma gad be athapeg e pi tow’ath ni kan micheg ngodad? Uw rogon ni ke tow’athnag Jehovah e pi tapigpig rok kakrom nge ngiyal’ ney? Ngad weliyed rogon.

3. Mang e kan micheg ngodad ko Malaki 3:10?

³ Ke micheg Jehovah Got nra tow’athnag e pi tapigpig rok ni yad ba yul’yul’. Ere, aram fan ni be pi’ e athamgil nga lanin’dad ni ngad nameged ni nge yag e pi tow’ath rok ngodad. Be gaar e Bible: “Mu sikengniged gag, mi gimed guy ni bay gu bing mban e tharmiy mu gu puog nga dakenmed e pi n’en nib fel’ nge pag e fol riy.” (Mal. 3:10) Faanra m’agan’dad ko n’en ni be ognag Jehovah ngodad, ma aram e be m’ug riy nrib ga’ fan u wan’dad ma gad be pining e magar riy ngak.

4. Mang fan nrayog ni nge pagan’dad ko fapi thin ni yog Jesus ni bay ko Matthew 6:33?

⁴ I micheg Jesus ngak pi gachalpen ni faan yad ra m’oneg e Gagiyeg rok Got u wan’rad, ma ra ayuwegrad Got. (Mu beeg e Matthew 6:33.) I micheg Jesus e re thin ney ni bochan e manang ni gubin ban’en ni ma micheg Got ni ma yan i aw nib riyul’. (Isa. 55:11) Ere, ku arrogodad nib pagan’dad ni faan gad ra dag nrib mich Jehovah u wan’dad, ma ra tay u gil’ fapi thin ni ke micheg ni be gaar: “Ri dab gu pagem; ma ri dab gu n’igem.” (Heb. 13:5) Ba puluw e re thin ney ko n’en ni yog Jesus u murung’agen e Gagiyeg rok Got nge tin nib m’agan’ ngay ni ngad m’oneged u wan’dad.

5. Mang fan ni fapi thin ni yog Jesus ngak Peter e ra pi’ e athamgil nga lanin’dad?

⁵ Immoy bayay ni gaar apostal Peter ngak Jesus: “Kug paged gubin ban’en kug uned ngom. Ere mang e bay yog ngomad.” (Matt. 19:27) De puwan’ Jesus ngak Peter, ya yog ngak pi gachalpen ni yira tow’athnagrad ni bochan e pi n’en ni yad ra pag fan. Ra un e pi apostal rok ni yad ba yul’yul’ nge ku boch e girdi’ ni yad ba yul’yul’ ngak ko gagiyeg u tharmiy. Machane, mus ko chiney maku bay boch e tow’ath nra yag ngodad. I  gaar Jesus: “Urngin e girdi’ ni kar digeyed e tabinaw rorad, ara pi walagrad ni pumoon, ara pi walagrad ni ppin, ara matam, ara matin, ara bitir, ara yungi binaw ni taferad ni bochag, e raay yay e pi n’ey ni bayi mun ngorad, ma yira pi’ e yafos ndariy n’umngin nap’an ngorad.” (Matt. 19:29) Ere, ka boor e tow’ath nra yag ngak pi gachalpen ko pi n’en ni kar paged fan. Bin riyul’ riy e, pi matam, nge matin, nge pi walagey ni pumoon nge ppin, nge piin bitir u lan e ulung e kab ga’ farad ko pi n’en ni kad paged fan ya nge yag ni ngad m’oneged e Gagiyeg rok Got.

6. Mang fan ni ke micheg Jehovah nra tow’athnag e pi tapigpig rok?

⁶ Bochan ni ke micheg Jehovah ngak e pi tapigpig rok nra tow’athnagrad, ma aram e n’en ni ma ayuwegrad ni ngar athamgilgad u nap’an ni kar mada’naged boch ban’en ni be skengnag e michan’ rorad. Gathi kemus ni ma felfelan’ e pi tapigpig rok Jehovah ni yad ba yul’yul’ ko pi tow’ath ni be pi’ ngorad nra ayuweg e michan’ rorad e ngiyal’ ney, ya ku yad be athapeg boch e tow’ath ni ka bay boch nga m’on ni kab gel e fel’ riy. (1 Tim. 4:8) Faanra rib mich u wan’dad ni Jehovah e ir e en ni ma “tow’athnag e piin ni yad be gayiy,” ma ra ayuwegdad e re n’ey ni ngad pared nib mudugil e michan’ rodad.​—Heb. 11:6.

7. Uw rogon ni athap rodad e aram e angkar u lanin’dad?

⁷ Nap’an fare Welthin ni Pi’ Jesus u Daken e Burey, me yog ni gaar: “Ngari felan’med, ya bay labgen ni ba ga’ ni fan ngomed ni kan tay u tharmiy. Ya erera’ rogon e gafgow ni i tay e girdi’ ngak e pi profet ni yad ba kakrom ngomed.” (Matt. 5:12) Ba gel e felfelan’ nra tay e piin ni tow’ath rorad e nga ranod nga tharmiy. Machane, ku bay rogon ni ‘ngari felan’uy’ ko athap ko yafos ndariy n’umngin nap’an u paradis u fayleng. (Ps. 37:11; Luke 18:30) Demtrug ko gad be athapeg e yan nga tharmiy fa par u roy u fayleng, ma rayog ni nge par e athap rodad ni ‘ke mang angkar u lanin’dad, ya be par nib mudugil.’ (Heb. 6:17-20) Angkar e ra ayuweg reb e barkow ni nge dabi man’ u nap’an ni ke yib e lang. Ku arrogon e athap rodad ko tow’ath ni yira pi’ ngodad nrayog ni nge ayuwegdad ni ngad pared nib meyuluy e lem rodad, maku gad ba mudugil ko tirok Got ban’en. Ku rayog ni nge pi’ gelngidad ni ngad athamgilgad u fithik’ e pi magawon ni gad ma mada’nag nib mo’maw’.

8. Uw rogon nrayog ni nge war e magafan’ rodad ni bochan e pi n’en ni gad be athapeg?

⁸ Pi n’en ni gad be athapeg ni bay u lan e Bible e bay gelngin ni nge warnag e magafan’ ni gad ma tay e ngiyal’ ney. Pi n’en ni ke micheg Got e rayog ni nge ayuwegdad ni ngad pirieged e gapas laniyan’ u nap’an ni ke magafan’dad ni bod rogon e gapgep ni ma munguynag dowey. Rriyul’ nra fel’ lanin’dad ni bochan e kad nanged nrayog ni ngad ‘pied e gilab rodad’ ngak Jehovah, ya ra ‘n’ufegdad’! (Ps. 55:22) Ere, rayog ni nge pagan’dad nrayog rok Got ni “nge maruwel nge pag rogon ko tin ni kad wenigniged ngak, ara ke taw e lem rodad ngay.” (Efe. 3:20) Aygum lemnag e re n’ey, ya gathi kemus nra maruwel Got nib gel, ya ku ra “maruwel nge pag rogon” ko tin ni kad wenigniged ngak!

9. Mang fan nrayog ni nge pagan’dad nra tow’athnagdad Jehovah?

⁹ Ra nge yag e re tow’ath nem ngodad, mab t’uf ni ngari mich Jehovah u wan’dad ma gad fol ko pi fonow rok. I yog Moses ko fare nam nu Israel ni gaar: “I Somol ni Got romed e bayi fal’eg waathmed u lan fare nam ni nge pi’ ngomed . . . ni faanra gimed ra fol rok mi gimed kol ayuwen e tin gu be tay chilen ngomed e daba’. I Somol e bayi fal’eg waathmed, ni bod ni ke micheg nra rin’.” (Deut. 15:4-6, BT) Ere, rib pagan’um nra tow’athnagem Jehovah ni faan ga ra ulul ni ngam pigpig ngak u fithik’ e yul’yul’, fa? Bay rogon ni nge pagan’um ko re n’ey.

10, 11. Uw rogon ni tow’athnag Jehovah Josef?

¹⁰ Kan yoloy e Bible ni fan ngodad. Boor e chep riy ni be weliy rogon ni i tow’athnag Got e pi tapigpig rok ni yad ba yul’yul’. (Rom. 15:4) Josef e ir bagayad e pi tapigpig rok Got nem nrayog ni ngad filed ban’en rok. Bochan e makath ni tay pi walagen  ni pumoon nib togopuluw ngak nge ban ni tay e ppin ko masta rok nib togopuluw ngak boch nga tomuren, ma aram mi non’ nga kalbus u Egypt. Ere gur, i digey Got ndaki ayuweg? Danga’, ya immoy ‘Somol rok Josef, ni i ayuweg nga i fel’ urngin ban’en ni be ngongliy.’ (Gen. 39:21-23) Yugu aram n’umngin nap’an ni i mada’nag Josef e pi skeng nem, machane i gum’an’nag ir nge sonnag Got.

¹¹ Boch e duw nga tomuren, ma aram me pag Farao Josef ni tapigpig rok nib sobut’an’ u kalbus me tay ni ir e en ni migid ngak u Egypt. (Gen. 41:1, 37-43) Nap’an ni fakay Josef l’agruw e pagel me gaar, “‘I Got e ke ayuwegneg kug pag talin urngin e gafgow ni kug tay nge urngin e girdi’ u tabinaw rok e chitamag’; ma aram me tunguy Manasseh ngak e bin som’on e pagel ni fak. Me ki gaar, ‘Re nam ni kug pirieg e gafgow riy, e ir e ke pi’ Got e bitir ngog riy’; ma aram me tunguy Efraim ngak e bin migid e pagel ni fak.’” (Gen. 41:51, 52) Bochan ni par Josef nib yul’yul’ ngak Got, ma aram min tow’athnag ni aram e yag ni nge ayuweg e yafos rok piyu Israel nge piyu Egypt u nap’an reb e uyungol. N’en ni gad be fil ko re n’ey e, manang Josef ni Jehovah e ir e en ni i tow’athnag u gubin ban’en.​—Gen. 45:5-9.

12. Uw rogon ni par Jesus nib yul’yul’ u fithik’ e pi skeng ni i mada’nag?

¹² Ku arrogon Jesus Kristus ni i par nib yul’yul’ ngak Got u fithik’ e pi skeng ni i mada’nag, ma aram min tow’athnag. Mang e ayuweg Jesus ni nge athamgil u fithik’ e pi n’ey? Be gaar e Thin rok Got: “Ya de pag ir. . . . Machane bochan e felfelan’ ni be sonnag ma daki tafinaynag e tamra’ nra tay ko yam’ ni nge tay.” (Heb. 12:2) Dariy e maruwar riy ni felfelan’ Jesus ni bochan e yag ni nge tayfan fithingan Got nib thothup. Maku reb e, nni tow’athnag ni aram e yag ni nge par nib fel’ u wan’ e Chitamangin mu kun pi’ boor e tow’ath ngak. Be yog e Bible ni “ke par nga but’ u ba’ ni mat’aw rok Got u tagil’ Got.” Maku bay bang ni be gaar: “Me fek Got Jesus nge tay ni ir e th’abi tolang u tharmiy, me pi’ fare ngachal ngak ndariy reb e ngachal ni ba ga’ ngay.”​—Fil. 2:9.

13, 14. Uw rogon u wan’ Jehovah e pi n’en ni gad ma rin’ ni fan ngak?

¹³ Rayog ni nge pagan’dad nib ga’ fan u wan’ Jehovah rogon e athamgil ni gad ma tay ni ngad pigpiggad ngak. Manang e pi n’en ni ma magafan’dad ngay nge pi n’en ni ma maruwaran’dad ngay u rarogodad. Faanra be magafan’dad ni bochan e gad be magawon ko salpiy, ara der yag ni ngad rin’ed boor ban’en ni fan ko pigpig ni gad be tay ngak ni bochan e gad ba m’ar, ara be kireban’dad ma ma runguydad. Maku reb e, rayog ni nge pagan’dad nib ga’ fan u wan’ Jehovah e pi n’en ni ma rin’ e pi tapigpig rok ya nge yag nra pared ni yad ba yul’yul’ ngak.​—Mu beeg e Hebrews 6:10, 11.

¹⁴ Ku dab mu pagtalin nrayog ni ngad nonad ngak e En ni ma “fulweg taban e meybil” ni bochan e ba pagan’dad nra motoyil ngodad u nap’an ni gad ra weliy e pi magafan’ rodad ngak. (Ps. 65:2) “Chitamangiy nrib tarunguy e girdi’, ni ir faanem i Got ni urngin mit e ayuw me ir e be yib rok ngodad” e ra pi’ urngin ban’en nib t’uf rodad ya nge yag nda pared ni gad ba chugur ngak. Ma bay yu ngiyal’ nrayog ni nge rin’ e re n’ey u daken e piin taareb e michan’ rodad. (2 Kor. 1:3) Ri ma felfelan’ Jehovah u nap’an nra guydad ni ku gad be runguy yugu boch e girdi’. “Ga ra pi’ ban’en ngak e gafgow, ma bod ni Somol e ka mu pi’ ngak, ra sulweg Somol puluwon ngom.” (Prov. 19:17, BT; Matt. 6:3, 4) Ere, faanra ud golgad ngak pi walagdad ma gad be ayuwegrad, ma bod ni Jehovah e ir e gad be gol Ngak, ma ke micheg nra fulweg puluwon ngodad.

15. Mang boch e tow’ath ni ga be sonnag ni nge yag ngom? (Mu guy e sasing ni bay u tabolngin e re article ney.)

¹⁵ Pi Kristiano ni kan dugliyrad e yad be athapeg ni nge yag ngorad “fare teeliyaw ko mat’aw ni ir e bayi pi’ fare Tapufthin nib mat’aw i Somol . . . e Chirofen nem.” (2 Tim. 4:7, 8, BT) Machane, dab mu lemnag ni faanra ba thil e tow’ath nra pi’ Got  ngom, ma aram e gathi rib ga’ fam u wan’. Ya bokum milyon “yugu boch e saf” rok Jesus e yad be sonnag e tow’ath nra yag ngorad boch nga m’on ni aram e yafos ndariy n’umngin nap’an u paradis u fayleng. Aram e gin ni yad ra par riy u “fithik’ e gapas, mu ur pired u fithik’ e gapas ni yad ba felfelan’.”​—John 10:16; Ps. 37:11.

16. Uw rogon nra pi’ fare thin ni bay ko 1 John 3:19, 20 e athamgil nga lanin’dad?

¹⁶ Bay yu ngiyal’ nrayog ni ngad lemnaged ni buchuuw ban’en ni gad be rin’ ni fan ngak Jehovah, fa reb e i maruwar u wan’dad ko rib ga’ fan e athamgil ni gad be tay u wan’ fa danga’. Maku reb e, rayog ni nge maruwar u wan’dad ko ra tow’athnagdad fa danga’. Machane, dab da paged talin ni “Got e ka ba ga’ nga lanin’dad, ni gubin ban’en ma manang.” (Mu beeg e 1 John 3:19, 20.) Ma tow’athnagdad ko pi n’en ni gad ma rin’ ni fan ngak ni ke yib u gum’ircha’dad ni bochan e michan’ nge t’ufeg rodad ngak, ni yugu aram rogon ni gad be lemnag ni ban’en nrib achig.​—Mark 12:41-44.

17. Mang boch e tow’ath ni bay rodad e chiney?

¹⁷ Yugu aram rogon ni gad be par ko tin tomuren e rran u lan e re fayleng rok Satan ney ni kari gel e kireb riy, machane ka be tow’athnag Jehovah e girdi’ rok. Ma pi’ e tin nib t’uf rodad ni fan ko tirok ban’en, ma ma ayuwegdad ni ngad pirieged e felfelan’ u lan e ulung rok ni bay u ga’ngin yang e fayleng. (Isa. 54:13) Ma tow’athnagdad Jehovah e chiney ni aram e ma pi’ boch e girdi’ ni ngar manged pi walagdad ni yad bay u ga’ngin yang e fayleng ni bod rogon ni micheg Jesus. (Mark 10:29, 30) Maku reb e, ma tow’athnag Got e piin ni yad be gay ni aram e ma pi’ e gapas laniyan’ nge felfelan’ ngorad, miki ayuwegrad ni nge fel’ u wan’rad e tin ni bay rorad.​—Fil. 4:4-7.

18, 19. Uw rogon u wan’ e pi tapigpig rok Jehovah e pi tow’ath ni be yag ngorad?

¹⁸ Rayog ni nge yog e pi tapigpig rok Jehovah ni yad bay u ga’ngin yang e fayleng nriyul’ ni ma tow’athnagrad Got. Bianca ni ma par u Chiyamen e yog ni gaar: “Rug be pining e magar ngak Jehovah u rogon ni ma ayuwegeg u fithik’ e pi magafan’ rog nge rogon e ayuw ni ma pi’ ngog u reb e rran ngu reb. Kari gel e wagey nge kireb ko re fayleng ney. Machane, bochan ni gu ma athamgil ni ngaug par ni gub chugur ngak Jehovah, ma aram fan ni gu ma par u tan pa’ nib pagan’ug. Nap’an ni gu ra pag fan boch ban’en ni fan ngak, ma ma sulweg puluwon ngog ni raay yay ni ke mun ngay.”

¹⁹ Kum lemnag e n’en ni yog Paula nreb e walag nib pin ni 70 e duw rok ni ma par u Canada. Re walag ney e bay ba mit e m’ar rok ni ka nog e spina bifida ngay. I yog ni gaar: “Bochan ni ke yoor ban’en ndabkiyog ni nggu rin’, ma gathi aram e dabkiyog ni nggu yoornag e tayim rog ni fan ko machib. Boor e kanawo’ ni gu ma machib riy ni bod rogon e telefon nge machib u fithik’ e sabethin. Bay bochi ke babyor rog ni kug yoloy boch e thin nu Bible ngay nge boch ban’en ni kug beeg u lan e pi babyor rodad ni gu baadag. Ere, ba ga’ ni gu ma beeg e n’en ni bay u lan e chi ke babyor nem ni nge pi’ e athamgil nga lanin’ug. Fithingan e chi ke babyor rog nem e ‘Ba Ke Babyor Nra Ayuwegeg.’ Faanra ud pared ma gad be lemnag e pi n’en ni ke micheg Jehovah, ma aram e rayog ni nge dabki mulan’dad. Demtrug e magawon ni gad ra mada’nag, ma bay Jehovah ni nge ayuwegdad.” Rayog nib thil e magawon ni ga be mada’nag ko magawon ni be mada’nag Bianca nge Paula. Machane, dabisiy nrayog ni ngam lemnag boch e kanawo’ ni ke tow’athnagem Jehovah nge piin ni yad bay u toobem. Rib manigil ni ngaum lemnag rogon ni be tow’athnagem Jehovah e chiney nge rogon nra tow’athnagem boch nga m’on!

20. Mang e rayog ni ngad athapeged boch nga m’on ni faan gad ra ulul ni ngad pigpiggad ngak Jehovah u polo’ i gelngidad?

²⁰ Dab mu pagtalin ni faanra um meybil ngak Got u polo’ i gum’irchaem mag weliy gubin ban’en ngak ma ‘bay wenegan ni ba ga’ nra yib ngom.’ Rayog ni nge pagan’um ni faanra mu ‘ngongliy e tin nib m’agan’ Got ngay [ma ra] yog ngom e tin ni ke yog nra pi’ ngodad.’ (Heb. 10:35, 36) Ere, ngad ululgad ni ngad gelnaged e michan’ rodad ma gad maruwel u polo’ i gelngidad ni fan ngak Jehovah, ya gad manang ni faan gad ra rin’ ni aray rogon ma ra tow’athnagdad.​—Mu beeg e Kolose 3:23, 24.