1, 2. (a) Mang fan ndab da gingad u nap’an nra magafan’dad? (Mu guy e sasing ni bay u tabolngin e re article ney.) (b) Mang e gad ra weliy ko re article ney?

 GAD be par u ba ngiyal’ ni kari yoor ban’en riy ni ma k’aring e mochuch ko girdi’. Bay Satan ni Moonyan’ ni kari damumuw ma “yugu be yan ni bod ba layon ni be tolul, ni be gayiy be’ ni nge longuy.” (1 Pet. 5:8; Rev. 12:17) Ere, aram fan ni bay yu ngiyal’ ni mus ngodad e pi tapigpig rok Got maku ma magafan’dad. Bin riyul’ riy e, mus ko pi tapigpig rok Jehovah ni yad ba yul’yul’ kakrom ni bod rogon David ni Pilung, ma immoy boch ban’en ni i magafan’rad ngay. (Ps. 13:2) Mus ngak apostal Paul ‘nda i pasleg laniyan’ ni bochan e be lemnag’ rarogon e pi ulung ni immoy kakrom. (2 Kor. 11:28) Machane, mang e rayog ni ngad rin’ed ni faanra be magawonnagdad e magafan’ rodad?

² I ayuweg e Chitamangidad ni bay u tharmiy e pi tapigpig rok kakrom, maku arrogodad e ngiyal’ ney ni ku ma ayuwegdad u rogon ni nge war e kireban’ ara magafan’ ni gad ma tay. Be gaar e Bible: “Mpaged fan urngin e magafan’ romed ngak, ya be lemnag rogomed.” (1 Pet. 5:7) Ere, uw rogon nrayog ni ngam rin’ e re n’ey? Chiney e ngad weliyed aningeg e kanawo’ nrayog ni ngad rin’ed e re n’ey riy ni aram e, ngaud meybilgad, ma gad beeg e Thin rok Got mu ud fal’eged i lemnag e thin riy,  ma gad ning gelngin Jehovah nib thothup, ma gad weliy lanin’dad ngak be’ ni be pagan’dad ngak. Nap’an ni gad be weliy e re aningeg i n’ey, mag fal’eg i yaliy boch ban’en riy ni ga baadag ni ngam rin’.

3. Uw rogon nrayog ni ngam “pi’ e gilab rom ngak” Jehovah u daken e meybil?

³ N’en nsom’on nrayog ni ngad rin’ed e aram e ngad nonad ngak Jehovah u daken e meybil. Nap’an ni ga ra mada’nag boch ban’en ni be k’aring e magafan’ nib gel ngom, mag weliy lanin’um ngak e Chitamangidad ni bay u tharmiy. David ni ir e en ni yoloy e Psalm e wenig ngak Jehovah ni gaar: “A Got, mu rung’ag e meybil rog.” Boch nga tomuren e re tang rok nem, miki gaar: “Mu pi’ e gilab rom ngak Somol, ma bayi n’ufegem.” (Ps. 55:1, 22, BT) Ere, tomuren ni kam rin’ e tin nrayog rom ni ngam pithig reb e magawon ni ga be mada’nag, ma rayog ni ngam yibilay murung’agen ngak Got, ya kab ga’ angin e meybil ni ga ra tay ko bin ni ngam par ni be magafan’um. Machane, uw rogon nrayog ni nge ayuwegem e meybil ni nge dabki magafan’um nib pag rogon?​—Ps. 94:18, 19.

4. Mang nib ga’ fan ni ngad meybilgad u nap’an ni ke magafan’dad?

⁴ Mu beeg e Filippi 4:6, 7. Faanra ud meybilgad ni gubin ngiyal’ ni keb u gum’ircha’dad, ma ra fulweg Jehovah taban e meybil rodad. Ni uw rogon? Rayog ni nge pi’ e gapas laniyan’ ngodad, ma re gapas laniyan’ nem e rayog ni nge ayuwegdad ndab ki magafan’dad. Boor e walag ni aray rogon e n’en ni ke buch rorad. Rayog ni nge ayuwegdad Got ni ngari gapas lanin’dad ko bin ni nge magafan’dad ara da rusgad. Rayog ni ngki yag e re gapas laniyan’ ney ngom. “Gapas rok Got” e rayog ni nge ayuwegem ni ngam athamgil u fithik’ e pi magawon ni ma yib ngom. Maku reb e, rayog ni nge pagan’um ko fare thin ni ke micheg Jehovah ni be gaar: “I gag e Got rom, dab mu rus [ara magafan’um] nga ban’en. Bay gu gelnigem mu gu ayuwegem.”​—Isa. 41:10.

5. Uw rogon nrayog ni nge pi’ e Thin rok Got e gapas nga lanin’dad?

⁵ Bin l’agruw e kanawo’ nrayog ni nge gapas lanin’um riy e aram e ngaum beeg boch e thin nu Bible ma ga be fal’eg i lemnag. Mang nib ga’ fan e re n’ey? Bay boch e fonow u lan e Bible nrayog ni nge ayuwegem u rogon ni ngam siyeg, ara nge war, ara ngam gel ko magafan’ rom. Dab mu pagtalin nrayog ni nge ayuwegem e Thin rok Got me fal’eg lanin’um ni bochan e aram e gin ni bay e thin rok e En ni Sunmiydad riy, ma pi thin nem e bay e gonop riy. Demtrug e ngiyal’ ni ga ra fal’eg i lemnag rogon laniyan’ Got u boch ban’en nge rogon nrayog ni ngam fanay e pi fonow u lan e Bible, ma rayog ni nge pi’ e re n’ey gelngim. Ke tamilangnag Jehovah ni faanra um beeg e Thin rok, ma aram e rayog ni ngam nang rogon ni ‘ngam gelnigem’ nge rogon ni nge “dab mu rus.”​—Josh. 1:7-9.

6. Uw rogon nrayog ni nge yib angin e thin rok Jesus ngom?

⁶ Bay boch e thin ni yog Jesus u lan e Thin rok Got nrayog ni nge fal’eg lanin’dad. Thin ni i yog nge pi n’en ni i fil ko girdi’ e i fal’eg laniyan’ e piin ni ur motoyilgad ngak. Boor e girdi’ ni yad baadag ni ngar motoyilgad ngak ni bochan e ma fal’eg laniyan’ e piin ni ke magafan’rad, ma ma pi’ gelngin e piin ni kar meewargad, maku ma fal’eg laniyan’ e piin ni ke kireban’rad. (Mu beeg e Matthew 11:28-30.) Gubin ngiyal’ ni ma lemnag rogon laniyan’ yugu boch e girdi’. (Mark 6:30-32) Ere, ra ayuwegdad Jesus e ngiyal’ ney ni bod rogon ni micheg nra ayuweg e pi apostal rok ni ur milekaggad u taabang. De t’uf ni ngam man ko gin ni bay Jesus riy ni nge yib angin e ayuw rok ngom. Ya chiney ni bay u tharmiy ni ke Pilung e ka be ulul ni nga i t’ufegdad. Ere, nap’an nra magafan’um, ma rayog ni nge ‘ayuwegem’ ko ‘ngiyal’ ndabi siy ni ngari ayuwegem’ riy. Arrogon, rayog ni nge ayuwegem Jesus ni ngam athamgil u fithik’ e kireban’ rom me pi’ e l’agan’ ngom me ayuwegem ni nge dab kum rus.​—Heb. 2:17, 18; 4:16.

7. Nap’an ni ga ra ning gelngin Got nib thothup ni pi’ ngom, ma mang angin nra yib ngom?

⁷ I micheg Jesus nra pi’ e Chitamangidad ni bay u tharmiy gelngin nib thothup ngak e piin ni yad ra ning Ngak. (Luke 11:10-13) Ireray e bin dalip e n’en nrayog ni nge ayuwegdad u nap’an ni ke magafan’dad. Pi fel’ngin ni ma yag ngodad u daken gelngin Got nib thothup e ma m’ug rarogon Got riy ni gubin ma rayog rok. (Mu beeg e Galatia 5:22, 23 *; Kol. 3:10) Ere, nap’an ni ga ra guy rogon ni nga i m’ug wom’engin gelngin Got nib thothup ko ngongol rom, ma aram e ra fel’ e tha’ u thilmed yugu boch e girdi’, me yag nim siyeg boch ban’en ni ma k’aring e magafan’. Am lemnag boch e kanawo’ nrayog ni nge ayuwegem gelngin Got nib thothup riy.

8-12. Uw rogon nrayog ni nge ayuwegem wom’engin gelngin Got nib thothup ni ngam pithig ara mu siyeg boch e magawon nrayog ni nge k’aring e mochuch ngom?

⁸ “T’ufeg, nge felfelan’, nge gapas.” Ra um tayfan e girdi’, ma rayog ni nge war e magafan’ rom. Ni uw rogon? Faanra um t’ufeg e pi walag u lan e ulung, ma ga be tay farad, ma aram e rayog ni ngam siyeg boch ban’en nra k’aring e mochuch ngom.​—Rom. 12:10.

⁹ “Gum’an’, nge gol, nge fel’ ngak e girdi’.” Rayog ni ngaum pared yugu boch e girdi’ nib gapas thilmed ni faan ga ra fol ko fare thin ni be gaar: “Um golgad ngomed, me bigimed me munguy ngak bigimed, mu um n’iged fan u wun’med e tin nib kireb ni ke rin’ bigimed ngak bigimed.” (Efe. 4:32) Faan ga ra rin’ e re n’ey, ma rayog ni ngam taleg boch e magawon ni ma k’aring e magafan’ ni nge dabi ga’. Maku reb e, ra ayuwegem e re n’ey ni ngam pithig boch e magawon ni ma sum ni bochan e dawor da flontgad.

¹⁰ “Michan’.” Ngiyal’ ney e ba ga’ ni ma magafan’ e girdi’ ko salpiy nge chugum. (Prov. 18:11) Machane, faanra rib mich u wan’um nra ayuwegem Jehovah, ma ireray e n’en nrayog ni nge ayuwegem ni ngam athamgil u fithik’ e magafan’ ni ga be tay ara mu siyeg e magafan’. Ni uw rogon? Faan ga ra fol ko fare fonow ni pi’ apostal Paul ni faan be yog ni ‘nge fel’ u wun’dad e tin ni ba’ rodad ban’en,’ ma aram e rayog ni ngam siyeg e magafan’. Ki ulul Paul ngay ni gaar: “Ya ke yog Got ni ke gaar, ‘Ri dab gu pagem; ma ri dab gu n’igem.’ Ere dab kud tamdaggad ma nge lungudad, I Somol e ir e be ayuwegeg, ere dab gu tamdag! Mang e rayog ni nge rin’ e girdi’ ngog?”​—Heb. 13:5, 6. 

¹¹ “Sumunguy, nge t’ar laniyan’.” Am lemnag feni ga’ fan ni ngaum sumunguy ma ga be t’ar lanin’um nge rogon angin nra yib ngom. Faan ga ra rin’ ni aray rogon ma aram e rayog ni ngam siyeg boch e ngongol nrayog ni nge k’aring e magafan’ ngom, ma rogon nra yib angin ngom e aram e rayog ni nge dabi aw nga lanin’um e ‘tin ni kam dabuy rok be’, ma dab ku um damumuw, ma dab ku um tolul ngak be’ u fithik’ e damumuw ara umog e thin nib kireb ngak be’.’​—Efe. 4:31.

¹² Bin riyul’ riy e, ba t’uf ni ngam sobut’nag lanin’um ya nge yag nim par nga “tan pa’ Got nib gel gelngin” mag ‘pag fan urngin e magafan’ rom ngak.’ (1 Pet. 5:6, 7) Machane faan ga ra sobut’nag lanin’um, ma aram e rayog ni ngam fel’ u wan’ Got me ayuwegem. (Mik. 6:8) Ma faanra ga manang e tin nrayog rom nge tin ndabiyog, ma aram e ra um taga’ ngak Got ko bin ni ngam taga’ ngom, ma re n’ey e ra ayuwegem ni nge dabi pag rogon e magafan’ ni ga ma tay.

13. Mang e yip’ Jesus fan u nap’an ni gaar: “Dabi magafan’med”?

¹³ Gad ra beeg fare thin u Matthew 6:34 (mu beeg), ma bay ba fonow riy ni pi’ Jesus ni be gaar: “Dabi magafan’med.” Machane, rayog ni nge mo’maw’ ngodad ni ngad folgad ko re fonow nem. Ere, mang e yip’ Jesus fan u nap’an ni gaar: “Dabi magafan’med”? Ba tamilang ni gathi be yip’ fan  ndariy ba ngiyal’ nra magafan’ reb e tapigpig rok Got, ya gad manang fapi thin ni yog David nge Paul u murung’agen e magafan’ ni ur tew. N’en ni rin’ Jesus e be ayuweg pi gachalpen ni ngar nanged ni faanra i magafan’ be’ nga boch ban’en ndariy rogon ara pag rogon e magafan’ ni i tay be’ ma dabi puf e magawon rok. Gubin e rran ni gad ma mada’nag e magawon, ere susun ni nge guy e piin Kristiano rogon ndab ron’ed daken e magafan’ rorad ni aram e ngaur pared ma yad be lemnag boch ban’en ni ke thumur ara boch ban’en ndawori buch. Ere, uw rogon nrayog ni ngam fol ko fare fonow ni pi’ Jesus mag siyeg e magafan’ nib pag rogon?

14. Uw rogon ni nge dabki magafan’um ko kireb ni um rin’ kafram?

¹⁴ Bay boch e girdi’ ni ma magafan’rad ni bochan boch e ngongol nib kireb ni ur rin’ed kafram. Be’ ni aray rogon e rayog ni nga i par ma be lemnag e kireb ni i rin’ kafram, ni kub muun ngay e kireb ni ke rin’ ni ke yan boor e duw. David ni Pilung e immoy yu ngiyal’ ni i par ni bod ni ‘be limoch u fithik’ e pi denen rok.’ Ere, aram fan ni gaar: “Ke kireb lanin’ug, ma gu be gel’gel’ ko amith.” (Ps. 38:3, 4, 8, 18, BT) Ere, mang e ba t’uf ni nge rin’ David? Ba pagan’ nra runguy Jehovah me n’ag fan e denen rok. Aram fan ni non u fithik’ e pagan’ ni gaar: “Ba felan’ e cha’ ni ke n’ag Got fan e denen rok.”​—Mu beeg e Psalm 32:1-3, 5. 

15. (a) Mang fan nsusun e dabi pag rogon e magafan’ ni ngam tay nga rarogom e chiney? (b) Mang boch ban’en nrayog ni ngam rin’ me war e magafan’ rom? (Mu guy fare thin ni kenggin e “ Boch e Kanawo’ Nrayog ni Nge War e Magafan’ Rom Riy.”)

¹⁵ Ku bay yu ngiyal’ nrayog ni nge magafan’um nga rarogom e chiney. Bod nnap’an ni yoloy David e Psalm 55, ma aram e ngiyal’ ni i par ni be rusnag e yafos rok. (Ps. 55:2-5) Machane, de pag e magafan’ rok ni nge k’aring ni nge dabki pagan’ ngak Jehovah. I par David ni be yibilay e pi magawon rok ngak Jehovah, machane ku manang nthingari ngongol nib puluw ko n’en ni be yibilay ya nge yag ni war e magafan’ ni be tay. (2 Sam. 15:30-34) Ere, rayog ni ngad filed ban’en rok David ni aram e ngad rin’ed e tin nrayog rodad ni ngad pithiged e magawon ni gad be mada’nag, me pagan’dad nra ayuwegdad Jehovah ko bin ni nge magafan’dad nib pag rogon.

16. Faanra tamilang u wan’um fan e ngachal rok Got, ma uw rogon nra gelnag e re n’ey e michan’ rom?

¹⁶ Faanra i par reb e Kristiano ma be lemnag boch e magawon nrayog ni nge buch rok boch nga m’on, ma aram e rayog ni nge magafan’ nga boch ban’en ndariy rogon. Machane, bin riyul’ riy e, de t’uf ni nge magafan’um nga boch ban’en ndam nang ko ra buch fa danga’. Mang fan? Ya boor yay ni bayi n’en me magafan’dad nga ban’en nib pag rogon me yan i taw ngay ma de buch ni bod rogon ni kad lemnaged. Maku reb e, fare Got nrayog ni ngam pag fan urngin e magafan’ rom ngak e dariy ban’en ndabiyog rok. Ya fan e ngachal rok e “Ma K’aring ni Nge Buch.” (Ex. 3:14) Re n’ey e be micheg ngodad nrayog rok ni nge lebguy e pi n’en nib m’agan’ ngay ni fan ko pi tapigpig rok. Rayog ni nge pagan’um nra tow’athnag Got e pi tapigpig rok ni yad ba yul’yul’ me ayuwegrad ni nge dabki magafan’rad nga boch ban’en nib kireb ni ur rin’ed kafram, nge pi n’en ni be buch rorad e chiney, nge pi n’en nrayog ni nge buch rorad boch nga m’on.

17, 18. Faan ga ra weliy lanin’um ngak be’, ma uw rogon nrayog ni nge ayuwegem ni ngam gel ko magafan’ rom?

¹⁷ Bin aningeg e kanawo’ nrayog ni ngam gel ko magafan’ rom e aram e ngam weliy lanin’um ngak be’ ni be pagan’um ngak. Rayog ni nge ayuwegem e en mabgol rom, ara be’ nrib pach e thin romew, ara reb e piilal u lan e ulung ni nge tamilangan’um u rarogon e pi n’en ni ga be yan u fithik’. “Magafan’ e rayog ni iring e felfelan’ rom, machane thin nib fel’ e ra baudeg lanin’um.” (Prov. 12:25, BT) Ga ra weliy lanin’um ngak be’ u fithik’ e yul’yul’, ma ra ayuwegem ni nge tamilang boch ban’en u wan’um mag nang rogon ni ngam athamgil u fithik’ e magafan’ ni ga be tay. Be gaar e Bible: “Faanra dab ni puruy’nag e n’en ni yibe lemnag ni ngan rin’, ma dabi yib angin, machane faanra boor e piin ni yad be pi’ e fonow ma aram e rayog ni ngan mu’nag ban’en.”​—Prov. 15:22, NW.

¹⁸ Ku ma ayuweg Jehovah e piin Kristiano ni ngar athamgilgad u fithik’ e pi magafan’ rorad u daken e pi muulung ni yad ma un ngay u gubin e wik. Aram e gin nrayog ni ngam chag riy ngak e pi walag ni yad ma lemnagem ma yad baadag ni ngar pied e athamgil nga lanin’um. (Heb. 10:24, 25) Re n’ey e ra pi’ gelngim me momnag ngom ni ngam gel ko magafan’ rom.

19. Mang fan nib pagan’um ni tha’ u thilmew Got e rayog ni nge pi’ gelngim?

¹⁹ Am lemnag rogon ni nang reb e piilal u reb e ulung u Canada feni ga’ fan ni nge pag fan urngin e magafan’ rok ngak Jehovah. Re walag nem e ma sensey u reb e skul. Ere, rib gel e mochuch ni ma tay ni bochan e re maruwel rok nem maku ma magafan’ nib pag rogon. Ere, uw rogon ni ke yag ni nge gel e re walag ney ko re magawon rok ney? I yog ni gaar, “Bochan ni kug athamgil u rogon nrayog rog ni ngari chugur e tha’ u thilmow Jehovah, ma aram e n’en ni ke ayuwegeg ni nggu gel ko magafan’ rog. Kub ga’ e ayuw ni ke pi’ e pi fager rog ngog nge pi walag u lan e ulung. Gu ma weliy gubin ban’en ni bay u lanin’ug ngak e ppin rog. Ki ayuwegeg yugu boch e piilal u lan e ulung nge en ni ma lekag e ulung ni nggu lemnag e magawon rog nrogon ni ma lemnag Jehovah. Maku reb e, kug wan gu un ko tafalay, ma kug thilyeg boch ban’en u rogon ni gu ma maruwel ko tayim rog, ma kug ma tay ba ngiyal’ ni nggu toffan riy mug rin’ boch ban’en nib chamag ngog. Munmun, ma aram mug guy ni ke war e magafan’ ni gu ma tay. Nap’an ni gu ra mada’nag boch e magawon ni gu manang ndabiyog ni nggu pithig, ma gu ma pag fan ngak Jehovah.”

20. (a) Uw rogon nrayog ni ngad paged fan e pi magafan’ rodad ngak Got? (b) Mang e gad ra weliy ko bin migid e article?

²⁰ Ere, kad weliyed u roy feni ga’ fan ni ngad paged fan e pi magafan’ rodad ngak Got u daken e meybil, ma gad beeg e Thin rok, mu ud fal’eged i lemnag. Kud weliyed feni ga’ fan ni ngad guyed rogon ni nge yag wom’engin gelngin Got nib thothup ngodad, ma gad weliy lanin’dad ngak be’ ni be pagan’dad ngak, mu ud chaggad ko pi walag u lan e ulung. Bin migid e article e gad ra weliy riy rogon ni ma ayuwegdad Jehovah u daken e n’en ni ke micheg ngodad ni aram e ra tow’athnagdad.​—Heb. 11:6.