Ke yag ni nge par e Bible ni ka rogon. Ere, ngiyal’ ney e rayog ni nge yag baken ngom mag beeg. Ma nap’an nra yag ba ken ngom nib fel’ rogon ni kan pilyeg, ma rayog ni nge pagan’um ni ga be beeg e thin ni kan fek ko tin th’abi som’on e babyor ko Bible nni yoloy. * Machane, mang fan ni ke yag ni nge par e pi babyor ko Bible nde wod nge m’ay, ma de yag ko pi tatogopuluw ni ngar taleged ndab kun wereg ma dab kun ngongliy, maku de yag ko girdi’ ni ngar thilyeged e thin riy? Mang e rib thil ko ken ney e babyor?

Boor e girdi’ ni kar filed e Bible e ke mich u wan’rad fare thin ni yoloy apostal Paul ni gaar: “Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor.” (2 Timothy 3:16) Ke mich u wan’rad ni fan nde kireb e Bible e bochan ni Thin rok Got e bay riy ma ir e ke ayuweg ni nge par nge mada’ ko ngiyal’ ney. Faizal ni faan kan weliy murung’agen ko bin som’on e article e munmun me dugliy ni nge un ko fol Bible ni bochan e baadag ni nge fal’eg i gay murung’agen e pi n’ey. Ere, ri ngat ko n’en ni pirieg u murung’agen e Bible. Munmun ma aram me fil ni yooren e machib ni yima fil ko pi yurba’ i teliw ni yad ma yog ni yad e Kristiano e dariy u lan e Bible. Maku reb e, kub gel e felfelan’ ni tay u nap’an ni fil murung’agen e n’en nib m’agan’ Got ngay ni fan ko fayleng nrogon ni bay ko Thin Rok.

I yog ni gaar: “Chiney e ke mich u wan’ug ni Bible ni bay rog e aram reb e tow’ath ni ke pi’ Got ngog. Bin riyul’ riy e, faanra rayog rok Got ni nge ngongliy e palpalth’ib, me ere gathi ku rayog rok ni nge pi’ ba ken e babyor ngodad me ayuweg ndabi kireb? Faanra nggog ndabiyog rok Got ni nge rin’ e re n’ey, ma aram e gu be darifannag feni gel gelngin Got. Me gag mini’ ni nggu darifannag gelngin Got ni Gubin Ma Rayog Rok?”​—Isaiah 40:8.