1. Mang e ba thil u thilin e n’en nib t’uf rodad nge n’en ni gad baadag ni nge yag ngodad?

 GADAD e girdi’ e yugu aram rogon nde yoor ban’en nib t’uf rodad, machane der ma gaman u wan’dad e tin ni gad baadag ni nge yag ngodad. Boor e girdi’ e der ma guy e n’en nib thil u thilin e pi n’en nib t’uf rorad nge pi n’en ni yad baadag ni nge yag ngorad. Ere, mang e ba thil u thilin e gali n’ey? Ra ba “t’uf” ban’en rom ma aram ban’en nthingari yag ngom ya ba ga’ fan ko yafos rom. Ggan, nge mad, nge naun e aram boch ban’en nib t’uf rodad. Ma ban’en ni ga “baadag” ni nge yag ngom e kemus ni ban’en ni kam guy ni ga baadag, machane de t’uf ko par rom.

2. Mang boch ban’en ni baadag e girdi’ ni nge yag ngorad?

² Ba thilthil e pi n’en ni baadag e girdi’ ni bochan e be yan u rogon e gin ni yad be par riy. Bay boch e girdi’ u boch e nam ni kemus ni yad baadag ni nge yag e cell phone ngorad, ara otobay, ara bochi yang e binaw ni ngar pared riy. Ma boch e nam e baadag e girdi’ riy ni nge yag boch e  mad ngorad nib tolang puluwon, ara naun nib ga’, ara boch e karrow nib tolang puluwon. Machane, demtrug e gin ni gad ma par riy ara urngin e salpiy ni bay rodad, ma rayog ni ngad chogownaged e chugum ni boor ni yugu aram rogon nde t’uf rodad ara dabiyog puluwon rorad.

3. Mang chogowen e chugum?

³ Mang chogowen e chugum? Aram reb e lem ni bay rok be’ ni kab ga’ fan e chugum u wan’ ko tha’ u thilrow Got. Pi n’en ni baadag be’, ara pi n’en nib ga’ fan u wan’, ara n’en ni be tiyan’ ngay e rayog ni nge k’aring ni nge chogownag e chugum. Biney e lem e ma k’aring be’ ni nge dabki fel’ u wan’ e pi n’en ni bay rok, me adag ni ngki yoor boch. Mus ngak e piin nde yoor e salpiy rorad ara darur chuw’iyed e chugum nib tolang puluwon ma ku rayog ni ngar chogownaged e chugum. Ma re n’ey e rayog ni nge k’aring be’ ni nge dabki mon’eg e tirok Got ban’en u lan e yafos rok.​—Heb. 13:5.

4. Uw rogon ni ma fanay Satan e “tin nra guy e girdi’ ma yad ba adag ni nge yog ngorad”?

⁴ Satan e ma fanay e pi siyobay ko re fayleng ney ni nge k’aringdad ni ngad lemnaged ni faanra yoor e chugum rodad, ma aram e rayog ni ngad pared ni gad ba felfelan’. Ere, ma fanay e re fayleng ney nge “tin nra guy e girdi’ ma yad ba adag ni nge yog ngorad” ni nge k’aringdad ni ngad adaged ni ngki yoor boch ban’en ni bay rodad. (1 John 2:15-17; Gen. 3:6; Prov. 27:20) Gubin mit e chugum ni ma ognag e re fayleng ney ngodad, ni tabab ko tin th’abi fel’ ban’en nge mada’ ko tin nde fel’, ma bay boch riy ni gad ra guy ma ri gad baadag ni nge yag ngodad. Bay ba ngiyal’ ni kam chuw’iy ban’en nde t’uf rom ni bochan e kam guy yaan u bang, ara kam guy u TV, ara kam rung’ag murung’agen, fa? Faanra bay, ma dabisiy ni yan i boch nga tomuren mag guy nde t’uf fare chugum rom. Faanra ud chuw’iyed e chugum nde t’uf rodad, ma aram e gad be mo’maw’nag rogon e par rodad. Pi n’ey e rayog ni nge magawonnag rogon e pigpig rodad ngak Jehovah, ya rayog ni nge dab kud ted e tayim ni ngad filed e Bible rodad, ara ngad fal’eged rogodad ma gad un ko muulung ara machib. Dab mu pagtalin e n’en ni ke yog apostal John ni gaar: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay.”

5. Mang e rayog ni nge buch rok e piin ni yad ma guy rogon ni nge yoor ban’en rorad?

⁵ Baadag Satan ni ngad manged sib ko Fel’ Rogon ma gathi Jehovah. (Matt. 6:24) Faanra kemus ni gad baadag ni nge yoor ban’en rodad, ma ra yan i aw nib m’ay fan e yafos rodad. Rayog ni nge chalbadad ara da awgad nga tabon e malfith. Ma bin th’abi gel e kireb riy e, rayog ni nge war e michan’ rodad ngak Jehovah nge Gil’ilungun. (1 Tim. 6:9, 10; Rev. 3:17) Ireray e n’en ni weliy Jesus ko fare fanathin rok ni murung’agen facha’ ni ma wereg e awoch. I yog ni ‘urngin mit ban’en ni yima chogownag’ e bod rogon e rachangal nrayog ni nge taleg ba awoch ndab ki tugul nge k’uf.​—Mark 4:14, 18, 19.

6. Mang e rayog ni ngad filed rok Baruk?

⁶ Am lemnag Baruk ni ir e en tayol rok Jeremiah ni profet. Nap’an ni chugur ko ngiyal’ ni ngan gothey yu Jerusalem ni bod rogon ni kan yiiynag, me tabab Baruk ni nge yognag boch “ban’en” ni fan ngak. Ma pi n’em e bogi ban’en ndariy angin ma dabi par nib n’uw nap’an. Machane, pi n’en ni micheg Jehovah ngak Baruk e aram e pi n’en nsusun e nge athapeg ni nge yag ngak. I yog Jehovah ngak ni gaar: “Gur e gu ra ayuwegem ko yam’ u gubin yang ni ga ra yan riy.” (Jer. 45:1-5, BT) Ba mudugil ndabi ayuweg Got e pi n’en nib milfan ko girdi’ u reb e mach ni be yan ni nge gothey. (Jer. 20:5) Ere, chiney ni gad be chugur i yan nga tungun e re m’ag ney e gathi ireray e ngiyal’ ni ngad yoornaged e chugum rodad. Demtrug feni tolang puluwon e chugum ni bay rodad ara feni ga’ fan u wan’dad, ma dab da lemnaged nra magey e pi chugum nem u tomuren fare gafgow nib ga’.​—Prov. 11:4; Matt. 24:21, 22; Luke 12:15.

7. Mang e bin migid ni gad ra weliy, ma mang fan?

 ⁷ I pi’ Jesus e bin th’abi fel’ e fonow u rogon ni ngad yognaged e tin nib t’uf ko par rodad, nge rogon ndab da paged boch ban’en ni nge magawonnag e pigpig ni gad be tay, nge rogon ni ngad siyeged chogowen e chugum, nge pi n’en nra k’aringdad ni nge mun daken e magafan’ rodad. Re fonow nem e bay ko fare Welthin ni Pi’ u Daken e Burey. (Matt. 6:19-21) Ere chiney e ngad beeged ma gad weliy fapi thin ni bay ko Matthew 6:25-34. Re n’ey e ra ayuwegdad ni ngari mich u wan’dad fan nthingar da ‘m’oneged u wun’dad’ e Gagiyeg rok Got, ma gathi chugum.​—Luke 12:31.

8, 9. (a) Mang fan nsusun e dabi pag rogon e magafan’ ni ngad ted ni fan ko pi n’en nib t’uf rodad? (b) Mang e manang Jesus u rarogon e girdi’ nge pi n’en nib t’uf rorad?

⁸ Mu beeg e Matthew 6:25. Nap’an ni yog Jesus ngak e piin ni yad be motoyil ngak ni ‘dabi magafan’rad ko ggan nge garbod ni nge yog ngorad ni fan e ngar pired ni yad ba fos,’ ma aram e be yog ngorad ni “ngar talgad ni dabki magafan’rad.” Piin ni ur motoyilgad ngak Jesus e i magafan’rad nga boch ban’en nsusun e dabi magafan’rad ngay. Ere, bay fan ni yog Jesus ngorad ni ngar talgad ko magafan’. Manang ni faanra i par be’ ma be magafan’ ko pi n’en nib t’uf rok, ma aram e rayog ni nge k’aring ni nge pagtalin e n’en nsusun e nge m’on u lan e yafos rok. Bochan ni i magafan’ ngak pi gachalpen ma aram fan ni aningeg yay ni ginangrad u murung’agen e re n’ey u nap’an fare welthin ni pi’ u daken e burey.​—Matt. 6:27, 28, 31, 34.

⁹ Mang fan ni yog Jesus ndabi magafan’dad ko n’en ni ngad ked, ara n’en ni ngad unumed, ara mad ni nga don’ed? Gathi pi n’ey e bogi ban’en nib ga’ fan ko yafos rodad? Arrogon. Ma riyul’ ni faanra de gaman e salpiy rodad ni ngad chuw’iyed e pi n’ey ngay, ma ra magafan’dad, ma manang Jesus e re n’ey. Manang e pi n’en nib t’uf ko par ko girdi’ u reb e rran ngu reb. Maku manang nra taw ko “tin tomren e rran” ma ra “mo’maw’” rogon e par rok pi gachalpen. (2 Tim. 3:1) Pi n’ey e ba muun ngay e maruwel ni ke mo’maw’ ni ngan pirieg, nge chugum ni be tolang puluwon, nge ggan ni ke lich, ma ke yoor e girdi’ nib gafgow. Yugu aram rogon, ma manang Jesus ni ‘ka ba ga’ fan e pogofan ko ggan, ma ka ba ga’ fan e dowef ko mad ni yibe yin’.’

10. Nap’an ni fil Jesus ngak pi gachalpen rogon ni ngar meybilgad, ma mang e yog nsusun e nge m’on u lan e yafos rorad?

¹⁰ Boch nga tabolngin e welthin rok Jesus me yog ngak e piin ni yad be motoyil ngak ni ngar meybilgad ngak e Chitamangirad ni bay u tharmiy ni nge pi’ e tin nib t’uf rorad. I yog ngorad ni ngar meybilgad ni nge lungurad: “Mpi’ ngomad e daba’ e ggan ni nge yog ngomad.” (Matt. 6:11) Ku immoy ba ngiyal’ ni yog ngorad ni nge lungurad: “Mpi’ ngomad u reb e rran ngu reb e rran e ggan ni nge yog ngomad.” (Luke 11:3) Machane, fonow ni pi’ e der yip’ fan ni kemus ni yigoo tin nib t’uf ko par rodad e aram e n’en ni ngad lemnaged ni nge yag ngodad ni gubin ngiyal’. Ya fil Jesus ngak pi gachalpen u lan fare kenggin e meybil nsom’on e ngar yibilayed Gil’ilungun Got ni nge yib. (Matt. 6:10; Luke 11:2) Bin migid me tamilangnag ngorad rogon ni ma pi’ Jehovah e tin nib t’uf ko pi n’en ni ke sunmiy ya nge yag ni nge ayuwegrad ndab ki magafan’rad.

11, 12. Mang e rayog ni ngad filed u rogon ni ma ayuweg Jehovah e arche’? (Mu guy e sasing ni bay u tabolngin e re article ney.)

¹¹ Mu beeg e Matthew 6:26. Thingar da fal’eged i yaliy e “arche’.” Yugu aram rogon ni arche’ e ba achig, machane yad ma kay boor ban’en ni bod rogon wom’engin e gek’iy, nge awoch, nge chachangeg, nge fakl’ud, nge gal’ol’ay. Bin riyul’ riy e, yira taarebrogonnag urngin e ggan ni ma kay e arche’ ko ggan ni ma kay e girdi’, ma ka boor e tin ni ma kay e arche’. Yugu aram rogon ma der ma yung e arche’ e awoch ni nge pi’ e ggan ngorad ya Jehovah e ir e ma pi’ e tin nib t’uf rorad. (Ps. 147:9) Machane der ma fek Jehovah e ggan nge tay nga  langrad! Ya ba t’uf ni yad e ngar gayed e ggan rorad.

¹² Manang Jesus ni faanra rayog rok e Chitamangin ni nge pi’ e tin nib t’uf ko arche’, me ere ku rayog rok ni nge pi’ e tin nib t’uf ko girdi’. ^[1] (1 Pet. 5:6, 7) Dabi fek Jehovah e ggan nge tay nga langdad, machane ra tow’athnag rogon e athamgil ni gad be tay ni ngad yunged e woldug ni nge yibnag e ggan ni fan ngodad, maku ra tow’athnag rogon ni gad be maruwel ni ngad yognaged e tin nib t’uf rodad u reb e rran ngu reb. Ma ra gad be gafgow u ban’en ma rayog ni nge pow’iy boch e girdi’ ni ngar ayuweged gadad. Yugu aram rogon nde weliy Jesus murung’agen e gin ni ma pi’ Jehovah ni nge par e arche’ riy, machane gad manang ni ke pi’ e llowan’ ngorad, nge salap, nge boch ban’en nrayog ni ngar fanayed ni ngar ngongliyed bang ni ngar pared riy. Ere, ku rayog rok Jehovah ni nge ayuwegdad ni ngad pirieged bang nrayog ni ngad pared chon e tabinaw rodad riy.

13. Mang e be micheg ni kab ga’ fadad ko arche’?

¹³ I fith Jesus ngak e piin ni ur motoyilgad ngak ni gaar: “Gathi ka ba ga’ famed ngak e arche’?” Dabisiy nnap’an ni fith Jesus e re deer ney ma be lemnag e n’en ni bayi buch rok ni aram e nge pi’ e yafos rok ni fan ko girdi’. (Mu taarebrogonnag ko Luke 12:6, 7.) Fare biyul ni pi’ Kristus e gathi fan ko arche’ nge yugu boch e gamanman, ya ke pi’ ni fan e nge yag e yafos ndariy n’umngin nap’an ngodad.​—Matt. 20:28.

14. Mang reb e ban’en ndabiyog ni nge rin’ be’ ni faanra i par ni be magafan’?

¹⁴ Mu beeg e Matthew 6:27. Mang fan fare thin ni yog Jesus ni faanra i magafan’dad ma dabiyog ni nge mun in e rran ko yafos rodad? Fan e re thin ney e faanra i magafan’dad nib gel ma dabiyog ni ngad pared nib n’uw nap’an. Bin riyul’ riy e, faanra nga i magafan’dad nib pag rogon ma ra ngochnag e yafos rodad.

15, 16. (a) Mang e gad be fil u rogon ni ma ayuweg Jehovah e pi floras u fithik’ e pan? (Mu guy e sasing ni bay u tabolngin e re article ney.) (b) Mang deer e ngad fithed gadad riy, ma mang fan?

 ¹⁵ Mu beeg e Matthew 6:28-30. Gad ba felfelan’ ni ngad chuwgad ko mad nib fel’ u nap’an ni nga darod ko machib ara ngad uned ko muulung nge pi assembly. Machane gur, ba t’uf ni nge ‘magafan’dad ko mad ni nga don’ed’? I puguran Jesus ngak pi gachalpen rogon ni ma ayuweg Jehovah e pi n’en ni ke sunumiy. I weliy murung’agen “e floras u fithik’ e pan.” I yog ni pi floras nem e darur ngongliyed e mad ni fan ngorad, machane ra puf ma rib fel’ yaan ni ngan guy. Bin riyul’ riy e, “mus ngak Solomon, ni aram feni yoor ban’en rok, ma da immoy e mad rok ni bod feni fel’ yaan reb e pi floras nem”!

¹⁶ I tamilangnag Jesus fan e n’en ni yog ni gaar: “I Got e ir e be pi’ e mad ko pan . . . . Ere gathi mmudugil nra pi’ Got e mad ngomed? Rib achig e pagan’ romed ngak Got!” Riyul’ nib war e michan’ rok pi gachalpen Jesus. (Matt. 8:26; 14:31; 16:8; 17:20) Ere, ba t’uf ni nge gel e michan’ nge pagan’ rorad ngak Jehovah. Ma uw rogodad? Ba mich u wan’dad nra pi’ Jehovah e tin nib t’uf rodad, fa?

17. Mang e rayog ni nge kirebnag e tha’ u thildad Jehovah?

¹⁷ Mu beeg e Matthew 6:31, 32. Yooren e piin ndar nanged Jehovah e ba ga’ ni yad ma guy rogon ni nge yoor e salpiy nge chugum rorad. Ere faan gad ra guy rogon ni nge yag ngodad e pi n’en ni “be nameg e piin ni yugu boch e kan e yad be meybil ngorad,” ma rayog ni nge kirebnag e tha’ u thildad Jehovah. Ma gad manang ni Jehovah e ir e Chitamangidad ni gad ba t’uf rok. Mab pagan’dad ni faan gad ra rin’ e tin ni ke yog ma gad tay Gil’ilungun nib m’on u lan e yafos rodad, ma aram e ra pi’ e tin nib t’uf rodad. Maku gad manang ni tha’ nib fel’ ni bay u thildad Jehovah e ir e ra  yibnag e bin riyul’ e felfelan’ ngodad, ma re n’ey e ra ayuwegdad ni nge fel’ u wan’dad e tin ni bay rodad ni bod rogon e ‘ggan nge mad’ ya kemus e n’en nib t’uf rodad.​—1 Tim. 6:6-8.

18. Mang e manang Jehovah u murung’agdad, ma mang e ra rin’ ni fan ngodad?

¹⁸ Mu beeg e Matthew 6:33. Pi gachalpen Kristus e gubin ngiyal’ nthingar ra ted Gil’ilungun Got ni ir e ba m’on u lan e yafos rorad. I yog Jesus ni faan gad ra rin’ e re n’ey, ma aram e ra pi’ Got “urngin” e pi n’ey ngodad. Mang fan nrayog ni nge yog e re n’em? I tamilangnag ko tin ni ke yan e verse ni gaar: “Chitamangimed ni bay u tharmiy e manang ni pi n’ey ni urngin e dabi siy ni nge yog ngomed,” ni aram e be yip’ fan e pi n’en nib t’uf ko par rodad. Ra dawori nang be’ e n’en nib t’uf rok ma manang Jehovah, ni bod rogon e ggan, nge mad, nge naun. (Fil. 4:19) Manang ko ken ngan e mad rodad e be yan ni nge kireb. Ku manang e re miti ggan nib t’uf ni ngad ked, nge ga’ngin e naun nib t’uf ni nge par chon e tabinaw rodad riy. Dariy e maruwar riy nra pi’ Jehovah e tin nib t’uf rodad.

19. Mang fan ndabi magafan’dad ko pi n’en nrayog ni nge buch boch nga m’on?

¹⁹ Mu beeg e Matthew 6:34. Ki yog Jesus bayay ni gaar: “Dabi magafan’med.” Dabun Jesus ni nge magafan’dad ko tin nra buch nga m’on. Ya nge pagan’dad ngak Jehovah nra ayuwegdad. Faanra i par be’ ma be magafan’ ko pi n’en nrayog ni nge buch boch nga m’on, ma aram e rayog ni nge tabab ni nga i taga’ ngak ma dabki taga’ ngak Jehovah, ma re n’ey e rayog ni nge magawonnag e tha’ u thilrow.​—Prov. 3:5, 6; Fil. 4:6, 7.

20. (a) Mang e rayog ni ngam nameg ni fan ko pigpig rom ngak Jehovah? (b) Mang e rayog nim rin’ ya nge yag ni mom rogon e par rom?

²⁰ Faanra dab da fanayed gelngidad ni ngad pigpiggad ngak Jehovah ni bochan e gad be gay rogon ni nge yoor e chugum rodad ma ra yan i aw nib m’ay fan. Ya susun e ngad nameged boch ban’en ni fan ko tirok Got ban’en. Bod ni, ga be lemnag ma rayog ni ngam man mu pi’ e ayuw nga reb e ulung nib t’uf boch e tamachib riy, fa? Rayog ni ngam mang reb e pioneer, fa? Ma faanra ga be pioneer, ma kam lemnag ni ngam fal’eg e babyor rom ni ngam un ko fare skul ni yima yog e School for Kingdom Evangelizers ngay, fa? Rayog ni ngam tay in e rran u lan reb e wik ni ngam pi’ e ayuw u Bethel ara gin ni yima pilyeg e babyor riy, fa? Rayog ni ngam mang bang ko fare ulung ni ka nog e Local Design/Construction ngay mag fanay bang ko tayim rom ni ngam pi’ e ayuw ko dimow Kingdom Hall ni yima tay, fa? Ere, mu lemnag rogon ni ngam lichnag pa’ nga puluwom ya nge yag nim un i pi’ e ayuw nga boch e maruwel ni yima rin’ ni bay rogon ko pigpig ni gad ma tay. Mmeybil mag fal’eg i lemnag e thin ni bay ko fare kahol ni kenggin e “ Rogon Nrayog ni Ngam Momnag e Par Rom,” mag thilyeg boch ban’en u rarogon e par rom ya nge yag nim rin’ e n’en ni ga be nameg.

21. Mang e ra ayuwegem ni ngam chugur ngak Jehovah?

²¹ I fil Jesus ngodad ni ngad m’oneged e Gagiyeg rok Got u wan’dad, ma gathi chugum. Faanra ngad rin’ed e re n’ey, ma de t’uf ni nga i magafan’dad ko pi n’en nib t’uf rodad. Gad ra chugur ngak Jehovah ni faanra pagan’dad ngak ma dab da guyed rogon ni nge yoor ban’en rodad ara ngad chuw’iyed gubin ban’en ni be ognag e re fayleng ney ngodad, ni yugu aram rogon nrayog puluwon rodad. Faan gad ra momnag e par rodad e chiney ma rayog ni nge ayuwegdad ni nge ‘yog ngodad e yafos ni ir e bin riyul’ e yafos’ ni bay fini yib boch nga m’on.​—1 Tim. 6:19.