Dab Mu Pag e Oloboch rok Boch e Girdi’ ni Nge Magawonnagem
“Um n’iged fan u wun’med e n’en ni manga ke kirebnag bigimed u laniyan’ bigimed.”—KOL. 3:13.
TANG: 53, 28
1, 2. Uw rogon ni yiiynag e Bible murung’agen rogon nra yoor e girdi’ rok Jehovah?
PI TAPIGPIG rok Jehovah ni yad ba yul’yul’ ara Pi Mich rok e yad reb e ulung u roy u fayleng nrib manigil. Riyul’ ndawori flont e girdi’ ko re ulung ney ma ka yad ma oloboch. Machane, bochan e ayuw ni be pi’ gelngin Got nib thothup ngorad ma aram fan ni be yag ni nge ga’ e ulung rorad u ga’ngin yang e fayleng maku be mon’og i yan. Baaray boch ban’en nrib manigil ni be rin’ Jehovah ni fan ko pi girdi’ rok ney ndawor ra flontgad.
2 Nap’an ni tabab e tin tomuren e rran ko re m’ag ney u nap’an e duw ni 1914, ma de yoor e pi tapigpig rok Got u fayleng. Machane, ke tow’athnag Jehovah fare maruwel ni machib. Ya nap’an e pi duw nga tomuren e re ngiyal’ i n’em, ma bokum milyon e girdi’ nra tababgad i fil e tin riyul’ u Bible mar manged boch e Pi Mich Rok Jehovah. Bin riyul’ riy e, ireray e n’en ni yog Jehovah nra buch. I gaar: “Mus ko re tabinaw nib th’abi lich e girdi’ riy ma ba sobut’ ni bay ra pired ni bod ba nam ni ba ga’ ma ba gel. Bayi taw nga nap’an mu gu gagiyegnag ni nge doro’ nib gur. Yi gag e Somol!” (Isa. 60:22) Ngiyal’ ney ko tin tomuren e rran e riyul’ ni ke lebug e re thin ko profet ney. Ya chiney e ke yoor e Pi Mich Rok Jehovah nga urngin e girdi’ ni ma par u boor e nam u roy u fayleng.
3. Uw rogon ni ke dag e pi tapigpig rok Got e t’ufeg?
3 Ngiyal’ ney e be ayuweg Jehovah e girdi’ rok ni nge m’ug u dakenrad e bin th’abi lingagil i fel’ngin ni aram e t’ufeg. (1 John 4:8) Jesus ni ir e en ni i m’ug e t’ufeg rok Got ko ngongol rok e yog ngak pi gachalpen ni gaar: “Nggu pi’ reb e motochiyel nib beech ngomed, nge bigimed me t’uf bigimed rok . . . Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) Fapi duw ni ke yan ma i dag e pi tapigpig rok Got e re fel’ngin ney u nap’an ni be mahl e pi nam u fayleng i yan. Bod nnap’an e Bin L’agruw e Mahl ko Fayleng, ma sogonap’an 55 e milyon e girdi’ nra m’ad. Machane, de un e Pi Mich Rok Jehovah ko re mahl nem. (Mu beeg e Mikah 4:1, 3.) Ere, yam’ ni tay e girdi’ u nap’an e re mahl nem e ‘dariy rogon ngorad’ ara de kireb e rorad riy.—Acts 20:26.
4. Mang fan ni yira ngat nga rogon ni be yoor e girdi’ rok Jehovah?
4 Yugu aram rogon ni be par e girdi’ rok Got u lan ba fayleng ni be gagiyegnag Satan ni ir “fare kan nib kireb nu roy u fayleng,” machane ka yad be yoor i yan. (2 Kor. 4:4) Satan e ir e be gagiyegnag e pi ulung ko am u roy u fayleng nge news, ma ma fanay e pi n’ey ni nge guy rogon ni nge taleg fare maruwel ni machib. Machane, dabiyog ni nge taleg e re maruwel ney. Yugu aram rogon, ma manang ndaki n’uw nap’an ni nge par. Ere, aram fan ni be guy rogon ni nge chefeg e girdi’ nga orel ko bin riyul’ e liyor, ma boor e kanawo’ ni ma rin’ e re n’ey riy.—Rev. 12:12.
RA SKENGNAG ROGON E YUL’YUL’ ROM NGAK GOT
5. Mang fan ni bay yu ngiyal’ nrayog ni nge yog ara rin’ be’ ban’en ni dubdad? (Mu guy e sasing ni bay u tabolngin e re article ney.)
5 Yima tamilangnag u lan e ulung ni Kristiano feni ga’ fan ni ngan t’ufeg Got nge girdi’. Ireray e n’en ni yog Jesus. Nap’an ni fith be’ ngak ko bin ngan e motochiyel e ir e th’abi ga’ u fithik’ e pi motochiyel, me fulweg ni gaar: “‘Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.’ Ereray e bin th’abi ga’ nge bin th’abi ga’ fan e motochiyel. Ma bin migid ngay e motochiyel ni ku ba ga’ fan e bod e biney ni gaar, ‘Gin’en ni ga ba’ riy e thingari t’uf rom e en ni ir e mmigid ngom ni gowe gur.’” (Matt. 22:35-39) Machane, be tamilangnag e Bible ni bochan ni ke af e denen rok Adam ngodad ma aram fan ndad flontgad. (Mu beeg e Roma 5:12, 19.) Ere, bay yu ngiyal’ nrayog ni nge yog ara rin’ boch e walag ban’en ngodad ni dubdad. Ma re n’ey e rayog ni nge magawonnag rogon ni gad ma t’ufeg Jehovah nge girdi’ rok. Ere, mang e gad ra rin’ u nap’an nra buch boch ban’en ni aray rogon? Mus ko pi tapigpig rok Got kakrom ni yad ba yul’yul’ ma u rogned ara ur rin’ed boch ban’en ni dabun boch e girdi’. Ere, bay ban’en nrayog ni ngad filed ko pi girdi’ ney.
Faan gomanga um moy u Israel u nap’an Eli nge fa gal pumoon ni fak, ma mang e ga ra rin’? (Mu guy e paragraph 6)
6. Uw rogon nde yag rok Eli ni nge yal’uweg fa gal pumoon ni fak?
6 Bod ni, immoy l’agruw i pumoon ni fak Eli ni ir e Th’abi Tolang ko Prist u Israel kakrom nda ur folgow ko motochiyel rok Jehovah. Be gaar e Bible: “Fa gal pumoon ni fak Eli e ri yow ba kireb; ya dariy fan Somol u wun’row.” (1 Sam. 2:12) Yugu aram rogon ni i un Eli ko bin riyul’ e liyor, machane rib gel e ubchiya’ ko denen ni i rin’ e gal pumoon ni fak nem. Manang Eli e pi n’em ni i buch, machane dariy ban’en ni rin’ ngay. Ere, wenegan ni yib riy e gechignag Got e tabinaw rok Eli. (1 Sam. 3:10-14) Ma boch nga tomuren ma aram e da kun pag e piin owchen ni ngar pigpiggad ni yad e prist nth’abi tolang. Ere, faan gomanga um moy u nap’an Eli ni ga be guy ni be pag e gal pumoon ni fak nem ni ngaur rin’ew e pi kireb nem, ma gur, ga ra pag e re n’em ni nge magawonnagem? Ma gur, ga ra pag e re n’em ni nge k’aringem ni ngam tal ko pigpig ni ga be tay ngak Got, fa?
7. Uw rogon ni rin’ David reb e denen nrib ubchiya’, ma mang e rin’ Got ngay?
7 David e ir be’ nib t’uf rok Jehovah, ma ir e cha’ ni “ba adag.” (1 Sam. 13:13, 14; Acts 13:22) Machane, boch nga tomuren ma aram me rin’ David reb e denen nrib ubchiya’, ya ra parew Bath-sheba ni gathi ppin rok me diyen. I buch e re n’ey u nap’an ni bay Uriah ni pumoon rok Bath-sheba ko mahl. Ere, nap’an ni sul Uriah ko mahl me guy David rogon ni nge n’igin ni ngar parew Bath-sheba ya ngan lemnag ni Uriah e ir e fak e bitir. Machane, de rin’ Uriah e n’en ni yog David, ma aram me yan u thaan ni ngan li’ nge yim’ u nap’an e mahl. Bochan nrib ubchiya’ e denen ni rin’ David, ma aram fan nrib kireb wenegan ni yib ngorad chon e tabinaw rok. (2 Sam. 12:9-12) Yugu aram rogon, me runguy Got David, ya manang ni ir be’ “ni i par nib yul’yul’.” (1 Ki. 9:4) Ere, faan gomanga um moy u fithik’ e girdi’ rok Got e ngiyal’ nem, ma mang e ga ra rin’? Ga ra pag e kireb rok David ni nge magawonnagem, fa?
8. (a) Uw rogon nde yag rok apostal Peter ni nge tay u gil’ e n’en ni yog? (b) Mang fan ni ulul Jehovah ni nge fanay Peter ni nge rin’ boch e maruwel u tomuren ni ke oloboch?
8 Kum lemnag e n’en ni buch rok apostal Peter. I mel’eg Jesus Peter ni nge mang reb e apostal rok; machane, boor yay ni i yog ara i rin’ Peter boch ban’en ni kalngan’ riy ko tomur. Bod nnap’an nni kol Jesus ma gubin e pi apostal rok nra milgad ngar paged. Machane, u m’on riy me yog Peter ni mus ni faanra pag e tin baaram e apostal Jesus, ma ir e dabi pag. (Mark 14:27-31, 50) Machane, faan nib ni kol Jesus ma gubin e pi apostal rok nra milgad ngar paged nib muun Peter ngay. Ma in yay ni sul Peter u daken nga i yog nde nang Jesus. (Mark 14:53, 54, 66-72) Machane, tomuren e re n’ey mi ri kireban’ Peter ko n’en ni rin’. Yugu aram rogon me n’ag Jehovah fan miki ulul ni nge fanay Peter ni nge rin’ boch e maruwel. Ere, faan gomanga um moy e ngiyal’ nem ni gur reb i gachalpen Jesus, ma ga ra pag e n’en ni rin’ Peter ni nge magawonnag e yul’yul’ rom ngak Jehovah, fa?
9. Mang fan ni ga manang ni gubin ban’en ni ma rin’ Got mab mat’aw?
9 Fapi girdi’ ni kad weliyed murung’agen e ireray boch e girdi’ ni ur rin’ed boch ban’en ni kirebnag laniyan’ yugu boch e girdi’. Machane, ka bay yugu boch e tapigpig rok Jehovah kakrom nge ngiyal’ ney ni kar rin’ed boch ban’en nib kireb ma kar kirebnaged laniyan’ yugu boch e girdi’. Machane n’en nib ga’ fan ni ngam lemnag e, mang e ga ra rin’? Gur, ga ra pag e oloboch rok be’ ni nge magawonnagem me k’aringem ni ngam tal ndab kum pigpig ngak Jehovah mag palog rok nge ulung rok? Fa ga ra lemnag nra pi’ Jehovah e tayim ngak facha’ ni nge kalngan’ ko kireb rok, maku ra yal’uweg e tin nib kireb ni ke buch? Maku reb e, bay yu ngiyal’ ndabi kal facha’ ngan’. Ere faanra buch ni aram rogon, mab pagan’um nra taw nga nap’an ni ke dugliy Jehovah ma ra yal’uweg fare kireb ni bod ni ngan chuweg facha’ ko ulung, fa?
MU PAR NI GAB YUL’YUL’
10. Mang e manang Jesus u murung’agen e oloboch ni tay Judas Iskariot nge Peter?
10 Be weliy e Bible murung’agen boch e tapigpig rok Jehovah nra pared ni yad ba yul’yul’ ngak maku yad ba yul’yul’ ko girdi’ rok ni yugu aram rogon ni i oloboch e girdi’ u toobrad. Bod nu tomuren ni par Jesus nib polo’ reb e nep’ ni be meybil ngak e Chitamangin, ma aram me mel’eg fa 12 i apostal rok. Judas Iskariot e ir bagayad e pi girdi’ nem ni mel’egrad Jesus. Machane, nap’an ni yognag Judas Jesus nga tomuren, ma de pag Jesus e re n’em ni nge magawonnag rogon e tha’ u thilrow Jehovah ni Chitamangin; maku de pag e n’en ni yog Peter ni nge magawonnag. (Luke 6:12-16; 22:2-6, 31, 32) Manang Jesus ni pi n’em ni ke buch e gathi kireb rok Jehovah ara kireb ko girdi’ u tooben. I ulul ni nga i rin’ e maruwel rok ni yugu aram rogon ni i oloboch pi gachalpen. Bochan e re n’ey ma aram me tow’athnag Jehovah ni aram e faseg ko yam’, me pi’ mat’awun ni nge mang Pilung u Gil’ilungun u tharmiy.—Matt. 28:7, 18-20.
11. Mang e ke yiiynag e Bible u murung’agen e pi tapigpig rok Jehovah e ngiyal’ ney?
11 Ba puluw fan ni i pagan’ Jesus ngak Jehovah nge girdi’ rok. Faan gad ra lemnag e pi n’en ni be rin’ Jehovah u daken e pi tapigpig rok e ngiyal’ ney ko tin tomuren e rran, ma rriyul’ ni gad ra ngat ngay. Dakuriy ba ulung e girdi’ nga bang ni yad be machibnag e tin riyul’ u ga’ngin yang e fayleng ni bod rogon e ulung rok Jehovah e ngiyal’ ney ni bochan e kemus ni yigoo yad e be pow’iyrad Jehovah. Be weliy e Isaiah 65:14 (BT) murung’agen e girdi’ rok Got nge rarogorad ko tirok ban’en ni gaar: “Bay ur tangniged e felfelan’.”
12. Susun ni nge uw rogon u wan’dad e oloboch rok yugu boch e girdi’?
12 Ma felfelan’ e pi tapigpig rok Jehovah ko pi n’en nib fel’ ni yad ma rin’ ni bochan e be pow’iyrad Jehovah. Machane, re fayleng ney ni Satan e ir e be gagiyegnag e be gel e kireb riy i yan. Ere, de puluw ni nge oloboch reb e tapigpig rok Got ma gad yon’ e kireb riy nga daken Jehovah nge ulung rok. Ya ba t’uf ni ngad pared ni gad ba yul’yul’ ngak Jehovah ma gad fol ko pi yaram rok, ma gad guy rogon ni ngad nanged e bin nib puluw e kanawo’ ni ngad lemnaged e oloboch rok yugu boch e girdi’ riy.
N’EN NI NGAM RIN’ U NAP’AN NI KE OLOBOCH BE’
13, 14. (a) Mang fan ni susun e nge bagadad mi i gum’an’ u puluwon bagadad? (b) Mang reb e ban’en ni kan micheg ni dubdad ni ngad paged talin?
13 Ere, mang e ngad rin’ed u nap’an ni ke yog ara ke rin’ reb e tapigpig rok Got ban’en ni ke kirebnag lanin’dad? Baaray reb i kenggin e motochiyel u Bible nib manigil ni be gaar: “Faan ga ra par ni gab filmunguyan’, ma gab gonop, machane faanra ba papey e damumuw ngom, ma kemus ni ga be dag fanam manan’.” (Prov. 14:29, BT) Thingar dab da paged talin ni ka nap’an e togopuluw nni tay u Eden ma ke gaman sogonap’an 6,000 e duw ni ke par e girdi’ u tan gelngin e denen. Ere, bochan ndawori flont e girdi’ maku ra ur olobochgad. Ere, de fel’ ni ngaud lemnaged ni gubin ngiyal’ nthingari rin’ pi walagdad gubin ban’en nib fel’ rogon, ya faan gad ra rin’ ni aray rogon ma aram e dabkiyog ni ngad pirieged e felfelan’ ni bay u thilin e girdi’ rok Got e ngiyal’ ney ko tin tomuren e rran. Maku reb e, rib gel e kireb riy ni faan gad ra pag e kireb rok boch e girdi’ ni nge magawonnagdad me k’aringdad ni ngad chuwgad ko ulung rok Jehovah. Faan gad ra rin’ ni aray rogon ma aram e dabkiyog ni ngad uned i rin’ e n’en nib m’agan’ Got ngay miki mul u pa’dad fare athap ko yafos ni manemus u lan e bin nib beech e fayleng rok Got.
14 Ra ngad pared ni gad ba felfelan’ ma be l’agan’dad ko pi n’en ni ka bay nga m’on, ma thingar dab da paged talin fapi thin ni ke micheg Jehovah ni be gaar: “Bay gu sunumiy reb e fayleng nib beech nge reb e lan e lang nib beech. Ma tin kakrom e ri bay ni pag talin.” (Isa. 65:17; 2 Pet. 3:13) Ere, dab mu pag e kireb rok boch e girdi’ ni nge talegem ndabi yag e pi tow’ath ney ngom.
15. Mang e yog Jesus nsusun e ngad rin’ed u nap’an ni ke oloboch yugu boch e girdi’?
15 Machane, bochan ndawor darod nga lan e bin nib beech e fayleng, ma susun e ngaud lemnaged e n’en ni baadag Got ni ngad rin’ed u nap’an ni ke yog ara ke rin’ be’ ban’en ni ke kirebnag lanin’dad. Ba fel’ ndab da paged talin fare kenggin e motochiyel ni yog Jesus ni faan be gaar: “Faanra mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy nra n’ag fan u wan’ e kireb ni kam rin’ed. Machane faanra dab mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.” Ku dab mu pagtalin nnap’an ni fith Peter ko susun ni nge n’ag fan e kireb rok walagen ni “medlip yay,” me fulweg Jesus ngak ni gaar: “Danga’, gathi medlip yay, ya medlip yay e medlip i ragag.” Ere, n’en ni yog Jesus e be yip’ fan ni gubin ngiyal’ nsusun e nga i m’agan’dad ngay ni ngaud n’aged fan u wan’dad e kireb rok yugu boch e girdi’.—Matt. 6:14, 15; 18:21, 22.
16. Mang e n’en ni rin’ Josef nib fel’ ni ngad folwokgad riy?
16 N’en ni rin’ Josef ni ir e en nib ilal ko fa gal pagel ni fak Rachel e rayog ni nge ayuwegdad ni ngad nanged e n’en ni ngad rin’ed u nap’an ni ke rin’ be’ ban’en ni ke kirebnag lanin’dad. I awan’ fa ragag i pagel ni walagen ngak ni bochan e ir e en nrib t’uf ko chitamangirad. Ma aram mar pied Josef nni chuway’ nga Egypt ni nge mang sib. Boor e duw nga tomuren ma aram me yan i par Josef ni ir e en ni migid ko cha’ nth’abi ga’ lungun u Egypt ni bochan e rib fel’ rogon e maruwel ni i rin’ u rom. Ere, nap’an ni yib e uyungol, ma aram me yan pi walagen Josef nga Egypt ni ngar chuw’iyed boch e ggan. Machane, nap’an nra mada’gad Josef ma dakur poyed. Ere, bochan ni ke par Josef ni ir be’ nib ga’ lungun u Egypt, ma rayog ni nge fulweg taban e kireb ni rin’ pi walagen ngak. Machane, n’en ni rin’ e skengnag fapi pagel ni walagen ya nge guy ko kar thilgad fa dawor. Ma nap’an ni guy ni ke thil fapi pagel ni walagen, ma aram me yog ngorad ko ir mini’. Boch nga tomuren me gaar ngorad: “Dab kum rusgad. Ya bay gu ayuwegmed nge pi fakmed.” Ku be gaar e Bible: “Ara’ rogon ni micheg ngorad u fithik’ e thin nib munguy ni kun ngorad.”—Gen. 50:21.
17. Mang e ga baadag ni ngam rin’ u nap’an ni ke oloboch yugu boch e girdi’?
17 Kub fel’ ndab da paged talin ni gad gubin ni gad ma oloboch, ere dabisiy ni bay ba ngiyal’ ni kad rin’ed ban’en ngak be’ ni ke kirebnag laniyan’. Ere, faanra kad nanged ni kad rin’ed ban’en ni ke kirebnag laniyan’ be’, ma be yog e Bible ni nga darod da guyed facha’ ngad awnaged e gapas u thildad. (Mu beeg e Matthew 5:23, 24.) Gad ma felfelan’ u nap’an nra n’ag be’ fan e kireb rodad, ere ku aram rogon nsusun e ngad rin’ed ngak boch e girdi’. Be gaar e Kolose 3:13: “Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.” Piin Kristiano e ‘der ma aw nga lanin’rad e n’en nib kireb ni ke rin’ be’ ngorad’ ni bochan e bay e t’ufeg u thilrad nrogon ni be yog e 1 Korinth 13:5. Faanra ud n’aged fan u wan’dad e kireb rok boch e girdi’, maku ra n’ag Jehovah fan e kireb rodad. Ere, nap’an nra rin’ be’ ban’en ni ke kirebnag lanin’dad, ma ngad folwokgad rok Jehovah ni Chitamangidad ni ir reb e Got ni ma runguyey.—Mu beeg e Psalm 103:12-14.